ગુજરાત પોલીસમાં 13,591 પોસ્ટ પર ભરતી:PSIની 858 અને લોકરક્ષકની 12733 જગ્યા માટે ઉમેદવારો 3થી 23 ડિસેમ્બર સુધી અરજી કરી શકશે

ગુજરાત પોલીસ ભરતી બોર્ડ દ્વારા પોલીસ સબ-ઇન્સ્પેક્ટર (PSI) અને લોકરક્ષક (LRD) કેડરની 13,591 ખાલી જગ્યા પર ભરવા માટેની જાહેરાત કરવામાં આવી છે. રાજ્યના યુવાનો માટે પોલીસ વિભાગમાં જોડાવાની આ એક મોટી તક છે. આ ભરતી માટેની ઓનલાઈન અરજી પ્રક્રિયા આગામી 3 ડિસેમ્બર, 2024થી શરૂ થશે. ઉમેદવારો 3 જાન્યુઆરી, 2026 સુઘી ઓનલાઈન અરજી કરી શકશે. PSIની 858 ખાલી જગ્યા ભરાશેપોલીસ સબ ઇન્સ્પેકટરની 858 ખાલી જગ્યાઓ ભરવામાં આવશે, જેમાં બિન હથિયારી પોલીસ સબ ઇન્સ્પેકટર, હથિયારી પોલીસ સબ ઇન્સ્પેકટર અને જેલર ગૃપ-2નો સમાવેશ થાય છે. ગ્રેજ્યુએશન(સ્નાતક) કરેલું હશે તે ઉમેદવારો PSI માટે અરજી કરી શકશે. LRDની 12733 ખાલી જગ્યાઓ ભરાશેલોકરક્ષક(LRD)ની 12733 ખાલી જગ્યાઓ ભરવામાં આવશે. આમાં મુખ્યત્વે બિન હથિયારી પોલીસ કોન્સ્ટેબલ, હથિયારી પોલીસ કોન્સ્ટેબલ, હથિયારી પોલીસ કોન્સ્ટેબલ (SRPF) અને જેલ સિપોઈ (પુરૂષ/મહિલા)ની જગ્યાઓનો સમાવેશ થાય છે. ધો.12 પાસ કરેલું હોવું તેવા ઉમેદવારો લોકરક્ષક(LRD) માટે અરજી કરી શકશે. મહત્વની તારીખો અને અરજી પ્રક્રિયાઉપરોક્ત ભરતી માટે ઉમેદવારો 3 ડિસેમ્બર, 2024થી 3 જાન્યુઆરી, 2026 સુઘી ઓનલાઈન અરજી કરી શકશે. ઉમેદવારો ગુજરાત પોલીસ ભરતી બોર્ડની વેબસાઇટ https://gprb.gujarat.gov.in તેમજ https://ojas.gujarat.gov.in પર જઈને ઓનલાઈન અરજી કરવાની રહેશે. ઉમેદવારોને વિનંતી કરવામાં આવે છે કે, અરજી કરતા પહેલા ભરતી સંબંધિત સંપૂર્ણ સૂચનાઓ અને માર્ગદર્શિકા વેબસાઇટ પરથી ધ્યાનપૂર્વક વાંચી લેવી. ભરતી બોર્ડના અધ્યક્ષ IPS નિરજા ગોટરૂ દ્વારા 29 નવેમ્બરના રોજ સતાવાર જાહેરાત કરવામાં આવી હતી.

NIDનો 45મો દીક્ષાંત સમારોહ જાન્યુઆરીમાં યોજાશે:ઇતિહાસમાં પહેલીવાર અમદાવાદની બહાર આયોજન, ઇસરોના ચેરમેન ડૉ. વી નારાયણ રહેશે ઉપસ્થિત

