જીવલેણ હુમલો:તલોદના તાજપુરની સીમમાં એસટીના મિકેનિકલ હેલ્પર પર જીવલેણ હુમલો

તલોદના તાજપુરની સીમમાં જૂની અદાવતને લીધે નોકરી પરથી પરત ફરી રહેલા એસટીના મિકેનિકલ હેલ્પર પર બે શખ્સોએ લોખંડના કડા વડે હુમલો કરી માથાના ભાગે ગંભીર ઈજાઓ પહોંચાડી હતી. તેને માથામાં ત્રણ ટાંકા આવ્યા હતા. તલોદના આંત્રોલી દોલજી વાસમાં રહેતા 21 વર્ષીય યુવરાજસિંહ રાજેન્દ્રસિંહ ઝાલા તલોદ એસટી વર્કશોપમાં મિકેનિકલ હેલ્પર તરીકે ફરજ બજાવે છે. ગત 21 એપ્રિલના રોજ મોડી રાત્રે દોઢ વાગ્યાના સુમારે સાથી કર્મચારી પવન સોલંકી સાથે બાઇક પર ઘરે પરત ફરી રહ્યા હતા. આ દરમિયાન તાજપુર ગામની સીમમાં જીઓ પેટ્રોલપંપ સામે આવેલી એક ચાની હોટલ પર રોકાયા હતા. યુવરાજસિંહ ચા પીવા ઉભા હતા ત્યારે પાછળથી આંત્રોલી પુંજાજી વાસનો શૈલેષસિંહ બાપુસિંહ પરમાર અને તલોદનો જયેશ ઝાલા ત્યાં ધસી આવ્યા હતા. અગાઉ થયેલા મનદુઃખની વેરભાવના રાખીને આ બંને શખ્સોએ યુવરાજસિંહ પર હુમલો કર્યો હતો. શૈલેષસિંહ પરમારે પોતાના હાથમાં પહેરેલા લોખંડના કડા વડે યુવરાજસિંહના માથાના પાછળના ભાગે, કપાળ પર અને જમણા હાથની આંગળી પર ફટકા માર્યા હતા. હુમલાને કારણે યુવરાજસિંહ લોહીલુહાણ થઈ ગયા હતા. ઝપાઝપી દરમિયાન યુવકની સોનાની ચેઈન અને રોકડ ભરેલું પાકીટ પણ સ્થળ પર પડી ગયું હતું. હુમલો કર્યા બાદ આરોપીઓ જાનથી મારી નાખવાની ધમકી આપી હતી.

સાબરકાંઠા તા.પં. ચૂંટણી:વડાલીના બડોલમાં સૌથી ઓછા મતદારો, ઝહીરાબાદમાં સૌથી વધુ

સાબરકાંઠા જિલ્લાની 8 તાલુકા પંચાયતોની ચૂંટણીના જંગમાં સ્ત્રી મતદારો નિર્ણાયક ભૂમિકા ભજવવા જઈ રહી છે. જિલ્લાના કુલ 170 વોર્ડમાં 444826 મહિલા મતદારો નોંધાયા છે. વડાલીના બડોલમાં સૌથી ઓછી મહિલા મતદારો નોંધાઈ છે. હિંમતનગર તાલુકાની 28-ઝહીરાબાદ બેઠક સમગ્ર જિલ્લામાં સૌથી મોટી બેઠક છે. અહીં કુલ 10184 મતદારો છે. આ એકમાત્ર એવી બેઠક છે જ્યાં મતદારોનો આંકડો 10 હજારને પાર કરી ગયો છે. તો વડાલી તાલુકાની 2-બડોલ બેઠક સમગ્ર જિલ્લામાં સૌથી નાની બેઠક છે. અહીં કુલ માત્ર 2772 મતદારો છે. એટલે કે, ઝહીરાબાદ અને બડોલ વચ્ચે આશરે 7400 મતદારોનો તફાવત છે. ઝહીરાબાદ બેઠકમાં સૌથી વધુ 5036 મહિલા મતદારો છે. ત્યારબાદ ઈડરના ગોરલમાં 3660 અને હિંમતનગરના બેરણામાં 3638 બેઠક આવે છે. વડાલીની બડોલ બેઠક પર જિલ્લામાં સૌથી ઓછી 1344 મહિલા મતદારો છે. આ ઉપરાંત પોશીના તાલુકાની દેમતી-1 બેઠકમાં માત્ર 1350 મહિલા મતદારો નોંધાવા પામ્યા હતા. તાલુકા વાઇઝ બેઠકોની વિગત હિંમતનગર (28 બેઠક) ઇડર (28 બેઠક) ખેડબ્રહ્મા (20 બેઠક) પોશીના (20 બેઠક) પ્રાંતિજ (20 બેઠક) તલોદ (20 બેઠક) વિજયનગર (18 બેઠક) વડાલી (16 બેઠક)

LCBની કાર્યવાહી:મકાઈના વેપારી સાથે 10 લાખની ઠગાઈ‎કરનારા ચાર શખ્સ પાલનપુરથી ઝડપાયા‎

પાલનપુર-ડીસા હાઈવે પરથી એલસીબીએ મધ્યપ્રદેશના વેપારી સાથે છેતરપિંડી કરનારા ચાર શખ્સોને ઝડપી પાડ્યા છે. આરોપીઓ પહેલા વેપારીઓનો ગુજરાત સહિત અન્ય રાજ્યોમાં પહેલા વેપારીને વિશ્વાસ જીતવા સમયસર નાણાં ચૂકવતા અને બાદમાં મોટા જથ્થામાં અનાજ-ચોખાની ખરીદી કરી રૂપિયા ચૂકવ્યા વગર ફરાર થઈ જતા હતા. બનાસકાંઠા એલસીબીના પીઆઈ ડી.એમ.રાઠોડના માર્ગદર્શન હેઠળ ટીમે બાતમીના આધારે પાલનપુર-ડીસા હાઈવે પર આવેલ હોટલ પ્રાઈમ નજીક વોચ ગોઠવી મધ્યપ્રદેશના ગુનામાં સંડોવાયેલા ચાર આરોપીઓને ઝડપી પાડ્યા હતા. મધ્યપ્રદેશના કુરાવર (કોટરા)ના વેપારી રાધેશ્યામ અગ્રવાલ પાસેથી લિમરા ઇન્ટરપ્રાઇઝ ફર્મના સંચાલકોએ વિશ્વાસ કેળવી 56.24 લાખ રૂપિયાની મકાઈ ખરીદી હતી. જેની સામે માત્ર 45 લાખ રૂપિયા ચૂકવ્યા હતા. બાકીના 10 લાખથી વધુની રકમ ન ચૂકવી છેતરપિંડી આચરાઈ હતી. આ મામલે ગુનો નોંધાયો હતો. ઝડપાયેલા આરોપીઓ1.ફૈઝાન અબ્દુલહક અબ્દુલ્લા મુખી (રહે.,ભાગળ-જ, તા. પાલનપુર) 2.શાહબુદ્દીન કિફાયતુલ્લા શરીફભાઈ દુક્કા (રહે.સઈદપુરા, કાલેડા,વડગામ) 3.અહેમદખાન ખિતાબુલ્લા ભુલઈ ચૌધરી(હાલ રહે.વસઈ રોડ, મુંબઈ) 4.જમાલ ઉર્ફે દાનિશ મુકીન અંસારી(હાલ રહે.મુંબઈ, મૂળ રહે.ઉત્તરપ્રદેશ)

ભાસ્કર એનાલિસિસ:ઉનાળાની જરૂરિયાતને ધ્યાને રાખી ઉ.ગુ.ના 11 ડેમમાંથી અપાતું ખેતીનું પાણી બંધ કરાયું

ઉત્તર ગુજરાતના 15 ડેમમાં ચોમાસું પૂરું થયું ત્યારે 91.83% પાણીનો જથ્થો સંગ્રહિત થયો હતો. તેની સામે 91.19% પાણીનો જથ્થો વપરાશ લાયક રહ્યો હતો. નવેમ્બર-2025 થી અત્યાર સુધીમાં 40.46 ટકા પાણીનો જથ્થો વપરાશમાં લેવાઇ ચૂક્યો છે. ઉત્તર ગુજરાતના 15 ડેમમાં હાલ 51.37% પાણીનો જથ્થો સંગ્રહિત છે, જે પૈકી 47.68% પાણીનો જથ્થો હજુ વપરાશમાં લઇ શકાય તેમ હોઇ ઉનાળો આરામથી નીકળી જશે. છેલ્લા 7 વર્ષમાં 22 એપ્રિલની સ્થિતિએ સૌથી વધુ જળસંગ્રહ આ વખતે રહ્યું છે. ઉનાળાની જરૂરિયાતને ધ્યાનમાં રાખી 15 પૈકી 11 ડેમનું પાણી રિઝર્વ કરાયું છે. હાલ દાંતીવાડા, મુક્તેશ્વર, વાત્રક અને ગુહાઇ ડેમમાંથી હજુ પણ સિંચાઇ માટે પાણી અપાઇ રહ્યું છે. બીજી તરફ, 15 પૈકી 10 ડેમમાં હજુ પણ 50 ટકાથી વધુ પાણીનો જથ્થો છે. સાબરકાંઠાના જવાનપુરા ડેમમાં સૌથી વધુ 93.60 ટકા પાણી છે, જ્યારે બનાસકાંઠાના સીપુ ડેમમાં સૌથી ઓછો 7.79 ટકા પાણીનો જથ્થો છે. ઉત્તર ગુજરાતના ચાર જિલ્લામાં જળસંગ્રહની સ્થિતિ છેલ્લા 7 વર્ષમાં સૌથી સારી સ્થિતિ વર્ષ કુલ જળસંગ્રહ વપરાશનો જથ્થો

સ્થાનિક સ્વરાજ્યની ચૂંટણી:સાબરકાંઠા: 48 અપક્ષો વચ્ચે 21 ચૂંટણી ચિહ્નોની ફાળવણી

સાબરકાંઠા જિલ્લામાં સ્થાનિક સ્વરાજની ચૂંટણીમાં ઉમેદવારી ફોર્મ ખેંચવાની મુદ્દત પૂર્ણ થતાંની સાથે જ વહીવટી તંત્ર દ્વારા ચૂંટણી ચિહ્નોની ફાળવણી કરી દેવામાં આવી છે. આ વખતે ચૂંટણીમાં રાજકીય પક્ષોના સત્તાવાર ઉમેદવારો સામે મેદાનમાં ઉતરેલા 48 જેટલા અપક્ષ ઉમેદવારોએ રસાકસી વધારી દીધી છે. ચૂંટણી પંચ દ્વારા આ અપક્ષોને કુલ 21 જેટલા વિવિધ રોજીંદા વપરાશના ચિહ્નો ફાળવવામાં આવ્યા છે, જેમાં ટેબલ અને કાચનો ગ્લાસ ઉમેદવારોની પસંદ બન્યા હોય તેમ જણાય છે. જિલ્લામાં ચૂંટણી લડી રહેલા અપક્ષોમાં ટેબલ ચિહ્ન સૌથી વધુ લોકપ્રિય સાબિત થયું છે. કુલ 7 ઉમેદવારોને ટેબલનું ચિહ્ન ફાળવવામાં આવ્યું છે. જ્યારે 6 ઉમેદવારો કાચના ગ્લાસના નિશાન સાથે અને 5 ઉમેદવારો કડાઈના નિશાન સાથે મતદારો પાસે જશે. આ સિવાય અન્ય ઉમેદવારોને ટીલર, દૂરબીન, પેટ્રોલપંપ, સીતાર, અલમારી, માઇક, ઝૂલો, ડીશ એન્ટેના,મીકસી, એરકંડીશનર, પટ્ટો, રોબટ, ઇસ્ત્રી, ભીંડા, દ્વાક્ષ, માચીસ બોકસ, પાણીની ટાંકી, ક્રેન જેવા ચિહ્નો ફાળવવામાં આવ્યા છે. ઇડર પાલિકામાં સૌથી વધુ 21 અપક્ષસાબરકાંઠાના રાજકીય વિશ્લેષકોનું માનવું છે કે, આટલી મોટી સંખ્યામાં અપક્ષો મેદાનમાં હોવાથી મુખ્ય પક્ષોના મતોમાં ગાબડું પડી શકે છે. જિલ્લા પંચાયતમાં 04, આઠ તાલુકા પંચાયતમાં 20, ઇડર પાલિકામાં સૌથી વધુ 21 હિંમતનગર પાલિકામાં 2 અને વડાલી પાલિકામાં 1 મળી કુલ 48 અપક્ષ ઉમેદવારો મેદાનમાં છે ખાસ કરીને ઇડર અને પ્રાંતિજમાં અપક્ષોનું જોર વધુ જોવા મળી રહ્યું છે. પક્ષના મેન્ડેટ ન મળતાં નારાજ થયેલા ભાજપના10 કાર્યકરોએ બળવો કરીને અપક્ષ તરીકે ઝંપલાવ્યું છે.

હિંમતનગર નેશલ હાઈવે પર અકસ્માત‎:બાઇક પાછળ બાઈક અથડાતાં વકીલનું મોત

હિંમતનગરમાં નેશનલ હાઈવે પર પૂરઝડપે આવતાં બાઇક ચાલકે આગળ જઈ રહેલા બાઈકને પાછળથી ટક્કર મારતાં ગંભીર અકસ્માત સર્જાયો હતો. આ દુર્ઘટનામાં વકીલાતનો વ્યવસાય કરતાં 58 વર્ષીય પ્રૌઢનું સારવાર દરમિયાન મોત નીપજ્યું હતું. અકસ્માત બાદ આરોપી પોલીસને જાણ કર્યા વગર નાસી છૂટ્યો હતો, જેની સામે એ-ડિવિઝન પોલીસ સ્ટેશનમાં ગુનો નોંધવામાં આવ્યો છે. દેસાસણના વતની અને વ્યવસાયે વકીલ એવા પ્રકાશકુમાર સોમાભાઈ પટેલ ગત તા.19-04-2026ના રોજ સવારે 7 વાગ્યાના અરસામાં પોતાની બાઈક નં જીજે-09-સીજી-8459 લઈને હિંમતનગર ઓફિસે આવવા નીકળ્યા હતા. તેઓ જ્યારે નેશનલ હાઈવે પર મેડિસ્ટાર હોસ્પિટલથી આગળ ધનલક્ષ્મી સીડ્સ પાસે પહોંચ્યા, ત્યારે પાછળથી આવતાં બાઈક નં આરજે-12-પીએસ-6662ના ચાલકે તેમના બાઈકને ટક્કર મારી હતી. અકસ્માતમાં પ્રકાશભાઈને માથા તેમજ શરીરે ગંભીર ઈજાઓ પહોંચતા તેમને તાત્કાલિક 108 મારફતે સિવિલમાં ખસેડાયા હતા. જ્યાં સારવાર દરમિયાન તેમનું મોત થયું હતું. મૃતકના પુત્ર સ્વપ્નીલભાઈ પટેલે એ-ડિવિઝન પોલીસમાં ફરિયાદ નોંધાવી હતી.

ઘેટા-બકરાંનાં મોત:સમીના સિંગોતરીયામાં એરંડાના પાન ખાતાં 35 ઘેટા-બકરાંનાં મોત નીપજ્યાં

સમી તાલુકાના સિંગોતરીયા ગામના સીમ વિસ્તારમાં એરંડાના ખેતરમાં ચરવા ગયેલા રબારી સમાજના પશુપાલકના 35 જેટલા ઘેટા-બકરાના એકસાથે મોત થયા હતા. સમી તાલુકાના સિંગોતરીયા ગામના ઠાકોર મહાદેવભાઇ ચુડાભાઇના ખેતરમાંથી એરંડાનો પાક લઈ લીધા બાદ, તેમણે માલધારી અમરાભાઇ રૂગનાથભાઈને પરવાનગી આપી હતી. બુધવારે સવારે અમરાભાઇ અંદાજે 250 જેટલા ઘેટા-બકરા લઈ ચરાવવા માટે ગયા હતા. ખેતરમાં એરંડાના કુણા પાન ફૂટેલા હોય, ઘેટાઓએ વધુ પ્રમાણમાં આ પાન ખાઈ લેતા તેમની તબિયત લથડી હતી. 50થી વધુ પશુઓ બીમાર ઘટનામાં 35 ઘેટા-બકરાના ઘટનાસ્થળે જ મોત નીપજ્યા હતા, જ્યારે અન્ય 50થી વધુ પશુઓ ગંભીર રીતે બીમાર હાલતમાં જોવા મળ્યા હતા. અચાનક પશુઓના મોતથી હડકંપ મચી ગયો હતો. તાત્કાલિક સ્થાનિક પશુ ડોક્ટરને જાણ કરવામાં આવતા તેઓએ સ્થળ પર પહોંચી અન્ય બીમાર પશુઓની પ્રાથમિક સારવાર શરૂ કરી હતી. ઘટનાની ગંભીરતાને જોતા ગામના તલાટી સહિતના સરકારી અધિકારીઓ અને ગામના આગેવાનોએ સ્થળની મુલાકાત લીધી હતી.

ભાસ્કર એનાલિસિસ:સિદ્ધપુર પાલિકાની ચૂંટણી: અપક્ષો ભાજપની પેનલ તોડી શકે છે

સિદ્ધપુર નગરપાલિકાની 36 બેઠકોના જંગમાં ભાજપે 3 બેઠકો બિનહરીફ જીતીને પ્રારંભિક સરસાઈ મેળવી લીધી છે. જોકે, બાકીની 33 બેઠકો પર 81 ઉમેદવારો વચ્ચે ખરાખરીનો જંગ છે. ચૂંટણીમાં અપક્ષો ભાજપની પેનલ તોડી શકે છે. આ વખતે નવાઈની વાત એ છે કે કોંગ્રેસ (14 ઉમેદવાર) કરતાં અપક્ષ ઉમેદવારોની સંખ્યા (34) વધુ છે, જે ભાજપ અને કોંગ્રેસ બંને માટે ચિંતાનો વિષય છે. વોર્ડ નંબર 3, 6 અને 9 માં પરંપરાગત ભાજપ-કોંગ્રેસ વચ્ચે ટક્કર છે, જ્યારે બાકીના 6 વોર્ડમાં અપક્ષોએ પોતાની તાકાત બતાવી ચૂંટણીને પ્રવાહી બનાવી દીધી છે. જેમાં મુખ્યત્વે પાલિકાના પૂર્વ મહિલા પ્રમુખ અને ઉપપ્રમુખ બંને સામે સામાન્ય મહિલાઓ કદાવર નેતાના નેતૃત્વમાં મેદાનમાં ઉતરી હોય મોટા માથાઓની પ્રતિષ્ઠા દાવ પર લાગતા અહીં રસાકસી ચરમસીમાએ પહોચતા જંગ જામ્યો છે. પાલિકાની ચૂંટણી રસાકસી ભરી બની છે. એક મહિલા બે વોર્ડમાં અપક્ષ લડી રહી છેસિધ્ધપુરમાં અપક્ષ મહિલા ઉમેદવાર ડિમ્પલબેન હિતેશકુમાર હરવાણી એ બે વોર્ડમાં અપક્ષ ઉમેદવારી નોંધાઈ છે. જેમાં વોર્ડ નંબર ત્રણમાં અપક્ષ તેમજ વોર્ડ નંબર ચારમાં અપક્ષ તરીકે ચૂંટણી લડી રહી છે. બંને બોર્ડમાં સામાન્ય સ્ત્રી બેઠક ઉપરથી ઉમેદવારી કરી છે. ભાજપ મજબૂત, પણ ‘આંતરિક અસંતોષ’ અને ‘અપક્ષો’ પેનલ તોડે તેવી પૂરી શક્યતા વિશ્લેષકના મતે ભાજપ મજબૂત સંગઠન સાથે મેદાનમાં હોય 3 બિનહરીફ બેઠકોના કારણે સરસાઈમાં છે. પરંતુ ટિકિટ વહેચણીમાં ઊભો થયેલો ક્યાંક આંતરિક અસંતોષ અને ક્યાંક શક્તિશાળી અપક્ષો તેની પેનલ તોડી શકે છે. સામે કોંગ્રેસ માત્ર મર્યાદિત ગઢ (વોર્ડ 6, 9) સાચવવા મથશે. જ્યારે અપક્ષના નવા ચહેરાઓ દ્વારા પરિવર્તન ઈચ્છતા મતો ખેંચી નિર્ણાયક ભૂમિકા ભજવી શકે છે. આમ પાલિકામાં 36 બેઠકોના પરિણામમાં મિક્સ પ્રતિનિધિ મંડળની શક્યતા નકારી શકાય નહીં. પરંતુ બહુમતી બેઠકો ભાજપની આવી શકે છે. એવા હાલના સમીકરણો જોતા લાગે છે.

ખેડૂતોને અપાયું માર્ગદર્શન:સિદ્ધપુરના ખળી ગામમાં ખાતરના સંતુલિત ઉપયોગ અંગે 39 ખેડૂતોને માર્ગદર્શન અપાયું

ખેતીમાં વધતા જતા રાસાયણિક ખાતરોનો ખર્ચ ઘટાડવા અને જમીનની ફળદ્રુપતા જાળવી રાખવાના ઉમદા હેતુ સાથે કૃષિ વિજ્ઞાન કેન્દ્ર, પાટણ દ્વારા સિદ્ધપુર તાલુકાના ખળી ગામે વિશેષ તાલીમ શિબિરનું આયોજન કરવામાં આવ્યું હતું. આ તાલીમ શિબિરમાં ખાતરના સંતુલિત ઉપયોગ વિષય પર યોજાયેલા આ કાર્યક્રમમાં ગામના 39 જેટલા જાગૃત ખેડૂત ભાઈ-બહેનોએ ઉત્સાહભેર ભાગ લીધો હતો. આ કાર્યક્રમની શરૂઆતમાં વરિષ્ઠ વૈજ્ઞાનિક ડો. ઉપેશકુમારે ખેડૂતોને પાકની જરૂરિયાત અને હવામાન મુજબ યોગ્ય માત્રામાં ખાતર આપવાની સલાહ આપી હતી. તેમણે ખાસ કરીને મેક્રો અને માઇક્રો પોષક તત્વોના સંતુલન પર ભાર મૂક્યો હતો.આ પ્રસંગે વિષય નિષ્ણાત એસ.એસ. દરજીએ વિગતે જણાવ્યું હતું કે, સંતુલિત ખાતરના ઉપયોગથી ખેતી ખર્ચમાં મોટો ઘટાડો થાય છે અને પાકની ગુણવત્તામાં નોંધપાત્ર સુધારો જોવા મળે છે. તાલીમ દરમિયાન ભારત સરકારની સોઇલ હેલ્થ કાર્ડ યોજના, નીમ-કોટેડ યુરિયા અને આધુનિક ટેકનોલોજી સમાન નેનો ખાતરના ઉપયોગ અંગે પણ ખેડૂતોને પ્રોત્સાહિત કરવામાં આવ્યા હતા. પ્રશ્નોત્તરી બાદ ખેડૂતોના મુંઝવતા પ્રશ્નોનું નિરાકરણ લાવી તાલીમનું સફળ સમાપન કરાયું હતું.

ગમખ્વાર અકસ્માત સર્જાયો:બાઈકની ટક્કરથી પતિનું મોત પત્નીને ઈજા પહોંચી

પાટણ તાલુકાના કુણઘેરથી સબોસણ તરફના માર્ગ પર સર્જાયેલા અકસ્માતમાં એક્ટિવા સવાર આધેડનું મોત નિપજ્યું છે. પાટણ શહેરના મોતીસા દરવાજા પાસે આવેલી સતકેવલ સોસાયટીમાં રહેતા પ્રકાશભાઈ કાંતિભાઈ પટણી અને તેમના પત્ની જ્યોત્સનાબેન પોતાનું એક્ટીવા લઈને કુણઘેર-સબોસણ માર્ગ પરથી પસાર થઈ રહ્યા હતા. આ દરમિયાન સામેથી પૂરપાટ ઝડપે આવી રહેલા એક બાઈક ચાલકે તેમના એક્ટિવાને જોરદાર ટક્કર મારી હતી. અકસ્માત એટલો ભયાનક હતો કે દંપતી રોડની સાઈડમાં ફંગોળાઈને નીચે પટકાયું હતું, જેમાં પ્રકાશભાઈને માથા અને કપાળના ભાગે ગંભીર ઈજાઓ પહોંચી હતી. જ્યારે તેમના પત્ની જ્યોત્સનાબેનને પણ શરીરના ભાગે વધતી-ઓછી ઈજાઓ થઈ હતી. બંનેને બેભાન અવસ્થામાં તાત્કાલિક સારવાર અર્થે ધારપુર મેડિકલ હોસ્પિટલ ખાતે ખસેડવામાં આવ્યા હતા. જોકે, હોસ્પિટલમાં ટૂંકી સારવાર બાદ પ્રકાશભાઈ પટણીએ દમ તોડ્યો હતો. બાઈક ચાલક વિરુદ્ધ ફરિયાદ નોંધાવી છે.

ધૂરંધર-બોલિવૂડના આદિત્ય ધરનો હોલિવૂડના ક્વિન્ટન ટેરેન્ટિનોને જવાબ:આખરે ટિકિટબારી પર સફળ થાય એ જ જો જીતા વહી સિકંદર

અત્યારે બોલિવૂડની ફિલ્મ ધૂરંધર ફક્ત ભારત જ નહીં પણ દુનિયાભરમાં ધૂમ મચાવી રહી છે. રોજે રોજ નવા નવા રેકોર્ડ બનાવે છે. ફિલ્મ વિશે, એના કલાકારો વિશે, સંગીત વિશે, ફિલ્મની વાર્તા વિશે અને ફિલ્મ ડિરેક્ટર આદિત્ય ધર વિશે નવી નવી વાતો અને રમૂજો બહાર આવે છે. આદિત્ય ધર ફક્ત એક મૂવીના 2 ભાગ બનાવી રાતોરાત બોલિવૂડના ખેરખાંઓને હડસેલીને સ્ટાર ડિરેક્ટરની હરોળમાં પ્રથમ નંબર પર આવી ગયા છે. ખાસ કરીને ઇન્ડિયામાં ઘટેલી વાસ્તવિક ઘટનામાં કલ્પનાના રંગો પૂરીને જે મનોરંજનની ધમાલ એમણે મચાવી છે એને કારણે એમને એવોર્ડ્સ તો ઘણા બધા મળશે જ મળશે પણ જીનિયસ, ઓરિજિનલ વાર્તાકાર-ડિરેક્ટર વગેરે જેવા વિશેષણથી નવાજવામાં આવી રહ્યા છે. જે એમણે અને આખી ટીમે કરેલી મહેનત માટે યોગ્ય જ છે. ફિલ્મ મેકિંગની નવી વ્યાખ્યા બનીઆખરે ટિકિટબારી પર સફળ થાય એ જ જો જીતા વહી સિકંદર પછી એને પ્રોપેગન્ડા, હાયપર નેશનાલિસ્ટ ફિલ્મ વગેરે કહેવાવાળા ટીકા ટિપ્પણી કર્યા કરે. કલ્ટ ફિલ્મની કેટેગરીમાં આવી ગયેલી ધૂરંધર બોલિવૂડ માટે ફિલ્મ મેકિંગની એક નવી વ્યાખ્યા સફળતાપૂર્વક લઇને આવી છે એ વાતનો ઇન્કાર કોઇ કરી શકે એમ નથી! અને આવી કલ્ટ મૂવી બોલિવૂડ અને વિશ્વને આપનાર આદિત્ય ધરની આ ફિલ્મ ધૂરંધર ઘણાને ઓરિજિનલ લાગી પણ વૈશ્વિક સિનેમા જોવાના રસિયાઓએ પકડી પાડ્યું હશે કે આ એક અંગ્રેજીમાં નોન લીનિયર સ્ટોરી ટેલિંગ તરીકે ઓળખાતી વાર્તા કહેવાની રીતથી પ્રભાવિત ફિલ્મ છે. આ નોન લિનીઅર સ્ટોરી ટેલિંગના માસ્ટર છે જીવતે જીવ દંતકથા સમાન બનેલા જીનિયસ હોલિવૂડ દિગ્દર્શક, સર્જક ક્વિન્ટન ટેરેન્ટિનો. ક્વિન્ટન ટેરેન્ટિનોએ નવો જ ચીલો ચાતર્યોક્વિન્ટન ટેરેન્ટિનો જે બધા વિશેષણો પ્રતિભાશાળી લોકો માટે વપરાય છે એનાથી પર છે અને એમના વિશે વાત કરવા એક લેખ નહીં પણ લેખની સિરીઝ જોઇએ પણ આજે એમની નોન લિનીઅર સ્ટોરી ટેલિંગની વ્યાખ્યા આપનાર, વિશ્વભરની ફિલ્મ મેકિંગમાં નવો ચીલો ચાતરનાર, ફિલ્મો જેવી કે રિઝર્વાર ડોગ, પલ્પ ફિક્શન, કિલ બિલ, ઇન્ગ્લોરિયાસ બાસ્ટર્ડ અને જાંગો અનચેઇન્ડ જેવી ફિલ્મોની વાત કરવી છે. વાતને અસરકારક રીતે રજૂ કરવા જુદી-જુદી પદ્ધતિઆગળ ઉલ્લેખ કર્યો એમ ટેરેન્ટિનોની ફિલ્મોમાં સૌથી મહત્વપૂર્ણ વિશેષતા નોન લીનિયર સ્ટોરી ટેલિંગ છે. સાદી સરળ ભાષામાં આનો અર્થ થાય છે કે તેઓ વાર્તા સીધી શરૂઆતથી અંત સુધી નહીં પરંતુ તૂટેલા સમય ક્રમમાં રજૂ કરે છે અને આ વાત વધુ અસરકારક રીતે રજૂ કરવા સર્જકો ફ્લેશબેક, ફ્લેશ-ફોરવર્ડ અને ડ્રિમ સિક્વન્સનો ઉપયોગ કરે છે. ટેરેન્ટિનોની પલ્પ ફિક્શન આ શૈલી સમજવા માટે શ્રેષ્ઠ ઉદાહરણ છે. જેમાં અનેક અલગ-અલગ કથાઓ એકબીજા સાથે જોડાયેલી છે. માટે જ ફિલ્મને ફક્ત મનોરંજન અને ટાઇમ પાસ માટે જોતાં સિનેમાના ચાહકોને આ રીત અપીલ ના કરી શકે. કારણ કે આ રીતથી કહેવાતી કથા સમજવા માટે ધ્યાનપૂર્વક ફિલ્મ જોવી પડે છે. કલ્પના સૃષ્ટિની કમાલપહેલી જ ફિલ્મ રિઝર્વાર ડોગથી ફિલ્મ રસિયાઓ, સર્જકો, કલાકારોનું ધ્યાન ખેંચનાર ટેરેન્ટિનો આ મૂવી માટે પાછા કોઇ ઠહેરાવ વિના આવતા લાંબા લાંબા ડાયલોગ્સ, જે હાસ્ય, તણાવ, કરુણા અને જીવન વિશે ફિલોસોફી એક સાથે રજૂ કરે છે. ઉપરાંત ટેરેન્ટિનો ફક્ત વાર્તા નહીં પણ એ વાર્તા જેના દ્વારા કહેવામાં આવે એ અલગ અલગ પાત્રો સર્જવામાં પણ કમાલ કરી જાણે છે. ફિલ્મને ફક્ત અને ફક્ત મનોરંજનના માધ્યમ તરીકે જોનાર આથી જ જેટલી સરળતાથી કથા માટે નાયકનું પાત્ર રચી જાણે છે એટલી જ ખૂબીથી પ્રતિનાયક(વિલન) પણ સર્જી શકે છે. વળી ક્યારેક Django Unchained ફિલ્મમાં અમીટ છાપ છોડી જનાર એન્ટિ હીરો પણ એમની કલ્પના સૃષ્ટિમાંથી ફિલ્મના પડદે આવી ચડે છે. કિલ બિલઃ એક રિવેન્જ સ્ટોરીટેરેન્ટિનો જેને એમની સર્જન માટે પ્રેરણામૂર્તિ માને છે એવી ભારતીય નામ ધરાવતી હોલિવૂડની દિગ્ગજ અભિનેત્રી ઉમા થર્મન અભિનીત Kill Bill: Volume 1-2. વિશ્વભરના દર્શકો જે સિનેમા અને એની સ્ટાઇલ જોઇને ગાંડા થઇ ગયા હતા એ કિલ બિલ આમ તો એક રિવેન્જ સ્ટોરી છે. ફિલ્મમાં મુખ્ય પાત્ર ઉમા થર્મન તેના પર થયેલા અન્યાયનો બદલો લેવા એક પછી એક દુશ્મનોને જે અંદાજમાં શોધે છે એ ફિલ્મની વિઝ્યુઅલ ઇફેક્ટ, રંગોનો ઉપયોગ, કેમેરા એંગલ, બેકગ્રાઉન્ડ સંગીત, લડાઇના સ્ટાઇલિશ અને એક એક લડાઇના દ્રશ્યો પર થિસીસ લખી શકાય એવી અદભૂત રીતે રચાય છે. આ ફિલ્મ દ્વારા ફક્ત ઉમા થર્મન જ નહીં પણ બધા પાત્રો, ઘટનાઓ, વાર્તા, વાર્તા કહેવાની ટેરેન્ટિનોની અનન્ય રીત ફક્ત કલ્ટ નહીં પણ ના ભૂતો ના ભવિષ્યતિ બની ગયા છે. ટેરેન્ટિનો પોતાની ફિલ્મમાં જૂના એમને પોતાને પ્રિય એવા ગીતો બેકગ્રાઉન્ડ સ્કોર તરીકે ઉપયોગ કરી ને સ્પેગેટી વેસ્ટર્ન, સામુરાઇ ફિલ્મો અને 70ના દાયકાની ફિલ્મોથી પ્રેરણા લઇને જે કલ્પના અને વાસ્તવિકતાનું વિશ્વ રચે છે એ એમના માટે એક જાતનું એ જે માધ્યમને દિલોજાનથી ચાહે છે એને આપેલું તર્પણ, શ્રદ્ધાંજલિ છે. જેમની ફિલ્મનો હેતુ તેમના દર્શકોને પોતાની નૈતિકતા અને જાત વિશે પ્રશ્ન ઉઠાવવા મજબૂર કરે છે પછી ભલેને વિવેચકો અને સિનેમા રસિયાઓએ વિભાજીત થઇને એના વિશે ચર્ચા કર્યા કરે! પોતાની કલા દ્વારા ચર્ચા ઊભી કરવામાં માહેર અને આપણા આદિત્ય ધર, રામ ગોપાલ વર્મા જેવાને પ્રેરણા આપનાર ધ ક્વિન્ટન ટેરેન્ટિનો પોતે એક કલ્ટ બની ગયા છે!

પાલનપુર પાલિકા ચૂંટણીનો ચિતાર:, સફાઈ, પાણી સહિત પાયાની સુવિધાઓને લઇને જનતાની ઉમેદવારો સામે નારાજગી

ૉપાલનપુરમાં ચૂંટણીનો માહોલ ગરમાયો છે, મત માગવા પહોંચતા ઉમેદવારોને લોકો પહેલા પોતાની સમસ્યાઓ જણાવી રહ્યા છે. મફતપુરા વિસ્તારમાં લગ્નપ્રસંગો દરમિયાન ઉભરાતી ગટરની સમસ્યાથી રહેવાસીઓ પરેશાન છે. ઉમેદવારોએ ભૂગર્ભ ગટર મંજૂર થઈ ગઈ હોવાનું અને મહિનામાં કામ શરૂ થવાનું આશ્વાસન આપ્યું, ત્યારે સ્થાનિકોએ પણ સ્પષ્ટ કહ્યું કે, ગટરના ભૂંગળા મોટા નખાવજો જેથી ભવિષ્યમાં ફરી સમસ્યા ન સર્જાય. પાલનપુર નગરપાલિકાના વોર્ડ નંબર-3માં ચૂંટણી પ્રચાર દરમિયાન લોકો ઉમેદવારોને મત આપવા પહેલા પોતાના વિસ્તારની મૂળભૂત સમસ્યાઓનો હિસાબ માંગતા જોવા મળ્યા હતા. સવારે 10 વાગ્યે મફતપુરા, ડંકીવાસ, ઓડવાસ, રબારીવાસ, ખોડિયાર મંદિર, અમીરબાગ સહિતના વિસ્તારોમાં ડોર-ટુ-ડોર પ્રચાર માટે નીકળેલા ઉમેદવારોને સ્થાનિકોએ ગટર, વરસાદી પાણી, પીવાના પાણી અને રખડતા પશુઓના પ્રશ્નો અંગે ઘેર્યા હતા. . ઉમેદવારોનું એક મહિનામાં કામનું આશ્વાસન લોકોના આક્રોશને શાંત કરવા ઉમેદવારો એવો દાવો કરી રહ્યા છે કે ગટર અને વરસાદી લાઇન મંજૂર થઈ ગઈ છે અને એક મહિનામાં કામ શરૂ થશે. જોકે, વર્ષોથી હાલાકી ભોગવતી જનતા હવે માત્ર વચનોથી સંતોષ માનવા તૈયાર નથી.

14 કોર્ટોમાં દરરોજ 200થી વધુ કેસોને અસર‎:પાલનપુરના વકીલો 7 દિવસથી હડતાળ ઉપર

પાલનપુરના જોરાવર પેલેસ સંકુલમાં આવેલી જિલ્લા કોર્ટને જગાણા ખસેડવા મુદ્દે 17 એપ્રિલથી શરૂ થયેલો વિરોધ પ્રદર્શન સતત પાંચ દિવસથી જારી છે. બાર એસોસિએશનના 900થી વધુ વકીલ હાલમાં વકીલાત કર્યા વગર ધરણા પર ઉતરીને ગમે તે ભોગે પાલનપુરની કોર્ટને જગાણા ન ખસેડવા સરકાર પર દબાણ વધાર્યું છે. છેલ્લા કેટલાક દિવસોથી હાઇકોર્ટ થી જુદા જુદા સિનિયર એડવોકેટ આવીને આ મુદ્દાને સમર્થન આપી રહ્યા છે. અગાઉ જે જિલ્લામાં કોર્ટ બદલાવાથી મુશ્કેલીઓ ઊભી થઈ તેવી મુશ્કેલી પાલનપુરમાં ન થાય તેનું પણ માર્ગદર્શન આપી રહ્યા છે. પાલનપુર બાર એસોસિએશનના પ્રકાશભાઈ એ જણાવ્યું કે પાલનપુર જોરાવર પેલેસ સંકુલમાં જુદી જુદી 14થી વધુ કોર્ટ આવેલી છે. જેમાં હાલ વકીલોની ગેરહાજરીમાં કેસો ન ચાલવાના લીધે પ્રતિ દિન 200થી વધુ કેસોને અસર થઈ રહી છે અને તારીખો પડી રહી છે. અમે આ મુદ્દાને લઇ હાઇકોર્ટમાં પણ ધ્યાન દોર્યું છે. એસો.ના પ્રમુખ ભાવેશભાઈ રાવલે જણાવ્યું હતું કે આ સમગ્ર પાલનપુર શહેરનો મુદ્દો છે.

સ્થાનિક સ્વરાજ્યની ચૂંટણી:પાલનપુર પાલિકામાં 13 અપક્ષોને માઈક, એસી, આઈસ્ક્રીમ જેવા ચિન્હો ફાળવાયા

પાલનપુર પાલિકામાં 13 અપક્ષોને માઈક, એસી અને આઈસ્ક્રીમ જેવા ચિન્હો ફાળવાયા છે. પાલિકાના કુલ 11 વોર્ડની 40 બેઠકો માટે હવે 105 ઉમેદવારો વચ્ચે જંગ અંતિમ તબક્કામાં છે. શાસક પક્ષ ભાજપ અને વિપક્ષ કોંગ્રેસ મોટાભાગની બેઠકો પર આમને-સામને છે, જ્યારે વોર્ડ 2, 4, 5, 6 10માં અપક્ષોની સંખ્યાએ રસાકસી વધારી દીધી છે. ચૂંટણી અધિકારી દ્વારા અપક્ષોને ફાળવવામાં આવેલા નિશાનો આકર્ષણનું કેન્દ્ર બન્યા છે. જેમાં મહિલા ઉમેદવારને માચીસ બોક્ષ, કેટલાક યુવા ઉમેદવારોને મોર ગ્લાસ તરબૂચનું નિશાન મળ્યું છે. વોર્ડ 6 માં મહિલા ઉમેદવારને આઈસ્ક્રીમ, જ્યારે બીજાને એરકંડીશનર ફાળવાયું છે. વોર્ડ 11 ના એક ઉમેદવારને માઈકનું પ્રતીક મળ્યું છે. પાલિકાના જંગમાં માત્ર પુરુષો જ નહીં પરંતુ ચાર મહિલાઓએ પણ અપક્ષ તરીકે ઝંપલાવ્યું છે. વોર્ડ 2 માં વોર્ડ 6 માં 2 મહિલા ઉમેદવારો જ્યારે વોર્ડ 10 માં પણ અપક્ષ મહિલા ચૂંટણી લડી રહ્યા છે. લઘુમતી પ્રભુત્વ ધરાવતા વોર્ડ નંબર 4 અને 5 માં AIMIM ના ઉમેદવારો કોંગ્રેસના મતોમાં ગાબડું પાડી શકે છે. સમગ્ર ચૂંટણીમાં કુલ 105 ઉમેદવારોમાંથી મહિલા ઉમેદવારોની સંખ્યા પણ નોંધપાત્ર છે, જેમાં વોર્ડ નંબર 6 માં તો પુરુષો કરતા મહિલા ઉમેદવારો વધુ છે. વોર્ડ નંબર 2 માં સૌથી વધુ 14 અને વોર્ડ 4 માં 16 ઉમેદવારો હોવાથી ત્યાં મતદારોને પસંદગી માટે મોટી યાદી મળશે. બીજી તરફ, વોર્ડ નંબર 1 અને વોર્ડ નંબર 10 માં માત્ર 4-4 ઉમેદવારો જ મેદાનમાં રહ્યા છે, જેના કારણે ત્યાં ભાજપ અને કોંગ્રેસ વચ્ચે સીધો જંગ ખેલાશે. અપક્ષોની ભૂમિકા આ વખતે ઘણી નિર્ણાયક સાબિત થઈ શકે છે. ખાસ કરીને વોર્ડ નંબર 6 માં ઠાકોર જ્ઞાતિના ત્રણ અપક્ષ ઉમેદવારો ઉભા રહેતા મુખ્ય પક્ષોના જ્ઞાતિ સમીકરણો ખોરવાય તેવી શક્યતા છે.