નેશનલ ઈન્સ્ટિટ્યૂટ ઓફ ડિઝાઈન(NID) ના ઇતિહાસમાં પહેલીવાર દીક્ષાંત સમારોહ અમદાવાદની બહાર યોજાશે. સૂત્રો પાસેથી મળતી માહિતી અનુસાર અત્યાર સુધીના તમામ દીક્ષાંત સમારોહ NID અમદાવાદ કેમ્પસમાં યોજાવામાં આવ્યાં હતા. જો કે, NIDનો 45મો દીક્ષાંત સમારોહ 22 જાન્યુઆરી, 2026ના રોજ NID ગાંધીનગરમાં યોજાશે. જેમાં મુખ્ય અતિથિ તરીકે ઈસરોના ચેરમેન ડૉ. વી નારાયણ ઉપસ્થિત રહેશે. જેમના હસ્તે વિદ્યાર્થીઓને પદવી એનાયત કરવાની સાથે સાથે પ્રાઈડ NID એવોર્ડ પણ આપવામાં આવશે. આ દીક્ષાંત સમારોહને લઈને તૈયારીઓ પણ શરૂ કરી દેવામાં આવી હોવાનું સૂત્રોએ જણાવ્યું હતું. ગયા વર્ષે 57 ટકા મહિલા અને 43 ટકા પુરુષ ડિઝાઈનરે પદવી મેળવી હતી મહત્વનું છે કે, ગત વર્ષે યોજાયેલા દીક્ષાંત સમારોહમાં રાષ્ટ્રપતિ દ્રોપદી મુર્મુ મુખ્ય અતિથિ તરીકે ઉપસ્થિત રહ્યાં હતા. આ પ્રસંગે ગુજરાતના રાજ્યપાલ આચાર્ય દેવવ્રત, મુખ્યમંત્રી ભૂપેન્દ્રભાઈ પટેલ, કેન્દ્રીય વાણિજ્ય અને ઉદ્યોગ મંત્રી પીયૂષ ગોયલ, રાજ્યકક્ષાના વાણિજ્ય અને ઉદ્યોગ મંત્રી જિતિન પ્રસાદ અતિથિ વિશેષ તરીકે ઉપસ્થિત હાજર રહ્યાં હતા. જેમાં બેચલર ડિગ્રી પ્રોગ્રામના 102 વિદ્યાર્થીઓને, 323 માસ્ટર્સ ડિગ્રી પ્રોગ્રામના વિદ્યાર્થીઓ અને 5 પીએચડી સ્કોલર્સ વિદ્યાર્થીઓ મળીને કુલ 430 વિદ્યાર્થીઓને ડિગ્રી એનાયત કરવામાં આવી હતી. ડિગ્રી મેળવનારા 430 વિદ્યાર્થીઓ પૈકી 57 ટકા મહિલા ડિઝાઈનર હતી જ્યારે 43 ટકા જેટલા પુરુષ ડિઝાઈનર્સ હતા. 1961માં થઈ સ્થાપના, ગૌતમ સારાભાઈનું મહત્ત્વપૂર્ણ યોગદાન1961માં અમદાવાદમાં નેશનલ ઇન્સ્ટિટ્યૂટ ઓફ ડિઝાઇનની સ્થાપના કરવામાં આવી હતી. જેમાં ગૌતમ સારાભાઈ અને તેમનાં બહેન ગિરા સારાભાઈનું સૌથી મહત્ત્વપૂર્ણ યોગદાન હતું. ગૌતમ સારાભાઈએ તે સમયની શૈક્ષણિક પ્રણાલીના પ્રોટોકોલના સામા પ્રવાહે ચાલીને આ વિખ્યાત સંસ્થાના પાયા નાંખ્યા હતા. ત્યાર બાદ 1 એપ્રિલ, 1976ના રોજ દૂરદર્શનની સ્ક્રીન પર એક કાળા અને સફેદ રંગની મોર્ફિંગ આંખ જોઇ આખો દેશ ચોંકી ગયો. આ બીજું કંઈ નહીં પણ દૂરદર્શનનો લોગો હતો. ભારતીય ઇતિહાસમાં આ સૌથી મહત્ત્વપૂર્ણ ક્ષણ હતી. આ અભૂતપૂર્વ લોગોની ડિઝાઈન અમદાવાદ સ્થિત NIDમાં કરવામાં આવી હતી. જેને તે સમયના NID સ્ટુડન્ટ દેવાશિષ ભટ્ટાચાર્યએ ડિઝાઇન કર્યો હતો.

પોરબંદર ફિશરીઝ કચેરીમાં દલાલ ₹10,000ની લાંચ લેતા ઝડપાયો:એસીબીએ ફિશિંગ બોટના કોલ નંબર માટે ગોઠવી ટ્રેપ

પોરબંદરની ફિશરીઝ કચેરીમાં એન્ટી કરપ્શન બ્યુરો (ACB) દ્વારા કાર્યવાહી કરવામાં આવી છે. એક દલાલને ₹10,000ની લાંચ લેતા રંગેહાથ ઝડપી પાડવામાં આવ્યો હતો. આ દલાલ દિનેશભાઈ પ્રેમજીભાઈ સલેટ તરીકે ઓળખાય છે. એસીબીને ટોલ-ફ્રી નંબર 1064 પર મળેલી ફરિયાદના આધારે આ ટ્રેપ ગોઠવવામાં આવી હતી. એક માછીમારે મહિનાઓ પહેલાં ફિશિંગ બોટનો કોલ નંબર મેળવવા માટે અરજી કરી હતી. જોકે, લાંબા સમય સુધી આ કામગીરી થઈ ન હતી. અરજદારને અધિકારી દ્વારા વહીવટ નક્કી કરવા માટે દબાણ કરવામાં આવ્યું હતું. નાયબ મત્સ્ય ઉદ્યોગ અધિક્ષક માટે ₹10,000ની લાંચની માંગણી કરવામાં આવી હતી. અરજદારે એસીબીનો સંપર્ક કરતા, ટ્રેપ ગોઠવવામાં આવી હતી. આ ટ્રેપ દરમિયાન ફિશરીઝ કચેરીમાંથી અધિકારી ડી.એલ. ચૌહાણના દલાલ તરીકે કામ કરતા દિનેશભાઈ સલેટને લાંચ સ્વીકારતી વખતે પકડી પાડવામાં આવ્યો હતો. ફિશરીઝ કચેરીમાં એજન્ટ પ્રથા બંધ હોવાના બોર્ડ લગાવવામાં આવ્યા હોવા છતાં, એજન્ટો મારફતે જ કામગીરી થતી હોવાનું આ કાર્યવાહીથી ફરી સાબિત થયું છે. નોંધનીય છે કે પોરબંદરની ફિશરીઝ કચેરી લાંબા સમયથી વિવાદો અને ગેરવહીવટના આરોપોને લઈને ચર્ચામાં રહી છે. આજના બનાવ બાદ સરકારી અધિકારીઓ અને કર્મચારીઓમાં હલચલ મચી ગઈ છે.