ભાસ્કર એનાલિસિસ:GST દર ઘટ્યા છતાં ખરીદી-વેપાર વધતાં આવક 8% વધી

મહેસાણા સહિત ઉત્તર ગુજરાતમાં જીએસટી દર ઘટ્યા હોવા છતાં ઓટોમોબાઇલ, ઓટોપાર્ટ્સ એસેસરીઝ, ખેતી સહિતના ક્ષેત્રોમાં ખરીદી અને વેપારમાં વધારો થતાં જીએસટીની આવકમાં 8 ટકાનો ઉછાળો જોવા મળ્યો છે. વર્ષ 2025-26 દરમિયાન ₹રૂ.2576.70 કરોડની આવક નોંધાઈ છે. જે ગત વર્ષે ₹2387.19 કરોડ હતી. સૌથી વધુ GST આ વક ઓટોમોબાઇલ ક્ષેત્રમાં ₹286 કરોડ, ઓટોપાર્ટ્સ એસેસરીઝમાં ₹251 કરોડ અને વર્ક્સ કોન્ટ્રાક્ટમાં ₹અંદાજે રૂ.250 કરોડની આ વક થઇ છે. મહેસાણા ડિવિઝનના નવ ઘટક મહેસાણા, પાટણ, પાલનપુર, વિજાપુર, વિસનગર, કડી, ઊંઝા, ડીસા અને સિદ્ધપુર વિસ્તારમાં ઓટો સ્પેરપાર્ટ્સ, રોડ એન્ડ બિલ્ડિંગ (વર્ક્સ કોન્ટ્રાક્ટ), મેનપાવર સપ્લાય, તમાકુ, ઓટોમોબાઇલ, ખેતી, સિરામિક, એરકન્ડીશનિંગ અને રેફ્રિજરેશન તેમજ ડેરી પ્રોડક્ટ્સનો વ્યાપ વધારે છે. જીએસટી મહેસાણા ડિવિઝન કમિશનર મિતેશભાઇ પ્રજાપતિએ કહ્યું કે, માર્કેટમાં કન્ઝપ્શન વધતાં જીએસટી આવકમાં વધારો થયો છે. બજારમાં ખરીદી વધે એટલે વેપાર વધે. જેથી જીએસટીની આવક વધતી હોય છે. ઊંઝા, ડીસાથી એક્સપોર્ટ વધતાં સ્થાનિક આવક ઘટીમહેસાણા ડિવિઝનના ઊંઝા અને ડીસા ઘટકોમાં આ વર્ષે GST આવક ઘટી છે. વિભાગના અધિકારીઓ અનુસાર, આ વિસ્તારોમાંથી આંતરરાજ્ય વેપાર અને એક્સપોર્ટ વધારે થાય છે. પરિણામે, GST સેટલમેન્ટ અન્ય રાજ્યોમાં થતું હોવાથી સ્થાનિક સ્તરે આવક ઓછી દેખાય છે. જે રાજ્યમાં માલ સપ્લાય થયો ત્યાં જીએસટી કલેકશન થાય. હકીકતમાં આવક દેશમાં જ થાય છે. મહેસાણા રૂ.₹845 કરોડની આવક સાથે અગ્રેસરજીએસટી આ વકમાં સૌથી વધુ વૃદ્ધિ પાલનપુર (20%), વિજાપુર (19%) અને વિસનગર (17%) જ્યારે ઘટાડો ઊંઝામાં (28%) અને ડીસામાં (6%) થઇ છે. ઉત્તર ગુજરાતમાં મહેસાણા શહેર રૂ.₹845 કરોડની આ વક સાથે ટોપ પર છે.

ચૂંટણીને લઈને તંત્ર સજ્જ:10 મતદાન મથકો વચ્ચે પોલીસની એક મોબાઇલ ટીમ પેટ્રોલિંગ કરશે

મહેસાણા જિલ્લામાં 26 એપ્રિલને રવિવારના રોજ યોજાનારી મહેસાણા મહાનગરપાલિકા, જિલ્લા પંચાયત, 10 તાલુકા પંચાયત અને 6 નગરપાલિકાની ચૂંટણીમાં શાંતિપૂર્ણ મતદાન યોજાય તે માટે પોલીસ દ્વારા ચુસ્ત બંદોબસ્ત માટે એક્શન પ્લાન ઘડાયો છે. ચૂંટણીના દિવસે 4 ડીવાયએસપી, 27 પીઆઇ, 75 પીએસઆઇ, 1398 પોલીસ, 80 સભ્યોની એક એસઆરપી કંપની, 2021 હોમગાર્ડ અને 153 તાલીમી એલઆરડી સહિત કુલ 3758 પોલીસ જવાનો ફરજ બજાવશે. બંદોબસ્ત વ્યવસ્થા મુજબ, જિલ્લામાં 994 મતદાન મથકોના 1723 બુથ ઉપર જ્યાં મતદાન થવાનું છે ત્યાં દરેક બુથ ઉપર 1 પોલીસ, 1 હોમગાર્ડ અને 1 જીઆરડી તેમજ મતદાન મથકના 100 અને 200 મીટરના અંતરે પણ પોલીસ, હોમગાર્ડ તેમજ જીઆરડી તૈનાત કરાશે. આ સિવાય 10 મતદાન મથકો વચ્ચે એક પીએસઆઇ અને અન્ય પોલીસ સાથેની 125 સેક્ટર મોબાઈલવાન સતત પેટ્રોલિંગ કરતી રહેશે. ઉપરાંત, સ્થાનિક પોલીસ મથકની પીસીઆર અને મોબાઇલ વાનનું પણ વિસ્તારમાં પેટ્રોલિંગ ચાલુ રહેશે. જિલ્લામાં એક સાથે યોજાઇ રહેલી ત્રણ ચૂંટણીઓમાં આ વખતે નવીન તાલીમ લઈ રહેલા 153 એલઆરડી પણ ફરજ બજાવશે. ઉલ્લેખનીય છે કે, જિલ્લામાં ચૂંટણી પંચ દ્વારા જાહેર કરવામાં આવેલા સંવેદનશીલ મતદાન મથકો ઉપર અન્ય મતદાન મથકની સાપેક્ષમાં વધારે પોલીસ ફોર્સ ગોઠવાશે. 1130 લાયસન્સ વાળાં હથિયાર જમા લીધાજિલ્લામાં યોજાઇ રહેલી ચૂંટણીને લઇ પોલીસ દ્વારા અત્યાર સુધી 1130 જેટલા હથિયાર જમા લેવાયા છે. 23 જેટલા નાસતા ફરતા આરોપીઓને પકડી લેવાયા છે. તેમજ 2780 સામે અટકાયતી પગલાં ઉપરાંત 11,301 વાહનોનું ચેકિંગ અને 1 પાસાનો પણ હુકમ કરાયો છે.

મહેસાણાની મહિલાને કોમેન્ટ કરવી ભારે પડી:ઇન્સ્ટાગ્રામ પર કરેલી કોમેન્ટથી બે મહિલા વચ્ચે ગાળાગાળી મહેસાણા આવે તો ગોળી મારી દઉં'ની ધમકી આપતાં ફરિયાદ

સોશિયલ મીડિયા પર એક સામાન્ય કોમેન્ટ ક્યારેક કેટલો મોટો વિવાદ ઉભો કરી શકે છે તેનું તાજું ઉદાહરણ મહેસાણામાં સામે આવ્યું છે. મહેસાણા શહેરના માનવ આશ્રમ ચાર રસ્તા વિસ્તારમાં રહેતી 51 વર્ષની આધેડ મહિલાને ઇન્સ્ટાગ્રામ પર કરેલી એક કોમેન્ટ ભારે પડી ગઈ છે અને હવે મામલો પોલીસ સુધી પહોંચી ગયો છે. મહિલાએ હરિયાણાના એક યુવક દ્વારા તેના પેરાલિસિસથી પીડિત પિતાની સંભાળ લેતા વીડિયો પોસ્ટ પર “છોકરાઓ આવાં જ હોવા જોઈએ” જેવી સામાન્ય કોમેન્ટ કરી હતી. પરંતુ, આ કોમેન્ટથી યુવકની એક મિત્ર યુવતી ઉશ્કેરાઈ ગઈ હતી અને તેણે મહિલાને ગાળો લખીને જવાબ આપ્યો હતો. ત્યાર બાદ બંને વચ્ચે ઇન્સ્ટાગ્રામ પર જ ગાળાગાળી અને વાકયુદ્ધ શરૂ થઈ ગયું હતું. મામલો વધુ ગંભીર બનતાં મહિલાએ પણ સામેવાળી યુવતીને ગાળો આપતાં અને તું મહેસાણા આવે તો તને ખબર પાડું અને ગોળી મારી જાનથી મારી નાખવાની ધમકી આપતી કોમેન્ટ કરી હોવાનું પણ સામે આવ્યું છે. આ સમગ્ર વિવાદ બાદ યુવતીએ ગુડગાંવ પોલીસ મથકે મહેસાણાની મહિલા સામે પોતાને મારી નાખવાની ધમકી આપી હોવાની ફરિયાદ નોંધાવી હતી. આઇપી એડ્રેસ અને મોબાઇલ નંબરના આધારે ગુડગાંવ પોલીસ મંગળવારે મહેસાણા એ ડિવિઝન પોલીસ સાથે તપાસ માટે‎પહોંચી હતી. સ્થાનિક પોલીસની મદદથી મહિલાને પોલીસ મથકે‎બોલાવતાં તેણીએ પોલીસ સમક્ષ જણાવ્યું હતુ કે, તેને પણ‎સામેવાળી યુવતીએ બેફામ ગાળો લખી હતી અને સમગ્ર વિવાદમાં‎તે પહેલેથી ઉશ્કેરાઈ હતી. હાલ ગુડગાંવ પોલીસે મહિલાનું નિવેદન‎લઈ સાથે મહિલા પોલીસ ન હોવાથી નોટિસ આપી છે અને સમય‎મર્યાદામાં ગુડગાંવ હાજર થવા સૂચના આપી છે. સાથે જ મહિલાને‎મહેસાણા સાઇબર ક્રાઇમમાં પણ ફરિયાદ નોંધાવવા સલાહ‎આપવામાં આવી છે.‎ મને ગાળો લખનાર યુવતી સામે હું પણ ફરિયાદ કરીશ મારા કરતાં તો સામેવાળી યુવતીએ મને બેફામ ગાળો લખી છે. જે યુવકની પોસ્ટ પર મેં કોમેન્ટ લખી હતી તે યુવકને પણ મેં વાત કરતાં તેણે પણ તે યુવતી સાઇકી હોવાની વાત કરતાં હવે હું પણ મહેસાણામાં સાઇબર ક્રાઇમ પોલીસ મથકે તેની સામે ફરિયાદ નોંધાવીશનું પોલીસની હાજરીમાં મહિલાએ કહ્યું હતું.

મનપાની ચૂંટણીમાં રાત ઓછી વેશ ઝાઝા:ઉમેદવારો હવે 7-8 કલાક અને 10 10 સોસાયટીમાં મત માગવા ફરે છે

મહેસાણા મહાનગરપાલિકાની ચૂંટણી આડે હવે ગણતરીના દિવસો બાકી છે. ત્યારે ઉમેદવારોએ સમર્થકો સાથે સોસાયટીઓમાં ડોર ટુ ડોર એટલે કે ઘરે ઘરે મતદારોનો સંપર્ક વધારી દીધો છે. છેલ્લા દિવસોમાં દરેક મતદાર સુધી પહોંચી શકાય તે માટે સાત થી આઠ કલાક ફરી રહ્યા છે. મુલાકાત દરમિયાન વડીલોને પગે લાગે છે, મહિલાઓને બે હાથ જોડી નમન કરે છે તો યુવાનો સાથે હાથ મિલાવે છે. સાથે પોતાની પેનલના ચારેય ઉમેદવારોને મત આપવા વિનંતી કરી રહ્યા છે. એક ઉમેદવાર રોજ 10 થી વધુ સોસાયટીમાં ડોર ટુ ડોર પ્રચાર માટે ફરતા હોઇ કસરત એટલી હદે વધી છે કે કમરના દુ:ખાવા પણ કેટલાકને શરૂ થયા છે. શહેરના વોર્ડ નં.4માં વિસનગર રોડ પર એન.જી. સ્કૂલ સામે કૃણાલ હોપટાઉન અને સોમેશ્વર યુએન હોમ્સમાં સાઉન્ડ સિસ્ટમ સાથે ડોર ટુ ડોર પ્રચાર કરતા ઉમેદવારો ઘરમાંથી વડીલ બહાર આવે કે તરત પગે લાગી આશીર્વાદ મેળવતા, માસી જોજો હો, મત રહી ન જાય, તો સામે માસી પણ અરે કહેવું ના પડે, બધુ બરોબર છે તેવા સંવાદ સંભળાય છે. બાજુમાં એક કાર્યકર પેમ્ફલેટ આપી આ ક્રમ સામે બટન દબાવી રજીસ્ટ્રેશન છેલ્લે કરી લેવા સમજાવે છે. આ બંને સોસાયટીમાં સ્થાનિક લોકોને પૂછ્યું કે, અહીં કેટલા મતદારો છે. તો જવાબ મળ્યો કે, ઘણા વતનમાં રહે છે. એટલે મકાન 250 છે પણ મત 130 જેટલા હશે. ચૂંટણીનો માહોલ કેવો છે, શું લાગે છે એવું પૂછતાં એક યુવાને કહ્યું, તમે ભાજપમાં કે કોંગ્રેસમાં છો?. એટલે મતદારો પણ સામે કયા પક્ષ માં માનવાવા ળા છે તે જા ણીને જવાબ આપે છે. એક વડીલે કહ્યું જે ઉમેદવારો આવે તેમને બધાને આવકારવાના. મત તો જેને આપવાનો હોય તેને જ મતદારો આપશે ને? ઉમેદવારો સાલ અને ‎હાર સાથે જ રાખે છે‎પ્રચાર દરમિયાન કેટલાક ઘર‎માલિકને સામેથી સાલ, હાર‎આપી અને તેમના હસ્તે‎ઉમેદવારોનું સ્વાગત કરતા‎ફોટોની જમાવટ પણ જોવા મળી‎રહી છે. ટાબરિયાઓને પાર્ટીની‎ટોપી મળી જતાં સાયકલીગ મોજ‎કરવા લાગ્યા. ત્યાં ત્રીજી‎લાઇનના એક ઘરના ઝાંપે આ‎પ્રચાર ટીમ પહોચી તો એક યુવાન‎મોબાઇલ લઇને તરત રીલ‎ઉતારવા લાગ્યો અને ઉમેદવારને‎આગળ ધરી મત અપીલ મેળવી‎લીધી હવે ઇન્ટાગ્રામમાં ચઢાવી‎દઇશુ તેવું કહ્યું.‎

પીએમ કિસાન સન્માન નહીં ‘પરેશાની યોજના’:ઈ-કેવાયસી સહિત પોર્ટલમાં 7 ખામી,હપ્તા બંધ થતાં ખેડૂતો ધક્કે ચડ્યા

કેન્દ્ર સરકારની પીએમ કિસાન સન્માન નિધિ યોજનાના પોર્ટલમાં છેલ્લા કેટલાક સમયથી ઉભી થયેલી અનેક ટેકનિકલ ખામીઓના કારણે ખેડૂતો ધક્કે ચડ્યા છે. અડધો ડઝનથી વધુ ખામીઓના કારણે ખેડૂતો ગામડાથી તાલુકા પંચાયત અને જિલ્લા ખેતીવાડી કચેરીના છેલ્લા કેટલાક સમયથી ચક્કર લગાવી રહ્યા છે. તેમ છતાં પ્રશ્નોનું નિરાકરણ નહીં આવતાં હવે ખેડૂતોમાં અસંતોષ ફાટી નીકળ્યો છે. આ પરિસ્થિતિમાં મહેસાણા તાલુકાના આંબલિયાસણ સહિત 16 ગામોના ખેડૂતોએ સામૂહિક રજૂઆત કરી તાત્કાલિક સમસ્યાનું નિરાકરણ લાવવા માંગ ઉઠાવી છે. પીએમ કિસાન સન્માન નિધિ યોજના અત્યારે ખેડૂતો માટે સન્માનને બદલે પરેશાનીનું કારણ બની રહી છે. પીએમ કિસાન પોર્ટલમાં છેલ્લા કેટલાક સમયથી સર્જાયેલી અડધો ડઝનથી વધુ ટેકનિકલ ખામીઓને કારણે મહેસાણા જિલ્લા સહિત સમગ્ર ઉત્તર ગુજરાતના ખેડૂતો કફોડી સ્થિતિમાં મુકાયા છે. જેને લઇ સીએસસી સેન્ટરથી લઈને જિલ્લા ખેતીવાડી કચેરી સુધી ધક્કા ખાવા છતાં પ્રશ્નોનું નિરાકરણ ન આવતાં આખરે ખેડૂતો અકળાઇ ગયા છે. મહેસાણા તાલુકાના આંબલિયાસણ સહિતના 16 ગામના ખેડૂતોએ રજૂઆત કરી છે. ખેડૂતોએ મામલતદાર, ટીડીઓ અને જિલ્લા ખેતીવાડી કચેરીને લેખિતમાં રજૂઆત કરી ત્રણ મુખ્ય માંગણીઓ મૂકી છે. જેમાં પોર્ટલ પર આવતી ખામીઓ તાત્કાલિક દૂર કરવામાં આવે, જે ખેડૂતોના હપ્તા બંધ થયા છે, તેમનું વેરિફિકેશન ઝડપથી કરી નાણાં જમા કરવામાં આવે અને ખેડૂતોને કચેરીઓના ધક્કામાંથી મુક્તિ આપવા ગ્રામ્ય કક્ષાએ ખાસ કેમ્પનું આયોજન કરવામાં આવેની માંગણી છે. ફોર્મ ભર્યે 12 મહિના થયા પણ હજુ લાભ નથી મળ્યો યોજનાનો લાભ લેવા 12 મહિના પહેલા ફોર્મ ભર્યું હતું. પરંતુ આજ દિન સુધી લાભ નથી મળ્યો. કયા કારણથી લાભ નથી મળી રહ્યો એ કારણ પણ જાણવા મળતું નથી. > છનાજી ઠાકોર, ખેડૂત પોર્ટલની 7 મોટી ખામી

અમદાવાદ બાદ હવે મહેસાણામાં રેસ્ટોરન્ટ ઓન વ્હીલ:રેલવે કોચ રેસ્ટોરન્ટનું 60 ટકા કામ પૂરું, બે મહિના પછી 24 કલાક ગુજરાતી, પંજાબી ને ચાઈનીઝ વાનગી...

રેલવે તંત્ર અમદાવાદ બાદ હવે મહેસાણામાં રેસ્ટોરન્ટ ઓન વ્હીલ શરૂ કરવા જઇ રહ્યું છે. રેલવે સ્ટેશનમાં ગોપીનાળા નજીક રેલવે પ્રવેશદ્વાર પાસે કોચ રેસ્ટોરન્ટ બનાવવાની કામગીરી 60 ટકા પૂરી થઈ છે અને દોઢ-બે મહિનામાં રેસ્ટોરન્ટ શરૂ થવાની સંભાવના છે. રેસ્ટોરન્ટ માટે 70 ટન વજન ધરાવતો જૂનો કોચ અહીં લવાયો છે. જેને આધુનિક સુવિધાઓ સાથે રેસ્ટોરન્ટમાં રૂપાંતરિત કરવામાં આવી રહ્યો છે. 75 ફૂટ લાંબા, 12 ફૂટ પહોળા અને 13 ફૂટ ઊંચા કોચમાં એકસાથે 65 લોકો ભોજન લઈ શકશે. આ એસી રેસ્ટોરન્ટ 24 કલાક ખુલ્લું રહેશે. જ્યાં ગુજરાતી, પંજાબી, ચાઈનીઝ વાનગી મળશે. કોચની અંદર એક બાજુ રસોડું અને બીજી બાજુ શૌચાલય જેવી પ્રાથમિક સુવિધા પણ હશે. રેસ્ટોરન્ટની આગળ ગાર્ડન બનાવાશે, જ્યાં ખુલ્લી હવામાં બેસીને ભોજન માણી શકાય તેવી વ્યવસ્થા પણ કરવામાં આવશે. સાથે જ બહાર મોટી સ્ક્રીન મૂકવામાં આવશે, જેથી લોકો ભોજન સાથે મનોરંજનનો પણ આનંદ લઈ શકે. આ કોચમાં મહેસાણાની સંસ્કૃતિ અને પ્રખ્યાત સ્થળોની ઝાંખી દર્શાવવામાં આવશે.

ખાડી યુદ્ધની કચ્છના દરિયાઈ વેપાર પર અસર:મુન્દ્રા આવતા લાઈબેરિયાના જહાજને હોર્મુઝમાં ઈરાને કબજામાં લઇ લીધું

પશ્ચિમ એશિયામાં વધતા તણાવની સીધી અસર હવે કચ્છના દરિયાઈ વેપાર પર જોવા મળી રહી છે. ઈરાનની ઈસ્લામિક રિવોલ્યુશનરી ગાર્ડ (IRGC) દ્વારા હોર્મુઝ સ્ટ્રેટમાં ભારત, અને ખાસ કરીને કચ્છના મુન્દ્રા પોર્ટ તરફ આવી રહેલા એક વિશાળ કન્ટેનર શિપ ‘એપામિનોડેસ’ને રોકીને કબજે કરવામાં આવ્યું છે. લાઈબેરિયાના ફ્લેગ ધરાવતું આ જહાજ મુન્દ્રા પોર્ટ પર માલસામાન ઉતારવા માટે નિર્ધારિત હતું, પરંતુ ઈરાની નૌકાદળે તેને અધવચ્ચેથી ઈન્ટરસેપ્ટ કરી પોતાના કબજામાં લીધું છે. ઈરાની નૌકાદળના સત્તાવાર નિવેદન અનુસાર, આ જહાજ પરવાનગી વગર હોર્મુઝ સ્ટ્રેટમાંથી પસાર થવાનો પ્રયાસ કરી રહ્યું હતું. વધુમાં આરોપ લગાવવામાં આવ્યો છે કે જહાજની નેવિગેશન સિસ્ટમમાં છેડછાડ કરવામાં આવી હતી, જે આંતરરાષ્ટ્રીય દરિયાઈ સુરક્ષાના નિયમોનું ઉલ્લંઘન છે. આ કાર્યવાહી દરમિયાન ઈરાને માત્ર ‘એપામિનોડેસ’ જ નહીં, પરંતુ ઈઝરાયલ સાથે કનેક્શન ધરાવતા ‘ફ્રાન્સેસ્કા’ નામના જહાજને પણ જપ્ત કર્યું છે, જ્યારે ‘યૂફોરિયા’ નામના જહાજ પર હુમલો કરવામાં આવ્યો હોવાના અહેવાલ છે. મુન્દ્રાએ ભારતનું સૌથી મોટું ખાનગી બંદર છે અને અહીંથી હજારો ટન માલસામાનનું પરિવહન થાય છે. આ જહાજમાં રહેલો કન્ટેનર કાર્ગો મુન્દ્રાના વિવિધ એજન્ટો અને ઉદ્યોગો સાથે જોડાયેલો હતો. આ અગાઉ ઓમાનના તટ પાસે પણ જહાજો પર હુમલાની ઘટનાઓ બની હતી, જે દર્શાવે છે કે આ રૂટ પર જોખમ વધી રહ્યું છે. જહાજ જપ્ત થતા થશે મોટી અસર

કચ્છમાં ફરી ડીઝલનો દુકાળ?:ખાનગી પંપોએ ભાવ વધારતા સરકારી પંપો ખાલી

કચ્છ જિલ્લામાં એક માસના વિરામ બાદ ફરી એકવાર ડીઝલની ગંભીર અછત ર્સજાઈ છે. છેલ્લા ત્રણ દિવસથી સમગ્ર જિલ્લામાં ડીઝલની સાથે અનેક જગ્યાએ પેટ્રોલ પણ પુરતું મળતું નથી. નાયરા અને શેલ જેવી ખાનગી કંપનીઓએ ડીઝલના ભાવમાં લિટર દીઠ 5 થી 7 રૂપિયાનો તોતિંગ વધારો ઝીંકી દેતા ગ્રાહકો સરકારી પેટ્રોલ પંપ (HPCL, IOCL, BPCL) તરફ વળ્યા છે. સરકારી પંપો પર અચાનક ઘસારો વધતા સ્ટોક રાતોરાત ખાલી થઈ રહ્યો છે. હાલત એવી છે કે અનેક પંપો પર રાત્રિના સમયે વાહનચાલકોને ખાલી હાથે પરત ફરવું પડી રહ્યું છે. ડીઝલની અછત પાછળ કંપનીઓની નવી નીતિ જવાબદાર હોવાનું બહાર આવ્યું છે. જિલ્લા પુરવઠા અધિકારી અર્શ હાશ્મીના જણાવ્યા અનુસાર, કંપનીઓએ દરેક પંપ માટે સપ્લાયનો ‘કોટા’ નક્કી કરી દીધો છે. સરેરાસ વેચાણ મુજબ જ જથ્થો ફાળવવામાં આવતો હોવાથી, જ્યારે માંગ વધે ત્યારે પંપો પર ‘નો સ્ટોક’ના પાટિયા ઝૂલી જાય છે. પંપ સંચાલકોના મતે કંપનીઓ જરૂરિયાત મુજબ સપ્લાય આપી રહી નથી. કચ્છની અર્થવ્યવસ્થાની જીવાદોરી સમાન ટ્રાન્સપોર્ટ ઉદ્યોગને મોટો ફરી એકવાર મોટી સમસ્યાનો સામનો કરવાનો વારો આવ્યો છે. હજારો ટ્રક ચાલકો ડીઝલ મેળવવા માટે એક પંપથી બીજા પંપે ભટકી રહ્યા છે. પૂરતો જથ્થો ન મળતા ડિલિવરી મોડી પડી રહી છે, જેની સીધી અસર આવશ્યક ચીજવસ્તુઓના ભાવ પર પડવાની ભીતિ છે. ઇંધણની અછત અને કારણો

સુરતમાં પાટીદાર ગઢમાં મુખ્યમંત્રી ભૂપેન્દ્ર પટેલની ભવ્ય બાઈક રેલી:રાજકોટમાં નાયબ મુખ્યમંત્રીનો ભવ્ય રોડ શો, અમદાવાદમાં ઓવૈસીના ભાજપ-કોંગ્રેસ પર પ્રહાર

રાજ્યમાં સ્થાનિક સ્વરાજ્ય ચૂંટણીના પ્રચાર પડઘમ શાંત થવાને હવે બે દિવસ બાકી રહ્યા છે. રાજકીય પક્ષો મતદારોને રીઝવવા એડીચોટીનું જોર લગાવી રહ્યા છે, ત્યારે સુરત મનપાની ચૂંટણીના અંતિમ તબક્કામાં ભાજપે પાટીદાર બહુલ વિસ્તારમાં પ્રભુત્વ મેળવવા પૂરી તાકાત લગાવી દીધી છે અને આજે 23 એપ્રિલે મુખ્યમંત્રી ભૂપેન્દ્ર પટેલ સુરતની મુલાકાતે છે. મુખ્યમંત્રી ભૂપેન્દ્ર પટેલની ભવ્ય બાઈક રેલીજ્યાં તેઓ સીમાડા નાકાથી હીરાબાગ સર્કલ સુધી ભવ્ય બાઈક રેલી યોજી જનસમર્થન મેળવવાનો પ્રયાસ કરવાના છે. આ હાઈ-પ્રોફાઈલ પ્રવાસને પગલે શહેરમાં સુરક્ષાનો લોખંડી બંદોબસ્ત ગોઠવી દેવાયો છે. તો બીજી તરફ નાયબ મુખ્યમંત્રી રાજકોટની મુલાકાતે છે. સાંજે 5 વાગ્યે જુના રાજકોટ વિસ્તારમાં તેઓ ભવ્ય રોડ શો યોજવાના છે. રાજકોટમાં નાયબ મુખ્યમંત્રીનો ભવ્ય રોડ શોતેઓ શહેરની જૂની બજારમાં રોડ શો યોજી વેપારીઓને ભાજપના સમર્થનમાં મતદાન કરવા અપીલ પણ કરશે. રાજકોટના ત્રિકોણબાગથી શરૂ કરી ગરેડીયા કુવા રોડ, ધર્મેન્દ્ર રોડ, લાખાજીરાજ રોડ, ઘી કાંટા રોડ, કંસારા બજાર, સોની બજાર, પેલેસ રોડ, સ્વામિનારાયણ મંદિર, બાલાજી મંદિર અને પરત ત્રિકોણબાગ ખાતે રોડ શો પૂર્ણ કરવામાં આવશે. 'અમદાવાદમાં સ્લોટર હાઉસ બનવું જરૂરી છે'ઉલ્લેખનીય છે કે, 22 એપ્રિલે અમદાવાદ શહેરના જમાલપુર વોર્ડમાં મિરઝાપુરના કુરેશી ચોકમાં AIMIMના વડા અસદુદ્દીન ઓવૈસીએ જાહેર સભા યોજી હતી. જેમાં અસદુદ્દીન ઓવૈસી ભાજપ અને કોંગ્રેસ પર પ્રહાર કર્યા હતા. ઓવૈસીએ જણાવ્યું હતું કે, અમદાવાદમાં રોડ, ગટર, વરસાદી પાણીના નિકાલની જરૂર છે. અમદાવાદમાં સ્લોટર હાઉસ બનવું જરૂરી છે. કુરેશી સમાજના લોકો જ્યારે પશુઓ લઈને આવે છે ત્યારે ગૌરક્ષક અને RSS રોકે છે. 'બિલિકીસ બાનુના આરોપીઓને છોડી દેવામાં આવ્યા'ભારતમાં મુસ્લિમની નેતાગીરી હોવી જોઈએ. માત્ર જો વોટર બનશો તો તમારી તકલીફો દૂર નહીં થાય. લોકો મારા પર આરોપ લગાવે છે કે, હું ચૂંટણી લડું છું. પશ્ચિમ બંગાળમાં અનેક પાર્ટીઓ ચૂંટણી લડે છે, પરંતુ માત્ર મારા પર ભાજપને જીતાડવાનો આરોપ લગાડવામાં આવે છે. જે વધુ સીટ પર લડે છે એમને કોઈ પૂછવા આવતું નથી. જ્યારે મુસ્લિમની નેતાગીરી હશે અને તેમને રોકશે નહીં. હું તમામને કહું છું કે, તમે આરોપ લગાવી દો. હું જ્યાં સુધી જીવું છું ત્યાં સુધી લડીશ. હું ગુજરાતમાં પાંચ ધારાસભ્ય લડાવીશ અને જીતીશું. બિલિકીસ બાનુના આરોપીઓને છોડી દેવામાં આવ્યા છે. 2002ના તોફાનો કઈ જ નથી એના પહેલા કોંગ્રેસની સરકારમાં બહુ તોફાનો થયા છે. 'તમારા કોઈ નેતા બને એવું લોકો ઇચ્છતા નથી'AIMIM પાર્ટીના નેતા બનાવવા માટે આવ્યો છું. તમારા કોઈ નેતા બને એવું લોકો ઇચ્છતા નથી. તમારા વોટથી પાર્ટીને સફળ બનાવવાની છે. તમારી નેતાગીરીને મજબૂત કરવાની છે. ભારતના કરોડો મુસ્લિમોનો અવાજ બનીશું. તમારો વોટ કોઈને સફળ બનાવવા માટે હશે. 'UCC બિલ વિરુદ્ધ અમે અદાલતમાં જઈશું'તમારો મત ભાજપ વિરુદ્ધ હોવો જોઈએ. ગુજરાતના ભાજપ અને RSS નેતાઓને કહેવા માગું છું કે, તમે મુસ્લિમ વિરુદ્ધ UCC બિલ લાવ્યા છો. UCC બિલ વિરુદ્ધ અમે અદાલતમાં જઈશું. આ બિલ વિરુદ્ધમાં તમારે મત આપવાનો છે. કોંગ્રેસે અશાંતધારો બનાવ્યો છે. અશાંતધારો અને UAPA કોંગ્રેસે બનાવ્યો છે અને ભાજપે તેને વધારે ખરાબ કરી નાખ્યો છે. વાઇબ્રન્ટ ગુજરાતની વાતો કરો છો તો કેમ અશાંતધારો લાગુ કર્યો છે? અશાંતધારો લાગુ કર્યો છે. હું જવાબદારી સાથે કહું છું કે આ ચૂંટણી પૂરી થયા બાદ 3 મહિનામાં અમારા નેતા ગુજરાત આવશે અને કોર્પોરેટરને મળશે અને બધાને સુધારશે.

હાર્દિક પટેલનું ગામમાં ચાલ્યું પણ ઘરમાં ના ચાલ્યું!:વિરમગામમાં મામાજી V/s માસાજી; સુરતમાં પ્રસંગમાં AAPનું ગીત વાગ્યું, ટોપી-ખેસ પહેરી મહેમાનોએ ધબધબાટી બોલાવી

રાજનીતિ અને બ્યૂરોક્રેસીની અંદરની વાત જાણવા ઉપર દર્શાવેલી તસવીર પર ક્લિક કરો અને માણો ‘પારકી પંચાત’

અમદાવાદ મનપાની બેવડી સદી VIDEO:આધુનિક અમદાવાદના પિતા ગટરમાં કેમ ઉતર્યા? ગ્લોબલ ઈમેજ છતાં માથે 7 સમસ્યાઓ, જાણો જાજરમાન ઈતિહાસ

અમદાવાદ મ્યુનિસિપલ કોર્પોરેશન (AMC)ની 200 વર્ષની સફર એટલે ભદ્રથી સ્માર્ટ સિટીનો પ્રવાસ. રણછોડલાલ છોટાલાલ અને સરદાર પટેલ જેવા નેતાઓએ ઘડેલું આ શહેર આજે રિવરફ્રન્ટથી ગ્લોબલ મેપ પર છે. વિકાસ અને પડકારો વચ્ચે, 26 એપ્રિલનું મતદાન અમદાવાદનું ભાવિ નક્કી કરશે. જુઓ આઝાદીથી અત્યાર સુધીની AMCની આ ખાસ ગાથા પણ મનપા સામે આખલાની જેમ 7 સમસ્યાઓ હજુ પણ ઉભી છે. વીડિયો જોવા ઉપરના ફોટો પર ક્લિક કરો.

કોંગ્રેસી નેતાઓએ પોતાના પક્ષનો ખેલ પાડ્યો, ભાજપને સત્તા મળી ગઈ:છેલ્લી ઘડી સુધી ઉમેદવારોને મેન્ડેટ ન આપ્યા, ખિસ્સામાં મૂકી રાખ્યા, ગણદેવીમાં ડર્ટી પોલિટિક્સનો મોટો ઘટસ્ફોટ