અમેરિકન ફેમિલીનો બરડા સફારીમાં અદ્ભુત અનુભવ:એકસાથે 11 સિંહના ઝુંડના દર્શન થયા; ત્રણથી ચાર સિંહણ, નર સિંહો અને નાના બચ્ચાંઓનો સમાવેશ

પોરબંદર નજીક આવેલા બરડા સફારીમાં અમેરિકાથી આવેલા એક પરિવારને અનોખો અનુભવ થયો હતો. સફારી દરમિયાન તેમને એક સાથે 11 સિંહના ઝુંડના દર્શન થયા હતા, જે સામાન્ય રીતે જોવા મળતા નથી. આ ઝુંડમાં ત્રણથી ચાર સિંહણ, નર સિંહો અને નાના બચ્ચાંઓનો સમાવેશ થતો હતો. સિંહોને નજીકથી નિહાળીને અમેરિકન પરિવાર પ્રભાવિત થયો હતો. જંગલના કુદરતી વાતાવરણમાં સિંહોને તેમના પરિવાર સાથે વિચરતા જોઈને પ્રવાસીઓ આકર્ષિત થયા. આજે બરડા સફારીમાં સ્થાનિક અને વિદેશી પ્રવાસીઓનો સારો એવો ધસારો જોવા મળ્યો હતો. મોટાભાગના પ્રવાસીઓને સિંહોના દર્શનનો લાભ મળ્યો હતો. સિંહોની વધતી સંખ્યાને કારણે આ વિસ્તાર સફારી માટે વધુ લોકપ્રિય બની રહ્યો છે. સફારી પૂર્ણ થયા બાદ અમેરિકન પરિવારે ગાઈડ અને સફારી ડ્રાઈવરની પ્રશંસા કરી હતી. તેમણે જંગલ વિશેની વિગતવાર માહિતી, સિંહોને સુરક્ષિત અંતરથી દર્શાવવાની કુશળતા અને સફારીના સુચારુ સંચાલન બદલ આભાર વ્યક્ત કર્યો હતો. બરડા સફારીનો આ દિવસ પ્રવાસીઓ અને વન્યજીવન પ્રેમીઓ માટે યાદગાર બની રહ્યો. એક સાથે 11 સિંહના દર્શનની આ ઘટના સફારીના ઇતિહાસમાં નોંધપાત્ર રહેશે.

SP દ્વારા ગામની મુલાકાત:બોટાદ SP સેથળી,સમઢીયાળા નં -1 ગામની મુલાકાત લીધી

બોટાદ જિલ્લા પોલીસ વડા ધર્મેન્દ્ર શર્મા દ્વારા બોટાદ જિલ્લાના સેથળી અને સમઢીયાળા નં -1 ગામની વિઝીટ કરાઈ હતી. ગામડાઓમાં કાયદો અને વ્યવસ્થાની પરિસ્થિતિ જળવાઈ રહે તે માટે ઉપસ્થિત ગ્રામજનો અને અગ્રણીઓને જરૂરી માર્ગદર્શન આપવામાં આવ્યું હતું. બોટાદ રૂરલ (ગ્રામ્ય) પોલીસ સ્ટેશન વિસ્તારના સેથળી અને સમઢીયાળા નં-1 ગામે બોટાદ જિલ્લા પોલીસવડા ધર્મેન્દ્ર શર્મા દ્વારા વિલેજ વિઝીટ કરવામાં આવેલ અને ગામડાઓમાં કાયદો અને વ્યવસ્થાની પરિસ્થિતિ જળવાઈ રહે તે માટે હાજર ગ્રામજનો અને અગ્રણીઓને જરૂરી માર્ગદર્શન આપવામાં આવ્યું હતું. અને કાયદાકીય કોઈ પ્રશ્નો કે રજૂઆત બાબતે જરૂરી ચર્ચાઓ કરવામાં આવી હતી. આ તકે બોટાદ ડીવાયએસપી મહર્ષિ રાવલ તથા બોટાદ રૂરલ પોલીસ સ્ટેશનના પોલીસ ઇન્સ્પેક્ટર વી.એલ.સાકરીયા સહિત હાજર રહયા હતા.

મેગા ધિરાણ કેમ્પનું આયોજન:બોટાદ નગરપાલિકા,SBI કોર્ટ કમ્પાઉન્ડ શાખા દ્વારા મેગા ધિરાણ કેમ્પ યોજાયો

બોટાદ નગરપાલિકા અને સ્ટેટ બેંક ઑફ ઇન્ડિયા (કોર્ટ કમ્પાઉન્ડ શાખા)ના સંયુક્ત ઉપક્રમે પી.એમ. સ્વનિધિ યોજના અંતર્ગત મેગા ધિરાણ કેમ્પનું આયોજન કરવામાં આવ્યું હતું. શહેરનાં ફેરીયા વર્ગનાં વેપારીઓને રોજગાર વધારવા અને આર્થિક પ્રગતિ માટે સહાયરૂપ થવાનાં મુખ્ય હેતુ સાથે આ કેમ્પ યોજાયો હતો. પી.એમ. સ્વનિધિ યોજનાનાં તે તમામ લાભાર્થીઓ જેમણે પ્રથમ અને બીજી લોનના હપ્તાઓ નિયમિત રીતે ભર્યા છે, તેઓને ત્રીજી લોન મેળવવાનો અધિકાર મળે છે. આ ત્રીજી લોન રૂપે રૂ. 50,000ની સહાય ફેરીયાઓને તેમનાં ધંધા–રોજગારના વિસ્તરણ માટે આપવામાં આવી હતી. આ ધિરાણ કેમ્પમાં નગરપાલિકાનાં ચીફ ઓફિસર ઓફિસ સુપ્રિટેન્ડેન્ટ જયરાજભાઈ રાઠોડ, એસ.બી.આઈ.ના લોન ઓફિસર જયેશભાઈ, તેમજ લીડ બેંક મેનેજર ઉપસ્થિત રહ્યાં હતાં. લોન ઓફિસર જયેશભાઈએ ફેરીયાઓને પી.એમ. સ્વનિધિ યોજના વિષે વિસ્તૃત માર્ગદર્શન આપ્યું અને લોન પ્રક્રિયા અંગે સરળ ભાષામાં સમજાવ્યું હતું. ચીફ ઓફિસરે ફેરીયાઓને નિયમિત હપ્તા ભરવા તથા ડિજિટલ નાણાકીય વ્યવહારોને અપનાવવા માટે પ્રોત્સાહિત કર્યા હતા. ફોન પે કંપનીનાં મોસીનભાઇએ ફેરીયાઓને ક્યુ.આર કોડ, ડિજિટલ પેમેન્ટ અને તેની સરળ પ્રક્રિયા બાબતે માર્ગદર્શન આપ્યું હતું. આ કેમ્પમાં આશરે 70 જેટલા ફેરીયાઓએ લોન માટે અરજી કરી હતી. આમ કુલ મળીને લગભગ રૂ. 35,00,000 જેટલું ધિરાણ શહેરનાં ફેરીયા વર્ગ સુધી પહોંચશે. આ પગલાથી તેમનાં રોજગારને નવી દિશા મળશે.

ગંભીર અકસ્માત સર્જાયો:બોટાદથી તાજપર સમન્વય સ્કૂલની વિદ્યાર્થીનીઓને મુકવા જતી રીક્ષાને કારચાલકે ટક્કર મારતા 8ને ઇજા

બોટાદના તુરખા રોડ ગગજીની ઝૂંપડી પાસે રહેતા આશિષભાઇ રતિલાલભાઈ સાકરીયાએ બોટાદ પોલીસમાં ફરિયાદ નોંધાવી છે કે, તેઓ તા.28ના રોજ સવારે સમન્વય સ્કૂલ ની વિદ્યાર્થીનીઓને રીક્ષામાં લઈને બોટાદથી સ્કૂલે મુકવા જતાં તે સમયે તાજપર રોડ ઉપર એક કાર ચાલકે રીક્ષાને પાછળથી ટક્કર મારતાં 7 વિદ્યાર્થીનીઓ સહીત રીક્ષા ચાલક ને ગંભીર ઈજાઓ થઈ હતી. ઈજાગ્રસ્તોને તાત્કાલિકસબીહા હોસ્પિટલ ખસેડી કારચાલક ભૌતીક ભરતભાઈ વેગડ (કાર નં.જીજે 33 એફ 8706) સામે ગુનો નોંધી વધુ તપાસ હાથ ધરી હતી.