ગુજરાતમાં સ્થાનિક સ્વરાજની આ વખતની ચૂંટણી એક અલગ જ કારણે ચર્ચામાં છે. કારણ કે કોંગ્રેસ, આમ આદમી પાર્ટી સહિત અપક્ષના ઘણા ઉમેદવારોના ફોર્મ રદ થયા અથવા તો એમણે પાછા ખેંચી લીધા. પરિણામે ભાજપે 700થી વધુ બેઠકો બિનહરિફ જીતી લીધી. એમાં પણ કડી અને ગણદેવી તો એવી નગરપાલિકા છે, જ્યાં મતદાન થયા વગર જ ભાજપને સત્તા મળી ગઈ. આવા ગજબનાક ઘટનાક્રમને સમજવા માટે અમે ગણદેવીમાં ઇન્વેસ્ટિગેશન કર્યું. તો કોંગ્રેસી નેતાઓની એવી દાનત ખુલ્લી પડી, જેનાથી જનતા જ નહીં મોટા નેતાઓ પણ કદાચ અજાણ હશે. સત્તાની સજાવેલી થાળી ભાજપને ભેટમાં મળવાની ઘટના શું છે?આ પ્રકરણની શરૂઆત થઈ 11 એપ્રિલથી. ફોર્મ ભરવાનો અંતિમ દિવસ હતો. ગણદેવી નગરપાલિકામાં 6 વોર્ડની 24 બેઠકો છે. જ્યાં ગયા વખતે તમામ બેઠકો ભાજપ જીતી ગયું હતું. આ વખતે કોંગ્રેસને ઉમેદવાર શોધવામાં પણ ફાંફા પડી ગયા. જેમ તેમ કરીને 18 બેઠકો માટે ઉમેદવારો નક્કી કર્યા. એટલે કે ઉમેદવારી માટે કોંગ્રેસમાં આંતરિક રીતે કોઈ ખેંચતાણ ન હતી એ સ્પષ્ટ રીતે માલુમ પડે છે. એક સાથે કોંગ્રેસના તમામ ઉમેદવારોના ફોર્મ રદ થયાચૂંટણી કેલેન્ડર પ્રમાણે 11 એપ્રિલે બપોરના 3 વાગતા સુધીમાં ઉમેદવારી નોંધાવી શકાય એમ હતું. કોંગ્રેસના નેતાઓ 18 ઉમેદવારો ફોર્મ લઈને દોઢ વાગ્યે પહોંચ્યા પરંતુ મેન્ડેટ 3 વાગતા સુધીમાં ન પહોંચી શક્યા. એટલે ચૂંટણી અધિકારી મિતેશ પટેલે કહી દીધું કે ‘હવે મેન્ડેટ સ્વીકારવામાં આવશે નહીં.’ 13 એપ્રિલે ફોર્મ ચકાસણી થઈ, મેન્ડેટ ન હોવાથી કોંગ્રેસી ઉમેદવારોના ફોર્મ રદ થયા અને ભાજપના નેતાઓ આ બેઠકો પર બિનહરિફ વિજેતા જાહેર થયા. પણ…પણ…પણ.. આ ઘટનાક્રમ દેખાય છે એટલો ચોખ્ખો નથી. એક સાથે 18 ઉમેદવારોના મેન્ડેટ ન પહોંચવા એ અસામાન્ય ઘટના હતી. આ સમાચાર આવતા જ પહેલી નજરે લાગ્યું કે દાળમાં કંઈક કાળુ છે. એટલે વિગતવાર આખો ઘટનાક્રમ સમજવા માટે દિવ્ય ભાસ્કરના રિપોર્ટર ત્રણ દિવસ ગણદેવી, ચિખલી અને નવસારીમાં રહ્યા અને ઇન્વેસ્ટિગેશન કર્યું. અમે કોંગ્રેસી નેતાઓને મળ્યા, જરૂર લાગી ત્યાં સ્ટિંગ ઓપરેશન કર્યું અને સત્તાવાર ઇન્ટરવ્યૂ પણ લીધા. જેમાં અમે જાણ્યું તે અમદાવાદના પ્રદેશ કાર્યાલયથી મેન્ડેટ કોણ લઈને નીકળ્યું? ફોર્મ ભરાઈ રહ્યા હતા ત્યારે મેન્ડેટ ક્યાં હતા? મેન્ડેટ મોડા પહોંચવા પાછળનું કારણ ખરેખરમાં શું છે? એ જાણવા માટે અમે વિવિધ નેતાઓને મળીને આખો ઘટનાક્રમ સમય પ્રમાણે ગોઠવ્યો. જેમાં ખરેખર કોની “ભૂલ” હતી એ ખબર પડી ગઈ. સૌથી પહેલાં આ કોષ્ટકમાં આપેલી માહિતી જુઓ. કોંગ્રેસના નેતાઓ સવા 1 વાગ્યાની આસપાસ ઉમેદવારો સાથે ફોર્મ ભરવા માટે ચિખલી પહોંચી ગયા હતા. ડિપોઝિટ જમા કરાવ્યાની રસિદમાં લખેલા સમય પ્રમાણે તેમણે પહેલું ફોર્મ વોર્ડ નંબર 2ના ઉમેદવાદ અમીના બેનનું 2 વાગીને 37 મિનિટે જમા કરાવ્યું હતું. જ્યારે છેલ્લું ફોર્મ પણ અમીના બેનનું વોર્ડ નંબર 3ના ઉમેદવાર તરીકે 2 વાગીને 55 મિનિટે જમા કરાવ્યું હતું. ફોર્મ જમા કરાવવાનો સમય 3 વાગ્યા સુધીનો હતો. એટલે જો 5 મિનિટ પહેલાં જ ફોર્મ જમા કરાવી દીધા હોય તો સમયસીમા પૂરી થતાં પહેલાં ઉમેદવાર કે અધિકારીઓને મેન્ડેટ યાદ આવ્યા હતા કે નહીં? કોંગ્રેસના ઉમેદવારોના ફોર્મ રદ થયા પછી 13મી એપ્રિલે નવસારી જિલ્લાના કોંગ્રેસ પ્રમુખ શૈલેષ પટેલની સૌથી પહેલી પ્રતિક્રિયા આવી હતી. તેમણે આ મુદ્દે આક્રોશ વ્યક્ત કરીને હાઇકોર્ટ જવા સુધીની તૈયારી દર્શાવી હતી. પણ પછી જાણે કાંઈ થયું જ ન હોય એમ ન તો શૈલેષ પટેલ આ બાબતે આગળ વધ્યા, ન તો પ્રદેશ કક્ષાએથી હલચલ જોવા મળી. એટલે અમે સૌથી પહેલાં શૈલેષ પટેલને મળવાનું નક્કી કર્યું. શૈલેષ પટેલ સાથે ટેલિફોનિક વાતચીત થયા પછી તેમણે 16 એપ્રિલે બપોરે 1 વાગ્યે રૂબરૂ મળવા માટેની તૈયારી દર્શાવી. જો કે 1 વાગ્યાનો વાયદો કર્યા બાદ પણ શૈલેષ પટેલ 3 વાગ્યે પહોંચ્યા. તેમણે ઓનરેકોર્ડ ઇન્ટરવ્યૂ આપવાનો ઇન્કાર કરી દીધો. એટલે નાછૂટકે અમારે સ્ટિંગ ઓપરેશન કરવું પડ્યું. રૂબરુ મુલાકાત દરમિયાન અમે સૌથી પહેલાં ફોર્મ ભરાયા એ દિવસના ઘટનાક્રમ અંગે સવાલ કર્યા. જેના જવાબમાં શૈલેષ પટેલે કહ્યું, મેન્ડેટ તો અમે જ અમદાવાદથી લાવીએ છીએ. અમે સવારમાં લખીને આપી દીધા હતા. કુલ 18 લોકોના મેન્ડેટ લખ્યા હતા. પણ અધિકારી રાજરમત રમી ગયા. તેમણે આગળ કહ્યું, કુલ 18 ઉમેદવારોના ફોર્મ ભરવાના હતા. એમના ફોર્મ અને ફી ભરવાની પ્રક્રિયા 3 વાગતા સુધીમાં પતી ગઈ. તમામ લોકો સંકુલમાં જ હતા. પણ ફોર્મમાં જે તે વસ્તુ ખુટે છે એમ કહેતા સમયમર્યાદા કરતા 7 મિનિટ વધુ થઈ ગઈ. પછી અમારા લોકો મેન્ડેટ આપવા ગયા એટલે ચૂંટણી અધિકારીએ ના પાડી દીધી. “અમારા આગેવાનોએ મને ફોન કર્યો. હું હાઇવે પર જ હતો. એટલે પાંચ મિનિટમાં પહોંચી ગયો. ત્યારે ચૂંટણી અધિકારી મિતેષ પટેલે મને પણ કહ્યું કે ‘સાત મિનિટ વધારે થઈ ગઈ છે.’ મેં કહ્યું, ‘ફી ભરી દીધી છે, તેની રસિદ પણ છે. એ લોકોએ ફોર્મમાં સુધારા તમારા અધિકારીની દેખરેખમાં કરતા હતા તો પછી વાંધો શું છે?’ મને 50 લાખની ઓફર હતી- શૈલેષ પટેલવાતવાતમાં શૈલેષ પટેલે એક ચોંકાવનારો દાવો કર્યો કે, ભાજપના કાર્યકરોએ મને પણ પ્રલોભન આપ્યા હતા. એ લોકો ચહેરા અને હોદ્દા જોઈને ઓફર કરે છે. મને નબળા ઉમેદવાર ઉભા રાખવા માટે 50 લાખ રૂપિયાની ઓફર હતી. જિલ્લા પંચાયતની જે પણ સીટ પર એ લોકો હારતા હોય ત્યાં મારે નબળા ઉમેદવાર મૂકવાના. એટલે એ લોકો જીતી જાય. મારે એવી 10 સીટ સેટ કરવાની હતી. એમાં 50 લાખ રૂપિયાની ઓફર હતી. પરંતુ અમે ઉમેદવાર મજબૂત મૂક્યા એટલે અમારા ઉમેદવાર ખરીદવા પડ્યા. એ લોકોએ ખરીદીને, ધમકાવીને ઉમેદવાર પાડી દીધા. પોલીસવાળા મને કહે છે કે ચૂંટણી વખતે સરખા રહેજો નહીં તો તમારા પર કેસ થશે. અમારી પાસે ઓફર તો ઘણા પ્રકારની આવે. પણ મારી પાસે એ લોકો નથી કરી શકતા. શૈલેષ પટેલ બોલ્યા, મારે કહેવું ન જોઈએ પણ મારા કાર્યકારી પ્રમુખને તો એ લોકોએ ખરીદી લીધો. એક રેગ્યુલર પ્રમુખ સાથે પણ સેટિંગ કરી લીધું. અમે વેરો ભર્યો, જેમ તેમ કરીને ઉમેદવારો તૈયાર કર્યા હતા- શૈલેષ પટેલશૈલેષ પટેલે અન્ય એક સવાલના જવાબમાં જણાવ્યું, અત્યારે કોંગ્રેસના ઉમેદવારોની સ્થિતિ એવી છે કે એ લોકોનો ઘર વેરો પણ અમારે ભરવો પડ્યો. એ લોકોની ડિપોઝિટ પણ આપવાની અને જેમ તેમ કરીને ચૂંટણી લડાવવા માટે લાવવાના. એવી પરિસ્થિતિમાં 18 ઉમેદવાર તૈયાર કર્યા હતા. શૈલેષ પટેલ સાથેની મુલાકાતથી એક વાત તો સ્પષ્ટ થઈ ગઈ કે ફોર્મ ભરાયા ત્યારે કોંગ્રેસના એક નેતા પાસે મેન્ડેટ હતા અને આ નેતા પ્રાંત અધિકારીની ઓફિસે જ હાજર હતા. પરંતુ આવી હકીકત સામે આવતા જ કેટલાક ગંભીર સવાલો પણ ઉઠ્યા. મેન્ડેટ વગર ફોર્મ ભર્યા એટલે ઉમેદવારી રદ થવી નક્કી હતી. વાજતેગાજતે ઉમેદવારી નોંધાવવા માટે ગયેલા કોંગ્રેસના નેતાઓ વીલા મોઢે એ દિવસે ઘરે પરત ફર્યા હતા. આ જ ઉમેદવારો સમગ્ર ઘટનાના પ્રત્યક્ષદર્શી હતા. એટલે સચોટ સત્ય જાણવા માટે અમે એવા નેતાને મળ્યા, જેનું ફોર્મ મેન્ડેટ ન હોવાના કારણે રદ થયું. અમારી મુલાકાત મયુર શાંતિલાલ મિસ્ત્રી સાથે થઈ. જેઓ ગણદેવી શહેર કોંગ્રેસ પ્રમુખ છે અને તેમણે વોર્ડ નંબર 3 અને વોર્ડ નંબર 5માંથી ઉમેદવારી નોંધાવવાની તૈયારી કરી હતી. વાંચો… મયુર મિસ્ત્રી સાથેના સવાલ-જવાબ. જેનાથી ઘણુ ખરું ચિત્ર સ્પષ્ટ થઈ જાય છે. પહેલાં શૈલેષ પટેલ અને ત્યાર બાદ મયુર મિસ્ત્રી સાથેની વાતચીતથી ખ્યાલ આવી ગયો કે મેન્ડેટ તો સમયસર મળી જ ગયા હતા. પરંતુ એ યોગ્ય સમયે રજૂ કેમ ન કર્યા? આ વાતનો જવાબ એક જ વ્યક્તિ પાસે મળે એમ હતો. આ વ્યક્તિ એટલે નવસારી જિલ્લા કોંગ્રેસના મંત્રી મિનેશ પટેલ ઉર્ફે મુન્નાભાઈ પટેલ. તેમણે મળવા અમે શહેર કોંગ્રેસની ઓફિસે પહોંચ્યા. કોંગ્રેસી નેતાએ કહ્યું, પ્રદેશ કક્ષાએથી કોઈ મદદ ન મળીગણદેવી શહેરમાં એક કોમ્પ્લેક્સના અંડરગ્રાઉન્ડ ફ્લોર પર કોંગ્રેસની ઓફિસ આવેલી છે. ઓફિસમાં ગાદલા પાથરીને બેસવાની વ્યવસ્થા કરવામાં આવી હતી. પણ ચૂંટણી જ ન હોવાના કારણે કાર્યાલય પર સન્નાટો હતો. અમે ત્યાં પહોંચ્યા તો ત્રણેક લોકો જ હાજર હતા. એક પીઢ કોંગ્રેસી કાર્યકરે કહ્યું, અહીંયાં કોંગ્રેસને ઉમેદવાર પણ નથી મળતા, માંડ ઉમેદવાર ઊભા રાખ્યા હતા. અમુક ઉમેદવારોનો વેરા પણ અમે અમારા ખિસ્સાના રૂપિયા કાઢીને ભર્યો હતો. અમને પ્રદેશ કોંગ્રેસે મદદ નથી કરી, કોઈ ફંડ નથી આપ્યું. ઝેરોક્ષ કરાવવાના રૂપિયા પણ અમારે ચૂકવવા પડે છે એવી હાલત છે. થોડા જ સમયમાં અમારી મુલાકાત નવસારી જિલ્લા કોંગ્રેસના મંત્રી મિનેશ પટેલ ઉર્ફે મુન્નાભાઈ પટેલ સાથે થઈ. મેન્ડેટ એમની પાસે હોવાનું અગાઉ બે લોકો કહી ચૂક્યા હતા. એટલે અમે સત્ય જાણવા માટે ટૂ ધી પોઈન્ટ અને આકરા સવાલો પૂછ્યા. દિવ્ય ભાસ્કર- તમે ફોર્મ ભરવા માટે કેટલા વાગ્યે નીકળ્યા હતા?મિનેશ પટેલ- અમે ચિખલીની કોંગ્રેસ ઓફિસથી ગણદેવી SDM કચેરીએ ફોર્મ ભરવા માટે એક-સવા એક વાગ્યાના અરસામાં નીકળ્યા હતા. અમે દોઢ વાગતા સુધીમાં કચેરીએ પહોંચી ગયા હતા. અમને એવી માહિતી આપવામાં આવી તે તમારા બધા ઉમેદવારોના ફોર્મ ઓબ્ઝર્વેશન રૂમમાં ચેક કરાવી લો. અમે ત્યાં ગયા અને ઉમેદવારોના ફોર્મ ચેક કરાવ્યા. એમણે (અધિકારીઓએ) અમને “ઓકે” લખીને આપ્યું અને કહ્યું, ‘તમે પ્રાંત અધિકારીની કચેરીમાં આ ફોર્મ જવા કરાવી દો અને ફી ભરી દો.’ એટલે અમે પ્રાંત અધિકારીની ઓફિસમાં ગયા અને બધાના ફોર્મ રજૂ કર્યા. એમણે ફોર્મ ચેક કરીને ફરીથી “ઓકે” લખ્યું. ત્યાર પછી બધાની ડિપોઝિટની રસીદ પણ ફડાવી આપી. ‘પછી ત્રણ વાગવામાં એક-બે મિનિટ બાકી હતી ત્યારે અમારા ગણદેવીના શહેર પ્રમુખ મયુર મિસ્ત્રીને પૂછ્યું કે તમારા મેન્ડેટ ક્યાં છે?’ ‘ત્યારે મયુર મિસ્ત્રી જવાબ આપ્યો, મેન્ડેટ બહાર જ છે. અમે તમને લાવીને આપીએ છીએ. આ રીતે વાત કરી તો તરત જ પ્રાંત અધિકારીએ કહ્યું, હવે સમય પૂરો થઈ ગયો છે, તમે મેન્ડેટ નહીં આપી શકો.’ દિવ્ય ભાસ્કર- તમને કોઈ લોભલાલચ આપવામાં આવી હતી?મિનેશ પટેલ- ના.. એવું કાંઈ નથી. પરંતુ ભાજપના મંત્રી દ્વારા જ પ્રાંત અધિકારીને દબાણ હોય કે કોંગ્રેસના ફોર્મ રદ કરવા, એવું થયું હોય એમ અમને લાગે છે. કારણ કે અમારી વાત જરાય સાંભળવામાં નથી આવી. ગણદેવીના અત્યાર સુધીના ઇતિહાસમાં ગણદેવી મામલતદાર ઓફિસ કે નગરપાલિકામાં જ ફોર્મ ભરવાની પ્રક્રિયા ચાલતી હતી. આ વખતે પહેલીવાર એવું થયું કે ચિખલીમાં પ્રાંત કચેરીએ ફોર્મ ભરવા જવાનું થયું. આ ફેરફાર કેમ આવ્યો તેનો ખ્યાલ નથી. દિવ્ય ભાસ્કર- તમે પ્રદેશ કક્ષાએ આ મુદ્દે કોઈ વાત કરી? ચૂંટણી અધિકારીના નિર્ણય વિરુદ્ધ તમે કોર્ટમાં જવાના હતા એનું શું થયું?મિનેશ પટેલ- શૈલેષ પટેલ સાથે વાત થઈ છે અને પ્રદેશકક્ષાએ પણ વાત થઈ છે. એમણે કહ્યું છે કે હાઇકોર્ટમાં અરજી કરવી પડશે. પ્રદેશમાં કોઈક વકીલ સાથે વાત થઈ છે. પ્રદેશ કક્ષાએથી કોઈક વકીલે કહ્યું છે કે આ પ્રક્રિયા ચાલુ જ રહેશે. પરંતુ ચૂંટણી પતે એના 15 દિવસની અંદર હાઇકોર્ટમાં અરજી દાખલ કરીશું. મિનેશ પટેલે દાવો કર્યો કે સુપ્રીમ કોર્ટ અને હાઇકોર્ટની ગાઇડલાઇન છે કે જો આવી પરિસ્થિતિમાં એક-બે મિનિટ આમતેમ થાય તો લોકશાહીના હિતમાં મેન્ડેટ સ્વીકારવા જોઈએ. પરંતુ કોઈ જાતની વાત માનવામાં નથી આવી. પ્રાંત અધિકારીએ ભાજપના કોઈ મંત્રીના દબાણમાં આવીને કામ કર્યું હોય એવું લાગે છે. ચૂંટણી અધિકારીએ મેન્ડેટ પ્રકરણ પર કહ્યું, અમારી પાસે વીડિયો પુરાવા છેપરિસ્થિતિ વધુ સ્પષ્ટ રીતે સમજી શકાય એ હેતુથી અમે ચિખલીના પ્રાંત અધિકારી અને ચૂંટણી અધિકારી તરીકે ફરજ બજાવતા મિતેશ પટેલને મળવાનું નક્કી કર્યું. જ્યારે અમે તેમને પ્રશ્ન કર્યો કે, ઉમેદવારો પાસે મેન્ડેટ હોવા છતાં માત્ર પાંચ-દસ મિનિટના વિલંબને કારણે લોકશાહીના હિતમાં ફોર્મ કેમ સ્વીકારવામાં ન આવ્યું? ત્યારે તેઓ ઓન-કેમેરા બોલવા તૈયાર નહોતા. જોકે, ઓફ-કેમેરા તેમણે આખી ઘટનાની વિગતો સમજાવી હતી. તેમણે જણાવ્યું કે, જ્યારે ઉમેદવારો ફોર્મ ભરવા આવે છે, ત્યારે વહીવટી તંત્ર તરફથી તેમને સંપૂર્ણ સહયોગ આપવામાં આવે છે અને અમે નિષ્પક્ષ રીતે જ કામ કરીએ છીએ. કોઈપણ રાષ્ટ્રીય પક્ષ વતી ઉમેદવારી નોંધાવતી વખતે પક્ષનું મેન્ડેટ જમા કરાવવું ફરજિયાત છે. અમે પૂરતી કાળજી રાખીએ છીએ કે તમામ પ્રક્રિયા સમયમર્યાદામાં પૂર્ણ થાય અને જો કોઈ ઉમેદવારને તકલીફ પડે તો અમે મદદ પણ કરીએ છીએ. કોંગ્રેસના ઉમેદવારોના ફોર્મ રદ થયા તે બાબતે ખુલાસો કરતા તેમણે ઉમેર્યું કે, અમારી ઓફિસના કેમેરા સતત કાર્યરત હોય છે. ફોર્મ જમા કરાવવાની અંતિમ તારીખે બપોરે ત્રણ વાગ્યા સુધીનો સમય હતો. અમારા કર્મચારીઓ દ્વારા વારંવાર બૂમો પાડીને ઉમેદવારોને બોલાવવામાં આવ્યા હતા, જે તમામ બાબતો કેમેરામાં કેદ થયેલી છે. આમ છતાં, કોંગ્રેસના ઉમેદવારો સમયસર મેન્ડેટ રજૂ કરી શક્યા નહોતા. નિયમ મુજબ, સમયમર્યાદા પૂર્ણ થયા બાદ અમે કશું કરી શકતા નથી. આ મુદ્દે અમે કોંગ્રેસના મુખ્ય પ્રવક્તા ડૉ.મનીષ દોશીને સવાલો કર્યો તેમણે કહ્યું, પક્ષ તરફથી ક્યાંય ભૂલ થઈ હશે, પક્ષના કોઈ આગેવાને કરી હશે, પક્ષના કોઈ સ્થાનિક પદાધિકારીએ કરી હશે તો તેને કોઈ પદ પર રાખવામાં નહીં આવે. કારણ કે હજારો કાર્યકરોની મહેનત લાગી હોય, હજારો મતદારો મતાધિકાર ગુમાવી દેતા હોય એવા સંજોગોમાં કોંગ્રેસની જવાબદારી બને છે કે આવું ખોટું થયું હોય તો ચલાવી લેવાય નહીં. જો કે હાઇકોર્ટ જવાનો દાવો કરતી કોંગ્રેસ અરજી ક્યારે કરશે એ મોટો સવાલ છે. કારણ કે બિનહરિફ ઉમેદવારોને ચૂંટણી અધિકારીએ સર્ટિફિકેટ આપી દીધા છે અને ભાજપ ગણદેવી પાલિકા પર સત્તા મેળવી ચૂક્યું છે. અગાઉ રાજ્યસભાની ચૂંટણીમાં એવું બની ચૂક્યું હતું કે કોંગ્રેસ ગેરરીતિના આરોપ લગાવીને ગણતરીના કલાકોમાં જ કોર્ટ તેમજ ચૂંટણીપંચ સુધી પહોંચી ગઈ હોય.

ભાસ્કર વિશેષ:ખરવા મોવાસા રસીકરણમાં રાજ્યમાં કચ્છ પ્રથમ

કચ્છ જિલ્લાના પશુપાલન વિભાગ દ્વારા પશુધનને ગંભીર રોગોથી સુરક્ષિત કરવાના હેતુ સાથે ‘ખરવા મોવાસા’ (FMD) રસીકરણની ખાસ ઝુંબેશની શરૂઆત 1 માર્ચથી કરવામાં આવી હતી છે. આ અભિયાન હેઠળ સમગ્ર જિલ્લાના અંદાજે 9,85,900 જેટલા ગાય અને ભેંસ વર્ગના પશુઓનું રસી આપવાનું આયોજન છે. . આ ખાસ ઝુંબેશ 1લી માર્ચથી 15મી એપ્રિલ સુધી સતત દોઢ મહિનો ચાલવાની હતી, પરંતુ આ ડેડ લાઈનમાં કેન્ચાદ્લર સરકાર દ્શેવારા 15 દિવસનો વધારો કરીને હવે 30 એપ્રિલ કરવામાં આવી છે. અત્યાર સુધીમાં કચ્છના 7 લાખ 33 હજાર 225 ગાય અને ભેંસને રસીકરણ સાથે રાજ્યમાં 75 ટકા કામગીરી સાથે પ્રથમ ક્રમે છે. જેમાં 6 મહિનાથી ઉપરની વયના તમામ ગાય અને ભેંસ વર્ગના પશુઓને આ રસી વિનામૂલ્યે આપવામાં આવી રહી છે. પશુપાલકોની સગવડતા માટે સરકારી પશુ દવાખાનાઓ ઉપરાંત ગામે-ગામ ખાસ રસીકરણ કેમ્પનું આયોજન કરાઈ રહ્યું છે. રસીકરણની પ્રક્રિયાને વેગ આપવા માટે 23 પશુ ચિકિત્સા અધિકારીઓ, 45 પશુધન નિરીક્ષકો અને 150 પેરાવેટ્સની ટીમ કાર્યરત કરવામાં આવી છે.રસીના જથ્થાને સુરક્ષિત રાખવા માટે તાલુકા કક્ષાએ કોલ્ડ ચેઈન જાળવવામાં આવી છે અને કોઈ પણ કટોકટી માટે વધારાનો જથ્થો અનામત રાખવામાં આવ્યો છે. નાયબ પશુપાલન નિયામક ડૉ. આર. ડી. પટેલ અને મદદનીશ પશુપાલન નિયામક ડૉ. વિજયભાઈ દેસાઈએ જિલ્લાના તમામ પશુપાલકોને અનુરોધ કર્યો છે કે, તેઓ પોતાના પશુધનને આ રસી અપાવી ખરવા મોવાસા જેવા જીવલેણ રોગ સામે રક્ષણ અપાવે. જો કોઈ પશુ બીમારી કે અન્ય કારણોસર રસીથી વંચિત રહી જાય, તો તેનો રેકોર્ડ રાખીને પાછળથી અચૂક રસીકરણ કરવામાં આવશે. પશુઓ માટે કેમ જરૂરી છે ખરવા-મોવાસાની વેક્સિનપશુઓમાં જોવા મળતો ખરવા-મોવાસાએ એક અત્યંત ચેપી વિષાણુજન્ય રોગ છે, જે પશુધનને ગંભીર શારીરિક નુકસાન પહોંચાડવાની સાથે પશુપાલકોને આર્થિક રીતે પાયમાલ કરી શકે છે. આ રોગ સામે સમયસર રસીકરણ કરાવવાથી પશુઓમાં મજબૂત રોગપ્રતિકારક શક્તિ કેળવાય છે, જે તેમને જીવલેણ સંક્રમણથી સુરક્ષિત રાખે છે. રસીકરણનો સૌથી મોટો ફાયદો એ છે કે તે પશુઓની દૂધ ઉત્પાદન ક્ષમતા જાળવી રાખે છે, કારણ કે આ રોગના પ્રકોપથી દૂધમાં 5% થી 50% સુધીનો મોટો ઘટાડો થઈ શકે છે. આ ઉપરાંત, રસીકરણથી પશુઓમાં ગર્ભપાત અને વંધ્યત્વ જેવી પ્રજનન સમસ્યાઓ અટકે છે અને બીમાર પશુઓના મોંઘા નિદાન તેમજ સારવારના ખર્ચમાં પણ મોટી બચત થાય છે. જો ગામના તમામ પશુઓને રસી અપાયેલી હોય, તો આખા વિસ્તારમાં રોગચાળાને ફેલાતો અટકાવી શકાય છે. આથી, પશુપાલકોએ આર્થિક સ્થિરતા અને પશુધનની તંદુરસ્તી માટે સરકાર દ્વારા ચલાવવામાં આવતા મફત અભિયાનનો લાભ લઈ દર છ મહિને આ રસી અચૂક અપાવવી જોઈએ. ખરવા-મોવાસા એટલે શું

નરનારાયણદેવનાં 203માં પાટોત્સવની ઉજવણી:અન્નકૂટ ઉત્સવમાં ભાવિકોની ભક્તિ છલકાઇ

ભુજ સ્વામિનારાયણ મંદિર ખાતે નરનારાયણદેવનાં 203મા પાટોત્સવ ઉજવાયો હતો. શ્રીહરિસ્મૃતિ પંચાહ્નપારાયણ જ્ઞાન યજ્ઞ અંતર્ગત પોથી યાત્રા યોજાઇ હતી. કથાના સમાપને મહા અભિષેક, અન્નકુટ ઉત્સવ, ઠાકોરજીની શોભાયાત્રા યોજવામાં આવી હતી. આ પ્રસંગે ધર્મકુળ આચાર્ય કૌશલેન્દ્રપ્રસાદજી મહારાજ ખાસ ઉપસ્થિત રહ્યા હતા. ભુજ, અંજાર, ગાંધીધામ, અબડાસા, રાપર , મુન્દ્રા તેમજ ચોવીસીના ગામોમાંથી મોટી સંખ્યામાં લોકો અભિષેક અને અન્નકુટ દર્શનનો લાભ લેવા ઉમટ્યા હતા. મંદિરનાં મુખ્ય કોઠારી સ્વામી દેવપ્રકાશદાસજીએ જણાવ્યું હતું કે, સ્વામિનારાયણ મંદિર ખાતે મહંત સ્વામી ધર્મનંદનદાસજી, ઉપમહંત સ્વામી ભગવજીવનદાસજી, પાર્ષદ કોઠારી જાદવજી ભગવતની આજ્ઞાથી નરનારાયણ દેવનાં 203માં પાટોત્સવના મુખ્ય યજમાન તરીકે મૂળ માધાપર હાલે બોલ્ટન લંડનના અ.નિ. વિશ્રામભાઈ કાનજી વરસાણી તથા અ.નિ. ખીમજીભાઈ હીરા વાગડીયા પરિવારના અક્ષરનિવાસી ભક્તોની સ્મૃતિમાં નાનદાસભાઈ સામજી વરસાણી સહ પરિવારે મુખ્ય યજમાન પદ સ્વીકાર્યું હતુ. સભાનું સંચાલન શાસ્ત્રી સ્વામી હરિકૃષ્ણદાસજી અને કૃષ્ણવિહારીદાસજીએ કર્યુ હતું. કથા દરમ્યાન ધામધૂમથી ઘનશ્યામ જન્મોત્સવ, શ્રીહરિ ભુજ આગમન, ફૂલદોલોત્સવ, ઠાકોરજીની શોભાયાત્રા સહિત પ્રસંગોની ઉજવણી કરાઇ હતી. ઉજવણીનાં સમાપને વહેલી સવારે વિધિવિધાન સાથે પંચામૃતથી ઠાકોરજીનો મહાઅભિષેક કરવામાં આવ્યો હતો. બાદમાં અન્નકૂટ ઉત્સવની ઉજવણી કરાઈ હતી. મહોત્સવને સફળ બનાવવા માટે કોઠારી સ્વામી ગોલોકવિહારી દાસજી, મુખ્ય કોઠારી રામજીભાઈ વેકરીયા, ઉપકોઠારી જાદવજીભાઈ ગોરાસીયા, ટ્રસ્ટીઓ ખીમજી ભગત, દિનેશ ભગત, ઘનશ્યામવલ્લભદાસજી, પુરૂષોત્તમપ્રિય દાસજી, શ્રીહરિપ્રસાદ દાસજી, વિજ્ઞાન દાસજી, ભક્તિપ્રકાશ દાસજી, પુરૂષોત્તમ સ્વરૂપદાસજી, કૃષ્ણવિહારી દાસજી, શાન્તિસ્વરૂ પદાસજી, નંદકિશો રદાસજી, ઘનશ્યામ ચરણદાસજી, ગોવલ્લભ દાસજી, દિવ્યપ્રસાદ દાસજી, વિવેકસાગર દાસજી, જગજીવન દાસજી, ઘનશ્યામ પ્રકાશદાસજી, બ્રહ્મવિહારી દાસજી, જ્ઞાનસ્વરૂપ દાસજી, જ્ઞાનપ્રિય દાસજી, નિલકંઠસ્વરૂપ દાસજી, ઘનશ્યામચરણ દાસજી, ઘનશ્યામસેવક દાસજી, પ્રેમવલ્લભ દાસજી આદિ સંતો, કચ્છ નરનારાયણ દેવ યુવક, યુવતી અને મહિલા મંડળે જહેમત ઉઠાવી હતી. શોભાયાત્રામાં મહિલા બેન્ડે આકર્ષણ જમાવ્યુંકથા પ્રારંભ પૂર્વે સ્મૃતિ મંદિરથી વાજતે-ગાજતે નીકળેલી પોથીયાત્રામાં સંતો, સાંખ્યયોગી બહેનો જોડાયા હતાં. પટેલ ચોવીસીની મંડળીએ કીર્તનની રમઝટ બોલાવી હતી જ્યારે મહિલા બેન્ડ અને પાઇપ બેન્ડે આકર્ષણ જમાવ્યું હતું. કથાનાં વક્તા તરીકે શાસ્ત્રી સ્વામી આનંદવલ્લભદાસજી, શાસ્ત્રી સ્વામી પ્રેમવલ્લભદાસજી, શાસ્ત્રી સ્વામી કૃષ્ણવલ્લભદાસજીએ કથાનું રસપાન કરાવ્યુ હતું.

કચ્છમાં ભારતીય સેનાનું શક્તિ પ્રદર્શન:સેનાએ જમીન અને જળના મોરચાઓ પર સૈન્ય વ્યૂહરચનાઓ પ્રદર્શિત કરી

ઓપરેશન સિંદૂરની પહેલી વર્ષગાંઠ પહેલા કચ્છમાં ભારતીય સેનાએ પોતાની શક્તિ, તૈયારીઓ અને આધુનિક યુદ્ધક્ષમતાનું પ્રભાવશાળી પ્રદર્શન કરીને વિશ્વપટલ પર સંદેશ મૂક્યો છે કે દેશની સુરક્ષા માટે તે સર્વદિશામાં સજ્જ છે. એર ડિફેન્સ રેજિમેન્ટ દ્વારા L70 એર ડિફેન્સ ગન અને ડ્રોન ટેકનોલોજીના પ્રદર્શન સાથે દુશ્મનના સંભવિત હુમલાઓને નિષ્ફળ બનાવવાની ક્ષમતા પણ રજૂ કરાઈ હતી. ડ્રોન ટેકનોલોજીના વધતા પ્રભાવ વચ્ચે સેનાએ દેખરેખ, લક્ષ્ય ઓળખ અને જેતે સમયની ગુપ્ત માહિતી એકતરીત કરવાની ક્ષમતાને વધુ મજબૂત બનાવી હતી. સાથે જ એર ડિફેન્સ સિસ્ટમ્સના ઝડપી પ્રતિસાદ આપવાની ક્ષમતા પણ સામે આવી હતી. કવાયતથી જમીન અને જળ બંને મોરચે સૈન્ય વ્યૂહરચનાઓનું પ્રદર્શન કરાયું, જેમાં ઓપરેશન સિંદૂર દરમિયાન સેનાએ ખાડી વિસ્તારમાં જમીન અને પાણી બંને પર પોતાનું વર્ચસ્વ જાળવી રાખ્યું હતું.

આગ લાગી:દયાપર-દોલતપર હાઇવે પર ટ્રકમાં અચાનક આગ લાગી

દયાપરથી એકાદ કિલોમીટરના અંતરે દોલતપર તરફથી આવી રહેલા ટ્રકમાં અચાનક આગ લાગી હતી. હાઈવે માર્ગ પર આવેલા પોલીસ મથક નજીક બુધવારે સવારે દસેક વાગ્યાના અરસામા બનાવ બન્યો હતો. ચિનાઈ માટીના પાઇપ ભરેલ ટ્રકમાં આગના બનાવને લઈને જીએમડીસી પાનધ્રો તેમજ ઉંમરસરમાં જાણ કરતા ફાયર ફાઈટર દોડી આવ્યા હતા. અને સળગતી ટ્રક પર પાણીનો મારો ચલાવી આગને કાબુમાં લીધી હતી. હાઇવે માર્ગ પર બનેલા બનાવને લઈને રસ્તાની બંને તરફ વાહનોને લાંબી કતાર લાગી ગઈ હતી. બનાવને પગલે દયાપર પોલીસ જવાનો પણ દોડી આવ્યા હતા. આગનો બનાવ ગાડીમાં શોર્ટ સર્કિટ થવાને કારણે બંને હોવાનું લોકોએ જણાવ્યું હતું. ટ્રકના આગળનો ભાગ બળીને ખાખ થઈ ગયો.

વિશ્વાસઘાત:ભાડાના બહાને સેન્ટરિંગનો સામાન મેળવી વેપારી સાથે વિશ્વાસઘાત કરાયો

સેન્ટ્રીંગનો સામાન ભાડે રાખવાના બહાને છેતરપીંડી કરવામાં આવી છે. ગણેશનગર વિસ્તારમાં રહેતા અને સેન્ટ્રીંગના વ્યવસાય સાથે સંકળાયેલા મુળજીભાઈ વેલજીભાઈ વેકરીયાએ આ મામલે ભુજ એ ડિવિઝન પોલીસ મથકે ફરિયાદ નોંધાવી છે. ફરિયાદીના જણાવ્યા અનુસાર, તેઓ કાન્તાબેન ગોરસિયાના પાવરનામું ધરાવીને સેન્ટ્રીંગનો વ્યવસાય સંભાળે છે અને મિરઝાપર હાઈવે પર આવેલી તેમની ઓફિસથી સામાન ભાડે આપવાનું કામ કરે છે. કોટડા ચકાર ગામનો રહેવાસી કાનજીભાઈ ખીમજીભાઈ મહેશ્વરી છેલ્લા ચાર વર્ષથી ફરિયાદી પાસેથી સેન્ટ્રીંગનો સામાન ભાડે લઈ જતો હતો. ગત ઓગસ્ટ 2025માં આરોપીએ અંજાર, ચકાર અને શેખપીર જેવા સ્થળોએ બાંધકામ ચાલતું હોવાનું જણાવી લોખંડની પ્લેટો સહિતનો અંદાજે રૂપિયા 3.50 લાખની કિંમતનો સામાન ભાડે લીધો હતો. આ સામાન ઓક્ટોબર 2025 સુધીમાં પરત કરવાનો હતો, પરંતુ આરોપીએ સામાન પરત કરવાને બદલે ગલ્લાતલ્લાં શરૂ કર્યા હતા. ભાડા પેટે લીધેલો સામાન પરત ન કરી અને ભાડાની રકમ પણ ન ચૂકવી આરોપીએ વેપારી સાથે પૂર્વયોજિત કાવતરું રચી 3.50 લાખનો સામાન અને 35 હજાર ભાડું મળી 3.85 લાખની છેતરપિંડી આચરી હતી. આ મામલે એ ડિવિઝન પોલીસે ગુનો નોંધી આગળની તપાસ હાથ ધરી છે. ઉઘરાણી માટે ફોન કર્યા તો ફોન ઉપાડવાનું બંધ કરાયુંફરિયાદીના કર્મચારીઓએ જ્યારે સામાનની ઉઘરાણી માટે ફોન કર્યા ત્યારે આરોપીએ ફોન ઉપાડવાનું બંધ કરી દીધું હતું. શંકા જતાં વેપારીના માણસોએ તપાસ હાથ ધરી તો ચોંકાવનારી વિગતો પ્રકાશમાં આવી હતી. આરોપી કાનજી મહેશ્વરીએ આ ભાડાનો સામાન પરત કરવાને બદલે અન્ય વ્યક્તિઓને બારોબાર વેચી માર્યો હતો અથવા પધરાવી દીધો હતો. તપાસ દરમિયાન જાણવા મળ્યું કે કેટલોક સામાન શીણાઈ પાસેની એક સંસ્થામાં પડ્યો હતો, જ્યારે અન્ય સામાન અન્ય શખ્સોને વેચી દેવામાં આવ્યો હતો.

કરુણાંતિકા:પશ્ચિમ કચ્છમાં આપઘાત-અપમૃત્યુની ઘટનાઓમાં 4 વ્યક્તિના કરૂણ મોત

પશ્ચિમ કચ્છ જિલ્લામાં અકસ્માત મોતના ચાર અલગ-અલગ બનાવો નોંધાયા છે, જેમાં વીજ કરંટ અને ફાંસો ખાવાને કારણે ચાર લોકોએ જીવ ગુમાવ્યા છે. ગઢશીશા પોલીસ સ્ટેશન વિસ્તારના નાગ્રેચા ગામની સીમમાં એક કરૂણ અકસ્માત સર્જાયો હતો. 60 વર્ષીય કાદર હાસમ માંજોઠી બકરા ચરાવવા માટે સીમમાં ગયા હતા. બકરાના ચારા માટે લીમડાના ઝાડ પર ચઢી ડાળીઓ કાપી રહ્યા હતા ત્યારે ઉપરથી પસાર થતી વીજ લાઇન સાથે સંપર્ક થતાં જોરદાર વીજ આંચકો લાગ્યો હતો. તેમને સારવાર માટે ગઢશીશા સરકારી હોસ્પિટલ ખસેડવામાં આવ્યા હતા, જ્યાં ફરજ પરના તબીબે તેમને મૃત જાહેર કર્યા હતા. ગઢશીશા પોલીસે અકસ્માત મોતની નોંધ દાખલ કરી તપાસ હાથ ધરી છે. આ તરફ મુંદરા પોલીસની હદમાં આવતા મોટા કાંડાગરા પાસેની અદાણી કોલોનીમાં રહેતા 23 વર્ષીય મોહમ્મદ સલામ (મૂળ રહે. બિહાર) એ કોઈ અગમ્ય કારણોસર પોતાના ઘરે ફાંસો ખાઈ આત્મહત્યા કરી હતી. આ જ કોલોનીમાં રહેતા 40 વર્ષીય સંજીત બાદલ ઘોષ (મૂળ રહે. પશ્ચિમ બંગાળ) એ અગમ્ય કારણોસર ફાંસો ખાઈ જીવનલીલા સંકેલી હતી. મુન્દ્રા પોલીસે બંને બનાવોમાં એડી દાખલ કરી છે. દરમિયાન ભુજ એ ડિવિઝન પોલીસ સ્ટેશનમાંથી જાણવા મળતી વિગતો મુજબ, જૂની રાવલવાડી વિસ્તારમાં રહેતા 27 વર્ષીય યોગેશ રવજી સોલંકી નામના યુવાને કોઈ અગમ્ય કારણોસર પોતાના ઘરે રાત્રિના સમયે ફાંસો ખાઈ જીવાદોરી ટૂંકાવી હતી. બનાવ અંગે પોલીસે એડી દાખલ કરીને મોતના કારણો જાણવા માટે તપાસ હાથ ધરી છે

સિટી એન્કર:કોણ કહે છે કે ગુજરાતીઓ વાંચતા નથી મોબાઈલ સ્ક્રીન ટાઈમના યુગમાં સંસ્થાએ વર્ષમાં રૂ.1.44 કરોડના જ્ઞાનવર્ધક પુસ્તકો વેચ્યા

આજના ડિજિટલ યુગમાં જ્યાં લોકોમાં મોબાઈલ સ્ક્રીનનો સમય વધતો જાય છે. જેને લઈને છેલ્લા 5 વર્ષોમાં વાંચનનો ગ્રાફમાં નોંધપાત્ર ઘટાડો જોવા મળ્યો છે. તે વચ્ચે ભુજની સંસ્થા મોટા પબ્લિકેશન્સ પાસેથી ડિસ્કાઉન્ટમાં પુસ્તકો મેળવીને તે જ ભાવે વાચકો સુધી પહોંચાડે છે. તેમણે ગત વર્ષમાં રૂ.1.44 કરોડના પુસ્તકોનું વેંચાણ કરીણે વાંચન સંસ્કૃતિને જીવંત રાખવાનું એક ઉદાહરણ પૂરું પાડ્યું છે. ભુજ મીરજાપર રોડ પર આવેલી સહજાનંદ રૂરલ ડેવલોપમેન્ટ ટ્રસ્ટ સંચાલિત બુકસ્ટોલ જ્યાં દરેક વયના વાંચકો માટે પુસ્તકો ઉપલબ્ધ છે. જેમાં દેશ દુનિયાના લેખકો, સ્પર્ધાત્મક પરીક્ષાઓના પુસ્તકો,બાળકો માટે મેગેઝીન સહિતના પુસ્તકો, મેગેઝીન, ડિક્શનરીઓનો સમાવેશ થાય છે. સંસ્થા, માત્ર કચ્છ નહીં પણ સમગ્ર ગુજરાતમાં, મુંબઈ, દિલ્લી સુધી પુસ્તકો કુરિયર કરી મોકલાવે છે. તેમજ રાજ્યની ઘણી શાળાઓની લાઇબ્રેરી સુધી પણ સંસ્થાના પુસ્તકો પહોંચે છે. સંસ્થામાં કાર્યરત પ્રદીપભાઈ જણાવે છે કે, અહીં નૉમિનલ ફી ડિપોઝિટ પર લાઇબ્રેરીની સુવિધા પણ ઉપલબ્ધ છે, જેથી વાંચકોને પુસ્તકો અહી જ વાંચી શકે છે. આધુનિક સમયમાં મોબાઈલ અને સોશિયલ મીડિયાને લીધે છેલ્લા પાંચક વર્ષમાં વાંચનનો ગ્રાફ નોંધપાત્ર રીતે નીચે આવ્યો છે. સામે, ખાસ કરીને યુવાનોમાં સરકારી નોકરી માટેની સ્પર્ધાત્મક પરીક્ષાઓને લઈને પુસ્તકોનો વપરાશમાં પણ નોંધપાત્ર વધારો થયો છે. સંસ્થાએ વર્ષ 2024-25માં રૂ.1.44 કરોડના પુસ્તકોનું વેચાણ કર્યું છે. જેના પરથી એ સાબિત થાય છેકે, લોકો હવે વાંચતા નથી, એવી વાત ઘણી જગ્યાએ સાંભળવામાં આવે છે.ખાસ કરીને મોબાઈલના વધતા ઉપયોગને કારણે, પરંતુ આ માન્યતા સંપૂર્ણ સત્ય નથી. ઘણી વખત લોકો કોઈ ચોક્કસ માહિતી વગર જ આ વાત માની લે છે, જ્યારે હકીકતમાં ઉપલબ્ધ આંકડાઓ તેનો વિરોધ કરે છે. ભારતમાં અંદાજે 1 લાખ કરોડનો પુસ્તક બજાર, વિશ્વમાં 10મું સ્થાનયુનેસ્કો 1995થી આજના દી’એ વર્લ્ડ બુક ડે ઉજવે છે. ઈન્ડિયન બુક્સ માર્કેટ સાઇઝ એન્ડ આઉટલુક રિપોર્ટ મુજબ 2025 દરમિયાન દેશમાં અંદાજે 1 લાખ કરોડ રૂપિયાનાં પુસ્તકો છપાયા અને વેચાણા છે. વર્ષ 2025 દરમિયાન ભારતમાં લગભગ 90 હજાર નવા પુસ્તકો પ્રકાશિત થયા હતા.