ચોરીનો મામલો:બોરસદના વડેલી ગામના પાટીયા પાસેથી આઇસર ટેમ્પાની ચોરી

આણંદ જિલ્લાના ખંભાત શહેરની મહમદી સોસાયટીમાં રહેતા યુવકે પોતાનો આઈશર ટેમ્પો ખોટકાઈ જતાં બોરસદના વડેલી ગામના પાટીયા પાસે પેટ્રોલપંપ નજીક ટેમ્પો પાર્ક કર્યો હતો ત્યારે રાત્રીના અરસામાં કોઈ ચોર શખ્સ રૂ 7.50 લાખની કિંમતનો ટેમ્પો ચોરી કરી લઈ ગયાની ફરિયાદ ભાદરણ પોલીસ મથકમાં નોંધાઈ છે. ખંભાત શહેરમાં મહમદી સોસાયટી વિસ્તારમાં 32 વર્ષીય સદામ જાકીરહુસેન દિવાન પોતાનો ટેમ્પો લઈને ખંભાત જતા હતા. ત્યારે કોઈ કારણોસર ટેમ્પામાં ખરાબી આવી જતા સદામ દીવાને પોતાનો ટેમ્પો બોરસદ ધુવારણ રોડ ઉપર આવેલા વડેલી ગામના પાટીયા નજીક ભારત પેટ્રોલપંપ પાસે પોતાનો ટેમ્પો પાર્ક કર્યો હતો. અને ખંભાત પોતાના ઘરે જતા રહ્યા હતા. જે દરમ્યાન રાત્રીના અરસામાં કોઈ ચોર શખ્સ રૂ 7.50 લાખની કિંમતનો આઈશર ટેમ્પો ચોરી કરી લઈ ગયા હતા. જે અંગે ભાદરણ પોલીસ મથકનો સંપર્ક સાધી હકીકત જણાવતા પોલીસે સદામ જાકીરહુસેન દિવાનની ફરિયાદ લઈ ચોરીનો ગુનો દાખલ કરી આગળની કાર્યવાહી હાથ ધરી છે.

ગોઝારો અકસ્માત સર્જાયો:ખાંધલી-નાપા રોડ ઉપર ટ્રેક્ટરની ટક્કરે ટુવ્હીલર ચાલકનું મોત

આણંદ જિલ્લાના બોરસદ તાલુકાના વહેરા ગામે વાણીયાકુવા શાયોનામ રેસીડેન્સી પાસે ખેતરમાં 28 વર્ષીય કૌશલકુમાર શશીકાંતભાઈ પટેલ પોતાના પરિવાર સાથે રહે છે. સુર્યા ઇન્ટરનેશનલ સ્કૂલ લક્કડપુરા પેટલાદ ખાતે સ્કુલવાનમાં ડ્રાઈવીંગ કરી જીવન ગુજરાન ચલાવે છે. તેમના મોટાભાઈ ધ્રુવલભાઈ સવારના 11-00 વાગે પોતાનું નવું ટુવ્હીલર લઇને નંબર પ્લેટ ફીટ કરાવવા માટે નીકળ્યા હતા. અને ખાંધલી-નાપા રોડ ઉપર ચીકન શોપ પાસે રોડ ઉપરથી પસાર થતા હતા. આ વખતે રોંગ સાઈડે પુરઝડપે આવી ચઢેલ મહેન્દ્રા ટ્રેક્ટરના ચાલકે ટુવ્હીલર ચાલક ધ્રુવલભાઈને સામેથી ટક્કર મારતા ધ્રુવલભાઈને પેટ,સાથળના ભાગે તેમજ શરીરે ગંભીર ઇજાઓ પહોંચી હતી. આ બનાવ બનતા જ આજુબાજુમાંથી લોકો એકત્ર થઈ ગયા હતા અને ગંભીર ઇજાગ્રસ્ક ધ્રુવલભાઈને બેભાન હાલતમાં તાત્કાલીક સારવાર અર્થે કરમસદ શ્રીકૃષ્ણ હોસ્પિટલ ખાતે ખસડવામાં આવ્યા હતા. જ્યાં મોડી સાંજે સારવાર દરમ્યાન ધ્રુવલભાઈનું મોત નીપજ્યું હતું. આ બનાવ અંગે કૌશલકુમાર શશીકાંતભાઈ પટેલની ફરિયાદ લઈ આણંદ રૂરલ પોલીસે ટ્રેક્ટર ચાલક વિરુધ્ધ અકસ્માતનો ગુનો દાખલ કરી આગળની કાર્યવાહી હાથ ધરી છે.