જનસભામાં સાંસદ દ્વારા ચંદ્રકાન્ત શ્રીવાસ્તવ સામે આક્ષેપો:વોર્ડ-16માં 30 વર્ષથી પાણીનું પોલિટિક્સ, વોર્ડ ઓફિસર સાથે સેટિંગ: ડો.હેમાંગ જોશી

વોર્ડ નંબર 16માં જનસભામાં સાંસદ ડો.હેમાંગ જોશીએ વિપક્ષના નેતા ચંદ્રકાન્ત શ્રીવાસ્તવ સામે આક્ષેપો કર્યા હતા. જેમાં વોર્ડ નંબર 16ની અંદર છેલ્લા 30 વર્ષથી વોર્ડ ઓફિસર અને તેનાથી નીચેના અધિકારીઓ સાથે સેટિંગ કરીને યોજનાબદ્ધ રીતે વિકાસ કરવામાં આવતો ના હોવાનું જણાવ્યું હતું. વોર્ડ નંબર 16ની અંદર છેલ્લા 30 વર્ષથી વોર્ડ ઓફિસર અને તેનાથી નીચેના અધિકારીઓ સાથે સેટિંગ કરીને યોજનાબદ્ધ રીતે વિકાસ કરવામાં આવતો નથી. 5 વર્ષ પછી એજ મુદ્દાને ઉછાળીને એક સિનિયર કોર્પોરેટર સત્તા પર આવી જાય છે. પાણી પોલિટિકસ ચાલે છે. પહેલા પાણીની વાલ્વ બંધ કરીને ચાવી ખોઈ નાખવાની. ભાજપના કોર્પોરેટર અધિકારી ફોન કરે તો અધિકારી મળતા નથી. પછી અચાનક કોંગ્રેસના સિનિયર કોર્પોરેટર આવી જાય એટલે ચાવી પણ મળી જાય અને પાણી પણ આવી જાય. તેમજે લોકોની અંદર એવું આભાસી ચિત્ર ઉભું કરાવવામાં આવે કે ભથ્થુભાઇ આવ્યા એટલે જ પાણી આવ્યું. આવા હથ્થકડ્ડા કરીને વોર્ડ નંબર 16માં તેઓ અત્યાર સુધી શાસનમાં આવી રહ્યા છે. આ જ પ્રકારનો અનુભવ ત્યારે બંગાળમાં ત્યારે મમતા બેનર્જીનો જોયો છે. પાણી પોલિટિકસ ચાલી છે. વોર્ડ ઓફિસર અને તેનાથી નીચેના અધિકારીઓ સાથે ભથ્થુંનું સેટિંગ છે. બંગાળની ચૂંટણી સાથે સાંસદે વડોદરાની ચૂંટણીને પણ જોડીસાંસદ ડો.હેમાંગ જોશીએ ભથ્થુભાઇ આવ્યા એટલે કામ થઇ રહ્યું છે તેવું આભાસી ચિત્ર ઉભું કરવામાં આવી રહ્યું છે. તેમણે કહ્યું હતું કે આ જ પ્રકારનો અનુભવ મે બંગાળમાં ત્યારે મમતા બેનર્જીનો જોયો છે. આ પ્રોપોગેન્ડાનું રાજકારણ કરવામાં આવે છે. તમને અહી મત મળી જશે તો ઉપર ભગવાન માફ નહીં કરે. જનતાનો વિકાસ કેવી રીતે અટકી જાય તેવું કામ કરે છે. જનતાની હાય લાગશે. સાંસદની અધિકારીઓને ચીમકી, ચૂંટણી પછી જોઇ લઇશવોર્ડ નંબર 16ના વોર્ડ ઓફિસર અને અધિકારીઓને સાંસદે જાહેર મંચ પરથી ચીમકી આપી હતી. જેમાં તેમણે કહ્યું હતું કે વોર્ડ નંબર 16ના જે અધિકારીઓને ભથ્થુભાઇ સાથે સેટિંગ છે તે તમામને ચૂંટણી પછી તમને જોઇ લઇશું.

બીસીએની ચૂંટણીનો વિવાદ જટિલ બન્યો:કિરણ મોરે સહિત 4ના ગેરલાયક ઠરવાના મુદ્દે સુપ્રીમના 2022ના ચૂકાદાનું અર્થઘટન મગાશે

બીસીએની ચૂંટણીનો વિવાદ જટિલ બન્યો છે. હાઇકોર્ટના ચીફ જસ્ટિસની બેંચ સમક્ષ સુનાવણીમાં નવો વળાંક આવ્યો છે. ઉમેદવારોએ સુપ્રીમ કોર્ટના 2022ના આદેશો બાબતે કાયદાકીય સ્પષ્ટતાઓ મેળવવા સુપ્રિમમાં અરજી કરવાની પરવાનગી માગી હતી. ચીફ જસ્ટિસની કોર્ટે તેને સ્વીકારી હવે વધુ સુનાવણી 9 જૂન પર રાખી છે. તે પહેલાં સુપ્રિમ કોર્ટમાંથી અભિપ્રાય આવે તો સુનાવણીની માટે તારીખ માગી શકાશે. સુપ્રિમ કોર્ટે 2022માં સ્પોર્ટ્સ એસો.હોદ્દેદારોની યોગ્યતા મુદ્દે ચૂકાદો આપ્યો હતો. તે કેસનું અર્થઘટન કરવા સુપ્રિમ કોર્ટમાં અરજી કરાશે. ત્યારબાદ કેસમાં મહત્ત્વનો વળાંક આવશે. આગામી સુનાવણી સુધી કોર્ટે વચગાળાની વ્યવસ્થા યથાવત રાખવાનો આદેશ આપ્યો છે. એટલે કે વર્તમાન કમિટીની સત્તાઓ મર્યાદિત રહેશે અને તેઓ માત્ર રોજિંદા વહીવટી કામો જ કરી શકશે. કોઈપણ મોટા નીતિવિષયક નિર્ણયો લેવા પર મનાઈ ફરમાવવામાં આવી છે અને ચૂંટણીનું પરિણામ પણ અત્યારે જાહેર કરી શકાશે નહીં. આ મામલો પૂર્વ ક્રિકેટર કિરણ મોરે સહિત 4 સભ્યોની ઉમેદવારીની લાયકાતનો છે. સિંગલ જજે તેમને ચૂંટણી લડવા અયોગ્ય ઠેરવ્યા હતા, ઉમેદવારોએ ચીફ જસ્ટિસની બેંચમાં અપીલ કરી છે. તેમની દલીલ છે કે સુપ્રીમના નિયમ મુજબ સમય મર્યાદા બાદ હોદ્દા પર રહેનાર ફરી ચૂંટણી લડી શકે નહીં. ચીફ જસ્ટિસની કોર્ટે પણ નોંધ્યું છે કે, ચૂંટણી અધિકારીએ સુપ્રીમ કોર્ટના નિર્દેશોનું પાલન કરવું અનિવાર્ય છે. સુપ્રિમ કોર્ટના આ ચુકાદાના અર્થઘટન માટે અરજી કરાશે કોઈ મોટા નિર્ણય લઈ કોર્ટનું કન્ટેમ્પ્ટ કરે તો હાઈકોર્ટમાં જઈશુંહાલની એપેક્ષ બોડી કોઈ મહત્ત્વના નિર્ણય લઈને કોર્ટનું કન્ટેમ્પ્ટ કરે તો અમે હાઈકોર્ટ જઈશું. તમામ કામો પર અમે નજર રાખી રહ્યા છે. > ડૉ.દર્શન બેંકર, પ્રમુખપદના ઉમેદવાર, બીસીએ

કાર્યવાહી:રાણા બોરડી ગામે ચૂંટણીની આચારસંહિતા ભંગની ફરિયાદમાં તલાટીમંત્રીને નોટિસ

પોરબંદરના રાણા બોરડી ગામે ભૂતપૂર્વ તલાટીમંત્રી સામે ગેરકાયદેસર ગ્રામ પંચાયત પ્રવેશ કરવા બદલ ચૂંટણીની આચાર-સહિતા ભંગની ફરિયાદ થઈ હતી જે બાબતે પોરબંદર તાલુકા પંચાયતના તાલુકા વિકાસ અધિકારી દ્વારા આ તલાટીમંત્રીને નોટીસ આપી ખુલાસો માંગવામાં આવ્યો છે. પોરબંદર તાલુકામાં ફરજ બજાવતા તલાટી કમમંત્રી આશિષભાઈ અમલાણી સામે ફોજદારી કેસ દાખલ કરીને સસ્પેન્ડ કરવા સહિત, ચૂંટણી આચાર-સંહિતા દરમિયાન ગેરકાયદેસર રીતે પોતાના ફરજ વિસ્તાર છોડી દેવા અને શિસ્તનું ઉલ્લંઘન કરવા બદલ કાયદેસરની કાર્યવાહી કરવા તથા તપાસ કરવા ચૂંટણીપંચ ગાંધીનગર તેમજ ચૂંટણી અધિકારીને લેખિત રજુઆત કરવામાં આવી હતી ત્યારે આ લેખિત ફરિયાદ બાબતે તલાટીમંત્રીને નોટીસ આપવામાં આવી છે. પોરબંદર તાલુકા પંચાયતના તાલુકા વિકાસ અધિકારી દ્વારા નોટીસ આપી ખુલાસો માંગવામાં આવ્યો છે. ઘટનાને લઇ ભારે ચર્ચા જાગી છે. ચૂંટણીમાં અધિકારી સામે આચાર-સંહિતા ભંગની પ્રથમ ફરિયાદ સામાન્ય રીતે ચૂંટણી દરમ્યાન એકબીજા પક્ષ અને ઉમેદવારો આચાર-સંહિતા ભંગની ફરિયાદ કરતા હોય છે ત્યારે આ ચૂંટણીમાં પોરબંદર જિલ્લામાં તલાટીમંત્રી સામે આચાર-સંહિતા ભંગની પ્રથમ ફરિયાદ થઈ છે.

અનોખો રાજકીય ઇતિહાસ:29 વર્ષથી પોરબંદર જિલ્લા પંચાયતમાં ભાજપનો‎અજય ગઢ, કોંગ્રેસ માત્ર વિરોધપક્ષમાં જ રહી‎

પોરબંદર જિલ્લા પંચાયતના અનોખો રાજકીય ઇતિહાસ જોવા મળ્યો છે.પોરબંદર જિલ્લા પંચાયત અસ્તિત્વથી અત્યાર સુધી ભાજપનું જ શાસન જોવા મળ્યું છે તો કૉંગ્રેસ તેમજ અન્ય પક્ષ માત્ર વિરોધ પક્ષમાં જ રહ્યો છે.ત્યારે હાલની ચૂંટણીમાં જિલ્લા પંચાયતનો ઇતિહાસ બદલશે કે કેમ તે જોવાનું રહ્યું છે. પોરબંદર જિલ્લાનો વિસ્તાર અગાઉ જૂનાગઢ જિલ્લામાં સમાવેશ થતો હતો ત્યારે 2 ઓક્ટોબર 1997માં પોરબંદર જિલ્લાની જાહેરાત કરી અને અસ્તિત્વમાં આવ્યો હતો ત્યારે પોરબંદર જિલ્લાના અસ્તિત્વ સાથે સાથે પોરબંદર જિલ્લા પંચાયતનું પણ અસ્તિત્વમા આવી હતી ત્યારે આ જિલ્લા પંચાયતમાં પોરબંદર,રાણાવાવ અને કુતિયાણા પંચાયતનો સમાવેશ કરવામાં આવ્યો હતો.પરંતુ પોરબંદર જિલ્લા પંચાયતના અસ્તિત્વથી અત્યારસુધીમાં અનોખો રાજકીય ઇતિહાસ જોવા મળ્યો છે. પોરબંદર જિલ્લા પંચાયતના 29 વર્ષથી ભાજપનું અજય ગઢ જોવા મળી રહ્યો છે.અને કૉંગ્રેસ માત્ર વિરોધપક્ષમાં રહી છે.જિલ્લા પંચાયતની ચૂંટણીમાં દર વખતે કૉંગ્રેસના માત્ર 2 થી 5 જેટલા સભ્યોની જ જીત થતી હોવાની વિગતો સામે આવી છે ત્યારે આ સ્થાનિક સ્વરાજ્યની ચૂંટણીમાં જિલ્લા પંચાયતમાં કોનું શાસન રહેશે તે જોવાનું રહ્યું છે. 29 વર્ષ પૂર્વે જિલ્લા પંચાયતમાં 149 ગ્રામ પંચાયતો કાર્યરત હતીપોરબંદર જિલ્લા પંચાયતનું અસ્થિત્વમાં આવી ત્યારે પોરબંદર જિલ્લા પંચાયત હેઠળ હાલમાં 3 તાલુકા પંચાયતો અને 149 ગ્રામ પંચાયતો કાર્યરત હતી.જેમાં પોરબંદર તાલુકા પંચાયતમાં 74 ગ્રામ પંચાયતો,કુતિયાણા તાલુકા પંચાયતમાં 46 ગ્રામ પંચાયતો અને રાણાવાવ તાલુકા પંચાયતમાં 29 ગ્રામ પંચાયતોનો સમાવેશ કરાયો હતો જોકે હાલ અમુક ગ્રામ પંચાયત મનપામાં સમાવેશ થયો છે.

ઉનાળે મિજાજ બદલ્યો:બપોરે તાપ, રાત્રે ભેજ સાથે ઠંડક પ્રસરી; મહતમ 36, લઘુતમ તાપમાન 21.5 ડિગ્રી નોંધાયું

પોરબંદરમાં મહતમ તાપમાન 36 ડિગ્રી યથાવત રહ્યું છે જ્યારે લઘુતમ તાપમાન 21.5 ડિગ્રી નોંધાયું છે અને વાતાવરણમાં ભેજનું પ્રમાણ 41 ટકા યથાવત રહ્યું છે, ત્યારે સવાર થી સાંજ ગરમી અને રાત્રે ભેજ વાળું વાતાવરણ રહે છે. પોરબંદરમાં ઉનાળાએ હવે પોતાનું અસલી સ્વરૂપ દેખાડવાનું શરૂ કર્યું છે. બુધવારે મહત્તમ તાપમાન 36 ડિગ્રી અને લઘુતમ 21.5 ડિગ્રી નોંધાતા દિવસ-રાતના માહોલમાં ફેરફાર જોવા મળ્યો હતો.બપોરના સમયે કાળઝાળ ગરમી અને તાપના કારણે રસ્તાઓ સૂમસામ જોવા મળ્યા હતા. આકરા તાપનો કારણે લોકો પસીને રેબઝેબ થતા નજરે ચડ્યા હતા અને લોકો છાંયો અને ઠંડક શોધતા નજરે પડ્યા હતા. વાતાવરણમાં 41 ટકા ભેજના પ્રમાણને કારણે ગરમી સાથે ઉકળાટનો અનુભવ પણ થયો હતો, જોકે, સાંજ બાદ હળવા પવન સાથે થોડી રાહત મળી હતી અને રાત્રે ભેજભરી ઠંડક ભર્યું વાતાવરણ અનુભવાયું હતું, શહેરમાં હાલ ગરમી-રાહતનો મિશ્ર માહોલ જોવા મળી રહ્યો છે.

ફરિયાદ:કાર વેચાણ સોદો રદ કરતા 3 શખ્સે ઘરે જઈ આધેડને ધમકી આપી

શહેરમાં કાર વેચાણ સોદો રદ થતા 3 શખ્સે આધેડના ઘરે જઈ ધમકી આપી હતી. શહેરમાં મીરાનગર પાછળ આવેલ યશોદા પાર્કમાં રહેતા 52 વર્ષીય ગીરીશભાઈ નરોત્તમભાઈ વાઘેલાએ પોતાની જીજે 03 એલબી 5685 નંબરની કાર ખલીલપુર રોડ વિસ્તારમાં રહેતા બ્રીજેશ વિજયભાઈ યાદવને રૂ. 5,17,000માં વેચવાનું નક્કી કર્યું હતું. જોકે, બ્રીજેશે માત્ર રૂ. 87,000 ચૂકવ્યા હતા અને બાકીની રકમ લાંબા સમય સુધી ન ચૂકવતા સોદો પૂર્ણ થયો ન હતો. આ દરમિયાન કાર હજુ પણ ગીરીશભાઈના નામે જ હોવાથી અને અન્ય લોકો તે ફેરવતા હોવાનું જણાતા, તેઓએ પોતાની કાર પરત મેળવી લીધી હતી. ​આ બાબતનો ખાર રાખીને ગત તા. 16 એપ્રિલના રોજ વહેલી સવારે 5 વાગ્યાના અરસામાં બ્રીજેશ યાદવ, દોલતપરામાં રહેતા રામભાઈ રામદેભાઈ ઓડેદરા અને સલીમભાઈ નામના ત્રણ શખ્સો આધેડના ઘરે પહોંચ્યા હતા. શખ્સોએ ઘરનો દરવાજો જોરજોરથી ખખડાવી ગાળાગાળી કરી હતી. ગીરીશભાઈ બહાર આવતા જ શખ્સોએ ઉશ્કેરાઈને કહ્યું હતું કે, 'તમે સોદો કેન્સલ કરી મોટી ભૂલ કરી છે, હવે ઘરની બહાર નીકળશો તો જીવતા નહીં મૂકીએ.’ એવી ધમકી આપતા ગીરીશભાઈએ તુરંત 112 પર પોલીસને જાણ કરતા ત્રણેય શખ્સ નાસી છૂટ્યા હતા. સી ડિવિઝન પોલીસે આધેડની ફરિયાદ લઈ વધુ તપાસ હાથ ધરી હતી.

ધરપકડ:સગીરાનાં અપહરણનો આરોપી 4 વર્ષે ઝડપાયો

બાંટવા પોલીસ સ્ટેશનમાં નોંધાયેલા અપહરણના ગુનામાં છેલ્લા 4 વર્ષથી પોલીસને થાપ આપી નાસતા-ફરતા આરોપીને ઝડપી જૂનાગઢ ક્રાઈમ બ્રાન્ચ અને પૅરોલ ફર્લો સ્ક્વોડે ગાંધીનગરથી ભોગ બનનાર સાથે દબોચી લઈ આગળની કાર્યવાહી કરી હતી. સ્થાનિક સ્વરાજ્યની ચૂંટણીને ધ્યાને રાખીને, લાંબા સમયથી ફરાર આરોપીઓને પકડવા માટે ખાસ ડ્રાઈવનું આયોજન કરાયું હતું. ક્રાઈમ બ્રાન્ચની ટીમને તપાસ દરમિયાન ટેકનિકલ સોર્સ અને ખાનગી બાતમીદારો પાસેથી માહિતી મળી હતી કે વર્ષ 2022ના બાંટવા પોલીસ મથકમાં નોંધાયેલા અપહરણના ગુનાનો આરોપી માણાવદર તાલુકાના બુરી ગામનો રાજકુમાર ભાણજીભાઈ પારધી ઉં.વ. 25 હાલ ગાંધીનગર જિલ્લાના દહેગામ પાસે કડાદરા જીઆઈડીસીમાં આવેલ 'વીર સાઈન બોર્ડ' નામના કારખાને છુપાયો છે. ​બાતમીના આધારે ક્રાઈમ બ્રાન્ચ, પેરોલ ફર્લો સ્ક્વોડે દરોડો પાડી આરોપી રાજકુમાર પારધીને દબોચી લીધો હતો. તેની સાથે ગુનામાં ભોગ બનનાર વ્યક્તિ પણ મળી આવી હતી. ઉલ્લેખનીય છે કે આરોપી વિરુદ્ધ કોર્ટ દ્વારા સીઆરપીસી કલમ 70 મુજબનું વોરંટ પણ જારી કરવામાં આવ્યું હતું. આ કેસમાં વધુ તપાસ માનવ તસ્કરી વિરોધી એકમ ચલાવતી હોવાથી, પકડાયેલા આરોપીને આગળની કાર્યવાહી માટે તેને સોંપી દેવાયો હતો.

કાર્યવાહી:જોડીયાના ચાર શખસની PIT NDPS એકટ હેઠળ અટકાયત

જામનગર સ્પેશ્યલ ઓપરેશન ગ્રૃપ દ્વારા પીઆઇટી એનડીપીએસ એકટ હેઠળ જોડીયાના ચાર શખસોની અટકાયત કરી અમદાવાદ, વડોદરા, સુરત અને ભુજ જેલ હવાલે કરવામાં આવ્યા છે.રાજયના સીઆઇડી ક્રાઇમના વડાએ દરખાસ્તને મંજુર કરતા પોલીસે ચારેયને સંકજામાં લીઘા હતા. રાજયને નશામુકત કરવા ખાસ અભિયાનના અનુસંધાને જિલ્લામાં માદક પદાર્થના વેચાણ અને વહન અંગે કેસો કરવા સાથે આવા ઇસમોને ઝડપી પાડવા તદુપરાંત વારંવાર ગુનાઓ કરતા તત્વો વિરૂધ્ધ પીઆઇટી એનડીપીએસ એકટ મુજબની દરખાસ્ત તૈયાર કરવા જિલ્લા પોલીસ વડા ડો. રવિ મોહન સૈનીની સૂચના અને માર્ગદર્શન હેઠળ એસઓજી પીઆઇ બી.એન. ચૌધરી તથા ટીમ દ્વારા એનડીપીએસ એકટ હેઠળના ગુનામાં સંડોવાયેલા જોડીયાના ચાર શખસો વિરૂધ્ધ પુરતા પુરાવા મેળવી દરખાસ્ત તૈયાર કરી પોલીસ વડા મારફતે પોલીસ મહાનિદર્શેક, સીઆઇડી ક્રાઇમ,ગુજરાત સમક્ષ મોકલવામાં આવી હતી. જે દરખાસ્તને મ઼જુરીની મ્હોર મળતા એસઓજી પોલીસે જોડીયાના મોટા વાસ વિસ્તારમાં રહેતા ફરીદ બસીરભાઇ ખોડ, અજીજ મામદભાઇ ગાધ, અસગર ગનીભાઇ પલેજા, નુરમામદ ઉર્ફે નૂરો સિદીકભાઇ છરૈયાને સકંજામાં લીઘા હતા. પોલીસે ચારેય શખસોને અટકાયત લઇ અમદાવાદ, વડોદરા, સુરત અને ભુજ મધ્યસ્થ જેલ હવાલે કરવા માટે તજવિજ હાથ ધરી છે. PIT NDPS અધિનિયમ હેઠળ કેવી રીતે કાર્યવાહી... પોલીસસુત્રોમાંથી જાણવા મળ્યા મુજબ પીઆઇટી એનડીપીએસ અધિનિયમ હેઠળ આવા વ્યકિતઓને પુર્વગામી અટકાયત હેઠળ રાખી શકાય છે,જેથી તેઓ નશીલા પદાર્થના વેચાણ, ખરીદી,વહન અથવા સંગ્રહ જેવી પ્રવૃતિઓમાં જોડાય નહી,જેલમુકત થયા બાદ આવા લોકો ફરીવાર નશીલા પદાર્થની પ્રવૃતિઓમાં સક્રિય થઇ શકે તેમ છે તેવુ જણાય તેવા સમયે કાર્યવાહી કરવામાં આવે છે.

મુલાકાત:જામ્યુકોના 16 વોર્ડની મત ગણતરી હરીયા કોલેજમાં થશે, કલેકટરે સ્થળ નિરીક્ષણ કર્યુ

જામનગર મહાનગર પાલિકા વિસ્તારના મતગણતરી સ્થળ હરિયા કોલેજ ખાતે જિલ્લા ચુંટણી અધિકારીએ મુલાકાત લઇ સ્ટ્રોંગરૂમ અને કાઉન્ટીંગ હોલ સહીત અન્ય તમામ વ્યવસ્થાઓનું નિરીક્ષણ કર્યું હતું. સંબંધિત અધિકારીઓ અને જે તે વોર્ડના ચૂંટણી અધિકારીઓને જરૂરી સૂચનાઓ આપી તમામ વ્યવસ્થાઓ સુનિશ્ચિત કરવા જણાવ્યું હતું. જીલ્લા કલેકટરે સ્ટ્રોંગ રૂમની મુલાકાત લઇ જરૂરી સુરક્ષા વ્યવસ્થાઓ ઉભી કરવા જણાવ્યું હતું. તેમજ સીસીટીવી મોનિટરિંગ સિસ્ટમનું નિરીક્ષણ કર્યું હતું. વિવિધ વોર્ડ પ્રમાણે તૈયાર કરવામાં આવેલા મતગણતરી હોલની મુલાકાત કરી તેઓએ ટેબલોની ગોઠવણી, ગણતરી એજન્ટો માટેની બેઠક વ્યવસ્થાની ચકાસણી કરી હતી. આ ઉપરાંત મીડિયા સેન્ટર, ઓબ્ઝર્વર રૂમમાં પણ જરૂરી વ્યવસ્થાઓ ગોઠવવા લગત અધિકારીઓને જણાવ્યું હતું. ચૂંટણી અધિકારીએ મતગણતરીની પ્રક્રિયા સાથે જોડાયેલા અધિકારીઓ અને કર્મચારીઓ ચૂંટણીપંચની માર્ગદર્શિકાનું ચુસ્તપણે પાલન કરે તે પ્રમાણે જરૂરી કાર્યવાહી કરવા જણાવ્યું હતું. ચૂંટણી અધિકારીએ મત ગણતરી સ્થળ પર જરૂરી વ્યવસ્થાઓ જેમ કે, પીવાનું પાણી, વીજળી મેડિકલ ટીમ, પાર્કિંગ, સુરક્ષા વ્યવસ્થા સહીતની જરૂરી તમામ વ્યવસ્થાઓ ઉભી કરવા સૂચનો કર્યા હતા. ઉલ્લેખનીય છે કે, આગામી તા.26 એપ્રિલના રોજ સવારે 7 વાગ્યાથી સાંજે 6 વાગ્યા સુધી મતદાન યોજાશે. તેમજ તા.28 એપ્રિલના રોજ સવારે નવ કલાકથી મતગણતરી શરુ થશે. જામનગર મહાનગર પાલિકાના વોર્ડ નં.1થી 16ની મત ગણતરી હરિયા કોલેજ ખાતે યોજાશે. જિ.પં.-તાંં.પંચાયતો માટે મતગણતરી કેન્દ્રોસિક્કા નગરપાલિકાની ચૂંટણીની મતગણતરી ડીસીસી ટેકનીકલ હાઈસ્કુલ, જામનગર જિલ્લા પંચાયત તથા તાલુકા પંચાયતોમાં મતગણતરી સ્થળ જેમાં જામનગર ગ્રામ્યમાં ઓશવાળ ઈંગ્લીશ એકેડમી ખાતે, કાલાવડ તાલુકામાં મ્યુનીસીપલ હાઈસ્કુલ ખાતે, જામજોધપુર તાલુકામાં ઇવીડીએસ આર્ટસ એન્ડ કોમર્સ કોલેજ ખાતે, ધ્રોલ અને જોડિયામાં મતગણતરી હરધ્રોળ હાઈસ્કુલ ખાતે, લાલપુર તાલુકામાં સરકારી આર્ટસ એન્ડ કોમર્સ કોલેજ ખાતે મતગણતરી યોજવામાં આવશે.

વાતાવરણ:જામનગરમાં 1 ડિગ્રીના ઘટાડા સાથે મહતમ પારો 35.5 ડિગ્રી

જામનગર શહેરમાં મહતમ તાપમાનમાં એક ડિગ્રીના ઘટાડા સાથે પારો 35.5 ડિગ્રી પર સ્થિર થયો હતો.આંશિક રાહત વચ્ચે બપોરે સુ્ર્યનારાયણનો પ્રકોપ મહદઅંશે યથાવત રહયો હતો.જે સાથે પવનનુ જોર પણ વધતા બપોરે માર્ગો પર આવા ગમન કરતા વાહનચાલકોએ લૂ વર્ષાનો અહેસાસ કર્યો હતો.જે સાથે બફારા અને ઉકળાટનો માહોલ પણ મોટા ભાગે યથાવત રહયો હતો. જામનગરમાં બુધવારે સવારે પુરા થતા 24 કલાક દરમિ્યાન મહતમ તાપમાન એક ડિગ્રી ઘટી 35.5 ડિગ્રી પર સ્થિર થયુ હતુ.જયારે લઘુતમ તાપમાન પણ આંશિક વધારા સાથે 24 ડિગ્રીએ પહોચ્યુ હતુ. મહતમ તાપમાનમાં ઘટાડા છતા સુર્યનારાયણનો પ્રકોપ મહદઅંશે યથાવત રહયો હોવાનો અહેસાસ જનજીવને કર્યો હતો.બીજી બાજુ મંગળવારની સરખામણીએ બુધવારે પવનનુ જોર વધ્યુ હતુ.જેના કારણે શહેરના માર્ગો સહિત ધોરીમાર્ગો પર આવા ગમન કરતા વાહનચાલકોએ બપોરના સુમારે લૂ વર્ષાનો અહેસાસ કર્યો હતો.આગામી દિવસોમાં ગરમીનુ જોર વધવાની સંભાવના પણ હવામાન નિષ્ણાંતો દ્વારા દર્શવાઇ રહી છે.ખાસ કરી દિવસના સુમારે ભેજના ઉંચા પ્રમાણના કારણે ઉકળાટ અને બફારાથી શહેરીજનો ત્રાહિમામ પોકારી ઉઠયા છે.બીજી બાજુ લઘુતમ તાપમાન પણ ક્રમશ: ઉંચકાતા ઉનાળાના આગવા મિજાજનો અહેસાસ લોકોને થઇ રહયો છે.

ફરિયાદ:જામનગરમાં બ્રાસપાર્ટના વેપારીને રૂા. 95 લાખની ઉઘરાણી મામલે 8 શખ્સોનો ત્રાસ

જામનગરમાં વેપારીને 95 લાખની ઉઘરાણી મામલે મારકૂટ કરી તેની પત્નીના 22 કોરા ચેક લખાવી લીધાની પોલીસ ફરિયાદ થતા પોલીસે 8 આરોપીઓની શોધખોળ હાથ ધરી છે. જામનગરના કૈલાશનગર શેરી નં.5, હરીયા કોલોજ ની બાજુમાં રહેતા નરેશભાઈ વીરજીભાઈ મેંદપરા નામના ઉ.વ.43 વર્ષીય વેપારીએ આરોપી વિશાલ લગારીયા, નીલેશ ડાંગર, સુભાષ રાવલીયા, સાગર કંડોરીયા, ચેતન રાવલીયા, જયદીપ લગારીયા, દીવુભા અને સાગર સામે ફરિયાદ નોંધાવી છે. ફરિયાદમાં ઉલ્લેખ કરાયા અનુસાર શંકરટેકરીમાં ફરિયાદી પોતાના ભત્રિજા હાર્દિકભાઈ ભાણજીભાઇ મેંદપરાની કારખાનામાં બેસી અને ત્યાથી બ્રાસપાર્ટના માલનો ભંગારનો કમીશન પેટે વેપાર કરતો હતો. આ દરમિયાન ફરીયાદી વેપારીએ વિશાલ લગારીયા, નીલેશ ડાંગર તથા સુભાષ રાવલીયા પાસેથી રૂ.65 લાખ ભંગારનો માલ લીધેલ તેમજ રૂ.30લાખનો ચેતનભાઇ રાવલીયા તથા સાગરભાઇ કંડોરીયા પાસેથી ભંગારનો માલ લીધો હતો. જે રૂપીયા પૈકી કુલ રૂ.10 લાખ વીશાલભાઇ તથા જયદીપભાઇને આપેલ હોય તેમ છતા વીશાલ, નીલેશ ડાંગર , ચેતન રાવલીયા, સુભાષ રાવલીયા અને જયદીપ લગારીયા , દીવુભા તથા અન્ય સાગરભાઇ બધાય ભેગા મળી ફરીયાદી પાસેથી અવાર નવાર રૂપીયાની ઉધારણી કરી ફરીયાદીને ઢીકાપાટુનો ઢોર માર મારી તેમની પાસેથી કુલ-22 કોરા ચેકો તેમના તેમજ ફરીયાદીની પત્નીના સહી વાળા બળજબરી પુર્વક ભયમાં ભુકી તેમની પાસેથી લઇ ગયા હતા. તેમજ જો રૂપીયા ન આપે તો છોકરાઓને ઉપાડી જવાની ધાક ધમકીઓ આપી સુભાષએ સી.સી.ટીવી કેમેરો તોડી નુકશાની કરી હતી. જેથી નરેશભાઈ મેદપરા દ્વારા આ મામલાને સીટી સી. ડિવિઝન પોલીસ મથકમાં લઈ જવાયો હતો, અને પોલીસે તમામ આઠ આરોપીઓ સામે ગુનો નોંધી વધુ તપાસ હાથ ધરી છે.

મહાપાલિકા માટે 474 ઈવીએમ ફાળવાયા:આગામી રવિવારે યોજાનાર મતદાન માટે‎ 2137 ઇવીએમ કાર્યરત કરવાની પ્રક્રિયા સંપન્ન

જામનગર મહાનગર પાલિકા, સિક્કા નગરપાલિકા, જામનગર જિલ્લા/તાલુકા પંચાયતની સામાન્ય ચૂંટણી-2026 અન્વયે કુલ 23 ચૂંટણી અધિકારીઓને 2137 ઈ.વી.એમ. ફાળવવામાં આવ્યા છે. જેના કમિશનિંગની પ્રક્રિયા 100% પૂર્ણ કરવામાં આવી છે. જામનગર મહાનગર પાલિકા વિસ્તારમાં કુલ 474 ઈવીએમ પૈકી વોર્ડ નં.1 થી 4માં 112 ઈવીએમ, વોર્ડ નં.5 થી 8માં 115 ઈવીએમ, વોર્ડ નં.9 થી 12માં 126 ઈવીએમ, વોર્ડ નં.13થી 16માં 121 ઈવીએમ ફાળવવામાં આવ્યા છે. જેના કમિશનિંગની પ્રક્રિયા પૂર્ણ થઇ છે. સિક્કા નગરપાલિકા વિસ્તારમાં વોર્ડ નં.1થી7માં 31 ઈવીએમના કમિશનિંગની પ્રક્રિયા પૂર્ણ થઇ છે. જામનગર જિલ્લા પંચાયત માટે 808 અને તાલુકા પંચાયતો માટે ફાળવવામાં આવેલ 824 ઈવીએમના કમિશનિંગની પ્રક્રિયા 100% પૂર્ણ થઇ છે. સ્થાનિક સ્વરાજયની ચૂંટણીમાં રવિવારે યોજાનારા મતદાન માટે વહીવટી તંત્ર દ્વારા જરૂરી તમામ વ્યવસ્થાઓને આખરી ઓપ આપવામાં આવી રહ્યો છે.

ઝુંબેશ:નિબંધ, કિવઝ, રેલી સહિત વિવિધ કાર્યક્રમો થકી છાત્રોએ મતદાન કરવા મતદારોને જાગૃત કર્યા

સ્થાનિક સ્વરાજ્યની સંસ્થાઓની સામાન્ય ચૂંટણી અંર્તગત આગામી 26મી એપ્રિલને રવિવારે મતદાન યોજાનાર છે. જેને અનુલક્ષીને જામનગર જિલ્લામાં સ્વીપ એક્ટિવિટી હેઠળ મતદાન જાગૃતિ અભિયાન અંતર્ગત શાળાઓમાં વિવિધ કાર્યક્રમોનું આયોજન કરવામાં આવ્યું છે. જામનગર જિલ્લા ચૂંટણી અધિકારી પી.બી.પંડયાના માર્ગદર્શન હેઠળ સ્વીપ એક્ટિવિટીના ભાગરૂપે લોકો માટે લોકશાહી મૂલ્યો પ્રત્યે જાગૃતિ લાવવા અને મતદાનનું મહત્વ સમજાવવા માટે વિવિધ સર્જનાત્મક પ્રવૃત્તિઓ હાથ ધરવામાં આવી હતી. આ અભિયાન અંતર્ગત જિલ્લાની શાળાઓ જેમાં ખંઢેરા તાલુકા શાળા, ડીએચકે મુંગરા કન્યા વિદ્યાલય ધ્રોલ, યુપીવી કન્યા વિદ્યાલય જોડિયા, સતાપર કન્યા શાળા, નિકાવા તાલુકા શાળામાં ક્વિઝ સ્પર્ધા, નિબંધ સ્પર્ધા, રંગોળી સ્પર્ધા, શપથ વિધિ તેમજ જાગૃતિ રેલી જેવા કાર્યક્રમો યોજાયા હતાં. શપથ વિધિ દરમિયાન છાત્રોએ પોતાના પરિવારને મતદાન કરાવવા અંગે તથા શિક્ષકોએ નિષ્પક્ષ, નિર્ભય અને જવાબદારીપૂર્વક મતદાન કરવાની પ્રતિજ્ઞા લીધી હતી. છાત્રો દ્વારા જાગૃતિ રેલીમાં સૂત્રોચારો કરાયા હતાં. શહેરના આણદાબાવા વૃદ્ધાશ્રમમાં મહિલાઓએ મતદાનના શપથ લીધા સ્થાનિક સ્વરાજયની સંસ્થાઓની ચૂંટણીના અનુસંધાને જામનગરમાં 26મી એપ્રિલે મતદાન યોજાશે.વધુમાં વધુ લોકો મતદાન કરે તે દિશામાં પ્રયત્નો હાથ ધરવા માટે જિલ્લા વહીવટી તંત્ર દ્વારા મતદાન જાગૃતિ અંગે ઝુંબેશ ચલાવાઇ રહી છે. ત્યારે આણદાબાવા મહિલા વૃદ્ધાશ્રમ ખાતે મહિલાઓ માટે મતદાન જાગૃતિ કાર્યક્રમનું આયોજન કરાયુ હતુ.જેમાં વૃદ્ધાશ્રમના મહિલાઓને મતદાન કરવા અંગેની પ્રતિજ્ઞા લેવડાવવામાં આવી હતી. ઉપરાંત મતદાન કઈ રીતે કરવું તે અંગે માર્ગદર્શન આપી મતદાનનું મહત્વ સમજાવાયુ હતુ.

ધરપકડ:સાવરકુંડલામાં આઈપીએલ મેચ પર સટ્ટો રમાડતો શખ્સ ઝડપાયો: 3 ફરાર

સાવરકુંડલા શહેરમાં આઈપીએલ ક્રિકેટ મેચ પર સટ્ટાનો જુગાર રમી અને રમાડતા એક શખ્સને અમરેલી એલ.સી.બી. ટીમે ઝડપી પાડી કાર્યવાહી કરી છે. પોલીસે આરોપી પાસેથી કુલ રૂપિયા 1 લાખ કરતા વધુનો મુદ્દામાલ કબજે લઈ આગળની કાર્યવાહી કરી છે. અમરેલી એલ.સી.બી. ટીમે જુગાર પ્રવૃત્તિ કરતા તત્વો પર નજર રાખી કાર્યવાહી હાથ ધરી હતી. તે દરમ્યાન મળેલી બાતમીના આધારે એલ.સી.બી.ના પીઆઈ સી.પી. વાઘેલાના માર્ગદર્શન હેઠળ ટીમે સાવરકુંડલા ટાઉનમાં દરોડો પાડ્યો હતો. જ્યાં આઈ.પી.એલ.માં સનરાઈઝ હૈદરાબાદ અને દિલ્હી કેપિટલ્સ વચ્ચે ચાલી રહેલી લાઈવ મેચ પર એન્ડ્રોઇડ મોબાઈલમાં ઓનલાઇન એપ્લિકેશન મારફતે રનફેરનો ભાવ આપી ક્રિકેટ સટ્ટો ચલાવતા નૂરાનીનગરમાં રહેતા રૂસ્તમ ઉર્ફે બાવલો હબીબભાઈ કુરેશી (ઉ.વ.37) ને ઝડપી પાડ્યો હતો. જ્યારે આ ગુનામાં સંડોવાયેલા મહુવાના જીતુ મગનભાઈ મારૂ, મહેશ જેન્તીલાલ મહેતા અને સાદીક કરીમભાઈ સોરઠીયા નાસી જવામાં સફળ રહ્યા હતા. જેને ઝડપી પાડવા પોલીસે કવાયત શરૂ કરી છે. પકડાયેલા શખ્સ પાસેથી રૂપિયા 23 હજાર 500 રોકડા, રૂપિયા 1 લાખનો મોબાઈલ ફોન સહિત કુલ રૂપિયા 1 લાખ 23 હજાર 505નો મુદ્દામાલ કબજે લઈ આગળની કાર્યવાહી હાથ ધરી છે.

ચકચાર:બાબરામાં બ્યુટી પાર્લર સંચાલિકાએ ફિનાઇલ પી આત્મહત્યાનો પ્રયાસ કર્યો

બાબરા પોલીસ લાઇન પાછળ રહેતી એક મહિલાએ પાડોશીઓ દ્વારા કરવામાં આવતી ગાળો અને ધમકીથી કંટાળી ફીનાઇલ પી આત્મહત્યાનો પ્રયાસ કર્યો હોવાની ઘટના સામે આવી છે. મહિલાને ઉલ્ટી-ઉબકા થવા લાગતા તાત્કાલિક સારવાર માટે હોસ્પિટલમાં દાખલ કરાઈ હતી. બાબરા ખાતે રહેતી અલ્પાબેન મહેન્દ્રભાઇ કાલાવડીયા (ઉ.વ.37) બ્યુટી પાર્લરનો વ્યવસાય કરે છે. અલ્પાબેનની બહેનપણીને શંકા હતી કે અલ્પાબેન તેના પતિ સાથે ફોન પર વાત કરે છે. આ બાબતે બંને વચ્ચે ચર્ચા બાદ સમાધાન થઈ ગયું હતું. પરંતુ બાદમાં અલ્પાબેનની બહેનપણીના મકાન માલિક મંગુબેન વારંવાર અલ્પાબેનને ખરાબ ગાળો આપતા અને આવા પાડોશી બાજુમાં ન રહેતા સારું કહીને હેરાન કરતા હતા. સાથે જ મંગુબેનની દીકરી દ્વારા પણ ફોન કરી મંગુબેનને કંઈ થશે તો સારું નહીં રહે તેવી ધમકી આપવામાં આવતી હતી. આ સતત ત્રાસથી વ્યથિત થઈ અલ્પાબેને ગઈ કાલે બપોરે લગભગ એક વાગ્યે મંગુબેનના ઘરે જઈ ફીનાઇલ પી જતા તેમને ઉલ્ટી-ઉબકા થવા લાગતા સારવાર માટે હોસ્પિટલમાં ખસેડવામાં આવ્યા હતા. આ બનાવ અંગે જાણ કરતા બાબરા પોલીસે વધુ તપાસ હાથ ધરી છે.

રમત સાથે સર્વાંગી વિકાસ પર ભાર:ગજેરા કેમ્પસ વિદ્યાસભા સ્કૂલ ખાતે 4 દિવસીય ઇન્ટર ડિએલએસએસ શૂટિંગ લીગનો પ્રારંભ

અમરેલીની અગ્રણી શૈક્ષણિક સંસ્થા ગજેરા કેમ્પસ–વિદ્યાસભા સ્કૂલ ખાતે તારીખ 22 થી 25 એપ્રિલ 2026 દરમિયાન ઇન્ટર DLSS શૂટિંગ લીગ 2026નું આયોજન કરવામાં આવ્યું છે. સ્પોર્ટ્સ ઓથોરિટી ઓફ ગુજરાતના માર્ગદર્શન હેઠળ યોજાયેલી આ સ્પર્ધાનો પ્રારંભ દીપ પ્રાગટ્યથી કરવામાં આવ્યો હતો. ગજેરા કેમ્પસ વિદ્યાસભા ખાતે યોજાયેલ કાર્યક્રમમાં જિલ્લા રમત વિકાસ અધિકારી પૂનમબેન ફૂમકિયા, સંસ્થાના મંત્રી ચતુરભાઈ ખૂંટ અને કેમ્પસ ડાયરેક્ટર વસંતભાઈ પેથાણી સહિતના આગેવાનો હાજર રહ્યા હતા. આ પ્રસંગે કેમ્પસ ડાયરેક્ટર વસંતભાઈ પેથાણીએ ખેલાડીઓને ઉત્તમ પ્રદર્શન કરવા પ્રોત્સાહિત કર્યા હતા. તેમના માર્ગદર્શનથી વિદ્યાર્થીઓમાં સ્પર્ધા પ્રત્યે ઉત્સાહ અને આત્મવિશ્વાસમાં વધારો થયો હતો. સાથે સાથે સંસ્થાના ટ્રસ્ટીઓ અને સ્ટાફ દ્વારા વિદ્યાર્થીઓને સારા પ્રદર્શન અંગે શુભેચ્છા પણ પાઠવવામાં આવી હતી.

ખળભળાટ:અમરેલીમાં યુવાને ગળેફાંસો ખાઈને આત્મહત્યા કરી લીધી

અમરેલી શહેરના કેરિયારોડ વિસ્તારમાં આવેલી શિવપાર્ક સોસાયટીમાં રહેતા એક યુવાને ગળાફાંસો ખાઈ આત્મહત્યા કરી લેતાં વિસ્તારમાં શોકની લાગણી વ્યાપી ગઈ છે. ઘટનાની જાણ થતાં પોલીસ તાત્કાલિક સ્થળ પર પહોંચી તપાસ હાથ ધરી હતી. ગઈકાલે સવારે આશરે 10:30 વાગ્યા પહેલા કોઈપણ સમયે કેરિયારોડ સ્થિત શિવપાર્ક સોસાયટીમાં જીગ્નેશભાઈ રતિભાઈ કાબરીયાના મકાનમાં ભાડે રહેતા સર્જન રમેશભાઈ ઉર્ફે નગરસીગભાઈ ગણાવા (ઉ.વ.22)એ કોઈ અગમ્ય કારણોસર પોતાના ઘરે ગળાફાંસો ખાઈ આત્મહત્યા કરી લીધી હતી. આ અંગે મજૂરી કામ કરતા રમેશભાઈ ઉર્ફે નગરસીગભાઈ દાલસિંગભાઈ ગણાવા (ઉ.વ.47) દ્વારા જાણ કરવામાં આવી હતી. બનાવની જાણ થતાં પોલીસે સ્થળ પર પહોંચી મૃતદેહને કબજે લઈને આગળની કાર્યવાહી હાથ ધરી હતી. હાલમાં યુવાને આત્મહત્યા કરવા પાછળનું ચોક્કસ કારણ જાણવા મળ્યું નથી.

ફરિયાદ:જૂના ઝાંઝરીયા ગામે લગ્ન પ્રસંગમાં બોલાચાલી બે પક્ષ વચ્ચે મારામારી

બગસરા તાલુકાના જૂના ઝાંઝરીયા ગામે લગ્ન પ્રસંગ દરમિયાન થયેલી બોલાચાલી બાદ બે પક્ષ વચ્ચે મારામારીની ઘટના બની હોવાનું સામે આવ્યું છે. બનાવ અંગે બંને પક્ષે એકબીજા સામે પોલીસમાં ફરિયાદ નોંધાવી છે. બગસરા તાલુકાના જૂના ઝાંઝરીયા ગામે રહેતા હર્ષાબેન મેહુલભાઈ મકવાણા (ઉ.વ.26), આપવામાં આવેલી ફરિયાદ મુજબ ગઈ કાલે રાત્રે આશરે પોણા દસ વાગ્યે પરિવાર સાથે લગ્ન પ્રસંગે હાજર હતા. તે સમયે અગાઉ ફોન પર થયેલી બોલાચાલીનું મનદુઃખ રાખીને વશરામ દેવશીભાઈ મકવાણા, જયાબેન વશરામભાઈ મકવાણા અને અમિત વશરામભાઈ મકવાણાએ હર્ષાબેન અને તેના પતિને ઢીકા-પાટુનો મારમારી ગાળો આપી મારી નાખવાની ધમકી આપી હતી. તો બીજી તરફ વશરામભાઈ દેવશીભાઈ મકવાણા (ઉ.વ.52) તેમના ભાઈના ઘરે લગ્ન પ્રસંગે હાજર હતા ત્યારે અગાઉ ફોન પર થયેલી બોલાચાલીનું મનદુઃખ રાખીને મેહુલ રમેશભાઈ મકવાણા, હર્ષાબેન મેહુલભાઈ મકવાણા અને અશ્વિન છગનભાઈ માધડ તેમના ઘરે આવી ગાળો આપી છરી વડે હુમલો કરી ઇજા પહોંચાડી હોવાની ફરિયાદ આપી હતી. આ અંગે બગસરા પોલીસે જ઼ંજરિયાના વશરામ દેવશીભાઇ મકવાણા, જયાબેન વશરામભાઇ મકવાણા, અમિત વશરામભાઇ મકવાણા અને બરવાળા બાવીસીના મેહુલ રમેશભાઇ મકવાણા, હર્ષાબેન મેહુલભાઇ મકવાણા અને અવિભાઇ છગનભાઇ માધડ સહિત કુલ 6 લોકો સામે ગુન્હો નોંધી આગળની તપાસ હાથ ધરી છે.

આયોજન:અમરેલી પાલિકાની કે.કે.પારેખ કોર્મસ કોલેજ ખાતે ગણતરી થશે

અમરેલી જિલ્લામાં છ નગરપાલિકાની મતગણતરી સેન્ટર નક્કી કરવામાં આવ્યા છે. અમરેલી પાલિકાની કે.કે.પારેખ કોર્મસ કોલેજ, બાબરા પાલિકાની કે.પી.આશરા ગર્લ્સ હાઈસ્કૂલ, સાવરકુંડલા પાલિકાની નગરપાલિકા કચેરી, ધારી પાલિકાની અરૂણ મુછાળ એન્જીનયરીંગ કોલેજ સરસીયા રોડ, બગસરા પાલિકાની ઝવેરચંદ મેઘાણી હાઈસ્કૂલ સ્ટેશન રોડ અને દામનગર પાલિકાની કન્યા પ્રાથમિક શાળા પોલીસ સ્ટેશન સામે મતગણતરી કરાશે. જ્યારે જિલ્લા પંચાયત અને તાલુકા પંચાયતની અમરેલીમાં કમાણી સાયન્સ કોલેજ એન્ડ પ્રતાપરાય આર્ટસ કોલેજ, વડીયામાં અ.હિ.કન્યા વિદ્યાલય, લાઠીમાં પીએમશ્રી કન્યા શાળા મામલતદાર કચેરીની બાજુમાં, બાબરામાં આઈટીઆઈ બાબરા ગ્રાઉન્ડ ફલોર, સાવરકુંડલામાં કે.કે.હાઈસ્કૂલ, લીલીયામાં આઈટીઆઈ, ધારીમાં આરવ મુછાળ ઈન્ટરનેશનલ સ્કૂલ પ્રાર્થના હોલ, બગસરામાં ઝવેરચંદ મેઘાણી હાઈસ્કૂલ સ્ટેશન રોડ, ખાંભામાં આઈટીઆઈ, રાજુલામાં ટી.જે.બી.એસ.ગર્લ્સ હાઈસ્કૂલ, જાફરાબાદમાં મોડેલ સ્કૂલ પ્રથમ માળ ખાતે મતગણતરી થશે.

કાર્યવાહી:અમરેલીમાં યુવક પર હુમલો કરનાર આરોપીઓનું જાહેરમાં સરઘસ કાઢ્યું

અમરેલી લુખ્ખા ભાનમાં લાવવા બુધવારે અમરેલી પોલીસે કાર્યવાહી કરી હતી. બિનાકા ચોક પાસે એક દુકાનદારને સામાન્ય બાબતે છરીના ઘા જીકનાર શખ્સોની ધરપકડ બાદ સ્થળ પર લાવી પોલીસ દ્વારા રીકન્ટ્રક્શન કરાવાયું હતું. અમરેલી શહેરમાં અસામાજિક તત્વો સામે પોલીસ દ્વારા કડક સંદેશ આપતી કાર્યવાહી કરવામાં આવી છે. શહેરના ડીલક્સ પાન નજીક એક્ટિવા અથડાવાની સામાન્ય બાબતે થયેલી બોલાચાલી બાદ ત્રણ શખ્સોએ દુકાનદાર યુવક પર છરી વડે જીવલેણ હુમલો કર્યો હતો, જેના કારણે વિસ્તારમાં ચકચાર મચી ગઈ હતી. ઘટનાની જાણ થતા જ પોલીસ તંત્ર હરકતમાં આવ્યું અને તપાસ હાથ ધરી દાદલીમીયા રફીકમીયા સૈયદ, ઇરફાન રફીકભાઇ સૈયદ અને અજુમ રફીકમીયા સૈયદ સહિત ત્રણેય શખ્સોને પકડી પાડવામાં આવ્યા હતા. આ ઘટનાના પગલે પોલીસ દ્વારા કાયદાનું ભાન કરાવવા માટે જે સ્થળે હુમલો થયો હતો તે જ વિસ્તારમાં આ શખ્સોનું જાહેરમાં સરઘસ કાઢવામાં આવ્યું હતું.

વાતાવરણ:અમરેલીમાં પારો 40.7 ડિગ્રીથી આકરો તાપ

અમરેલીમાં ગરમીનો પ્રકોપ યથાવત રહ્યો છે. આજે મહત્તમ તાપમાન 40.7 ડિગ્રી નોંધાતા લોકોને ગરમીનો સામનો કરવો પડ્યો હતો. બીજી તરફ ન્યુનત્તમ તાપમાન 22.5 ડિગ્રી નોંધાયું હતું. જેના કારણે રાત્રિના સમયે થોડીક રાહતનો અનુભવ થયો હતો. હવામા ભેજનું પ્રમાણ 65 ટકા નોંધાતા દિવસ દરમિયાન ઉકળાટમાં વધારો જોવા મળ્યો હતો. ભેજના કારણે ગરમી વધુ તીવ્ર લાગતી હતી અને લોકો પરેશાન બન્યા હતા. ખાસ કરીને બપોરના સમયે રસ્તાઓ પર લોકોની અવરજવર ઓછી જોવા મળી હતી. આ ઉપરાંત પવનની ગતિ પ્રતિ કલાક માત્ર 1.2 કિલોમીટર રહી હતી. જેના કારણે હવામાં ઠંડકનો અભાવ રહ્યો હતો. પવનની ધીમી ગતિને કારણે ગરમીનો પ્રભાવ વધુ અનુભવાયો હતો. હવામાન વિભાગ મુજબ આગામી દિવસોમાં ગરમીનો યથાવત રહેવાની શક્યતા વ્યક્ત કરવામાં આવી છે.

આવકના શ્રીગણેશ:અમરેલી અને સાવરકુંડલા યાર્ડમાં સીઝનની પ્રથમ કેસર કેરી આવી

અમરેલી અને સાવરકુંડલા યાર્ડમાં સીઝનની પ્રથમ કેસર કેરીની આવકના શ્રીગણેશ થયા હતા. અમરેલી યાર્ડમાં છેલ્લા બે દિવસથી સ્થાનિક કેસર કરી આવી રહી છે. જ્યારે સાવરકુંડલા યાર્ડમાં આજથી કેસર કેરીની આવક શરૂ થઈ હતી. અહીં વેપારીઓ અને ખેડૂતોની ઉપસ્થિતિમાં હરરાજીનો શુભારંભ કરવામાં આવ્યો હતો. સાવરકુંડલામાં સીઝનમાં પ્રથમ વખત કેસર કેરીની હરરાજી યોજાઈ હતી. જેમાં ઉત્તમ ગુણવત્તાની કેરીને ઉંચો ભાવ મળતા ખેડૂતોમાં ખુશીની લાગણી પ્રસરી ગઈ છે. હરરાજી દરમિયાન વેપારીઓએ કેરીની બોલી લગાવી હતી. જેના પરિણામે કેસર કેરીને 20 કિલોના રૂપિયા 2380 જેટલો સીઝનનો ઉચ્ચ ભાવ મળ્યો હતો. આ વર્ષે સીઝનની શરૂઆતમાં જ સારા ભાવ મળતા અન્ય કેરી ઉત્પાદક ખેડૂતોમાં પણ આશા જાગી છે કે આવનારા દિવસોમાં કેસર કેરીને વધુ સારા ભાવ મળશે. જ્યારે અમરેલી માર્કેટીંગ યાર્ડમાં છેલ્લા બે દિવસથી સ્થાનિક કેસર કેરીની આવક થઈ રહી છે. અમરેલીના વેપારી ઘનશ્યામભાઈ રૈયાણીએ જણાવ્યું હતું કે અમરેલી યાર્ડમાં છેલ્લા બે દિવસથી પાકેલ કેરીના 200 જેટલા બોક્સની આવક થઈ રહી છે. જ્યારે માર્કેટીંગ યાર્ડમાં આજે સરેરાશ ખેડૂતોને 20 કિલોના રૂપિયા 2600 ભાવ મળ્યો હતો. અત્યારે અમરેલી યાર્ડમાં ધારીના હુડલી પંથકમાંથી પાકેલ કેસર કેરીની આવક થઈ રહી છે. અહીં દરરોજ 200 બોક્સ આવે છે. પરંતુ આગામી એક સપ્તાહની અંદર કેસર કેરીની આવકમાં વધારો થશે અને અહીં પ્રતિ દિવસ 500 થી 600 બોક્સની આવક થશે. - ઘનશ્યામભાઈ રૈયાણી,અમરેલીના કેસર કેરીના વેપારી માવઠું ઓછી આવકનું કારણસામાન્ય રીતે અમરેલી યાર્ડમાં અત્યારે કેસર કેરીની આવક વધુ હોય છે. પરંતુ ચાલુ વર્ષે કમોસમી વરસાદ પડ્યો હતો. તેમજ ઉત્પાદન ઓછુ હોવાની ખેડૂતો ફરિયાદ કરી રહ્યા છે. જેથી અત્યારે ઓછી આવક થઈ રહી છે.

અમરેલીના દલિત યુવાન મોત મામલો:બીજા દિવસે પણ ઉકેલ નહીં, આજે આગેવાનો સાથે કોર્ટમાં રજુઆત કરાશે

અમરેલીમાં દલિત યુવાનના મોતના મામલે બીજા દિવસે પણ કોઈ ઉકેલ આવ્યો નથી. યુવકના પરિવારજનો અને દલિત સમાજના આગેવાનો દ્વારા આરોપીઓ સામે સીધો હત્યાનો ગુન્હો નોંધવાની માંગ પર અડગ રહેતા મામલો વધુ ગંભીર બન્યો છે. મૃતક યુવાનના પરિવારજનોનો આક્ષેપ છે કે હોસ્પિટલના અન્નક્ષેત્રમાં વધેલા ભોજન બાબતે થયેલી બોલાચાલી દરમિયાન ભરત આચાર્ય અને તેના સાથીદારો દ્વારા યુવકને બેફામ માર મારવામાં આવ્યો હતો, જેના કારણે યુવકનું મોત થયું છે. તેથી તમામ શખ્સો સામે હત્યાનો ગુન્હો દાખલ કરવામાં આવે તેવી માંગ ઉઠાવાઈ છે. જો કે, આ મામલે પોલીસ દ્વારા પેનલ પોસ્ટમોર્ટમ રિપોર્ટ આવ્યા બાદ આગળની કાર્યવાહી કરવામાં આવશે તેવી માહિતી આપવામાં આવી છે. હાલ સુધી કોઈ ચોક્કસ ઉકેલ ન આવતા પરિવારજનો અને સમાજના આગેવાનોમાં રોષ જોવા મળી રહ્યો છે. મામલો ઉકેલવા માટે કાલે દલિત સમાજના આગેવાનો, યુવકના માતા-પિતા અને સંબંધીઓ કોર્ટમાં રજૂઆત કરવા પહોંચશે. આ અંગે કોર્ટે હિયરિંગ માટે કાલની તારીખ નિર્ધારિત કરી છે. પરિસ્થિતિને ધ્યાનમાં રાખીને પોલીસ પણ આગળની કાર્યવાહી માટે તૈયાર હોવાનું સૂત્રો પાસેથી જાણવા મળ્યું છે.

ગંભીર માર્ગ અકસ્માત સર્જાયો:દેડિયાપાડાના ડાબકા પાસે પિકઅપ પલટી મારી જતાં ચારને ગંભીર ઇજા

નર્મદા જિલ્લાના ડેડિયાપાડા તાલુકામાં ગમખ્વાર અકસ્માતની ઘટના સામે આવી છે. મહારાષ્ટ્રના નંદુરબાર જિલ્લાના અક્કલકુવા તાલુકાના કુકડીપાદર ગામથી લગ્નપ્રસંગમાં માણસો ભરીને કોકટી (શિશા) ગામે જઈ રહેલી એક પીકઅપ ગાડી ડાબકા ગામના મુરબાઠી વિસ્તારમાં અચાનક પલટી ખાઈ ગઈ હતી. આ અકસ્માતમાં એક વ્યક્તિને ગંભીર ઈજાઓ પહોંચી છે, જ્યારે અન્ય ચાર લોકોને નાની-મોટી ઈજાઓ થઈ છે. મળતી માહિતી અનુસાર મહારાષ્ટ્રના કુકડીપાદર ગામના લોકો બપોરે આશરે 01:00 વાગ્યાની આસપાસ પીકઅપ ગાડીમાં સવાર થઈ ડેડિયાપાડાના કોકટી (શિશા) ગામે લગ્ન પ્રસંગમાં હાજરી આપવા જઈ રહ્યા હતા. ત્યારે ડાબકાથી પીપલોદને જોડતા માર્ગ પર ડાબકા ગામના મુરબાઠી વિસ્તારમાં ચાલકે સ્ટિયરિંગ પરનો કાબૂ ગુમાવતા પીકઅપ ગાડી ધડાકાભેર પલટી ખાઈ ગઈ હતી. ગાડી પલટી જતાં મુસાફરોમાં ચીસાચીસ મચી ગઈ હતી. અકસ્માત બાદ સ્થાનિક લોકો મદદે દોડી આવ્યા હતા. ઇજાગ્રસ્તોને તાત્કાલિક ખાનગી વાહનો દ્વારા મોઝદા સરકારી દવાખાને સારવાર માટે ખસેડવામાં આવ્યા હતા. ઉલ્લેખનીય છે કે, આ માર્ગ નર્મદા જિલ્લાના જાણીતા પ્રવાસન સ્થળો જેવા કે કોકમ, ચુલિયા હનુમાન મંદિર, નિનાઇ ધોધ અને સુપ્રસિદ્ધ દેવમોગરા માતાજીના મંદિરને જોડતો મુખ્ય રસ્તો છે. પ્રવાસીઓની સતત અવરજવર ધરાવતા આ રસ્તા પર થયેલા આ અકસ્માતે મુસાફરોની સુરક્ષા સામે સવાલો ઊભા કર્યા છે. કુકડીપાદર ગામથી કોકટી ગામે જતી ગાડી ડાબકા ગામે અચાનક પલટી ખાઈ ગઈ

બ્રહ્મસમાજ દ્વારા આયોજન:રાજપીપળા મોટા મઠ ખાતે આદિગુરુ શંકરાચાર્યની જન્મ જયંતીની ઉજવણી

રાજપીપલા મોટા મઠ ખાતે આદિગુરુ શંકરાચાર્યની જન્મ જયંતિ ની ઉજવણી રાજપીપલા બ્રહ્મ સમાજ દ્વારા કરવામાં આવી હતી. બ્રહ્મસમાજ દ્વારા ઐતિહાસિક મંદિર ખાતે શંકરાચાર્યનું પૂજન કરવામાં આવ્યું હતું. રાજપીપલા ખાતે આવેલ મોટા મઠ ના ટ્રસ્ટી દ્વારકા શારદાપીઠના શ્રી નારાયણનંદજી ના આશીર્વાદથી અહીંયા વર્ષો થી આદિગુરુ શંકરાચાર્ય જી નું પૂજન કરવામાં આવે છે. અહીંયા ના પ્રથમ દંડી સ્વામી માધવાનંદજી હતા જે વર્ષો પહેલા અંતરધ્યાન થયા હતા ત્યારબાદ આ સ્થળને દંડી સ્વામી ના મઠ તરીકે ઓળખવામાં આવે છે જોકે વર્ષો જુના આ મંદિર ને જીર્ણોધ્ધાર ની પણ જરૂર છે એક જર્જરિત સ્થળમાં આ મંદિર હાલ ચાલી રહ્યું છે. દર વર્ષે ગુરુપૂર્ણિમા અને શંકરાચાર્ય ની જન્મ જયંતિ નિમિતે અહીંયા પૂજન નું આયોજન કરવામાં આવે છે દેશ માં ચારેય દિશા માં ચાર મઠ ની સ્થાપના કરવામાં આવી હતી. ત્યાં ચારેય મઠ માં શંકરાચાર્યની નિમણૂક કરવામાં આવી હતી જેથી દેશ માં સનાતન ધર્મ લોકો સુધી પહોંચે છે.

પાયાની સુવિધાના અભાવે બદહાલી:સેલવાસ શાકભાજી માર્કેટમાં પાણીની તંગી

સેલવાસ પાલિકા સંચાલિત આમલી વિસ્તારમાં આવેલી મુખ્ય શાકભાજી માર્કેટ હાલ પાયાની સુવિધાઓના અભાવે બદહાલીનો સામનો કરી રહી છે. આ માર્કેટમાં જથ્થાબંધ અને છૂટક વેપાર કરતા સેંકડો વેપારીઓ વહેલી સવારના 4 વાગ્યાથી મોડી રાતના 11 વાગ્યા સુધી સખત મહેનત કરે છે. જોકે, છેલ્લા એક અઠવાડિયાથી અહીં પાણીની ગંભીર સમસ્યા સર્જાતા વેપારીઓ અને ગ્રાહકો ભારે હાલાકી ભોગવી રહ્યા છે.પરિસ્થિતિ એટલી હદે વણસી છે કે શૌચાલયોમાં પાણી નથી અને પાલિકાની ‘વોટર ટુ ટેપ’ યોજના હેઠળ મળતું શુદ્ધ પીવાનું પાણી પણ ઉપલબ્ધ નથી. માર્કેટની શરૂઆતથી અત્યાર સુધી ક્યારેય આવી તકલીફ પડી નથી, પરંતુ અચાનક સર્જાયેલી આ અછત અંગે પાલિકા પ્રમુખને જાણ કરવા છતાં હજુ સુધી કોઈ સકારાત્મક કાર્યવાહી કરી નથી. સ્થાનિક વેપારીઓનો આક્ષેપ છે કે પ્રમુખ અને સભ્યો માત્ર સોશિયલ મીડિયા પર ફોટો પડાવવામાં અને વાહવાહી મેળવવામાં વ્યસ્ત છે. સત્તાધીશો પોતાના ઔદ્યોગિક વ્યવસાયો વધારવામાં ધ્યાન આપે છે, પણ સામાન્ય જનતાની પરવા કરતા નથી. લોકોમાં એવી પણ ચર્ચા છે કે પાલિકાના સભ્યો બિનહરીફ ચૂંટાઈ આવ્યા હોવાથી તેઓ જવાબદારી પ્રત્યે બેદરકારી વર્તી રહ્યા છે .

જિલ્લા કોંગ્રેસ ‎પ્રમુખ અને પ્રભારી‎ દ્વારા રાવ:વાપી ચૂંટણીમાં પ્રચાર માટે કોંગ્રેસના ઉમેદવારોને હેરાન કરાતાં SPને રાવ

વાપી મહાનગરપાલિકાની સામાન્ય ચૂંટણીમાં બે મુખ્ય પક્ષો ભાજપ અને કોંગ્રેસ વચ્ચે કાંટાની ટક્કર છે ત્યારે કોંગ્રેસના ઉમેદવારોને પ્રચાર કરવા સામે હેરાન પરેશાન કરવા સહિત વિવધ આક્ષેપો સાથે વલસાડ એસપી સમક્ષ જિલ્લા કોંગ્રેસ પ્રમુખ કિશન પટેલ અને પ્રભારી ગીરીશ દેસાઇએ રાવ કરી છે.આ મુદ્દે એસપી સમક્ષ યોગ્ય કાર્યવાહી કરવા માગ કરાઇ છે.બીજી તરફ વાપી શહેર ભાજપ પ્રમુખે કહ્યું હતુ કે અમે કોઇને રોકયા જ નથી. આક્ષેપો તદ્દન ખોટા છે. વાપી મનપા ચુંટણીના કોંગ્રેસ પક્ષના પ્રભારી ગીરીશ દેસાઇ અને જિલ્લા કોંગ્રેસ પ્રમુખ કિશન પટેલે કરેલી રજૂઆત મુજબ વોર્ડ નં.11માં 19 એપ્રિલના રોજ કોંગ્રેસના કાર્યકરો ઉમેદવારોને ભાજપે પ્રચાર કરતા રોક્યા હતા તેની અરજી એસપી યુવરાજસિંહ જાડેજાને કરી હતી. આ બંન્ને કોંગ્રેસ નેતાઓએ રજૂઆતમાં આક્ષેપ કરતાં જણાવ્યુ હતું કે વોર્ડ નં.11ના કોળીવાડ અને સુલપડ સંવેદનશીલ વિસ્તારમાં તેમને પ્રચાર નહિ કરવા દેવાયો હતો અને પોસ્ટર ફાડી નાંખ્યા હતા તેની લેખિત રજૂઆતો કોંગ્રેસ ઉમેદવારોએ કહી હતી.વોર્ડ નં.10માં કોંગ્રેસના નેતા પીરૂ મકરાણીના કાર્યકરોને પણ ખોટી રીતે હેરાન પરેશાનનો આક્ષેપ કર્યો હતો. પ્રભારી ગીરીશ દેસાઇએ જણાવ્યું હતું કે, વલસાડ એસપીએ યોગ્ય પ્રતિસાદ આપી કાયદો વ્યવસ્થાની જાળવણી માટે સ્પેશ્યિલ પોલીસ ફોર્સ મૂકવા હૈયાધરપત આપી હતી. આ અંગે પુછતાં વાપી શહેર ભાજપ પ્રમુખ મનિષ દેસાઇએ જણાવ્યું હતું કે આ પ્રકારનો બનાવ ધ્યાને આવ્યો નથી. અમે કોઇને પ્રચાર માટે અટકાવ્યાં નથી.ચૂંટણીપંચની ગાઇડલાઇન મુજબ ભાજપના ઉમેદવારો પ્રચાર કાર્ય કરી રહ્યાં છે. જેથી અમે કોઇ મુશ્કેલી ઉભી કરી નથી. આમ વાપી મહાનગરપાલિકાની ચૂંટણી પહેલા કોંગ્રેસે ભાજપ પર આક્ષેપ કર્યો છે. તો ભાજપે પણ આક્ષેપ પાયાવિહોણા હોવાના જવાબ આપ્યો હતો. રાજકીય માહોલમાં ગરમાટો વ્યાપી ગયો છે.

વિશ્વ પુસ્તક દિવસ:ધરમપુરના વ્યક્તિએ લંડનમાં વસાવ્યું પુસ્તકધામ

વિશ્વ પુસ્તક દિવસ 23એપ્રિલ નિમિત્તે જ્યારે પુસ્તકો પ્રત્યેનો પ્રેમ ઓછો થઈ રહ્યો હોવાની ચર્ચા છે. ત્યારે વલસાડ જિલ્લાના ધરમપુરના વતની અને છેલ્લા 38 વર્ષથી લંડનમાં સ્થાયી ઇલ્યાસ આબીદઅલી સિદાત (ઇલ્યાસ ધરમપુરી) એ સાહિત્ય પ્રત્યેનો અનોખો ભાવ દર્શાવી સાત સમંદર પાર પોતાના નિવાસસ્થાને માત્ર કવિતાના 625 પુસ્તકોની એક પર્સનલ લાઇબ્રેરી બનાવી ગુજરાતી સાહિત્યની સેવા કરી રહ્યા છે. વિશ્વ પુસ્તક દિવસ નિમિત્તે તેમની આ પ્રવૃત્તિ ગુજરાતી ભાષાના ચાહકો માટે પ્રેરણા સ્ત્રોત બની છે. કવિ દીપક બારડોલીકરના સબંધમાં દોહિત્ર ઇલ્યાસ ધરમપુરીના લંડન સ્થિત નિવાસસ્થાને કવિતાના 625પુસ્તકોની લાઇબ્રેરી આવેલી છે. મરીઝ, શયદા, બેફામ, અદમ ટંકારવી, અનિલ જોશી, ઉમાશંકર જોશી ,પ્રફુલ પંડ્યા,ભાવેશ ભટ્ટ, રઈશ મનીઆર, ભાવિન ગોપાણી, ખલીલ ધનતેજવી, શૂન્ય પાલનપુરી, અમૃત ઘાયલ અને ગની દહીવાલાના જેવા અનેક નામાંકિત કવિઓના દુર્લભ કાવ્ય સંગ્રહો સચવાયેલાછે. માત્ર સંગ્રહ કરવા પૂરતું સીમિત ન રહી તેમણે લંડનમાં વસતા અન્ય ગુજરાતી સાહિત્ય પ્રેમીઓને આ પુસ્તકો હોંશે-હોંશે વાંચવા આપે છે. લંડન જેવા મેટ્રોપોલિટન સિટીમાં જ્યાં જગ્યાનો અભાવ હોય છે, ત્યાં હાર્ડકોપી પુસ્તકોની જાળવણી કરવી એક ભગીરથ કાર્ય છે. માતૃભાષા સાથે જોડી રાખવા માટે અનન્ય યોગદાન ગુજરાતના વિવિધ પ્રકાશનો પાસેથી 625 કાવ્ય પુસ્તકો મંગાવી તેમણે પોતાનો ખજાનો સમૃદ્ધ કર્યો છે. એટલું જ નહીં, તેમણે લંડન અને અન્ય શહેરોની જાહેર ગુજરાતી લાઇબ્રેરીઓમાં પણ કવિતાના પુસ્તકો ભેટ આપીને નવી પેઢીને માતૃભાષા સાથે જોડી રાખવા માટે અનન્ય યોગદાન આપ્યું છે. તેઓ પોતે પણ ગઝલ ક્ષેત્રે ઊંડો રસ ધરાવે છે અને સોશિયલ મીડિયાના માધ્યમથી નિયમિત પોતાની રચનાઓ દ્વારા સાહિત્ય પીરસે છે. સાહિત્યનો લ્હાવો મળે તે જરૂરી પુસ્તકોમારા માટે માત્ર કાગળના પાના નથી, પણ મારો વારસો છે. લંડનમાં રહીને પણ હું મારા ધરમપુર અને ગુજરાતી સાહિત્યની નજીક રહું છું. બીજાને પણ આ સાહિત્યનો લ્હાવો મળે તે મારો મુખ્ય ઉદ્દેશ્ય છે.> ઇલ્યાસ ધરમપુરી, લંડન

તવડીમાં સંગ્રામ:9500થી વધુ બાવળ કાપવા મુદ્દે પોલીસ‎અને ગ્રામજનો સામસામે, 300 મહિલાઓએ કામ અટકાવ્યું‎

જલાલપોર તાલુકાના તવડી ગામે ખેતીની જમીનમાં ઉભેલા આશરે 9,567 જેટલા બાવળના ઝાડો કાપવાની મંજૂરી મુદ્દે ભારે હોબાળો મચ્યો છે. વહીવટી તંત્ર દ્વારા માત્ર એક જ પાવરદારની રજૂઆતને આધારે હજારો વૃક્ષો કાપવાની મંજૂરી આપી દેવાતા ગામના 22 હિસ્સેદારો અને સ્થાનિકોમાં આક્રોશ ફાટી નીકળ્યો હતો. બુધવારે મજૂરોએ ઝાડ કાપવાનું શરૂ કરતા જ સરપંચ રીનાબેન સહિત 300થી વધુ મહિલાઓએ સ્થળ પર ધસી જઈ ટ્રેક્ટરો અટકાવ્યા હતા. આ દરમિયાન પોલીસ કાફલો આવી પહોંચતા માહોલ ગરમ થયો હતો અને પોલીસ-ગ્રામજનો વચ્ચે ઘર્ષણના દૃશ્યો સર્જાયા હતા. રાત્રે પણ પંચાયત પાસે ગ્રામજનોના ધામાબુધવારે સવારે જ્યારે મજૂરો સાધનો સાથે ત્રાટક્યા ત્યારે ગ્રામજનોએ તેમના સાધનો જપ્ત કરી લીધા હતા. મોડી સાંજે અને રાત્રે પણ મહિલાઓ અને પોલીસ વચ્ચે ઉગ્ર બોલાચાલી થઈ હતી. ગ્રામજનોનો આક્ષેપ છે કે પોલીસ તેમને સહકાર આપવાને બદલે સવાલો કરી રહી છે. શુછે સમગ્ર વિવાદસુરતના બારડોલીમાં રહેતા પ્રિતેશકુમાર રમેશભાઈ પ્રજાપતિ (કુંદનબેન પટેલની પુત્રીના પાવરદાર) એ તવડી ગામના વિવિધ બ્લોક નંબરોમાં આવેલા બાવળના ઝાડ કાપવા પરવાનગી માંગી હતી. જોકે, સ્થાનિકોનો દાવો છે કે આ જમીન અલગ-અલગ 22 લોકોના નામે છે. મૂળ માલિકોએ જે-તે સમયે ગામના 22 લોકોને જમીન વેચી હતી, છતાં અન્ય એક પાવરદારને આધારે તંત્રએ મંજૂરી આપી દેતા વિવાદ વકર્યો છે. પોલીસ સવાલો પૂછે છે પણ મદદ નથી કરતી: સરપંચ જમીનના મૂળ માલિકો બહાર રહે છે, તેમણે ગામના 22 લોકોને જમીન વેચી છે. આ 22 લોકોની મંજૂરી વગર લાકડા કાપવા અને માટી ખનન શરૂ કરી દેવાયું છે. અમે વિરોધ કર્યો તો 300થી વધુ મહિલાઓ ઉતરી આવી છે. પોલીસ અમને સહકાર આપવાને બદલે અમારી જ ઉલટતપાસ કરી રહી છે. > રીનાબેન, સરપંચ તવડી ગામ

નવસારી જિલ્લા ટ્રાફિક પોલીસની સરાહનીય પહેલ‎:અકસ્માતના બનાવ ઘટાડવા બીલીમોરા અને ચીખલી APMCમાં 150થી વધુ વાહનો પર રિફ્લેક્ટર્સ લગાવાયા

ખેતીપ્રધાન ભારત દેશમાં ખેડૂતો પોતાની પેદાશોના વેચાણ માટે રાત-દિવસ વાહનો લઈને માર્કેટ યાર્ડ સુધી સફર કરતા હોય છે. ખાસ કરીને રાત્રિના સમયે અથવા વહેલી સવારે ધુમ્મસભર્યા વાતાવરણમાં રોડ પર ઊભેલા કે ગતિશીલ ટ્રેક્ટર-ટ્રોલી કે ટેમ્પો જેવા વાહનો અન્ય વાહન ચાલકોને દેખાતા નથી, જે ગંભીર અકસ્માતનું કારણ બને છે. આ જોખમને નિવારવા માટે બુધવારે જિલ્લા ટ્રાફિક શાખા નવસારી દ્વારા એક વિશેષ અભિયાન હાથ ધરવામાં આવ્યું હતું.આરટીઓ અધિકારીઓના સહયોગથી નવસારી ટ્રાફિક પોલીસે બીલીમોરા અને ચીખલી ખેતીવાડી ઉત્પન્ન બજાર સમિતિ (APMC)ની મુલાકાત લીધી હતી. અહીં માલસામાન લઈને આવતા ટ્રક, ટેમ્પો, ટ્રેક્ટર-ટ્રોલી અને છકડા જેવા 150થી વધુ કૃષિ વાહનો પર રેડિયમ અને રિફ્લેક્ટર્સ લગાવાની કામગીરી કરવામાં આવી હતી. આ ઝુંબેશનો મુખ્ય ઉદ્દેશ્ય માર્ગ વહન દરમિયાન ખેડૂતો અને વાહન ચાલકોની સલામતી સુનિશ્ચિત કરવાનો છે. રિફ્લેક્ટર્સના કારણે દૂરથી આવતા વાહનોને કૃષિ વાહનની હાજરીનો ખ્યાલ આવશે, જેથી સંભવિત અકસ્માતો અટકાવી શકાશે. ટ્રાફિક પોલીસની આ કામગીરીને ખેડૂત આલમ દ્વારા બિરદાવાઇ હતી. ધુમ્મસના જોખમ સામે સુરક્ષા કવચ વહેલી સવારે ધુમ્મસભર્યા વાતાવરણમાં રોડ પર ઊભેલા કે ગતિશીલ ટ્રેક્ટર-ટ્રોલી કે ટેમ્પો જેવા વાહનો અન્ય વાહનચાલકોને દેખાતા નથી, જે ગંભીર અકસ્માતનું કારણ બને છે. જેને લઇ એસપીના માર્ગદર્શન હેઠળ રિફ્લેક્ટર લગાવામાં આવ્યા અને જાગૃતિના કાર્યક્રમો પણ કરાયા છે. > એમ.પી.સોલંકી, ટ્રાફિક પોલીસ અધિકારી

પ્રશાસન વિરુદ્ધ વધતો આક્રોશ:ટ્રેન નહીં તો વોટ નહીં’ સોશિયલ‎ મીડિયા પર NOTAનું કેમ્પેઈન શરૂ‎

નવસારી જિલ્લા સહિત સમગ્ર દક્ષિણ ગુજરાતના 50 હજારથી વધુ અપ-ડાઉન કરતા પાસ ધારકો અને સ્થાનિક મુસાફરોમાં રેલવે પ્રશાસન વિરુદ્ધ ઉગ્ર રોષ જોવા મળી રહ્યો છે. છેલ્લા ઘણા સમયથી નવસારીના મુસાફરો દ્વારા વિવિધ ટ્રેનોના સ્ટોપેજ અને નવી ટ્રેનો શરૂ કરવા માટે રજૂઆતો કરવામાં આવી રહી છે, પરંતુ તંત્ર દ્વારા કોઈ નક્કર કાર્યવાહી કરવામાં આવતી નથી. ચૂંટણી સમયે નવસારી- વલસાડ જિલ્લાના પાસ મુસાફરો એ પોતાને કોરોના પહેલા બંધ થયેલી ટ્રેનોને શરૂ કરવામાં આવે, ટ્રેનોના ડબ્બા પણ વધારવામાં આવે અને ધારાસભ્યો અને સાંસદને વારંવાર લેખિતમાં અને રૂબરુ મળ્યા છતાં માત્ર ઠાલા વચનો જ મળ્યા હોય અને આગામી સમયમાં જો માંગ ન પૂરી થવાની હોય ત્યારે મતદાન શા માટે કરવાનું તેમ જણાવી સોશિયલ મીડિયામાં એક જ ચાલે નોટા જ ચાલે શાન ઠેકાણે લાવવા માટે જેને લઇ મુસાફરોમાં સરકાર પ્રત્યે આક્રોશ છવાયો છે. મુસાફરોની સ્પષ્ટ માંગ છે કે નવસારી સહિત દક્ષિણ ગુજરાતના મુસાફરોને અન્યાય કરવાનું બંધ કરી તાત્કાલિક અસરથી જરૂરી ટ્રેનોના સ્ટોપેજ આપવામાં આવે અને મુસાફરોની સુરક્ષા તથા સુવિધા સુનિશ્ચિત કરવામાં આવે. પશ્ચિમ બંગાળના ઉમેદવારને મત અપાવવા એસી ટ્રેન અને મજૂરો પર લાઠીચાર્જથી રોષ સુરતના એક રેલવે સ્ટેશન પર પોતાની વાજબી માંગણીઓ રજૂ કરી રહેલા શ્રમિકો અને મુસાફરો પર કરવામાં આવેલા લાઠીચાર્જની ઘટનાએ બળતામાં ઘી હોમવાનું કામ કર્યું છે. રોષે ભરાયેલા મુસાફરોનું કહેવું છે કે, એક તરફ પશ્ચિમ બંગાળમાં મતદાન માટે મજૂરોને લઈ જવા સ્પેશિયલ AC ટ્રેનોની વ્યવસ્થા કરવામાં આવે છે, જ્યારે બીજી તરફ જે મુસાફરો દરરોજ રેલવેને આવક કરી આપે છે તેમને સુવિધાના નામે લાઠીઓ મળી રહી છે. દરેકને નોટા પર બટન દબાવી વિરોધ નોંધાવવા અપીલરેલવે તંત્ર અને સરકારના પક્ષપાતી વલણથી કંટાળીને પાસ ધારકો અને પેસેન્જર એસોસિએશને આકરા તેવર અપનાવ્યા છે. આગામી લોકસભા ચૂંટણીમાં જો નવસારીના મુસાફરોની માંગણીઓ સંતોષવામાં નહીં આવે, તો હજારો પાસ ધારકો એકસૂત્રે નોટાનું બટન દબાવી પોતાનો વિરોધ નોંધાવશે તેવી ચીમકી ઉચ્ચારવામાં આવી છે.> મહેશભાઇ, મુસાફર

રોજનું કમાઈ રોજ ખાનારાની હાલત કફોડી‎:નવસારી જિલ્લામાં મનરેગામાં ત્રણ મહિનાથી શ્રમિકોને રૂ. 5 કરોડથી વધુની ચૂકવણી બાકી

નવસારી જિલ્લામાં 3 મહિનાથીય વધુ સમયથી મનરેગામાં કામ કરતા શ્રમિકોને વેતન નહી ચૂકવાતા ગરીબ શ્રમિકોની સ્થિતિ કફોડી થઈ છે. જિલ્લામાં કુલ 5 કરોડથી વધુ નાણાં અંદાજે 6 હજારથી વધુ શ્રમિકોને ચૂકવવાના બાકી છે. ગ્રામ્ય વિસ્તારમાં ગરીબ લોકોને રોજગારીની ખાતરી આપતી મહાત્વાકાંક્ષી યોજના મનરેગા 19 વર્ષથી અહીંના નવસારી જિલ્લામાં પણ ચાલી રહી છે. જળસંચય, નાની સિંચાઈ, કાંસ સફાઈ વગેરે કામો આ યોજનામાં કામ કરતા શ્રમિકો કરે છે. શ્રમિકોને આમ તો 15 દિવસમાં વેતન ચૂકવવાની એક ગાઈડલાઇન છે, જોકે તેમાં થોડો વિલંબ પણ થાય છે. માર્ચ મહિનામાં વિલંબ થતો આવ્યો છે. જોકે હાલ વધુ વિલંબ થયો છે. આ વિલંબ ચર્ચાસ્પદ પણ બન્યો છે અને તેની અસર પણ હવે કામ પર થવા લાગી છે. મળતી માહિતી મુજબ 15 જાન્યુઆરી બાદ જિલ્લામાં વેતન ચૂકવણી નહીં થયાની વાત બહાર આવી છે. આમ ત્રણ મહિના વિતી જતા રોજનું કમાઈ રોજ ખાનારા ઘણા શ્રમિકોની હાલત કફોડી થઈ ગઈ છે. સ્થાનિક લેવલે વિલંબ થવાનું કારણ પૂછતાછ કરતા ગ્રાન્ટ નહી આવ્યાનું જવાબ મળે છે. જિલ્લામાં 5 કરોડ રૂપિયાથી વધુની ચૂકવણી શ્રમિકોની બાકી છે, શ્રમિકોને ચોક્કસ આંક તો નથી પણ અંદાજે 6 હજારથી વધુ શ્રમિકોની ચૂકવણી બાકી છે. ભાસ્કર ઇનસાઇડતળાવ, કાંસ સફાઈ સહિતના કામો પર અસરઆમ તો 15 દિવસમાં ચુકવણી કરવાની એક ગાઇડલાઇન છે. ચૂકવણી થોડી લંબાવાની સ્થિતિ માટે શ્રમિકો તૈયાર હોય છે પણ હાલ વધુ સમય જતા અનેક શ્રમિકો મનરેગાની જગ્યાએ અન્ય જગ્યાએ કામ કરવા જઈ રહ્યાંની જાણકારી પણ બહાર આવી છે. અહીં ઉલ્લેખનીય છે કે હાલ ઉનાળામાં ગટર, કાંસ સફાઈ, તળાવ વગેરેના કામો થતા હોય છે, જે ચાલી પણ રહ્યાં છે પણ વેતન ચૂકવણી વિલંબ થતા કેટલીક જગ્યાએ શ્રમિક નહીં આવતા કામ અસરગ્રસ્ત થઈ રહ્યાંની માહિતી પણ બહાર આવી છે. વાંસદા તાલુકામાં 1.60 કરોડથી વધુ બાકીમનરેગા યોજનામાં શ્રમિકોને મજુરી ચુકવવાના નાણાં એક યા બે તાલુકામાં નહીં પરંતુ તમામ 6 તાલુકામાં વિલંબાયા છે. જો કે તમામ તાલુકામાં એક સરખી સ્થિતિ નથી. સૌથી વધુ ચુકવણી વાંસદા તાલુકામાં 1.60 કરોડ રૂપિયાથી વધુની બાકી હોવાની જાણકારી બહાર આવી છે. ત્યારબાદ ગણદેવી તાલુકામાં વધુ બાકી છે. અન્ય ચાર તાલુકામાં પણ 37 લાખથી 80 લાખ સુધીની ચુકવણી શ્રમિકોને બાકી હોવાની જાણકારી મળી છે. જિલ્લામાં કેટલાય કર્મીઓનો પગાર બાકી..જ્યાં મનરેગા યોજનામાં કામ કરતા શ્રમિકોનું વેતન વિલંબાયુ છે ત્યાં આજ યોજનામાં તાલુકા લેવલે કર્મચારીઓ પણ કરાર આધારિત કામ કરે છે તેમનો પગાર પણ નિયમિત નહીં થઈ રહ્યાની જાણકારી મળી છે. અનેક કર્મચારીઓનો તો ચાર મહિનાથી ય વધુ સમયથી પગાર થયો નથી. અહીં પણ ગ્રાન્ટની જ સમસ્યા છે. નજીકમાં ચુકવણી થઇ જવાની ચર્ચામળતી માહિતી મુજબ નજીકના દિવસોમાં મનરેગા યોજનાની જગ્યાએ વિકસીત ભારત જીરામજી યોજના અમલી બની રહી છે. જેને લઇ સિસ્ટમ બદલાઇ રહી હોય ચુકવણી લંબાઇ હોવાની એક જાણકારી બહાર આવી છે અને નજીકના દિવસમાં બાકી ચુકવણી થઇ જવાની ચર્ચા પણ અંતરંગ સરકારી સુત્રોમાંથી જાણવા મળી છે.