જીવલેણ હુમલો:કણભામાં પિતા સાથે બોલાચાલી અંગે ઠપકો આપતા યુવકને ચપ્પાથી જીવલેણ ઈજા કરી

બોરસદ તાલુકાના કણભા ગામે રામજી મંદિરની બાજુમાં 24 વર્ષીય રાજદીપસિંહ ઉર્ફે રાજ દેવેન્દ્રસિંહ પરમાર રહે છે ગત ગુરુવારે સાંજના સાત વાગ્યાના અરસામાં રાજદીપસિંહ પરમારના પિતા તેમજ વનરાજસિંહ અમરસિંહ પરમાર બંને રામજી મંદિરની બાજુમાં રહેતા રાવજીભાઈ રામાભાઇ પરમાર સાથે બેઠા હતા. ત્યારે કણભા ગામે રહેતા કિરણભાઈ ભગવાનસિંહ પઢીયારે પડીકી ખાઈને પિચકારી મારી હતી. જેથી રાજદીપસિંહના પિતાએ આ બાબતે ઠપકો આપતા કિરણ પઢીયારે બોલાચાલી કરી હતી. બીજા દિવસે શુક્રવારે આ બાબતની જાણ થતા રાત્રે સાડા આઠ વાગ્યાના અરસામાં રાજદીપસિંહ પરમાર પોતાના કુટુંબીભાઈ રાહુલભાઈ ચીમનભાઈ પરમાર સાથે કિરણ પઢીયારના ઘર નજીક જઈને કિરણભાઈને બોલાવીને પડીકી ખાઈને પિચકારી મારવા બાબતે અને પોતાના પિતા સાથે ઝઘડો કરવા બાબતે ઠપકો આપ્યો હતો. આ દરમ્યાન કિરણ પઢીયાર એકદમ ઉશ્કેરાઈ ગયો હતો અને ઘરમાંથી ચપ્પુ લઇ આવી રાજદીપસિંહ સાથે ઝપાઝપી કરી રાજદીપસિંહ પરમારને પેટમાં ઉપરા છાપરી ચપ્પાના ઘા મારી તેમજ હાથના કાંડામાં, અંગુઠામાં, જમણા હાથે બગલના ભાગે ઉપરા છાપરી ચપ્પાના ઘા મારી હત્યા કરી નાંખવાના ઈરાદે ગંભીર જીવલેણ ઇજાઓ પહોંચાડી હતી. જેથી રાજદીપસિંહને તેઓના કુટુંબીભાઈ તેમજ ફળીયાના અન્ય માણસો આવતા વચ્ચે પડીને છોડાવ્યા હતા. લોકો એકત્રક થઈ જતા કિરણ પઢીયાર જાનથી મારી નાખવાની ધમકી આપવા લાગ્યો હતો. બીજી તરફ ઈજાગ્રસ્ત રાજદીપસિંહને તાત્કાલીક સારવાર અર્થે બોરસદ ખાતેની હોસ્પીટલમાં ખસેડવામાં આવ્યા હતા. આ બનાવ અંગે રાજદીપસિંહ ઉર્ફે રાજ દેવેન્દ્રસિંહ પરમારની ફરિયાદ લઈ વિરસદ પોલીસે કિરણભાઈ ભગવાનસિંહ પઢીયાર વિરુદ્ધ હત્યાના પ્રયાસ સહિતની કલમો હેઠળ ગુનો દાખલ કરી આગળી કાર્યવાહી હાથ ધરી છે.

ભાસ્કર વિશેષ:મહિલાઓ યુવા વયથી જ યોગ્ય આહાર- જીવનશૈલી અપનાવે તો 40 વર્ષ પછી થતી હાડકાના પોચાપણાની સમસ્યા નિવારાય