અરજદારો વધ્યા:RTEમાં શહેરમાંથી સૌથી વધુ 36 હજાર ફોર્મ, 1 બેઠક માટે 3 વિદ્યાર્થી વચ્ચે સ્પર્ધા

રાઇટ ટુ એજ્યુકેશનમાં પ્રવેશ માટે આવકમર્યાદા 6 લાખની થતાં આ વર્ષે અમદાવાદ શહેરમાંથી મુદત વધારાયા બાદ અત્યાર સુધીમાં ઐતિહાસિક 36,939 વિદ્યાર્થીનાં ફોર્મ ભરવામાં આવ્યાં છે. જ્યારે કે ગયા વર્ષે સમગ્ર પ્રવેશ પ્રક્રિયા પૂરી થયા બાદ 36,836 વિદ્યાર્થીઓનાં કુલ ફોર્મ ભરાયાં હતાં. આ વર્ષે અમદાવાદ શહેરમાંથી ઐતિહાસિક ફોર્મ ભરાયાં છે. અમદાવાદ શહેરની સ્કૂલોમાં આરટીઇની કુલ 14200 અનામત બેઠકો છે. જેથી આ વર્ષે એક બેઠક પર 3 વિદ્યાર્થી વચ્ચે સ્પર્ધા થશે. આરટીઇમાં આ વર્ષે ગુજરાત બોર્ડની સ્કૂલો શરૂ થાય તે પહેલાં જ પ્રવેશપ્રક્રિયા પૂરી કરવાની જાહેરાત કરવામાં આવી હતી. પહેલા તબક્કા બાદ વાલીઓની સુવિધા માટે તારીખ લંબાવવામાં આવી હતી. પરંતુ અધિકારીઓના જણાવ્યા પ્રમાણે, ચૂંટણીને કારણે વાલીઓને આવકનો દાખવો કાઢવામાં મુશ્કેલી પડી રહી છે. આ કારણે હજુ પણ થોડા સમય વાલીઓને આપવામાં આવી શકે છે. અત્યારે દરરોજ 70 જેટલા નવા વાલીઓ પોતાનાં બાળકો માટે ફોર્મ ભરી રહ્યાં છે. જેથી સરકાર ચૂંટણીને ધ્યાનમાં રાખીને ફોર્મ ભરવાનો સમય વધારી શકે છે. 587 સિંગલ ચાઇલ્ડના વાલીએ ફોર્મ ભર્યાંગયા વર્ષે અમદાવાદમાંથી 510 એક માત્ર દિકરી હોય તેવા વાલીઓએ ફોર્મ ભર્યુ હતું. પરંતુ આ વર્ષે સૌથી વધુ 587 એવા વાલીઓએ અરજી કરી હતી કે જેઓને સંતાનમાં એક માત્ર દિકરી છે. આરટીઇના નિયમ પ્રમાણે આ વાલીના બાળકોને પ્રવેશ માટે પ્રાથમિકતા આપવામાં આવે છે. સરકારે જાહેર 8માં ક્રમ પર એક સંતાનની દિકરીઓને પ્રાથમિકતા આપવામાં આવી છે. વાલીઓ ફી ભરવા તૈયાર હોવા છતાં આરટીઇનાં બાળકોને ધોરણ-9માં પ્રવેશ ન આપતાં ફરિયાદઆરટીઇમાં ધોરણ 8 સુધી બાળકોને નિ:શુલ્ક અભ્યાસ કરાવવામાં આવે છે પરંતુ ત્યાર પછી વાલી ફી ભરવા તૈયાર હોવા છતાં એ જ સ્કૂલમાં પ્રવેશ ન અપાતો હોવાની ફરિયાદ ડીઇઓ કચેરીમાં કરવામાં આવી રહી છે. વાલીઓના જણાવ્યા મુજબ, સરકારે પ્રાથમિક બાદ માધ્યમિકમાં પ્રવેશ માટે વાલીઓને મદદ કરવી જોઇએ.

મોર્નિંગ ન્યૂઝ બ્રીફ:હોર્મુઝ સ્ટ્રેટથી ગુજરાત આવી રહેલા જહાજને રોકી ઈસ્લામિક ગાર્ડે કબજામાં લીધું

નમસ્તે, ઈરાને હોર્મુઝ સ્ટ્રેટમાં ભારત આવી રહેલા એક જહાજને અટકાવીને કબજે કરી લીધું છે. બીજી તરફ, PM મોદીને આતંકવાદી કહેવા બદલ ચૂંટણી પંચે કોંગ્રેસ અધ્યક્ષ મલ્લિકાર્જુન ખડગેને નોટિસ પાઠવી છે. મોર્નિંગ ન્યૂઝ બ્રીફમાં આગળ જણાવીશું કે તાજમહેલ જોવા ગયેલા પ્રવાસીઓ કેમ બેહોશ થઈ ગયા… ⏰ આજની ઈવેન્ટ્સ, જેના પર રહેશે નજર 1. પશ્ચિમ બંગાળમાં પ્રથમ તબક્કામાં 152 બેઠકો પર મતદાન થશે. જ્યારે, તમિલનાડુની તમામ 234 બેઠકો માટે વોટિંગ થશે. 2. જગ્ગી હત્યાકાંડમાં અમિત જોગીની અરજી પર સુપ્રીમ કોર્ટમાં સુનાવણી થશે. કાલના મોટા સમાચારો 1. હોર્મુઝ સ્ટ્રેટથી ગુજરાત આવી રહેલા જહાજને ઈરાને રોક્યું:ઈસ્લામિક ગાર્ડે કબજામાં લીધું, પરમિશન વગર પસાર થવાનો આરોપ ઈરાનની ઈસ્લામિક રિવોલ્યુશનરી ગાર્ડ (IRGC) એ હોર્મુઝ સ્ટ્રેટમાં ભારત આવી રહેલા એક જહાજને રોકીને કબજે કર્યું છે. ઈરાને આરોપ લગાવ્યો છે કે આ જહાજ પરવાનગી વગર હોર્મુઝમાંથી પસાર થવાનો પ્રયાસ કરી રહ્યું હતું. લાઈબેરિયાના ફ્લેગવાળું એપામિનોડેસ નામનું આ કન્ટેનર શિપ ગુજરાતના મુંદ્રા પોર્ટ તરફ જઈ રહ્યું હતું. ઈરાની નૌકાદળના જણાવ્યા અનુસાર, જહાજની નેવિગેશન સિસ્ટમમાં છેડછાડ કરવામાં આવી હતી, જેનાથી દરિયાઈ સુરક્ષા માટે જોખમ ઊભું થયું હતું. કાર્યવાહી દરમિયાન IRGCએ જહાજને ઈન્ટરસેપ્ટ કરી પોતાના કબજામાં લીધું અને તેને તટ તરફ લઈ ગયા. આ ઉપરાંત, ઈઝરાયલ સાથે જોડાયેલા ફ્રાન્સેસ્કા નામના બીજા જહાજને પણ જપ્ત કરવામાં આવ્યું છે. વાંચો સંપૂર્ણ સમાચાર 2. PM મોદીને આતંકવાદી કહેવા પર ખડગેને ECની નોટિસ:કોંગ્રેસ અધ્યક્ષે નિવેદન પર સ્પષ્ટતા પણ કરી હતી; શાહ બોલ્યા- રાહુલ સાથે રહીને ભાષા બગડી ચૂંટણી પંચ (EC) એ બુધવારે કોંગ્રેસ અધ્યક્ષ મલ્લિકાર્જુન ખડગેને નોટિસ પાઠવીને જવાબ માંગ્યો છે. ભાજપે આજે પીએમ મોદીને આતંકવાદી ગણાવવાના મામલે ચૂંટણી પંચ સમક્ષ ખડગેની ફરિયાદ કરી હતી. ખડગેએ મંગળવારે ચેન્નઈમાં ચૂંટણી પ્રચાર દરમિયાન પીએમ મોદીને આતંકવાદી કહ્યા હતા. જોકે, બાદમાં તેમણે નિવેદન પર સ્પષ્ટતા કરતા કહ્યું હતું કે પીએમ મોદી લોકો અને રાજકીય પક્ષોને ડરાવી રહ્યા છે. મેં ક્યારેય કહ્યું નથી કે તેઓ આતંકવાદી છે. મારો મતલબ છે કે મોદી હંમેશા ધમકી આપે છે. બીજી તરફ, અમિત શાહે પશ્ચિમ બંગાળના દમદમ ઉત્તરમાં એક ચૂંટણી રેલીમાં કહ્યું કે આતંકવાદને ખતમ કરનાર નરેન્દ્ર મોદીને ખડગે આતંકવાદી કહી રહ્યા છે. વાંચો સંપૂર્ણ સમાચાર 3. સુપ્રીમ કોર્ટે કહ્યું- તપાસમાં મમતાની દખલગીરી લોકશાહી માટે ખતરો:કોઈ CM આવું કરશે, વિચાર્યું નહોતું; ED તપાસ દરમિયાન ફાઈલ લઈને જતાં રહ્યાં હતાં I-PAC રેડ કેસમાં EDની અરજી પર સુપ્રીમ કોર્ટમાં બુધવારે સુનાવણી થઈ. કોર્ટે એન્ફોર્સમેન્ટ ડિરેક્ટોરેટ (ED)ની તપાસ વચ્ચે CM મમતા બેનર્જીની દખલગીરીને ખોટી ઠેરવી. કહ્યું- કોઈપણ રાજ્યના CM આવું કરે તો આ લોકશાહીને ખતરામાં મૂકવા જેવું છે. જસ્ટિસ કુમારે કહ્યું- આ રાજ્ય અને કેન્દ્ર વચ્ચેનો વિવાદ નથી. આ વર્ષે 8 જાન્યુઆરીએ EDની ટીમે I-PACના વડા પ્રતીક જૈનના કોલકાતાના ગુલાઉડન સ્ટ્રીટ સ્થિત ઘર અને ઓફિસ પર દરોડા પાડ્યા હતા. પ્રતીક જૈન જ મમતા બેનર્જી માટે રાજકીય રણનીતિ તૈયાર કરે છે. દરોડા દરમિયાન મમતા પ્રતીકના ઘરે પહોંચી ગયા હતા અને કેટલાક દસ્તાવેજો લઈને ચાલ્યા ગયા હતા. વાંચો સંપૂર્ણ સમાચાર 4. ટીસીએસ કેસ- જબરદસ્તી ધર્માંતરણમાં સામેલ હતી નિદા ખાન:પોલીસનો દાવો- બે મહિનાની ગર્ભાવસ્થાનો હવાલો આપીને આગોતરા જામીન માંગ્યા મુંબઈના નાસિક સ્થિત ટાટા કન્સલ્ટન્સી સર્વિસિસ (TCS) માં યૌન ઉત્પીડન કેસમાં કંપનીની પ્રોસેસ એસોસિયેટ આરોપી નિદા ખાન હજુ પણ ફરાર છે. પોલીસે દાવો કર્યો છે કે તે બળજબરીથી ધર્માંતરણમાં સામેલ હતી. સેશન્સ કોર્ટમાંથી ધરપકડ પર વચગાળાની સુરક્ષા ન મળ્યા બાદ પોલીસે જણાવ્યું છે કે નિદા ખાનની શોધખોળ ચાલુ છે. તેણે બે મહિનાની ગર્ભાવસ્થાનો હવાલો આપીને આગોતરા જામીન માટે નાસિક સેશન્સ કોર્ટમાં અરજી કરી હતી, પરંતુ કોર્ટે સોમવારે તેને 27 એપ્રિલ સુધી રાહત આપવાનો ઇનકાર કર્યો હતો. હવે કોર્ટ 27 એપ્રિલે આગોતરા જામીન અરજી અને વચગાળાની રાહત અરજી બંને પર સુનાવણી કરશે. વાંચો સંપૂર્ણ સમાચાર 5. ભીષણ હીટવેવનો હાહાકાર, પારો 45C ને પાર:મહારાષ્ટ્રમાં 7નાં મોત, આગ્રામાં 6 પ્રવાસીઓ બેભાન; ગરમીથી બચવા રીંછ માટે 8 કિલો આઈસ્ક્રીમની જયાફત! ઉત્તર ભારતના અનેક વિસ્તારોમાં ગરમીનું એલર્ટ જારી કરવામાં આવ્યું છે, જેમાં રાજસ્થાન, ગુજરાત, મધ્યપ્રદેશ, મહારાષ્ટ્ર, છત્તીસગઢ, ઉત્તરપ્રદેશ, પંજાબ, હરિયાણા, ચંદીગઢ, ઓડિશા અને બંગાળનો સમાવેશ થાય છે. છેલ્લા પાંચ દિવસથી તાપમાન સતત 40C થી 45C ની વચ્ચે રહ્યું છે. તીવ્ર ગરમી જનજીવનને અસર કરવા લાગી છે. ઉદયપુર અને જયપુર સહિત રાજસ્થાનના પર્યટન સ્થળોમાં પ્રવાસીઓનું આગમન ઘટ્યું છે. ઉત્તરપ્રદેશના આગ્રામાં તાજમહેલની મુલાકાત લેનારા છ પ્રવાસીઓ બીમાર પડ્યા હતા. મહારાષ્ટ્રના વિદર્ભ અને ઉત્તર મહારાષ્ટ્રમાં પારો 45 ડિગ્રી સેલ્સિયસને પાર કરી ગયો છે. સ્થિતિ એવી છે કે અહીં 7 લોકોના મોત થયા છે અને 31 લોકો બીમાર છે. વાંચો સંપૂર્ણ સમાચાર 6. કેદારનાથ દર્શનના પહેલા દિવસે વડોદરાના શ્રદ્ધાળુને હાર્ટએટેક:2 કલાક મૃતદેહ તડકામાં રઝળ્યો, પુત્રનો ઉત્તરાખંડના CMને સવાલ- મુખ્યમંત્રીને હેલિકોપ્ટર મળે તો ડેડબોડીને કેમ નહીં? કેદારનાથના કપાટ ખુલ્યાના પહેલા જ દિવસે વડોદરાથી આવેલા એક શ્રદ્ધાળુનું હાર્ટ એટેકથી મૃત્યુ થયું. મૃત્યુ બાદ મૃતદેહને નીચે લઈ જવા માટે પણ પરિવારજનોને કલાકો સુધી ભટકવું પડ્યું. મૃતકના પુત્ર હેમંતે પ્રશાસન અને મેડિકલ ટીમ પર બેદરકારીના ગંભીર આરોપો લગાવ્યા છે. હેમંતે કહ્યું કે, મેં ઉત્તરાખંડના મુખ્યમંત્રી(પુષ્કરસિંહ ધામી) સાથે પણ વાત કરી. તેમને કહ્યું કે, જો સીએમ સરને હેલિકોપ્ટર મળી શકે તો ડેડબોડી માટે કેમ નહીં? વડોદરાથી ટૂર ઓપરેટર હેમંતભાઈ માલી (ત્રિમૂર્તિ ટૂર્સ એન્ડ એડવેન્ચર્સ) પોતાના માતા-પિતા સાથે દર્શન કરવા આવ્યા હતા. વાંચો સંપૂર્ણ સમાચાર 7. કપરાડામાં પીકઅપ પલટી જતાં 8 લોકોનાં મોત:28 લોકો સવાર હતા, આણું વાળવા જતા પરિવારને અકસ્માત નડ્યો, ઈજાગ્રસ્તોને હોસ્પિટલ ખસેડાયા વલસાડ જિલ્લાના કપરાડા તાલુકાના વીરક્ષેત્ર નજીક એક ગોઝારો અકસ્માત સર્જાયો હતો. અહીં મુસાફરો ભરીને જતી એક પીકઅપ ગાડી અચાનક પલટી મારી જતાં 8 લોકોના કરુણ મોત નિપજ્યા છે. આ અકસ્માતને પગલે સ્થાનિક પંથકમાં અરેરાટી વ્યાપી ગઈ છે. અકસ્માતનો ભોગ બનેલી આ પીકઅપ ગાડીમાં કુલ 28 જેટલા વ્યક્તિઓ સવાર હતા. ગિરનારા ગામના પરિવારને અકસ્માત નડ્યો હતો. પરિવારના સભ્યો સામાજીક પ્રસંગે વિરક્ષેત્ર જતાં હતા, ત્યારે માર્ગમાં ઠાળ પાસે પિકઅપ વાનમાં ટેક્નિકલ ક્ષતિ સર્જાઈ હતી. ક્ષતિને કારણે પિકઅપ ઢાળ પરથી અચાનક રિવર્સ ચાલવા લાગી હતી. ચાલકે સ્ટેયરિંગપરથી કાબૂ ગુમાવતા વાહન રોડની બાજુના ઝાડ સાથે ધડાકાભેર અથડાઈ પલટી ખાઈ ગયું હતું. વાંચો સંપૂર્ણ સમાચાર આજનું કાર્ટૂન ⚡ કેટલાક મહત્વના સમાચારો હેડલાઈનમાં 1.નેશનલ : તો લાહોરમાં જઈને જ કંપની ખોલો ને...:લેન્સકાર્ટમાં તિલક-હિજાબ મામલે ધીરેન્દ્ર શાસ્ત્રી ઉકળ્યા, મહારાષ્ટ્ર-એમપી અને છત્તીસગઢમાં પણ કંપનીનો વિરોધ વાંચો સંપૂર્ણ સમાચાર 2.ઈન્ટરનેશનલ : 'ઇન્ડિયા ઈઝ વેરી બેડ..':થાઈલેન્ડમાં ભારતીય ટુરિસ્ટ પર રેસ્ટોરન્ટ સ્ટાફ ભડકી, ગાળો આપી; વ્લોગરે પોલીસ બોલાવતાં મેનેજરે માફી માંગી વાંચો સંપૂર્ણ સમાચાર 3.નેશનલ : બોયફ્રેન્ડને ખુરશી સાથે બાંધીને જીવતો સળગાવ્યો:ગર્લફ્રેન્ડે સરપ્રાઈઝ આપવાના બહાને આંખો પર પટ્ટી બાંધી, હાથ-પગ બાંધ્યા; પછી આગ લગાવીને વીડિયો બનાવ્યો વાંચો સંપૂર્ણ સમાચાર 4.ઈન્ટરનેશનલ : જર્મન એરલાઇન લુફ્થાન્સાએ 20 હજાર ફ્લાઇટ્સ રદ કરી:ઈરાન યુદ્ધથી ઈંધણ મોંઘું; યુરોપમાં માત્ર 6 અઠવાડિયાનું જેટ ફ્યુઅલ બાકી વાંચો સંપૂર્ણ સમાચાર 5.બિઝનેસ : વિદેશી ઓટો-પેમેન્ટ પર 24 કલાક પહેલા નોટિફિકેશન મળશે:યૂઝર્સ ઇચ્છે તો ચુકવણી રોકી શકશે, RBI એ ઇ-મેન્ડેટના નિયમો બદલ્યા વાંચો સંપૂર્ણ સમાચાર 6.સ્પોર્ટ્સ : પાકિસ્તાની ઓલરાઉન્ડર નવાઝ ડ્રગ ટેસ્ટમાં પોઝિટિવ જણાયો:PCB તપાસ શરૂ કરી; T20 વર્લ્ડકપ દરમિયાન લેવાયેલા સેમ્પલમાં નિષ્ફળ રહ્યો વાંચો સંપૂર્ણ સમાચાર 7.ધર્મ તહેવાર જ્યોતિષ : શનિદેવનો મીન રાશિમાં ઉદય:મિથુન, મકર સહિત 6 રાશિ માટે 'રાજયોગ' જેવી સ્થિતિ; મેષ, મીન સહિત 6 રાશિએ અગ્નિપરીક્ષા માટે તૈયાર રહેવું વાંચો સંપૂર્ણ સમાચાર ️ ચર્ચિત નિવેદન અજબ ગજબ ઝાડ પર બેઠેલા પોપટને ફાયર બ્રિગેડે નીચે ઉતાર્યો છત્તીસગઢમાં એક પાલતુ પોપટને ઝાડ પરથી નીચે ઉતારવા માટે તેના માલિકે ફાયર બ્રિગેડ બોલાવી. પાઇપ વડે સતત પાણીનો છંટકાવ કરવામાં આવ્યો, ત્યારે માંડ પોપટ નીચે આવ્યો. આ દરમિયાન હજારો લિટર પાણીનો વ્યય થયો હતો. કટોકટીની સેવાઓનો આ રીતે ઉપયોગ કરવા બદલ લોકોએ સવાલો ઉઠાવ્યા છે. ફોટો, જે પોતે સમાચાર છે ભાસ્કરની એક્સક્લૂસિવ સ્ટોરીઝ, જે સૌથી વધારે વંચાઈ 1. ભાસ્કર સિરીઝ : ‘નારાયણ સાંઈ તો કૃષ્ણના અવતાર છે, આપણે સૌ ગોપીઓ છીએ’: ‘ગયા ભવનાં પુણ્ય હોય તો જ ગુરુ સાથે કામલીલાનો અવસર મળે’; દુષ્કર્મ પહેલાંનું બ્રેઇનવૉશિંગ; જુઓ એપિસોડ-44 2. આજનું એક્સપ્લેનર: હોટલ બુક હતી, પ્લેન તૈયાર હતું, તો પછી ઈરાન વાતચીત માટે ઈસ્લામાબાદ કેમ ન ગયું; ટ્રમ્પે કઈ મજબૂરીમાં યુદ્ધવિરામ લંબાવ્યો 3. Editor's View: યુદ્ધના ખર્ચે મહાસત્તાને ધ્રૂજાવી: અમેરિકાની ઐસીતૈસી, હોર્મુઝ ખોલવા યુરોપનો પ્લાન-B તૈયાર, ભાઠે ભરાયેલા ટ્રમ્પે ધર્મનાં નામે પોલિટિકલ પેંતરો કર્યો 4. MATCH મસાલા : કોહલીને 2 કરોડનો ધુંબો લાગતા બચ્યો!: ઉત્તર ગુજરાતના નારાયણ અને રિંકુએ ગામ ગાંડું કર્યું; પંડ્યા બ્રધર્સના કજિયાનો બોલતો પુરાવો મળ્યો, જુઓ VIDEO 5. પત્નીએ પ્રેમી સાથે મળીને પતિની હત્યા કરી: રાહુલે પગ પકડી રાખ્યા, પાયલે મોં પર ઓશીકું દબાવી દીધું; આડા સંબંધમાં 3 બાળકો નિરાધાર થયા 6. પારકી પંચાત : મંડપ ઉડ્યો, ફૂલ લબડી ગયાં: સંઘવીની સ્પીચ પહેલા જ કાર્યકરો ધંધે લાગ્યા, મત માગવા આવેલા નેતાઓ પર અમદાવાદી માસી બગડ્યાં 7. ગ્રાઉન્ડ રિપોર્ટ : પહેલગામમાં 75% ટુરિસ્ટ ઘટ્યા; ગાઈડ બરબાદ, ગાડી-ઘોડા વેચવા પડ્યાં: 6 ટુરિસ્ટ સ્પોટ બંધ, આતંકીઓ સામે લડનાર આદિલના પરિવારને એક વર્ષે મળ્યું ઘર 8. ઝૂંપડાંમાં છુપાયા હતા પહેલગામ આતંકી, ચોખા ખવડાવીને આશરો આપ્યો: NIAની ચાર્જશીટ- ખજૂર અને સિગારેટ સાથે લાવ્યા હતા; 1113 લોકોની પૂછપરછ 9. ઈલેક્શન એક્સપ્લેનર : મુસ્લિમ બહુમતીવાળા 6 જિલ્લામાં વસે છે મમતાનો જીવ: TMCની અડધી સીટો અહીંયાથી; શું મમતાના 'ચિકન નેક' પર સકંજો કસશે ભાજપ? કરંટ અફેર્સ ⏳ આજના દિવસનો ઈતિહાસ ​​​​​​​ માર્કેટની સ્થિતિ ️ મોસમનો મિજાજ ગુરુવારનું રાશિફળ:વૃશ્ચિક, ધન અને મકર રાશિની આર્થિક સ્થિતિ મજબૂત થશે, કર્ક રાશિને વેપારમાં મંદી રહેશે વાંચો સંપૂર્ણ રાશિફળ

ATSએ પકડેલા આતંકીઓની તપાસમાં ખુલાસો:નેતાઓ અને RSSના લોકો પર હુમલાનું હતું પ્લાનિંગ, દેશમાં કટ્ટર વિચારો વાયરલ કરવા 12-13 વોટ્સએપ ગ્રુપ કર્યા'તા એક્ટિવ

ભારતમાં ‘ગઝવા-એ-હિંદ’ની સ્થાપના કરવાના ઉદ્દેશ સાથે દેશમાં હુમલો કરવાની તૈયારી કરી રહેલા બે આરોપીને ગુજરાત ATSની ટીમે ઝડપી લીધા હતા. સિદ્ધપુરનો ઇરફાન પઠાણ અને મુંબઈનો મુરશીદ સંખ્યાબંધ વોટ્સએપ એકાઉન્ટમાં એક્ટિવ હતા. આરોપીઓએ 12થી 13 સભ્યોના વોટ્સએપ ગ્રુપ બનાવ્યા હતા. ગ્રુપમાં રહેલા તમામ સભ્યોની વિગત એકઠી કરવામાં આવી રહી છે, જેમાં દેશવિરોધી કટ્ટર માનસિકતા ધરાવતા ઘણા ગુમરાહ લોકોને પૂછપરછ માટે તૈયારી કરવામાં આવી રહી છે, જેમાંથી ઘણી ચોંકાવનારી વિગતો સામે આવી શકે છે. જુદા-જુદા ગ્રુપમાં વીડિયો અને મેસેજીસ મોકલ્યા હતાસોશિયલ મીડિયા પર પાકિસ્તાની કટ્ટરપંથી સંગઠનો તથા સિરિયાના ISIS અને અન્ય સંગઠનોને ફોલો કરી તેમના વીડિયો તથા મેસેજ જુદા-જુદા ગ્રુપમાં વાયરલ કરવામાં આવી રહ્યા હોવાની વિગતો ATSને મળી હતી. ATSની ટીમને સિદ્ધપુરથી MSCનો અભ્યાસ કરી સ્પર્ધાત્મક પરીક્ષાની તૈયારી કરી રહેલા યુવક ઇરફાન પઠાણને ઝડપી લીધો હતો. તેની સાથે સંકળાયેલા મુંબઈના મુરશીદને પણ ઝડપી લેવાયો છે. કટ્ટર વિચારો વાયરલ કરવા 12-13 વોટ્સએપ ગ્રુપ એક્ટિવબંનેના ફોનમાંથી કટ્ટર વિચારો વાયરલ કરવા માટે બનાવાયેલા 12-13 સભ્યોના સંખ્યાબંધ વોટ્સએપ ગ્રુપ એક્ટિવ હોવાની વિગતો મળી હતી. મોબાઇલમાંથી આવા ઘણા ગ્રુપના સભ્યોની વિગતો પોલીસને મળી છે. સોશિયલ મીડિયાના જુદા-જુદા પ્લેટફોર્મ પર દેશના ચોક્કસ નેતાઓ અને RSSના લોકો પર હુમલા અને દેશ સામે યુદ્ધ છેડવાના મેસેજ સહિત ઘણું વિવાદાસ્પદ સાહિત્ય પણ વાયરલ કરવામાં આવ્યું હતું, જેની તપાસ ચાલી રહી છે. સો.મીડિયાના તમામ પ્લેટફોર્મ પર ખાસ વોચબંને યુવાનોએ દેશભરમાંથી પોતાના જેવી માનસિકતા ધરાવતા યુવાનોને એકત્રિત કરી મોટી ઘટનાને અંજામ આપવા તથા યુદ્ધ છેડવાની તૈયારી કરી હતી. તેના માટે તેઓ ફંડિંગ અને હથિયાર મેળવવા પ્રયત્નશીલ હતા. હવે તેમણે આ દિશામાં કોઈ કામગીરી કરી હતી કે કેમ તથા હુમલા માટે તેમણે કોઈ લોકેશનની રેકી કરી હતી કે કેમ તેની તપાસ ચાલી રહી છે. આ ઘટના બાદ ATS ઉપરાંત તમામ એજન્સીઓ દ્વારા સોશિયલ મીડિયાના તમામ પ્લેટફોર્મ પર ખાસ વોચ રાખવામાં આવી રહી છે.

ભાજપના સ્ટાર પ્રચારક રૂપાલાએ સુરતના વોર્ડ નં-12માં ગજવી સભા:વિપક્ષ પર આકરા પ્રહાર કર્યા, 'યુક્રેન યુદ્ધમાં સફેદ નહીં, તિરંગો હોય તો પણ નીકળી શકાતું હતું એવો ઇતિહાસ લખાશે'

સુરત મહાનગરપાલિકાની આગામી ચૂંટણીના પ્રચાર અર્થે ભાજપના દિગ્ગજ નેતા અને સ્ટાર પ્રચારક પરસોતમ રૂપાલાએ આજે વોર્ડ નંબર 12માં જાહેરસભાને સંબોધિત કરી હતી. તાપી કિનારે કર્ણની ભૂમિ પરથી રૂપાલાએ પોતાના આગવા અંદાજમાં 'મિની ભારત' ગણાતા સુરતના વિકાસ અને કેન્દ્ર સરકારની વૈશ્વિક સિદ્ધિઓની વાત કરી મતદારોને ભાજપ તરફી મતદાન કરવા અપીલ કરી હતી. યુક્રેન યુદ્ધ અને તિરંગાની શાનનો કિસ્સોરૂપાલાએ યુક્રેન-રશિયા યુદ્ધ સમયનો એક હૃદયસ્પર્શી કિસ્સો વર્ણવતા જણાવ્યું હતું કે, યુક્રેનથી પરત આવેલા વિદ્યાર્થીઓનું સ્વાગત કરવા હું એરપોર્ટ ગયો હતો. મેં એક દીકરાને પૂછ્યું કે તમે આ 'બહબહાટી' (યુદ્ધ) વચ્ચેથી બહાર કેવી રીતે નીકળ્યા? ત્યારે તે દીકરાએ ગર્વથી કહ્યું હતું કે અમને સૂચના મળી હતી કે હાથમાં તિરંગો લઈને નીકળજો, તમારી ઉપર ફાયરિંગ નહીં થાય. રૂપાલાએ ઉમેર્યું કે ઇતિહાસમાં અત્યાર સુધી યુદ્ધ અટકાવવા માટે માત્ર 'સફેદ ધ્વજ'નો જ નિયમ હતો, પરંતુ ભારતના તિરંગાએ એ સાબિત કર્યું કે હવે યુદ્ધભૂમિમાં તિરંગો હોય તો પણ સુરક્ષિત નીકળી શકાય છે. રામ મંદિર અને કલમ 370 પર વિપક્ષને આડે હાથ લીધાકોંગ્રેસ અને વિપક્ષ પર પ્રહાર કરતા રૂપાલાએ કહ્યું કે, પહેલા લોકો અમારી ટીકા કરતા કે 'મંદિર વહીં બનાયેંગે, પણ તારીખ નહીં બતાયેંગે'. હવે તારીખ પણ આવી ગઈ અને રામલલા પણ બિરાજી ગયા, પણ કરમની કઠણાઈ જુઓ કે ટીકા કરનારા દર્શન કરવા પણ ન જઈ શક્યા. કલમ 370 અંગે તેમણે કટાક્ષ કર્યો કે કોંગ્રેસીઓ કહેતા હતા કે મોદી 50 વર્ષ રહે તો પણ 370 નહીં હટે, પણ અમિત શાહે એક જ પ્રસ્તાવમાં તેને રદ કરી દીધી. હવે વિપક્ષી નેતાઓએ કાશ્મીર જવું હોય તો આંટો મારી આવે. મહિલાઓની સુખાકારી: 'ઇજ્જત ઘર' અને નળથી જળગ્રામીણ અને શહેરી સુવિધાઓની વાત કરતા તેમણે જણાવ્યું કે વડાપ્રધાને લાલ કિલ્લા પરથી શૌચાલયને 'ઇજ્જત ઘર' કહીને માતા-બહેનોનું સન્માન વધાર્યું છે. એક જમાનો હતો જ્યારે બહેનોને કૂવા પર સીંચણ લઈને જવું પડતું, પલળેલા લાકડાથી ધુમાડામાં રસોઈ કરવી પડતી. આજે નળથી જળ અને ગેસ કનેક્શને આ બધી હાડમારી દૂર કરી છે. ‘સુરત હવે મિની સૌરાષ્ટ્ર નહીં, મિની ભારત છે’સુરત સાથેના પોતાના જૂના સંભારણા તાજા કરતા રૂપાલાએ કહ્યું કે, હું 1985થી સુરત આવું છું. પહેલા આને 'મિની સૌરાષ્ટ્ર' કહેતો, પણ હવે સુરત 'મિની ભારત' બની ગયું છે. અહીં આખા દેશના લોકો વસે છે. તેમણે 2006ના પૂરનો ઉલ્લેખ કરી યાદ અપાવ્યું કે તત્કાલીન મુખ્યમંત્રી નરેન્દ્ર મોદીએ રાત્રે 2 વાગ્યે પાયચા ચડાવીને સુરતની ગલીઓમાં સફાઈ અભિયાનનું નિરીક્ષણ કર્યું હતું. ‘મોદીની પીઠ થપથપાવવી હોય તો 26મીએ વહેલા મતદાન કરજો’સભાના અંતે તેમણે મતદારોને એક અનોખી અપીલ કરી હતી. તેમણે કહ્યું કે, જો તમે મોદી સાહેબના કામથી ખુશ હોવ અને તેમની પીઠ થપથપાવવા માંગતા હોવ, તો 26મી તારીખે સવારે 8:30 વાગ્યે મતદાન કરી લાઈનોના વીડિયો વાયરલ કરજો. દિલ્હીમાં બેઠેલા મોદીજીને ખબર પડવી જોઈએ કે સુરતે મતદાન શરૂ કરી દીધું છે, એ જ તેમની સાચી પીઠ થપથપાવી કહેવાશે.

ચૂંટણી પહેલા રાજકીય ગરમાવો તેજ:રાજ્યમંત્રી પરષોતમ સોલંકી દ્વારા આવતીકાલે અગત્યની બેઠકનું આયોજન, સ્થાનિક સ્વરાજ્યમાં ભાજપને જીતાડવા અપીલ

ભાવનગર જિલ્લાની સ્થાનિક સ્વરાજ્યની ચૂંટણીના માત્ર ગણતરીના દિવસો બાકી રહ્યા છે તેવા સમયે ઉમેદવારો તેમજ પક્ષના મોટા નેતાઓ દ્વારા ચૂંટણી જંગ જીતવા માટે એડીચોટીનું જોર લગાવવામાં આવી રહ્યું છે એવા સમયે કોળી સમાજના કદાવર નેતા તેમજ રાજ્ય મંત્રી પરસોતમ સોલંકી દ્વારા આવતીકાલ સાંજના સમયે તેમનાં નિવાસ સ્થાને વિજય વિશ્વાસ બેઠકનું આયોજન કરવામાં આવ્યું છે. જેમાં ભાજપના ચૂંટણી લડતા ઉમેદવારો, ધારાસભ્યો,જિલ્લા-તાલુકાના સંગઠનોના કાર્યકર્તાઓ સાથે બેસી વિચાર વિમર્શ કરી ચૂંટણી જીતવાની વ્યુ રચના પ્રસ્થાપિત કરવામાં આવશે. ભાજપ તરફેણમાં મતદાન કરી તમામ ઉમેદવારોને મદદ કરોઆ અંગે રાજયમંત્રી પરશોત્તમ સોલંકી એ જણાવ્યું હતું કે, મારા બંગલે બધા આગેવાનોને અને ભાવનગરના તમામ સમાજોના આગેવાનોને મે સાંજના 7 વાગ્યે બધાને બોલાવ્યા છે અને બધાને કહેવાનું છે કે જે વસ્તુઓ બની છે એમાં તમે કોઈ ધ્યાન નહીં દેતા પણ આ જે ઈલેકશન છે એના હિસાબે ભાવનગરની આખી પરિસ્થિતિ ચેન્જ થવાની એટલે આમાં ધ્યાન દેજો અને ખૂબ એવું મતદાન કરજો કે કોઈ એમ ન વિચારી શકે કે આમાં કોઈએ મદદ નથી કરી. અમે બધા તમારી સાથે છીએ અને અમારાથી જેટલું થઇ એટલી મદદ તો કરી જ છે પણ ક્યાંક ભૂલચૂક થઈ હોય તો અમને માફ કરજો પણ અમારા બધાની એક લાગણી છે કે, તમે ભાજપ તરફેણમાં મતદાન કરી અને ભાજપને અને એના ઉમેદવારોને તમામ મદદ કરી અને મતદાન કરજો એવી મારા તરફથી તમને બધાને નમ્ર અપીલ છે. બહુમતીથી વિજયી બનાવો એવી અપીલવધુમાં જણાવ્યું હતું કે, મારા તરફથી જેટલા પ્રયત્નો થાય એટલા ભાજપ તરફણમાં અને નગરપાલિકામાં, તાલુકા પંચાયતમાં, જિલ્લા પંચાયતમાં બધાને મારી નમ્ર અપીલ કે ભાજપ તરફણમાં મતદાન કરી અને એમને બધાને બહુમતીથી વિજયી બનાવો એવી તમને બધાને મારી નમ્ર અપીલ છે.

પોલીસબેડામાં આત્મહત્યાનો સિલસિલો યથાવત:IPS અધિકારીના કમાન્ડોએ બાજુના ખંડેર ક્વાર્ટર્સમાં ગળેફાંસો ખાઈ જીવન ટૂંકાવ્યું, લોકેશન પરથી લાશ બાથરૂમમાંથી મળી

રાજ્યના પાટનગરમાં પોલીસ કર્મચારીઓમાં વધી રહેલા આત્મહત્યાના બનાવોએ ચકચાર જગાવી છે. ત્યારે ગાંધીનગરમાં આજે વધુ એક જવાને મોતને વ્હાલું કરતા પોલીસબેડામાં શોકનું મોજું ફરી વળ્યું છે. SRP ગ્રુપ-2 માં કમાન્ડો તરીકે ફરજ બજાવતા 36 વર્ષીય અજયભાઈ પટેલે સેક્ટર-20ની યુનિવર્સિટી સામેના બનેલા ઉચ્ચ અધિકારીઓ માટે બનાવેલા પણ ફાળવણીના અભાવે ખંડેર બની ગયેલા સરકારી ક્વાર્ટર્સમાં ગળેફાંસો ખાઈ આત્મહત્યા કરી લેતા પોલીસે વધુ તપાસ હાથ ધરી છે. બંગલા ફાળવણીના અભાવે ખંડેર બની ગયાગાંધીનગરના સેક્ટર-20 ખાતે આવેલી યુનિવર્સિટીની સામે IAS, IPS સહિતના ઉચ્ચ અધિકારીઓ માટે જે-તે સમયે બંગલો બનાવવામાં આવ્યા હતા. જોકે, કોઈ કારણોસર અમુક બંગલા ફાળવણીના અભાવે ખંડેર હાલતમાં બની ગયા છે. આજે મૂળ માણસાના હિંમતપુરા ગામના વતની અને હાલ અમદાવાદ ખાતે પરિવાર સાથે રહેતા અજયભાઈ રમેશભાઈ પટેલ ગાંધીનગરના સેક્ટર-20માં આવેલા પોતાના નોકરીના સ્થળની બાજુના એક ખંડેર બંગલામાં પહોંચી ગયા હતા. સવારે ટિફિન લઈને નોકરી પર જવા નીકળ્યા પણ પહોંચ્યા નહીબાદમાં કોઈ અગમ્ય કારણોસર તેમણે ત્યાં દોરડી વડે ગળેફાંસો ખાઈ લીધો હતો. જેઓ એક ઉચ્ચ પોલીસ અધિકારીના ત્યાં ગાર્ડ તરીકે ફરજ બજાવતા હતા. આજે સવારે નિત્યક્રમ મુજબ બંગલે અજયભાઈ નોકરીએ નહીં પહોંચતા ડીજી ઓફિસના ઉચ્ચ અધિકારીએ પરિવારને પૂછ્યું હતું ત્યારે જવાબ મળ્યો હતો કે, અજયભાઈ સવારે ટિફિન લઈને નોકરીએ આવવા નીકળ્યા છે પરંતુ, અજયભાઈ નોકરીએ નહીં પહોંચતા ઉચ્ચ અધિકારીએ તેમનું લોકેશન કઢાવી તપાસના આદેશો આપ્યા હતા. જેના પગલે ગાંધીનગર પોલીસે તપાસનો ધમધમાટ શરૂ કરી દીધો હતો. બાઈક બિનવારસી હાલતમાં મળી આવ્યું હતુંજોકે ટેકનિકલ સોર્સના માધ્યમથી અજયભાઈ પટેલ સેક્ટર 20 ખાતે જ હોવાનું સામે આવ્યું હતું. પરંતુ પોલીસ કાફલો લોકેશન ટ્રેક કરીને સેક્ટર 20 ખાતે પહોંચ્યો ત્યારે અજયભાઈનું બાઈક બિનવારસી હાલતમાં મળી આવ્યું હતું. જેના પગલે આસપાસના વિસ્તારમાં તપાસ કરવામાં આવતા તેઓ જ્યાં નોકરી હતી એના બાજુના ખંડેર બંધ હાલતના બંગલાના બાથરૂમમાં ગળેફાંસો ખાધેલી હાલતમાં મળી આવ્યા હતા. વિશ્વસનીય સૂત્રો પાસેથી મળતી માહિતી મુજબ, મૃતક અજયભાઈના પરિવારમાં પત્ની અને બે સંતાનો છે. પરંતુ કયા માનસિક તણાવ કે કારણોસર તેમણે આ પગલું ભર્યું તે હજુ સુધી જાણી શકાયું નથી. હાલમાં મૃતકનો પરિવાર ઘેરા શોકમાં હોવાથી તેમની વિસ્તૃત પૂછપરછ બાકી છે. ​ઉલ્લેખનીય છે કે, ગાંધીનગરમાં પોલીસ જવાનોની આત્મહત્યાનો આ કોઈ પ્રથમ કિસ્સો નથી. અગાઉ સચિવાલય સંકુલ જેવા અતિ સુરક્ષિત વિસ્તારમાં ફરજ બજાવતા કમાન્ડોએ પોતાનું જીવન ટૂંકાવ્યું હતું. જ્યારે તે પૂર્વે સેક્ટર-7 પોલીસ મથકના એક જવાને પણ આત્મહત્યા કરી હતી. ટૂંકા ગાળામાં બનેલી આ ત્રીજી ઘટનાએ પોલીસ જવાનોના માનસિક સ્વાસ્થ્ય અને કામના ભારણ અંગે ગંભીર પ્રશ્નો ઉભા કર્યા છે. હાલમાં ગાંધીનગર પોલીસે આ મામલે અકસ્માતે મોતનો ગુનો નોંધી વધુ તપાસ શરૂ કરી છે પરંતુ, સેકટર-21 પીઆઇ લતાબેન દેસાઈએ દર વખતની માફક ફોન રીસીવ નહીં કરી ભેદી ચુપકીદી સાધી લીધી છે.

દમણમાં 'સ્કાયડેક' પ્રોજેક્ટના નામે છેતરપિંડી:3 સ્ટાર હોટલની લાલચ આપી રોકાણકારોના 1.07 કરોડ ઓળવી ગયા, બિલ્ડર પર પાસા અને ચેક રિટર્નના 35 કેસ

સુરત શહેર અને આસપાસના વિસ્તારોમાં બિલ્ડરોના નામે ચાલતી છેતરપિંડીની ઘટનાઓ અટકવાનું નામ નથી લેતી. તાજેતરમાં સુરત પોલીસની આર્થિક ગુના નિવારણ શાખા (Eco Cell) એ એક મોટી સફળતા મેળવતા શહેરના જાણીતા બિલ્ડર ભરત ભરવાની ઉર્ફે ભરત સિંધીની ધરપકડ કરી છે. આરોપીએ દમણ ખાતે લક્ઝુરિયસ હોટલ અને ફ્લેટ બનાવવાનું સપનું બતાવી રોકાણકારો પાસેથી કરોડો રૂપિયા ખંખેરી લીધા હતા. ખટોદરા પોલીસ સ્ટેશનમાં નોંધાયેલા ગુનાના આધારે પોલીસે કાર્યવાહી કરી આરોપીના ત્રણ દિવસના રિમાન્ડ મેળવી વધુ તપાસ હાથ ધરી છે. દમણમાં 'સ્કાયડેક' પ્રોજેક્ટના નામે ખેલાયો છેતરપિંડીનો ખેલઆ સમગ્ર કૌભાંડની વિગત એવી છે કે, બિલ્ડર ભરત ભરવાની અને તેના સાથીદાર વિજય મહેતાએ મળીને દમણના કથીરીયા વિસ્તારમાં આવેલી સર્વે નંબર 77/1(4) અને 77/1(5) ની અંદાજે 639.72 ચોરસ મીટર જમીન પર 'સ્કાયડેક' નામનો પ્રોજેક્ટ શરૂ કર્યો હતો. આરોપીઓએ ફરિયાદી અને અન્ય સાક્ષીઓને વિશ્વાસમાં લીધા હતા કે, આ જમીન તેમની સ્વતંત્ર માલિકીની છે અને ત્યાં તેઓ 11 માળનું ભવ્ય હોટલ કોમ્પ્લેક્સ તેમજ 3-સ્ટાર હોટલ અને ફ્લેટ્સ બનાવી રહ્યા છે. આ આકર્ષક સ્કીમમાં રોકાણ કરવાના બહાને તેમણે લોકો પાસેથી કુલ 1,07,62,000/- (એક કરોડ સાત લાખ બાસઠ હજાર) રૂપિયા પડાવી લીધા હતા. અધૂરું બાંધકામ અને અન્યને વેચાણઆરોપીની કામ કરવાની પદ્ધતિ ખૂબ જ ચાલાકીભરી હતી. રોકાણકારો પાસેથી લાખો રૂપિયા લીધા બાદ આરોપીઓએ સાઈટ પર ફ્લેટનું કામ અધૂરું મૂકી દીધું હતું. જ્યારે ફરિયાદીઓએ તેમના ફ્લેટ અથવા નાણાં પરત માંગ્યા, ત્યારે બિલ્ડરે ગલ્લાતલ્લા કરવા માંડ્યા હતા. તપાસમાં બહાર આવ્યું છે કે, જે ફ્લેટ્સ ફરિયાદીઓને ફાળવવાનું વચન અપાયું હતું, તે જ ફ્લેટ્સ આરોપીએ અન્ય લોકોને વેચાણ દસ્તાવેજથી વેચી દીધા હતા. લોકો પાસેથી મેળવેલી રકમનો ઉપયોગ બિલ્ડરે પોતાના અંગત વપરાશ અને મોજશોખ માટે કરી નાખ્યો હતો, જેનાથી રોકાણકારો રસ્તે રઝળી પડ્યા હતા. સીટીલાઈટનો બિલ્ડર ક્રાઈમ બ્રાન્ચના સકંજામાંખટોદરા પોલીસ સ્ટેશનમાં 21 એપ્રિલ, 2026ના રોજ નોંધાયેલા ગુના બાદ ઇકો સેલ હરકતમાં આવ્યું હતું. પોલીસે ટેક્નિકલ સર્વેલન્સ અને બાતમીદારોની મદદથી આરોપી ભરતભાઈ ઉર્ફે ભરત સિંધી મોહનભાઈ ભારવાની (ઉ.વ. 52, રહે. એ/101 મોનાલીઝા પાર્ક, સીટી લાઈટ, સુરત) ને ઝડપી પાડ્યો હતો. ધરપકડ બાદ આરોપીને કોર્ટમાં રજૂ કરવામાં આવ્યો હતો, જ્યાં પોલીસે તેના દ્વારા આચરવામાં આવેલા અન્ય કૌભાંડોની વિગતો મેળવવા માટે રિમાન્ડની માંગણી કરી હતી. કોર્ટે આરોપીના 3 દિવસના પોલીસ રિમાન્ડ મંજૂર કર્યા છે. 6થી વધુ FIR અને 35 ચેક રિટર્ન કેસભરત સિંધી કોઈ નવો ગુનેગાર નથી, પરંતુ તે રીઢો છેતરપિંડી કરનાર હોવાનું પોલીસ રેકોર્ડ પરથી સાબિત થાય છે. તેની સામે અગાઉ ખટોદરા પોલીસ સ્ટેશનમાં ત્રણ, અઠવાલાઇન્સ પોલીસ સ્ટેશનમાં બે અને સચિન પોલીસ સ્ટેશનમાં એક મળી કુલ 6 જેટલા છેતરપિંડીના ગંભીર ગુનાઓ નોંધાયેલા છે. આ ઉપરાંત, તેની વિરુદ્ધ કોર્ટમાં 35 જેટલા ચેક રિટર્નના કેસો ચાલી રહ્યા છે. અગાઉ તેની સામે 'પાસા' (PASA) હેઠળ પણ કાર્યવાહી કરવામાં આવી હતી, તેમ છતાં તેની ગુનાહિત પ્રવૃત્તિઓ અટકી ન હતી.

મહીસાગરમાં વાહન ગોલ્ડન-સિલ્વર નંબરની ઓનલાઈન હરાજી:દિવ્યાંગજનો પણ ભાગ લઈ શકશે, પ્રક્રિયા અને તારીખો જાહેર

મહીસાગર સહાયક પ્રાદેશિક વાહન વ્યવહાર કચેરી દ્વારા ટુ-વ્હીલર અને ફોર-વ્હીલર વાહનો માટે ગોલ્ડન તથા સિલ્વર નંબર સીરીઝની ઓનલાઈન હરાજી શરૂ કરવામાં આવી છે. આ હરાજીમાં ટુ-વ્હીલર માટે GJ-35-BA અને GJ-35-BB સીરીઝ, જ્યારે ફોર-વ્હીલર માટે GJ-35-N અને GJ-35-AA સીરીઝના નંબરો ઉપલબ્ધ રહેશે. વાહન વ્યવહાર કમિશનર કચેરીના પત્ર મુજબ, દિવ્યાંગજન માલિકીના મોટર વાહન માલિકો પણ આ ઓક્શનમાં ભાગ લઈ શકશે. ઓનલાઈન અરજી પ્રક્રિયા 28 એપ્રિલ 2026ના રોજ સાંજે 04:00 કલાકથી શરૂ થઈ 30 એપ્રિલ 2026ના રોજ સાંજે 03:59 કલાક સુધી ચાલશે. ઈ-ઓક્શન 30 એપ્રિલ 2026થી શરૂ થઈ 02 મે 2026ના રોજ સાંજે 04:00 કલાક સુધી સમાપ્ત થશે. પસંદગીનો નંબર મેળવવા ઈચ્છતા વાહન માલિકોએ તેમના વાહનોનું રજીસ્ટ્રેશન કરાવીને http://parivahan.gov.in/fancy પર નોંધણી, યુઝર આઈ.ડી. અને પાસવર્ડ મેળવી હરાજીમાં ભાગ લેવાનો રહેશે. આ માટે વાહન વ્યવહાર કમિશ્નરની કચેરીના પરિપત્ર ક્રમાંક આઈ.ટી/પસંદગીનંબર/ઓનલાઈન ઓક્શન/7421, તા.12/10/2017 માં દર્શાવેલ સૂચનાઓનું પાલન કરવું ફરજિયાત છે. પસંદગીનો નંબર મેળવવા માટેની અરજી સેલ ઇનવોઇસની તારીખ અથવા વીમાની તારીખ, એ બેમાંથી જે વહેલું હોય તે તારીખથી 7 દિવસની અંદર www.parivahan.gov.in વેબસાઇટ પરથી CNA ફોર્મ ભરી લેવાનું રહેશે. આવી અરજી કર્યાની તારીખથી 60 દિવસ સુધી અમલી ગણાશે. જો 60 દિવસમાં અરજદારને પસંદગીનો નંબર નહીં મળે, તો રજીસ્ટ્રેશન ઓથોરીટી દ્વારા રેન્ડમ પદ્ધતિથી નંબર ફાળવી દેવામાં આવશે, જેની સામે અરજદાર કોઈ વાંધો લઈ શકશે નહીં. ખાસ નોંધ લેવી કે, આ 60 દિવસની મર્યાદા અરજદારને વધુ ઓક્શનમાં ભાગ લેવાની તક આપવાના હેતુથી આપવામાં આવી છે. તે કામચલાઉ નોંધણી પ્રમાણપત્રની 30 દિવસની મર્યાદામાં વધારો કરતી નથી. કામચલાઉ નોંધણી પ્રમાણપત્ર પૂરું થયા પછી વાહન અનરજીસ્ટર્ડ ગણાશે અને નિયમોનુસાર કાર્યવાહી કરવામાં આવશે. અરજદારે હરાજીની પ્રક્રિયા પૂરી થયાના 5 દિવસમાં બીડ એમાઉન્ટના નાણાં જમા કરાવવાના રહેશે. જો અરજદાર આ નિયત મર્યાદામાં નાણાં ચૂકવવામાં નિષ્ફળ જશે, તો મૂળ ભરેલી રકમ (Base Price) જપ્ત કરી ફરીવાર હરાજી કરવામાં આવશે, જેમાં અરજદાર કોઈ વાંધો લઈ શકશે નહીં. ઓનલાઈન ઓક્શન દરમિયાન અરજદારે આર.બી.આઈ. દ્વારા નક્કી કરેલ દરે ચાર્જ ચૂકવવાનો રહેશે. અસફળ અરજદારોને રિફંડ તેમના ખાતામાં SBI e-pay દ્વારા કચેરી દ્વારા પરત કરવામાં આવશે.

ઉમરેઠમાં ભાજપનો ભવ્ય વિજય થશે:પ્રદીપસિંહ જાડેજાનો વિશ્વાસ, વસ્ત્રાલ પાટીદાર સમાજે મતદાન માટે કર્યું આહ્વાન

વસ્ત્રાલ મા પાટીદાર સમાજ દ્વારા મહાસંમેલન યોજાયું હતું. પ્રદીપસિંહ જાડેજાએ જણાવ્યું છે કે, વસ્ત્રાલ પાટીદાર સમાજ દ્વારા ભાજપના ચારેય ઉમેદવારોના ભવ્ય વિજય માટે સમાજ એકત્રિત થયો છે. સમાજે વિશેષ અપીલ કરતાં જણાવ્યું છે કે, 26મી તારીખે યોજાનાર ચૂંટણીમાં એક પણ મતદાર મતદાન કર્યા વગર ન રહે અને મોટી સંખ્યામાં ભાજપ પક્ષના પક્ષમાં મતદાન થાય. વધુમાં તેઓએ કહ્યું કે, આવતીકાલે ઉમરેઠમાં મતદાન યોજાનાર છે અને તેઓ ઉમરેઠના નિરીક્ષક તરીકે કામગીરી કરી રહ્યા છે. તેમણે જણાવ્યું કે, સમગ્ર ગુજરાતમાં ભારતીય જનતા પાર્ટીનું શાસન ઘણા વર્ષોથી સફળતાપૂર્વક ચાલી રહ્યું છે. ઉમરેઠમાં ભાજપનો વિજય અગાઉ કરતાં વધુ લીડ સાથે થશેતેમણે દેશના વડાપ્રધાન નરેન્દ્ર મોદીના પ્રયાસોની પ્રશંસા કરતાં કહ્યું કે ગુજરાતને દેશનું નંબર વન રાજ્ય બનાવવા માટે અનેકવિધ વિકાસકાર્યો હાથ ધરવામાં આવ્યા છે. ઉમરેઠના સ્વર્ગસ્થ ધારાસભ્ય ગોવિંદભાઈ પરમારના અકાળે અવસાન બાદ, તેમની જગ્યાએ તેમના પુત્ર હર્ષદભાઈ ગોવિંદભાઈ પરમારને ભાજપના ઉમેદવાર તરીકે મેદાનમાં ઉતારવામાં આવ્યા છે. પ્રદીપસિંહ જાડેજાએ વિશ્વાસ વ્યક્ત કર્યો કે લોકો તેમને ભવ્ય બહુમતીથી વિજયી બનાવશે. તેમણે રાજ્યના મુખ્યમંત્રી ભૂપેન્દ્ર પટેલ અને વડાપ્રધાન નરેન્દ્ર મોદીની ડબલ એન્જિન સરકાર હેઠળ ઉમરેઠ અને ચરોતર વિસ્તારમાં વિકાસને નવી ગતિ મળશે એવી આશા વ્યક્ત કરી. તેમણે દાવો કર્યો કે, ઉમરેઠમાં ભાજપનો વિજય અગાઉ કરતાં વધુ લીડ સાથે થશે.

નવસારીમાં ભાજપ ઉમેદવારે ગાંધીજીના વેશધારી પાસેથી આશીર્વાદ મેળવ્યા:વોર્ડ-9માં પ્રચાર દરમિયાન તુષાર વ્યાસ બન્યા આકર્ષણનું કેન્દ્ર

નવસારી મહાનગરપાલિકાની આગામી ચૂંટણીને લઈને રાજકીય માહોલ ગરમાયો છે. તમામ પક્ષોના ઉમેદવારો મતદારોને રીઝવવા સઘન પ્રચાર કરી રહ્યા છે. આ દરમિયાન વોર્ડ નંબર 9માં ભાજપના ઉમેદવાર ધર્મેશ પટેલના પ્રચારમાં એક અનોખો દ્રશ્ય જોવા મળ્યું. તેમણે મહાત્મા ગાંધીનો વેશ ધારણ કરનાર એક યુવાન પાસેથી આશીર્વાદ મેળવ્યા, જે સમગ્ર વિસ્તારમાં ચર્ચાનો વિષય બન્યો છે અને તેનો વીડિયો સોશિયલ મીડિયા પર વાયરલ થયો છે. ગાંધીજીનું રૂપ ધારણ કરનાર આ યુવાન અન્ય કોઈ નહીં પણ સ્થાનિક નિવાસી તુષાર વ્યાસ છે. તુષારભાઈ છેલ્લા ઘણા વર્ષોથી એપ્રિલ મહિનામાં, ખાસ કરીને 6ઠ્ઠી એપ્રિલે, મહાત્મા ગાંધીનો વેશ ધારણ કરીને નીકળે છે. નોંધનીય છે કે તુષાર વ્યાસ અગાઉ દેશના વડાપ્રધાન નરેન્દ્ર મોદીની પણ મુલાકાત લઈ ચૂક્યા છે. ગાંધીજીના વેશમાં રહેલા તુષાર વ્યાસ પાસેથી શુભેચ્છાઓ મેળવ્યા બાદ ઉમેદવાર ધર્મેશ પટેલે પોતાની પ્રતિક્રિયા આપી હતી. તેમણે જણાવ્યું કે, આજે પ્રચાર દરમિયાન વોર્ડ નંબર 9માં ભારતના ભીષ્મ પિતામહ ગણાય એવા ગાંધીજીના સ્વરૂપમાં મને જે આશીર્વાદ મળ્યા છે, તે બદલ હું તેમનો ખૂબ આભારી છું. તેઓ મારા જ વોર્ડમાં દિવ્ય સ્કૂલની બાજુમાં રહે છે. આ આશીર્વાદ મળવાથી હું રાજકારણમાં ધન્યતા અનુભવું છું. ભારતીય રાજકારણમાં ગાંધીજીના મૂલ્યોનું વિશેષ મહત્વ છે. ચૂંટણીના માહોલમાં 'ગાંધીજી'ના આશીર્વાદ મળતા કાર્યકરોમાં પણ ઉત્સાહ જોવા મળ્યો હતો. સ્થાનિક રહીશો માટે પણ આ ઘટના આકર્ષણનું કેન્દ્ર બની હતી. નવસારી મહાનગરપાલિકાની આ ચૂંટણીમાં વોર્ડ નંબર 9નો જંગ હવે વધુ રસપ્રદ બન્યો છે.

ગોકુળ ગ્લોબલ યુનિવર્સિટીમાં 6ઠ્ઠો પદવીદાન સમારોહ યોજાયો:આનંદીબેન પટેલની હાજરીમાં 130 વિદ્યાર્થીઓને ડિગ્રી, 84ને મેડલ અપાયા

પાટણ જિલ્લાના સિદ્ધપુર ખાતે આવેલી ગોકુળ ગ્લોબલ યુનિવર્સિટીમાં 6ઠ્ઠો પદવીદાન સમારોહ યોજાયો હતો. ઉત્તર પ્રદેશના રાજ્યપાલ આનંદીબેન પટેલ અને યુનિવર્સિટીના ચેરમેન બળવંતસિંહ રાજપૂતની ઉપસ્થિતિમાં 130 વિદ્યાર્થીઓને ડિગ્રી અને 84 તેજસ્વી વિદ્યાર્થીઓને મેડલ એનાયત કરાયા હતા. આ પ્રસંગે રૂ. 20 કરોડના ખર્ચે નિર્મિત ડિજિટલ હોસ્ટેલનું પણ અનાવરણ કરવામાં આવ્યું હતું. યુનિવર્સિટી દ્વારા જાહેર કરાયેલા આંકડા મુજબ, કુલ 130 વિદ્યાર્થીઓને વિવિધ વિદ્યાશાખાઓમાં પદવી એનાયત કરાઈ હતી. જેમાં 46 Ph.D. સ્કોલર્સ (20 પુરુષ, 26 મહિલા), માસ્ટર પ્રોગ્રામના 44 વિદ્યાર્થીઓ (14 પુરુષ, 30 મહિલા) અને બેચલર પ્રોગ્રામના 40 વિદ્યાર્થીઓ (21 પુરુષ, 19 મહિલા)નો સમાવેશ થાય છે. શિક્ષણ ક્ષેત્રે વિશિષ્ટ સિદ્ધિ બદલ કુલ 84 વિદ્યાર્થીઓને મેડલ એનાયત કરાયા હતા, જેમાં 42 ગોલ્ડ પ્લેટેડ સિલ્વર મેડલ અને 42 સિલ્વર મેડલનો સમાવેશ થાય છે. માસ્ટર પ્રોગ્રામના શ્રેષ્ઠ વિદ્યાર્થીઓને 09 ગોલ્ડ અને 05 સિલ્વર મેડલ અપાયા હતા, જ્યારે બેચલર પ્રોગ્રામમાં 09 ગોલ્ડ અને 12 સિલ્વર મેડલ આપવામાં આવ્યા હતા. યુનિવર્સિટી દ્વારા કુલ 30 ગોલ્ડ અને 25 સિલ્વર મેડલનું વિતરણ કરાયું હતું. રાજ્યપાલ આનંદીબેન પટેલે પદવીધારક વિદ્યાર્થીઓને સંબોધતા જણાવ્યું હતું કે Ph.D. એ માત્ર એક પદવી નથી, પરંતુ એક નાનકડું સંશોધન છે. તેમણે સંશોધન માટે એવા વિષયો પસંદ કરવા પર ભાર મૂક્યો હતો જેનાથી સમાજને પ્રત્યક્ષ લાભ મળે અને ભવિષ્યમાં અન્ય લોકો તે વિષય પર આગળ કામ કરી શકે. તેમણે કાયદાના ક્ષેત્રમાં અભ્યાસ કરતા વિદ્યાર્થીઓને જેલમાં સજા ભોગવતા પીડિતો અને મિલકત કે હિસ્સાથી વંચિત મહિલાઓના પ્રશ્નો પર સંશોધન કરી તેમને ન્યાય અપાવવા માટે પ્રોત્સાહિત કર્યા હતા. આ કાર્યક્રમમાં ખોડલધામના ટ્રસ્ટી અનારબેન પટેલ, જયેશ પટેલ અને એમ. એસ. રાવ દ્વારા તમામ એવોર્ડ વિજેતાઓને શપથ લેવડાવવામાં આવ્યા હતા. NAAC A ગ્રેડ ધરાવતી આ યુનિવર્સિટીના કાર્યક્રમમાં મોટી સંખ્યામાં વિદ્યાર્થીઓ, વાલીઓ અને શૈક્ષણિક સ્ટાફ હાજર રહ્યો હતો. યુનિવર્સિટીના ચેરમેન બળવંતસિંહ રાજપૂતે વિદ્યાર્થીઓને સફળ ભવિષ્ય માટે શુભેચ્છાઓ પાઠવી હતી. અંતમાં રજિસ્ટ્રાર ચેતનસિંહ વાઘેલા દ્વારા આભાર વિધિ કરવામાં આવી હતી અને રાષ્ટ્રગીત સાથે સમારોહ પૂર્ણ થયો હતો.

મિડલ ઈસ્ટ સંઘર્ષ વલસાડમાં કેરી નિકાસ બજારમાં કડાકો:ગલ્ફ દેશોમાં મોકલાવેલા 360 જેટલા કન્ટેનર ગુમ; દૈનિક 400 કન્ટેન્ટરની સામે હાલ 25 કન્ટેન્ટરની જ નિકાસ

મિડલ ઈસ્ટમાં ચાલી રહેલા સંઘર્ષની સીધી અસર ભારતીય કેરીના નિકાસ બજાર પર પડી છે. આંતરરાષ્ટ્રીય શિપિંગ સેવાઓ ખોરવાઈ જવાને કારણે કેરીના ભાવમાં મોટો ઘટાડો નોંધાયો છે, અને મહારાષ્ટ્રથી ગલ્ફ દેશોમાં મોકલાવેલા લગભગ 360 જેટલા કન્ટેનર ગુમ થયા હોવાના અહેવાલ છે. ઉનાળાની સિઝન હોવા છતાં, કેરીનો ભાવ અગાઉના ₹2100 પ્રતિ મણથી ઘટીને હવે ₹1800 (ચોખ્ખો માલ) પર આવી ગયો છે. મુંબઈથી દર સિઝનમાં 12 હજાર મેટ્રિક ટનથી વધુ કેરીનો સપ્લાય થતો હતો. અગાઉ જ્યાં દરરોજ 400 કન્ટેનર વિદેશ રવાના થતા હતા, તેની સામે હાલ માત્ર 25 કન્ટેનર જેટલી જ નિકાસ થઈ રહી છે, જે 90% થી વધુનો ઘટાડો દર્શાવે છે. સૌથી ગંભીર સ્થિતિ મહારાષ્ટ્રથી ગલ્ફ કન્ટ્રીઝ મોકલાવેલા કન્ટેનરની છે. લગભગ 360 કન્ટેનર ગુમ અથવા મિસિંગ હોવાનું જાણવા મળ્યું છે. દુબઈના જુબેલલી પોર્ટ પર માલ ઉતારવાની મંજૂરી ન મળતા લાખોની કિંમતની કેરી અધ્ધરતાલ થઈ ગઈ છે. અરબ દેશોમાં કેરી મોકલવા માટે હોરમર્સ સ્ટેટ થઈને શિપ જતી હોય છે, જ્યાં યુદ્ધની સ્થિતિને કારણે શિપિંગ સેવાઓ ખોરવાઈ છે. આ સ્થિતિને કારણે વેપારીઓ મુશ્કેલીમાં મુકાયા છે. અખાત્રીજના મુહૂર્ત સમયે માર્કેટમાં 5 હજાર ગાડીઓની આવક થઈ હતી, પરંતુ લેવાલીના અભાવે વેપારીઓને નુકસાન વેઠવું પડ્યું છે. હાલમાં મિડલ ઈસ્ટની સ્થિતિ જોતા વેપારીઓ 'વેટ એન્ડ વોચ'ની સ્થિતિમાં છે અને નવો માલ મોકલતા ગભરાઈ રહ્યા છે. વેપારીઓએ આક્રોશ વ્યક્ત કરતા જણાવ્યું છે કે, વિદેશમાં માલસામાન વહન કરવા માટે ભારતની પોતાની એકપણ મોટી શિપિંગ કંપની નથી. આ કારણે ભારતીય વેપારીઓએ વિદેશી શિપિંગ કંપનીઓની મનમાની અને ઊંચા ભાડા સહન કરવા પડે છે.

વેરાવળમાં ભાજપનું શક્તિપ્રદર્શન:ભવ્ય રોડશોમાં રાજલ બારોટે સૂર રેલાવ્યાં, ભાજપના ઝંડા-બેનરો સાથે કાર્યકરોના સૂત્રોચ્ચારથી સમગ્ર વિસ્તાર ગુંજી ઉઠ્યો

વેરાવળ નગરપાલિકા ચૂંટણીને લઈ હવે રાજકીય ગરમાવો સ્પષ્ટ રીતે જોવા મળી રહ્યો છે. પ્રચારના અંતિમ તબક્કા નજીક આવતા તમામ પક્ષો મતદારોને આકર્ષવા માટે પૂરેપૂરો જોર લગાવી રહ્યા છે. આ વચ્ચે ભાજપ દ્વારા આજે યોજાયેલ ભવ્ય રોડ શોએ શહેરના રાજકીય માહોલમાં નવી ચેતના ફૂંકી દીધી છે. શહેરના 80 ફૂટ રોડ પર આવેલ ભાજપના મધ્યસ્થ કાર્યાલયથી શરૂ થયેલો આ રોડ શો મુખ્ય બજારો, વ્યસ્ત માર્ગો અને રાજમાર્ગો પરથી પસાર થઈ અંદાજે પાંચ કિલોમીટર સુધી ફર્યો હતો. માર્ગમાં જ્યાં જ્યાં રોડ શો પસાર થયો ત્યાં ભાજપના ઝંડા, બેનરો અને સૂત્રોચ્ચારથી સમગ્ર વિસ્તાર ગુંજી ઉઠ્યો હતો. કાર્યકરોનો ઉત્સાહ અને લોકોની ભીડે રોડ શોને જીવંત બનાવ્યો હતો. આ રોડ શોની સૌથી વિશેષ આકર્ષણ બની લોકપ્રિય લોકગાયિકા અને ઉના નગરપાલિકા ભાજપ ઉમેદવાર રાજલ બારોટ. ડીજેના તાલે તેમણે રજૂ કરેલા ભાજપ સમર્થનના ગીતોએ કાર્યકરોમાં નવી ઊર્જા ભરી દીધી હતી. સંગીતના તાલ સાથે નાચતા કાર્યકરો અને સમર્થકોનું દ્રશ્ય શહેરમાં ચૂંટણી ઉત્સવ જેવી લાગણી ઉભી કરતું હતું. કાર્યક્રમમાં ગીર સોમનાથ જિલ્લાના પ્રભારી ભાવનાબેન હીરપરા, જિલ્લા ભાજપ અધ્યક્ષ ડો. સંજય પરમાર, શહેર ભાજપ પ્રમુખ શૈલેષ મેસવાણીયા સહિત ભાજપના આગેવાનો, ઉમેદવારો અને મોટી સંખ્યામાં કાર્યકરો જોડાયા હતા. તમામે મળીને પક્ષની એકતા અને સંગઠન શક્તિનું પ્રદર્શન કર્યું હતું. રોડ શો દરમિયાન જૈન દેરાસર ચોક ખાતે ભાજપના બિનહરીફ ઉમેદવાર પ્રહલાદ શામળા અને તેમના સમર્થકો દ્વારા પુષ્પવર્ષા કરીને આગેવાનોનું સ્વાગત કરવામાં આવ્યું હતું, જે કાર્યક્રમનો યાદગાર પળ બની રહ્યો હતો. ચૂંટણી પ્રચાર હવે અંતિમ ચરણમાં પ્રવેશી રહ્યો છે ત્યારે ભાજપ દ્વારા આવી આક્રમક રણનીતિ અપનાવીને મતદારોમાં પોતાની પકડ મજબૂત કરવાની કોશિશ સ્પષ્ટ જોવા મળે છે. ભવ્ય રોડ શો અને શક્તિપ્રદર્શન દ્વારા ભાજપે ચૂંટણીનો માહોલ પોતાના પક્ષે વાળવાનો પ્રયત્ન કર્યો છે. હવે જોવાનું એ રહ્યું કે આ પ્રચારનો જોર મતદાન સુધી કેટલો જળવાઈ રહે છે અને મતદારો આ પ્રભાવને કેટલો સ્વીકાર આપે છે. આખરે, આ શક્તિપ્રદર્શનનો સાચો પરિચય તો મતગણતરીના દિવસે જ મળશે.

ચૂંટણી ટાણે સુરજીપુરામાં બિરસા મુંડાની મૂર્તિ ખંડિત:નશામાં ધૂત નસવાડીના યુવકે મૂર્તિનું નાક તોડ્યું, પોલીસે ગુનો નોંધ્યો

નર્મદા જિલ્લાના તિલકવાડા તાલુકાના સુરજીપુરા ગામે સ્થાનિક સ્વરાજ્યની ચૂંટણી દરમિયાન ભગવાન બિરસા મુંડાની મૂર્તિ ખંડિત કરવામાં આવી છે. મૂર્તિના નાકનો ભાગ તોડી નાખવામાં આવતા પોલીસ તંત્રમાં દોડધામ મચી ગઈ હતી. ઘટનાની જાણ થતાં જ તિલકવાડા પોલીસની ટીમ તાત્કાલિક સુરજીપુરા ગામે પહોંચી હતી. પ્રાથમિક તપાસમાં જાણવા મળ્યું કે એક સ્થાનિક યુવકે નશાની હાલતમાં આ કૃત્ય કર્યું હતું. તિલકવાડા પી.આઈ. એ.પી. સોલંકીએ જણાવ્યું કે, વધુ પૂછપરછમાં સુનિલભાઈ અશ્વિનભાઈ ભીલ (ઉંમર ૨૦, રહે. ઘોડીસિમેલ, તા. નસવાડી, જિ. છોટાઉદેપુર) નામના યુવકે આ કૃત્ય કર્યું હોવાનું સામે આવ્યું. પોલીસે સ્વયં ફરિયાદી બનીને મૂર્તિ ખંડિત કરનાર સામે ગુનો નોંધ્યો છે. આસિસ્ટન્ટ પોલીસ કોન્સ્ટેબલ હિતેશસિંહ લાલસિંહ (બકલ નંબર ૪૫૦) દ્વારા નોંધાવવામાં આવેલી ફરિયાદ મુજબ, સુનિલે સુરજીપુરા ગામે સ્થાપિત બિરસા મુંડાની મૂર્તિના નાકનો ભાગ તોડી આશરે રૂ. ૨૫,૦૦૦નું નુકસાન કર્યું હતું. આ ઉપરાંત, તે જાહેર રોડ પર વગર પાસ-પરમિટ દારૂ પીને નશાની હાલતમાં પકડાયો હતો. તિલકવાડા પોલીસે યુવક વિરુદ્ધ ગુનો નોંધી વધુ કાર્યવાહી હાથ ધરી છે.

ભાજપ નેતાઓની મગફળી-તુવેર ખરીદીમાં ગોલમાલની ચોંકાવનારી કબૂલાત:​ટેકાના ભાવે નબળો માલ જોખાયો હોવાનો મંત્રી અને પૂર્વ ઉપપ્રમુખનો સ્વીકાર, તંત્રની પારદર્શકતા સામે ઉઠ્યા ગંભીર સવાલ

​જૂનાગઢ જિલ્લામાં સ્થાનિક સ્વરાજ્યની ચૂંટણીનો માહોલ જામ્યો છે ત્યારે મતદારોને રીઝવવાના પ્રયાસમાં સરકારના મંત્રી અને ભારતીય જનતા પાર્ટીના દિગ્ગજ નેતાઓએ જાહેર મંચ પરથી એક એવી વાસ્તવિકતા સ્વીકારી છે, જેનાથી ખેતીવાડી ઉત્પન્ન બજાર અને સરકારી ખરીદી પ્રક્રિયામાં ચાલતી ગેરરીતિઓનો પર્દાફાશ થયો છે. જૂનાગઢના ધંધુસર ખાતે આયોજિત વિજય વિશ્વાસ સંમેલનમાં રાજ્ય સરકારના મંત્રી અર્જુન મોઢવાડિયાએ ખુલ્લેઆમ સ્વીકાર્યું હતું કે, આ વર્ષે સરકારી ટેકાના ભાવે મગફળીની ખરીદીમાં ગુણવત્તાના ધોરણોને બાજુ પર મૂકીને ખેડૂતોની નબળી ગુણવત્તાની મગફળી પણ ખરીદી લેવામાં આવી છે. સરકારે અધિકારીઓની વાત માન્યા વગર 100 ટકા નુકસાની ગણીને વળતર આપ્યુંમંત્રીના આ નિવેદને રાજકીય આલમમાં ખળભળાટ મચાવી દીધો છે કારણ કે, આડકતરી રીતે તે સરકારી તિજોરી પર બોજ અને ખરીદી પ્રક્રિયામાં થતી લાલિયાવાડીની કબૂલાત સમાન છે. મંત્રીએ મંચ પરથી જણાવ્યું હતું કે, આ વર્ષે ખેડૂતોને ભારે નુકસાની થઈ હતી જેના કારણે સરકારે અધિકારીઓની કોઈ પણ વાત માન્યા વગર 100 ટકા નુકસાની ગણીને વળતર આપ્યું છે. ​તમે ચિંતા ન કરો અમે તે નબળી મગફળીના પૈસા તમારી પાસે પાછા લેવા નથી આવ્યાઅર્જુન મોઢવાડિયાએ વધુમાં ઉમેર્યું હતું કે, ખેડૂતો પાસે બે પ્રકારની મગફળી હતી જેમાં એક સારી ગુણવત્તાની અને બીજી વરસાદને કારણે ડેમેજ થયેલી હતી. બજારમાં સારી મગફળીના ભાવ જ્યારે 800 થી 900 રૂપિયા હતા ત્યારે ખેડૂતો પોતાની નબળી મગફળી ટેકાના ભાવે સરકારી કેન્દ્રો પર વેચી આવ્યા છે. મંત્રીએ હળવા અંદાજમાં મતદારોને ખાતરી આપતા કહ્યું હતું કે તમે ચિંતા ન કરો અમે તે નબળી મગફળીના પૈસા તમારી પાસે પાછા લેવા નથી આવ્યા. જોકે, તેમણે સાવચેત પણ કર્યા હતા કે આવું માત્ર આ વર્ષે જ થયું છે કારણ કે ખેડૂતોને ભારે નુકસાન વેઠવું પડ્યું હતું પરંતુ, દરેક વર્ષે આ પ્રકારની છૂટછાટ આપવામાં આવશે નહીં.વળી મંત્રી અર્જુનભાઈ મોઢવાડિયાએ મતદારોને ટકોર કરતા એ પણ કહી દીધું કે દરેક વખતે નહીં થાય, આ વર્ષે થયું કારણ કે નુકસાની થઈ હતી એટલે. વળી આવું પાછું એમ કે આવતા વર્ષે થશે અને અરવિંદભાઈને તમે પાછા હેરાન ન કરતા મંત્રીએ પોતાના વક્તવ્યમાં અરવિંદભાઈ લાડાણીને નરેન્દ્ર મોદીના સાઢુભાઈ ગણાવતા બંને લોક સેવક હોવાનો ઉલ્લેખ કરી સમર્થન આપવા અપીલ કરી હતી ત્યારે મંત્રીના આ વક્તવ્યથી એ સ્પષ્ટ થઈ રહ્યું છે કે, ચૂંટણી જીતવા માટે અને ખેડૂતોની નારાજગી દૂર કરવા માટે સરકારી નીતિ-નિયમોમાં બાંધછોડ કરવામાં આવી છે, જે લાંબા ગાળે સરકારી વ્યવસ્થા સામે પ્રશ્નાર્થો ઊભા કરે છે. સરકારી ખરીદીના કેન્દ્રો પર રાજકીય વગનો ઉપયોગ કરીને ગુણવત્તાના નિયમો નેવે મૂકાયાસ્થાનિક સ્વરાજ્યની ચૂંટણીમાં મતદારોને રીઝવવા માત્ર મંત્રી જ નહીં પરંતુ જૂનાગઢ જિલ્લા પંચાયતના પૂર્વ ઉપપ્રમુખ વિપુલ કાવાણીએ પણ પોતાના પ્રચાર દરમિયાન આવી જ આશ્ચર્યજનક કબૂલાત કરી છે. વિપુલ કાવાણીના પત્ની હાલ જિલ્લા પંચાયતની કાલસારી બેઠક પરથી ઉમેદવાર છે અને તેઓ જ્યારે ગ્રામ્ય વિસ્તારમાં સભા સંબોધી રહ્યા હતા ત્યારે તેમણે ખેડૂતોનો વિશ્વાસ જીતવા માટે જણાવ્યું હતું કે, જ્યારે તુવેરની ખરીદી ચાલતી હતી ત્યારે ઘણા ખેડૂતોના ફોન આવ્યા હતા કે માલ નબળો છે. કાવાણીએ મિશાલ આપતા કહ્યું કે, તેમણે ક્યારેય કોઈ પણ ખેડૂતનું ટ્રેક્ટર પાછું નથી જવા દીધું અને નબળો માલ હોવા છતાં પણ તેની ખરીદી કરી લેવામાં આવી છે. આ નિવેદન સ્પષ્ટપણે સૂચવે છે કે, સરકારી ખરીદીના કેન્દ્રો પર રાજકીય વગનો ઉપયોગ કરીને ગુણવત્તાના નિયમો નેવે મૂકવામાં આવે છે. તેમણે પોતાની દસ વર્ષની કામગીરીના વખાણ કરતા એમ પણ કહ્યું કે, તેઓ છેવાડાના માણસના કામ માટે હંમેશા હાજર રહ્યા છે અને કોઈ પણ અધિકારી પાસે ખોટી રીતે પૈસા લેવા દીધા નથી. જાહેર મંચ પરથી ગોલમાલની કબૂલાત કરવામાં આવી​જૂનાગઢમાં ભાજપના આ બંને નેતાઓના વીડિયો સોશિયલ મીડિયામાં વાયરલ થતાં વિપક્ષ અને સામાન્ય જનતામાં અનેક તર્ક-વિતર્ક શરૂ થયા છે. મંત્રી મોઢવાડિયાએ જણાવ્યું હતું કે 15,000 કરોડની મગફળીની ખરીદી કરવામાં આવી છે અને 11,500 કરોડ રૂપિયા સીધા ખેડૂતોના ખાતામાં નુકસાની પેટે જમા કરાયા છે. જોકે, આ આંકડાકીય માયાજાળ અને નબળા માલની ખરીદી વચ્ચેનો જે તાલમેલ બેસાડવામાં આવ્યો છે તે ક્યાંક ને ક્યાંક સરકારી સિસ્ટમની નિષ્ફળતા અને ભ્રષ્ટાચાર તરફ આંગળી ચીંધે છે. નેતાઓ દ્વારા મત મેળવવાની લ્હાયમાં જે રીતે જાહેર મંચ પરથી ગોલમાલની કબૂલાત કરવામાં આવી રહી છે..