એસ એમ પટેલ કોલેજ ઓફ હોમ સાયન્સને રિસર્ચ પ્રોજેક્ટ અને રાષ્ટ્રીય સ્તરના રિસર્ચ સેમિનાર માટે રાજ્ય સરકારના નોલેજ કન્સોર્ટિયમ ઓફ ગુજરાત દ્વારા 6.14 લાખની ગ્રાન્ટ મંજૂર કરવામાં આવી હતી. જેમાં બે રિસર્ચરને આણંદના હોટેલના કર્મચારીઓના સખત મહેનતથી બગડતા સ્વાસ્થ્ય પ્રોજેક્ટને 2 લાખની તથા વિદ્યાનગર કોલેજની યુવતીઓના હાડકાની ઘનતાના સંશોધન માટે 1 લાખની ગ્રાન્ટ મળી હતી. તથા એઆઇની મદદથી સસ્ટેનેબલ ડેવલોપમેન્ટના પર્યાવરણ અને સ્વાસ્થ્યના ધ્યેયને પૂર્ણ કરવા રાષ્ટ્રીય સ્તરના રિસર્ચ સેમિનારના આયોજન માટે 3.14 લાખનું અનુદાન મળ્યું હતું. ડો. મિનલ ચૌહાણે જણવ્યું હતુ કે, હાલમાં યુવતીઓમાં ખોટી ખાવા- પીવાની ટેવો, હોર્મોનલ અસંતુલનતા કે બિનઆરોગ્યપ્રદ જીવનશૈલીથી હાડકાની ઘનતા અસર વધુ જોવા મળી રહી છે. તેમણે અગાઉ પીએચ ડી અભ્યાસમાં નિરિક્ષણ કર્યુ કે 40 વર્ષથી ઉપરની મહિલાઓમાં હાડકાના પોચાપણાની સમસ્યા વધુ રહે છે. જો યુવા વયથી જ યોગ્ય આહાર અને જીવનશૈલી અપનાવવામાં આવે તો સમસ્યા ઘટાડી શકાય છે. ખાસ તો અભ્યાસ દરમિયાન યુવતીઓને હાડકા મજબૂત બનાવવા માટે જરૂરી જાગરૂકતા આપવામાં આવશે. જેમાં હાડકાને મજબૂત બનાવતા પૌષ્ટિક આહાર જેમ કે કેલ્શિયમ, વિટામિન ડી ધરાવતા ખોરાક, નિયમિત વેઇટ બેરિંગ એક્સરસાઇઝ અને જરૂરી સુર્યપ્રકાશના લેવા જેવા મુદ્દાઓ અંગે માહિતી અપાશે. વિદ્યાનગર કોલેજની 300 યુવતીઓમાં હાડકાની તંદુરસ્તી તથા હાડકા વધુ મજબુત બનાવવાના માટે જાગૃતિ કેમ્પ યોજશે. એસોસિયેટ પ્રો. ડો. નિધી ગુપ્તા એર્ગોનોમિકલ ડિઝાઇનથી આણંદના 300 હોટેલ કર્મચારીઓના કામનું વિશ્લેષણ કરીને તેમની શારીરિક સમસ્યાઓનું સમાધાન કરશે. કર્મચારીઓને ઘણી વખત કામ કરતા સમયે પીઠ, ખભા, કમરમાં, હાથ કે પગમાં દુ:ખાવો થતો હોય છે. લાંબા સમય સુધી કામ કરવાથી કે ભારે વજન ઉપાડવાથી તેમની શારીરિક સ્થિતિ ખરાબ થાય છે. સંશોધનમાં અમુક ટેક્નિકથી તેમની કામ કરવાની ક્ષમતાની ચકાસણી કરાશે. ત્યારબાદ કર્મચારીઓની શારીરિક તકલીફોના સમાધાન રૂપે અમુક સરળ ઉપાયો જણાવાશે. આ સંશોધન માટે 2 લાખની ગ્રાન્ટ મળી છે. તેઓએ જણાવ્યું કે, રિસેપ્શન, ઓફિસ કે હોટેલના રસોડામાં કે હાઉસ કિપિંગ સમયે નાના-મોટા બદલાવથી સમાધાન લાવી શકાય છે. ભારે વજન ઉપાડવા પહેલાં તેને ખુરશી કે ટેબલ પર રાખીને ઉપાડવાથી શરીરને ઝટકો નથી લાગતો અને કામ સરળતાથી થઇ શકે છે. કોમ્પ્યુટર પર કામ કરતી વખતે તમારી કોણીથી નીચે ટેબલની ઊંચાઇ રહે તેવી રીતે ગોઠવવા જેવી તકનીક જણાવાશે.

મકાનમાં લાગી આગ:વિદ્યાનગરમાં આવેલ રુદ્ર રેસીડેન્સીના મકાનમાં આગ લાગતા અફડાતફડી

વિદ્યાનગરમાં આવેલ રુદ્ર રેસીડેન્સી માં 401 નંબરના મકાનમાં રસોડામાં અચાનક આગ લાગેલ હતી.ત્યારે સમગ્ર વિસ્તારમા અફડા તફડી મચી ગઈ હતી. આ બનાવ અંગે કરમસદ આણંદ ફાયર એન્ડ ઈમરજન્સી સર્વિસીસના જાણ કરાતા ટીમોએ ઘટના સ્થળ પર પોહચી ત્યાં બિલ્ડિંગ માં લગાવેલ ફિક્સ ફાયર સિસ્ટમનો ઉપયોગથી તાત્કાલિક ધોરણે ફાયર ફાઈટિંગ કરી આગ બુઝાવી દીધી હતી.જેમાં સંપૂર્ણ ઘટના દરમ્યાન કોઈ જાનહાની થયેલ નહી હોવાનું જણાવ્યું હતું.