મુખ્યમંત્રીએ બોટાદમાં જાહેર સભા સંબોધી:રીંગ રોડ, મેડિકલ કોલેજ, સિવિલ હોસ્પિટલના કામ ઝડપી બનશે

બોટાદમાં મુખ્યમંત્રી ભૂપેન્દ્ર પટેલે એક જાહેર સભાને સંબોધી હતી. આ સભામાં તેમણે બોટાદના રીંગ રોડ, મેડિકલ કોલેજ અને સિવિલ હોસ્પિટલના કામો ઝડપથી પૂર્ણ કરવાની ખાતરી આપી હતી. મુખ્યમંત્રીએ બોટાદની સ્થાનિક સમસ્યાઓ અને આગેવાનો દ્વારા કરાયેલી રજૂઆતો અંગે વાત કરી હતી. તેમણે જણાવ્યું હતું કે આ મહત્વપૂર્ણ પ્રોજેક્ટ્સની કામગીરીને વેગ આપવામાં આવશે. પ્રવચન દરમિયાન માઈકમાં ટેકનિકલ ખામી સર્જાઈ હતી, જેના કારણે મુખ્યમંત્રીને થોડા સમય માટે રાહ જોવી પડી હતી અને બાદમાં અન્ય માઈકનો ઉપયોગ કરવો પડ્યો હતો. આ સભામાં કેન્દ્રીય મંત્રી નિમુબેન બાંભણીયા સહિત અન્ય આગેવાનોએ કોંગ્રેસ પર પ્રહારો કર્યા હતા. સભામાં કેન્દ્રીય મંત્રી નિમુબેન બાંભણીયા, મંત્રી રિવાબા જાડેજા, ધારાસભ્ય શંભુનાથ ટુંડિયા સહિતના અગ્રણીઓ અને મોટી સંખ્યામાં લોકો ઉપસ્થિત રહ્યા હતા.

ગોધરાના વ્હોરવાડમાં પ્રાથમિક સુવિધાઓનો અભાવ:સ્થાનિકો ગંદકી અને પાણીની સમસ્યાથી પરેશાન

ગોધરા નગરપાલિકાના વોર્ડ નંબર 6 માં આવેલા વ્હોરવાડ વિસ્તારના રહીશો પ્રાથમિક સુવિધાઓના અભાવથી પરેશાન છે. છેલ્લા ઘણા સમયથી અહીંના રહીશો પાયાની સુવિધાઓ માટે ઝઝૂમી રહ્યા છે. સ્થાનિક રહીશોના જણાવ્યા અનુસાર, વિસ્તારમાં પાણી માત્ર 10 થી 15 મિનિટ માટે જ આવે છે. ઘણીવાર પાણી આવવાના સમયે વીજળી ગુલ થઈ જતી હોવાથી પાણી ભરી શકાતું નથી. પીવાના પાણી માટે પણ લોકોને ભારે હાલાકીનો સામનો કરવો પડે છે. રહીશોનો આક્ષેપ છે કે પીવાના પાણીની પાઈપલાઈનમાં ગટરનું ગંદુ પાણી ભળી જાય છે, જેના કારણે રોગચાળો ફેલાવવાનો ભય છે. વિસ્તારમાં ગટરો અને નાળાઓ કચરાથી ભરાઈ ગયા છે. નગરપાલિકા દ્વારા દર શનિવારે સફાઈ માટે ટ્રેક્ટર અને કર્મચારીઓ મોકલવાનો વાયદો કરવામાં આવ્યો હતો, પરંતુ વાસ્તવમાં સફાઈ થતી નથી. સ્ટ્રીટ લાઈટો બંધ હોવાથી રાત્રિના સમયે અંધારપટ છવાયેલો રહે છે. બિનવારસી પાર્ક કરેલા વાહનો નીચે રખડતા શ્વાનોનો જમાવડો રહે છે, જેના કારણે બાળકો માટે ઘરની બહાર નીકળવું મુશ્કેલ બન્યું છે. રહીશો દ્વારા વારંવાર રજૂઆતો કરવા છતાં તંત્ર દ્વારા આ સમસ્યાઓનો ઉકેલ લાવવા માટે કોઈ કાર્યવાહી કરવામાં આવી નથી.

કડાણા પોલીસે ખોવાયેલા 6 મોબાઈલ પરત કર્યા:'તેરા તુજકો અર્પણ' અંતર્ગત ₹59,988નો મુદ્દામાલ સોંપાયો

મહીસાગર જિલ્લાના કડાણા પોલીસે 'તેરા તુજકો અર્પણ' અભિયાન અંતર્ગત ખોવાયેલા 6 મોબાઈલ ફોન તેમના મૂળ માલિકોને પરત કર્યા છે. આ મોબાઈલ ફોનની કુલ કિંમત ₹59,988/- આંકવામાં આવી છે. ગુજરાત પોલીસ દ્વારા નાગરિકોની ખોવાયેલી અને ચોરી થયેલી ચીજવસ્તુઓ શોધીને પરત કરવા માટે 'તેરા તુજકો અર્પણ' કાર્યક્રમ ચલાવવામાં આવે છે. મહીસાગર જિલ્લા પોલીસ અધિક્ષક સફીન હસન અને I/C નાયબ પોલીસ અધિક્ષક જી.એલ. ચૌધરી (સંતરામપુર વિભાગ) દ્વારા જિલ્લા પોલીસને CEIR પોર્ટલનો ઉપયોગ કરીને ગુમ થયેલા મોબાઈલ ફોન શોધવા સૂચના આપવામાં આવી હતી. આ સૂચનાના આધારે, કડાણા પોલીસ સ્ટેશનના પીઆઈ એસ.એલ. કામોળને ખોવાયેલા મોબાઈલ ફોન અંગેની અરજીઓ મળી હતી. તેમણે કોમ્પ્યુટર ઓપરેટરને CEIR પોર્ટલ પર મોબાઈલ ફોનની માહિતી અપલોડ કરવા નિર્દેશ આપ્યો હતો. ટેકનિકલ માધ્યમથી મોબાઈલ ફોન એક્ટિવ થતાં, સર્વેલન્સ ટીમના કર્મચારીઓએ ગણતરીના દિવસોમાં ગુમ થયેલા ફોન શોધી કાઢ્યા અને રિકવર કર્યા. આજે યોજાયેલા 'તેરા તુજકો અર્પણ' કાર્યક્રમમાં કુલ 6 મોબાઈલ ફોન તેમના માલિકોને પરત કરવામાં આવ્યા. પરત કરાયેલા મોબાઈલ ફોનમાં અંબાલાલભાઈનો OPPO (₹14,999), પ્રદીપકુમારનો Vivo (₹7,990), ભુલાભાઈનો Realme (₹7,000), રામાભાઈનો Redmi (₹9,500), હિતેશભાઈનો Vivo (₹11,999) અને પર્વતભાઈનો Vivo (₹8,500) નો સમાવેશ થાય છે.

સોલંકી પરિવારે હરિભક્તોના 2.05 કરોડ ઓહિયા કર્યા:પ્રસાદી વહેંચી વિશ્વાસ જીત્યો અને પછી લાખોનું રોકાણ કરાવી ઓફિસને તાળા મારી પિતા સંતાનો સાથે ફરાર, બેની ધરપકડ

સુરતના મોટા વરાછા વિસ્તારમાં રોકાણના નામે છેતરપિંડીનો એક કિસ્સો પ્રકાશમાં આવ્યો છે. શહેરના શાંત ગણાતા ડભોલી અને મોટા વરાછા વિસ્તારમાં એપીક ઇનોવેશન LLP નામની પેઢી ખોલીને ભોળા રોકાણકારોને લૂંટવાનું વ્યવસ્થિત કૌભાંડ આચરવામાં આવ્યું હતું. આ કૌભાંડની સૌથી મહત્વની બાબત એ છે કે, ઠગબાજોએ પોતાની જાળ બિછાવવા માટે સ્વામિનારાયણ સંપ્રદાય અને મંદિરના પરિસરનો ઉપયોગ કર્યો હતો. ભક્તિના ઓઠા હેઠળ આર્થિક લાભ મેળવવાની લાલચ આપીને સ્વામિનારાયણ સંપ્રદાયના 14 જેટલા હરિભક્તોના અંદાજે 2.05 કરોડ સલવાઈ ગયા છે. આ મામલે ઇકો સેલે તપાસનો ધમધમાટ તેજ કરી પુત્ર જય અને પુત્રી જ્યોતિની ધરપકડ કરી લીધી છે. મંદિરમાં પ્રસાદી વહેંચી હરિભક્તોનો વિશ્વાસ જીત્યોછેતરપિંડીની આખી મોડસ ઓપરેન્ડી અત્યંત ચોંકાવનારી છે. મૂળ ભાવનગરના ઉમરાળાના વતની અને હાલ કામરેજના પાસોદરા ખાતે રહેતા અશોક મુળજી સોલંકી, તેનો પુત્ર જય અને પુત્રી જ્યોતિ નિયમિતપણે ડભોલી સ્થિત સ્વામિનારાયણ મંદિરે જતા હતા. મંદિરમાં આવતા હરિભક્તો સાથે નિકટતા કેળવવા માટે આ પરિવાર અવારનવાર કાજુ-બદામની પ્રસાદી વહેંચતો હતો. આ દેખાડા પાછળનો મુખ્ય હેતુ હરિભક્તોમાં પોતાની પ્રતિષ્ઠા ઉભી કરવાનો અને તેમને આકર્ષિત કરવાનો હતો. ડભોલી સ્વામિનારાયણ નગરમાં રહેતા અને ઓનલાઈન કપડાનો વેપાર કરતા અનિલભાઈ બલર પણ આ પરિવારના સંપર્કમાં આવ્યા હતા. એપીક ઇનોવેશન LLP અને ફોરેક્સ ટ્રેડિંગની માયાજાળમાર્ચ-2024માં અશોક સોલંકી અને તેના પુત્ર જયે હરિભક્ત અનિલભાઈ સાથે રોકાણ અંગેની વાતચીત શરૂ કરી હતી. તેઓએ જણાવ્યું કે તેમની 'એપીક ઇનોવેશન LLP' નામની ભાગીદારી પેઢી છે જે ફોરેક્સ ટ્રેડિંગમાં મોટું કામકાજ કરે છે. હરિભક્તોને લલચાવવા માટે તેઓએ દર મહિને 4 થી 5 ટકા જેટલું ઊંચું અને ફિક્સ વળતર આપવાની સ્કીમ સમજાવી હતી. આજકાલના સમયમાં બેંકો કરતા અનેકગણું વળતર મળતું હોવાની વાત સાંભળીને અનેક લોકો આ માયાજાળમાં ફસાયા હતા. ભવ્ય ઉદ્ઘાટન બાદ ટુકડે-ટુકડે 35 લાખનું રોકાણ કરાવ્યુંરોકાણકારોને વિશ્વાસમાં લેવા માટે આરોપીઓએ મોટા વરાછાના લજામણી ચોક પાસે આવેલા મેરેડિયન બિઝનેસ સેન્ટરમાં એક આલીશાન ઓફિસ ભાડે રાખી હતી. આ ઓફિસના ઉદ્ઘાટન પ્રસંગે અનિલભાઈ સહિતના હરિભક્તોને બોલાવીને મોટો તમાશો કરવામાં આવ્યો હતો. અહીં જ તેમની મુલાકાત પેઢીના અન્ય એક ભાગીદાર ઋષિ પટેલ સાથે કરાવાઈ હતી. વિશ્વાસમાં આવી ગયેલા અનિલભાઈએ ટુકડે-ટુકડે કુલ 35 લાખનું રોકાણ કર્યું હતું. શરૂઆતમાં વિશ્વાસ જીતવા માટે આરોપીઓએ વળતર પેટે થોડી રકમ ચૂકવી હતી, પરંતુ મોટું રોકાણ આવી ગયા બાદ ખેલ બદલાયો હતો. 14 હરિભક્તોના 2.05 કરોડ સ્વાહા, યાદી લાંબી થઈઇકો સેલની તપાસમાં બહાર આવ્યું છે કે આ ઠગ ટોળકીએ માત્ર અનિલભાઈ જ નહીં, પરંતુ અન્ય 13 હરિભક્તોને પણ શિકાર બનાવ્યા હતા. જેમાં અશોક તેજાણી (10 લાખ), ઘનશ્યામ સુતરિયા (21.50 લાખ), ત્રિભુવન સેંજલિયા (21.40 લાખ) અને જિગ્નેશ પટેલ (36.63 લાખ) જેવા રોકાણકારોનો સમાવેશ થાય છે. આ રીતે કુલ 14 લોકો પાસેથી 2.05 કરોડ પડાવી લેવામાં આવ્યા હતા. જ્યારે રોકાણકારોએ પોતાની રકમ પરત માંગી ત્યારે આરોપીઓએ ઓફિસને તાળા મારી દીધા હતા અને પોતાના વતન ભાવનગર ભાગી ગયા હતા. દેવામાં ડૂબેલા પિતાએ ઝેર પીવાનો ઢોંગ કર્યોમુખ્ય આરોપી અશોક સોલંકી અગાઉથી જ આર્થિક સંકડામણમાં હોવાનું જાણવા મળ્યું છે. તેના પર અંદાજે 70-80 લાખનું દેવું હતું જે વ્યાજ સાથે વધીને 1.25 કરોડથી વધુ થઈ ગયું હતું. આ દેવું ચૂકવવા માટે તેણે ફોરેક્સ ટ્રેડિંગના નામે નવી છેતરપિંડી શરૂ કરી હતી. જ્યારે ભોગ બનનારા લોકોએ ઉઘરાણી માટે દબાણ કર્યું, ત્યારે અશોક સોલંકીએ ધરપકડથી બચવા અને લોકોની સહાનુભૂતિ મેળવવા માટે ઝેર પી લેવાનો નાટક પણ કર્યો હતો અને કામરેજની હોસ્પિટલમાં દાખલ થઈ ગયો હતો. પુત્ર અને પુત્રી જેલના સળિયા પાછળઆ મામલે ઉત્રાણ પોલીસ મથકે ફરિયાદ નોંધાયા બાદ તપાસ ઇકો સેલને સોંપવામાં આવી હતી. ઇકો સેલના પીઆઇ ચૌહાણે ટેકનિકલ સર્વેલન્સ અને બાતમીદારોની મદદથી કાર્યવાહી કરી હતી. પોલીસે સૌ પ્રથમ જય સોલંકી અને તેની બહેન જ્યોતિની ધરપકડ કરી બે દિવસના રિમાન્ડ મેળવ્યા હતા. જોકે, પેઢીનો ભાગીદાર ઋષિ પટેલ હજુ પણ પોલીસ પકડથી દૂર છે. કૌભાંડનો આંકડો 40 કરોડ સુધી પહોંચવાની શક્યતાપોલીસની પ્રાથમિક તપાસમાં અત્યંત ચોંકાવનારા ખુલાસા થઈ રહ્યા છે. એવી ચર્ચા છે કે સોલંકી પરિવારે આ લોભામણી સ્કીમ આપીને અંદાજે 40થી 50 જેટલા લોકો પાસેથી 40 કરોડ રૂપિયા જેટલી માતબર રકમ ઓહિયા કરી છે. ભોગ બનનારાઓમાં અનેક વિધવા મહિલાઓ પણ હોવાનું જાણવા મળ્યું છે, જેમણે પોતાની જિંદગીની જમાપૂંજી ગુમાવી દીધી છે. પોલીસ હાલ આ મામલે ઉંડાણપૂર્વક તપાસ કરી રહી છે અને વોન્ટેડ આરોપી ઋષિ પટેલને પકડવા ચક્રો ગતિમાન કર્યા છે.

પંચમહાલ પોલીસે અપહૃત બે બાળકોને બચાવ્યા:મધ્યપ્રદેશથી અપહરણ કરાયેલા બાળકો મુક્ત કરાયા

પંચમહાલ પોલીસે મધ્યપ્રદેશથી અપહરણ કરાયેલા બે માસૂમ બાળકોને ગણતરીના કલાકોમાં સુરક્ષિત મુક્ત કરાવ્યા છે. આ મામલે પંચમહાલ લોકલ ક્રાઈમ બ્રાન્ચે (LCB) અપહરણકર્તાને ઝડપી પાડી કાયદેસરની કાર્યવાહી હાથ ધરી છે. ઘટનાની વિગત મુજબ, મધ્યપ્રદેશના કુક્ષી પોલીસ સ્ટેશન વિસ્તારના રહેવાસી ધર્મેન્દ્ર ચૌહાણના બે પુત્રો, 6 વર્ષીય અજય અને 4 વર્ષીય દીપકનું અપહરણ થયું હતું. એક અજાણ્યો ઈસમ તેમને મોટરસાયકલ પર નદીએ નવડાવવાના બહાને લઈ ગયો હતો. બાળકો મોડી સાંજ સુધી ઘરે પરત ન ફરતા પરિવારે ચિંતા વ્યક્ત કરી હતી. આ અંગે મધ્યપ્રદેશના કુક્ષી પોલીસ મથકે અપહરણનો ગુનો નોંધવામાં આવ્યો હતો. આ ઘટનાની ગંભીરતાને ધ્યાને લઈને પંચમહાલ પોલીસ અધિક્ષક ડૉ. હરેશભાઈ દુધાત દ્વારા LCB ને તાત્કાલિક તપાસના આદેશો આપવામાં આવ્યા હતા. LCB ઇન્સ્પેક્ટર અને તેમની ટીમે ટેકનિકલ સોર્સ અને બાતમીદારોની મદદથી સઘન સર્ચ ઓપરેશન હાથ ધર્યું હતું. પંચમહાલ પોલીસે કુશળતાપૂર્વક અપહરણકર્તાને આંતરી લીધો અને બંને બાળકોને સુરક્ષિત રીતે તેના કબજામાંથી મુક્ત કરાવ્યા. પોલીસે બંને માસૂમ બાળકોનો કબજો મેળવી તેમના પિતાને સોંપ્યા હતા. પંચમહાલ પોલીસની આ ત્વરિત અને કુશળ કામગીરીને કારણે બાળકો સુરક્ષિત રીતે પરિવાર પાસે પરત ફરી શક્યા.

વેરાવળ ભાજપમાં પૂર્વ પ્રમુખનો સ્ફોટક ખુલાસો:શીર્ષ નેતૃત્વને અંધારામાં રાખી સ્થાનિક સ્તરે ગેરરીતિ, પક્ષવિરોધીને ટિકિટ, સક્રિય કાર્યકરોને અવગણના

વેરાવળ નગરપાલિકાની ચૂંટણી પહેલા ભાજપમાં આંતરિક વિસ્ફોટ સામે આવ્યો છે. પાલિકાના પૂર્વ પ્રમુખ પિયુષ ફોફંડી દ્વારા જાહેર કરાયેલા સ્ફોટક વીડિયો પછી પાર્ટીમાં રાજકીય ભૂકંપ જેવી સ્થિતિ સર્જાઈ છે. વર્ષો સુધી પાર્ટી માટે ખપનાર સક્રિય કાર્યકરોને બાજુએ મૂકી પક્ષવિરોધી પ્રવૃત્તિ કરનારા લોકોને ટિકિટ આપવાના ગંભીર આક્ષેપો સાથે ફોફંડીએ ખુલ્લેઆમ પક્ષની અંદરની “ટિકિટ રમત”ને બેનકાબ કરી છે. ફોફંડીના વર્જન મુજબ, વોર્ડ નંબર 1માં જેને ભાજપે ઉમેદવાર બનાવ્યો છે તે વ્યક્તિ છેલ્લા દાયકાથી ભાજપના વિરોધમાં કાર્યરત રહી ચૂક્યો છે. વિધાનસભા અને નગરપાલિકા બંને ચૂંટણીમાં ભાજપ સામે જંગ લડનાર અને કોંગ્રેસી માનસિકતા ધરાવતા વ્યક્તિને ટિકિટ આપવી એ “પાર્ટી પ્રત્યે વફાદાર કાર્યકરોનો અપમાન” હોવાનું તેમણે કહ્યું છે. તેમણે વીડિયોમાં સ્પષ્ટ શબ્દોમાં જણાવ્યું છે કે, “જે કાર્યકરો વર્ષો સુધી ભાજપ માટે ખુરશીઓ ઉઠાવે છે, પાથરણાં પાથરે છે, ઘર-ઘર જઈ ઝંડા લગાવે છે, તેવા કાર્યકરોને અવગણીને એવા લોકોને ઉમેદવારી અપાઈ છે કે જેમણે ભાજપ કેવી રીતે હારે તે માટે પ્રયત્નો કર્યા છે.” ફોફંડીએ વધુમાં આક્ષેપ કર્યો છે કે સમગ્ર પ્રક્રિયામાં શીર્ષ નેતૃત્વને પણ અંધારામાં રાખવામાં આવ્યું છે. “રાજ્યના અગ્રણીઓ સુધી સાચી માહિતી પહોંચી નથી. સ્થાનિક કક્ષાએ જ ટિકિટ ફાળવણીમાં ગેરરીતિ થઈ છે,” એમ તેમણે જણાવ્યું. ચર્ચાનો વિષય બનેલો બીજો મુદ્દો એ છે કે સમગ્ર ગુજરાતમાં ઉમેદવારોની યાદી કેન્દ્રિય સ્તરે જાહેર થઈ હોવા છતાં વેરાવળ નગરપાલિકાની યાદી ફોર્મ ભરવાના અંતિમ દિવસે મોડી રાત્રે જાહેર થઈ. આ વિલંબને લઈને પણ “અંદરખાને કોઈ મોટો ખેલ રમાયો હોવાનો”શંકા વધુ ગાઢ બની છે. ફોફંડીના આ સ્ફોટક વીડિયોથી ભાજપના આંતરિક મતભેદો હવે ખુલ્લેઆમ સપાટી પર આવી ગયા છે. સ્થાનિક સ્તરે કાર્યકરોમાં અસંતોષ ઉગ્ર બન્યો છે અને ચૂંટણી પહેલા જ સંગઠન માટે આ મોટો પડકાર ઉભો થયો છે. બીજી તરફ આ મુદ્દે જિલ્લા ભાજપ પ્રમુખ ડો. સંજય પરમારનો સંપર્ક કરતા આ મુદ્દે તેમની પ્રતિક્રિયા આપવા નું ટાળી મંડળ પ્રમુખ એટલે કે શહેર પ્રમુખ ની પ્રતિક્રિયા લેવા જણાવ્યું હતું,મંડલ પ્રમુખ શૈલેષ મેસવાણીયાનો સંપર્ક કરતાં તેણે પણ આ મુદ્દે કોઈ સ્પષ્ટતા ના કરી અમે પિયુષ ફોફંડી જોડે વાત કરી પછી આપને જણાવશું તેમ જણાવ્યું હતું. જો કે,આ બધાની વચ્ચે ફોફંડીએ પાર્ટી પ્રત્યે પોતાની વફાદારી જાળવી રાખતાં અંતે ભાજપના તમામ ઉમેદવારોને જીતાડવાની અપીલ પણ કરી છે. “પાર્ટી મોટી છે, વ્યક્તિ નહીં,”એવો સંદેશ આપતા તેમણે કાર્યકરોને એકતા જાળવવા અનુરોધ કર્યો છે.

રાજકોટમાં 108 સેવાની પ્રશંસનીય કામગીરી:એક મહિનામાં 1389 પ્રસુતિઓ અને 931 અકસ્માતનાં કેસ સહિત 7067 કોલમાં ઇમરજન્સી સારવાર અપાઈ, અનેક લોકો માટે સંજીવની બની

રાજકોટ શહેર અને જિલ્લામાં 108 ઇમરજન્સી સેવાની કામગીરી અત્યંત પ્રશંસનીય રહી છે. છેલ્લા 30 દિવસના ટૂંકા ગાળામાં ઇમરજન્સી સેવાને કુલ 7067 જેટલા કોલ્સ મળ્યા હતા. આ કુલ કોલ્સમાં વિવિધ પ્રકારની તબીબી કટોકટીઓનો સમાવેશ થાય છે, જેમાં ખાસ કરીને સગર્ભાવસ્થા સંબંધિત 1389 કોલ્સ આવ્યા હતા અને માર્ગ અકસ્માતના ગંભીર ગણાતા 931 જેટલા કિસ્સાઓમાં ત્વરિત પ્રતિસાદ આપવામાં આવ્યો હતો. માર્ચ મહિનામાં 'ગોલ્ડન અવર' દરમિયાન હૃદયની તકલીફવાળા 506 અને શ્વાસની ગંભીર બીમારી ધરાવતા 596 દર્દીઓને સમયસર સારવાર આપી નવજીવન બક્ષવામાં આવ્યું છે. 108નાં સુપરવાઇઝર જયેશભાઈએ વિગતો આપતા જણાવ્યું કે, ગ્રામ્ય વિસ્તારોમાં જ્યાં મોટા દવાખાનાઓ દૂર હોય છે ત્યાં 108 ના તબીબોએ અદભૂત કામગીરી કરી છે. જેમાં ક્રિટિકલ ગણાતી 83 જેટલી પ્રસૂતિઓ એમ્બ્યુલન્સમાં અથવા ગ્રામ્ય સ્થળે નિષ્ણાત તબીબો દ્વારા સફળતા પૂર્વક કરાવવામાં આવી છે, જેનાથી માતા અને નવજાત શિશુ બંનેના જીવ જોખમમાંથી બચી શક્યા છે. કોઈપણ ભેદભાવ વગર 24 કલાક મફત સેવા પૂરી પાડતી 108 ની ટીમે રાજકોટ જિલ્લામાં માનવતાનું ઉત્કૃષ્ટ ઉદાહરણ પૂરું પાડ્યું છે. લોકશાહીના પર્વમાં રાજકોટના સ્વાતંત્ર્ય સેનાનીના પરિવારે કરી મતદાનની અપીલ રાજકોટના સ્વાતંત્ર્ય સેનાની સ્વ. મનુભાઈ વિઠલાણીનો પરિવાર દેશના લોકશાહી તંત્રને મજબૂત બનાવવા માટે અનોખું મતદાન જાગૃતિ અભિયાન ચલાવી રહ્યો છે. આઝાદીની લડતમાં પિતાના યોગદાનને વારસામાં જાળવી રાખીને તેમના પુત્ર અશ્વિનભાઈ વિઠલાણી અને કિરણબેન વિઠલાણી પ્રત્યેક ચૂંટણીમાં નાગરિકોને મતાધિકારનો અચૂક ઉપયોગ કરવા પ્રોત્સાહિત કરે છે. આ પરિવાર વર્ષોથી પોતાના પિતાના ફોટા સાથેના ખાસ બેનરો પ્રદર્શિત કરીને લોકોને મતદાનનું મૂલ્ય સમજાવે છે. અશ્વિનભાઈ પોતાના વ્યવસાયના સ્થળે આવતા ગેસના ગ્રાહકોને પણ રૂબરૂ મળીને 100 ટકા મતદાન કરવા માટે સંદેશો પાઠવે છે. આગામી 26મી એપ્રિલના સ્થાનિક સ્વરાજ્યની ચુંટણીઓનું મતદાન યોજાવાનું છે, ત્યારે વિઠલાણી પરિવારે દરેક નાગરિક પોતાની નૈતિક ફરજ સમજીને મતદાન કરે તેવી અપીલ કરી છે. ચૂંટણીલક્ષી રજૂઆતો માટે રાજ્ય ચૂંટણી આયોગ દ્વારા કંટ્રોલરૂમ કાર્યરત, નાગરિકો આંગળીનાં ટેરવે કરી શકશે ફરિયાદ રાજ્યની મહાનગરપાલિકાઓ, નગરપાલિકાઓ તેમજ જિલ્લા અને તાલુકા પંચાયતોની સામાન્ય અને પેટા ચૂંટણીઓ આગામી 26 એપ્રિલના રોજ યોજાવાની છે. આ સમગ્ર ચૂંટણી પ્રક્રિયા શાંતિપૂર્ણ માહોલમાં સંપન્ન થાય અને કાયદો તથા વ્યવસ્થાની સ્થિતિ જળવાઈ રહે તેવા હેતુથી રાજ્ય ચૂંટણી આયોગ દ્વારા ગાંધીનગર ખાતે એક ખાસ કંટ્રોલરૂમ શરૂ કરવામાં આવ્યો છે. આ વ્યવસ્થાનો મુખ્ય ઉદ્દેશ્ય નાગરિકોને તેમની રજૂઆતો કે ફરિયાદો નોંધાવવા માટે સચોટ પ્લેટફોર્મ પૂરું પાડવાનો છે. આ કંટ્રોલરૂમ 25 અને 26 એપ્રિલના રોજ સતત કાર્યરત રહેશે. જેમાં નાગરિકો ચૂંટણીને લગતી કોઈપણ ફરિયાદ અથવા પ્રશ્નો માટે 079 232 55951, 079 232 55953 તેમજ 079 232 57381 અને 079 232 57383 નંબર પર સંપર્ક કરી શકશે. ચૂંટણી દરમિયાન પારદર્શિતા જળવાય અને મતદારોને પડતી મુશ્કેલીઓનું ત્વરિત નિરાકરણ આવે તે માટે આયોગ દ્વારા ટેલિફોનિક સુવિધા જાહેર કરવામાં આવી છે. જે કોઈપણ વ્યક્તિને ચૂંટણી પ્રક્રિયામાં કોઈ ક્ષતિ જણાય અથવા પોતાની રજૂઆત કરવી હોય, તેઓ આ નિર્ધારિત સમયગાળા દરમિયાન જાહેર કરાયેલા નંબર પર ફોન કરીને પોતાની વાત નોંધાવી શકશે.

મોરબી ફેક્ટરીમાં અકસ્માતમાં સગીરનું મોત:મશીનના ઓપરેટર સામે મૃતકના ભાઈએ ફરિયાદ નોંધાવી, પોલીસ તપાસ શરૂ

મોરબીના લખધીરપુર રોડ પર આવેલી એક ફેક્ટરીમાં મશીનના પટ્ટામાં ફસાઈ જવાથી ગંભીર રીતે ઘવાયેલા સગીરનું સારવાર દરમિયાન મોત નીપજ્યું છે. આ ઘટના અંગે મૃતક સગીરના ભાઈએ મશીન ઓપરેટર સામે મોરબી તાલુકા પોલીસ સ્ટેશનમાં ફરિયાદ નોંધાવી છે, જેના આધારે પોલીસે ગુનો નોંધી વધુ તપાસ હાથ ધરી છે. મૂળ મધ્યપ્રદેશના બરવાણી કોતવાલી પોલીસ સ્ટેશનમાં હેડ કોન્સ્ટેબલ તરીકે ફરજ બજાવતા પ્રશાંત મિશ્રાએ આ ફરિયાદ નોંધાવી છે. તેમના જણાવ્યા અનુસાર, ગત તા. 18 નવેમ્બર, 2025 ના રોજ તેમનો 11 વર્ષીય ભાઈ વિશ્વાસ, વિશાલ અને સુરેશ સાથે લખધીરપુર રોડ પર આવેલી કજારીયા સલ્ફર ટાઇલ્સ ફેક્ટરીમાં હતા. રાત્રિના લગભગ 9:30 વાગ્યાની આસપાસ કોલસો પૂરો થઈ ગયો હતો. સુરેશે મશીન ઓપરેટર બ્રિજેન્દ્ર રાજાવતને મિલ બંધ કરવા અને ટ્રેક્ટર ડ્રાઈવરને સાથે લઈ જવા કહ્યું હતું. જોકે, ઓપરેટર બ્રિજેન્દ્રની બેદરકારીને કારણે વિશ્વાસ કોલસા મિલના મશીનના પટ્ટામાં ફસાઈ ગયો હતો. તેને બગલ, હાથ અને છાતીના ભાગે ગંભીર ઈજાઓ થઈ હતી. ઈજાગ્રસ્ત સગીરને તાત્કાલિક સારવાર માટે પ્રથમ મોરબી, ત્યાંથી રાજકોટ અને ત્યારબાદ તેના વતનમાં લઈ જવામાં આવ્યો હતો. જોકે, ચાલુ સારવાર દરમિયાન તા. 25 નવેમ્બર, 2025 ના રોજ વિશ્વાસનું મોત નીપજ્યું હતું. આ ઘટનામાં મશીન ઓપરેટર બ્રિજેન્દ્ર રાજાવતની બેદરકારીને કારણે વિશ્વાસનું મોત થયું હોવાનું ફરિયાદમાં જણાવાયું છે. પોલીસે ફરિયાદના આધારે આરોપી બ્રિજેન્દ્ર રાજાવત (રહે. કજારીયા સલ્ફર ટાઇલ્સ ફેક્ટરી, લખધીરપુર રોડ, મોરબી) સામે ગુનો નોંધી તેની ધરપકડ કરવા માટે તજવીજ શરૂ કરી છે.

મોરબીના યુવાનની હત્યા, 6 સામે ફરિયાદ:હોથલ ફાયનાન્સના શિવમ રબારી સહિત આરોપીઓ પોલીસની પકડમાં

મોરબીના યુવાનની માળીયા (મી) હળવદ રોડ પર હત્યા કરવામાં આવી છે. પૈસાની લેતીદેતીના મામલે થયેલા ઝઘડા બાદ છરીના ઘા ઝીંકી યુવાનને મોતને ઘાટ ઉતારી દેવાયો હતો. આ બનાવમાં હોથલ ફાયનાન્સવાળા શિવમ રબારી સહિત કુલ 6 શખ્સો સામે ફરિયાદ નોંધાઈ છે અને પોલીસે આરોપીઓને ઝડપી પાડવા તજવીજ હાથ ધરી છે. મૂળ જેતપર ગામના અને હાલ મોરબીના પ્રભુકૃપા ટાઉનશીપમાં રહેતા અનિલ હરિલાલ કંડિયા (ઉં.વ. 28) તેના મિત્રો સાથે માળીયા હળવદ રોડ પર આવેલી ધૈર્ય હોટલ ખાતે નાસ્તો કરવા ગયો હતો. તે સમયે ઇકો ગાડીમાં આવેલા પાંચ શખ્સોએ અનિલ કંડિયા સાથે પૈસાની લેતીદેતી બાબતે ઝઘડો કર્યો હતો. ઝઘડાએ ઉગ્ર સ્વરૂપ ધારણ કરતા આરોપીઓએ અનિલ કંડિયાને છરીના ઘા ઝીંક્યા હતા. ગંભીર રીતે ઇજાગ્રસ્ત અનિલને તાત્કાલિક મોરબી અને ત્યાંથી વધુ સારવાર માટે રાજકોટ ખસેડવામાં આવ્યો હતો. જોકે, સારવાર દરમિયાન તેનું મોત નીપજ્યું હતું. આ બનાવ અંગે મૃતક અનિલના મિત્ર વિવેક વિનોદભાઈ ઉર્ફે વેલજીભાઈ પટેલે માળીયા તાલુકા પોલીસ સ્ટેશનમાં ફરિયાદ નોંધાવી છે. ફરિયાદમાં હોથલ ફાયનાન્સવાળા શિવમ રબારી, રમેશ રબારી, કિશન ચૌહાણ, પૃથ્વીરાજસિંહ ઝાલા, હીરાભાઈ ઉલવા અને ગુલામ હુશેન પઠાણ (તમામ રહે. મોરબી)ના નામનો ઉલ્લેખ કરવામાં આવ્યો છે. ફરિયાદીના જણાવ્યા અનુસાર, તેઓ અને અનિલ કંડિયા ગૌરક્ષક પાર્થ મનસુખભાઈ નેસડીયા, વિશાલ મનસુખ નેસડીયા, આકાશ જામરીયા, કાર્તિકભાઈ કાવર અને રાહુલ સાથે ધ્રાંગધ્રા હાઈવે પર પાડા ભરેલ આઈસરની વોચ રાખી રહ્યા હતા. રાત્રે નાસ્તો કરવા ધૈર્ય હોટેલે પહોંચ્યા ત્યારે ઇકો ગાડીમાં આવેલા આરોપીઓએ અનિલને અમને શિવમ રબારીએ મોકલ્યા છે, તું કેમ તેના પૈસા આપતો નથી તેમ કહીને ઝઘડો કર્યો હતો. કિશન ચૌહાણ અને રમેશ રબારીએ અનિલને મારી નાખવાના ઈરાદે છરીના ઘા માર્યા હતા. માળીયા તાલુકા પોલીસે ગુનો નોંધી વધુ તપાસ હાથ ધરી છે અને આરોપીઓને ઝડપી પાડવા ચક્રો ગતિમાન કર્યા છે.

સુરેન્દ્રનગરમાં 'આપ'ના ઉમેદવારોએ ચૂંટણી પ્રચાર શરૂ કર્યો:ગોપાલ રાયે માર્ગદર્શન આપ્યું, વોર્ડ ૮ માં કાર્યાલય ઉદ્ઘાટન

સુરેન્દ્રનગર મહાનગરપાલિકાની આગામી ચૂંટણીઓ પૂર્વે આમ આદમી પાર્ટી (AAP) એ પ્રચાર અભિયાન તેજ કર્યું છે. ગુજરાત પ્રભારી ગોપાલ રાયે સુરેન્દ્રનગરની મુલાકાત લઈ ઉમેદવારો અને કાર્યકરોને માર્ગદર્શન આપ્યું હતું. આ સાથે જ, વોર્ડ નંબર ૮ ના AAP ઉમેદવારોએ પોતાનો ચૂંટણી પ્રચાર શરૂ કર્યો છે. ગોપાલ રાયે કાર્યકરો અને ઉમેદવારોમાં નવો જોશ ભર્યો હતો. તેમણે પ્રજાના પ્રશ્નોને વાચા આપવા અને લોકોની સેવા કરવા માટે કટિબદ્ધ બનવા આહવાન કર્યું હતું. આ બેઠકમાં સંગઠનને મજબૂત કરવા અને છેવાડાના માનવી સુધી પહોંચવા માટેની રણનીતિ પર ચર્ચા કરવામાં આવી હતી. વોર્ડ નંબર ૮ ના આમ આદમી પાર્ટીના ચારેય ઉમેદવારોએ સક્રિયપણે પોતાનો ચૂંટણી પ્રચાર શરૂ કર્યો છે. તેમણે પોપટપરા ખાતે પોતાના મધ્યસ્થ ચૂંટણી કાર્યાલયનું ઉદ્ઘાટન કર્યું હતું. પ્રચારના શ્રીગણેશ કરતા પહેલા ઉમેદવારોએ મેલડી માતાજીના આશીર્વાદ લીધા હતા. સુરેન્દ્રનગરમાં મહાનગરપાલિકાની ચૂંટણીઓ નજીક આવતા રાજકીય ગરમાવો તેજ બન્યો છે. AAP દ્વારા શરૂ કરાયેલો આ પ્રચાર આગામી દિવસોમાં અન્ય પક્ષો માટે પડકારરૂપ બની શકે છે.