આઇએએસ સંતોષ વર્મા સામે કાર્યવાહી કરવા માંગ‎:આઇએએસ અધિકારીએ બ્રાહ્મણ દિકરી પર કરેલ ટીપ્પણીને લઇને ભારે વિરોધ

તાજેતરમાં વરિષ્ઠ આઇએએસ અધિકારી સંતોષ વર્મા દ્વારા બ્રાહ્મણ ની દિકરી માટે કરેલ અપમાનજનક ટિપ્પણી ના પગલે બ્રાહ્મણ સમાજમાં ઉગ્ર રોષ વ્યાપી રહ્યો હોય ગુજરાત બ્રહ્મ સમાજ ના આણંદ એકમ દ્વારા જીલ્લા સમાહર્તા ને આવેદનપત્ર આપી સંતોષ વર્મા વિરુદ્ધ કાનૂની કાર્યવાહી હાથ ધરવા માંગ કરી હોવાનું જાણવા મળેલ છે. વરિષ્ઠ આઇએએસ અધિકારી સંતોષ વર્મા દ્વારા તાજેતરમાં બ્રાહ્મણ સમાજને નીચા દેખાડવાની કરેલ કોશિશ કરી બ્રાહ્મણ જ્યાં સુધી પોતાની દિકરી તેમના દિકરાને દાનમાં ન આપે ત્યાં સુધી આરક્ષણ મળવું જોઈએ ની વિવાદિત ટીપણી બ્રાહ્મણો ની લાગણી દુભાવતા ગુજરાત બ્રહ્મ સમાજ આણંદ એકમ દ્વારા જીલ્લા સમાહર્તા ને આવેદનપત્ર આપી આઇએએસ સંતોષ વર્મા વિરુદ્ધ કાર્યવાહી કરવા અને બ્રહ્મ સમાજ ની જાહેરમાં માફી માંગવા ની માંગ કરવામાં આવી હોવાનું જાણવા મળેલ છે જો કોઇ પગલાં લેવામાં નહીં આવે તો આગામી દિવસો ઉગ્ર આંદોલન કરવાની ચીમકી ઉચ્ચારી હતી

આરોગ્ય સેવા બનશે મજબૂત:એઆઈ ટેકનોલોજી સાથે દર્દીની સારવાર માટે 35 કરોડના ખર્ચે 4 માળનું સેન્ટર ઊભું કરાશે

કરમસદ ભાઈકાકા યુનિવર્સિટી ચારુતર આરોગ્ય મંડળ ખાતે જયા રિહેબિલેટેશન સેન્ટર અને રિસર્ચ ઇન્સ્ટિટ્યૂટની સ્થાપના કરવા માટે ખાતમૂહૂર્ત કરવામાં આવ્યું હતું. આ 4058 ચો. મીટરના સેન્ટરમાં ફિઝિકલ રિહેબિલિટેશન, ન્યૂરોપ્રોસ્થેટિક્સ, ઓક્યુપેશન થેરાપી, મોબિલિટી થેરાપી, કાયનેટિક મુવમેન્ટ તથા એલાઇડ હેલ્થ સંબંધિત સારવાર પૂરી પાડવા અને વ્યવસ્થા માટે ચાર માળનું ઇમારત ઊભું કરવામાં આવશે. ખાસ તો સેન્ટરમાં રોબોટિક એઆઈ ટેકનોલોજી પણ વિકસાવામાં આવશે. આ સુવિધાઓથી સ્ટ્રોક, કરોડરજ્જૂની ઇજાઓ, મગજનો લકવો, હાયપર એક્ટિવ ડિસઓર્ડરના દર્દીઓની સારવાર કરવામાં આવશે. આ વ્યવસ્થા દાતા અરવિનભાઇ શાહના સહયોગથી 35 કરોડના ખર્ચે નિર્માણ કરાશે. આ રિહેબિલીટેશન સેન્ટરની સ્થાપના થકી દિવ્યાંગજનોને હલન-ચલન અને સામાન્ય જીવન પુન: પ્રાપ્ત કરવાની મદદ મળશે.

અદ્ભુત કલાકારી:જીવનના દોડધામથી આરામમાં પણ શાંતિનો અભાવ વ્યક્ત કરતી પેઇન્ટિંગને 90મી વાર્ષિક કલા પ્રદર્શનીમાં પુરસ્કાર

સીવીએમ કોલેજ ઓફ ફાઇન આર્ટ્સના પ્રદ્યાપકને કલાકૃતિને અમૃતસર ખાતેની ધ ઇન્ડિયન એકેડમી ઓફ ફાઇન આર્ટ્સની 90મી વાર્ષિક કલા પ્રદર્શનીમાં પુરસ્કાર માટે નામાંકીત કરવામાં આવી હતી. દેશભરમાંથી આવેલી 600થી વધુ કલાકૃતિઓનું પ્રદર્શન કરવામાં આવ્યું હતું. જેમાં ફાઇન આર્ટ્સના પ્રદ્યાપકને રિલેક્સિંગ ઇન વેઇન નામની પેઇન્ટિંગ માટે નકદ રકમ, રજત પ્લાક સ્મૃતિ ચિહ્ન, પ્રશસ્તિ પત્ર દ્વારા સન્માનિત કરાયા હતા.

સિદ્ધિ:વિદ્યાનગરની વિદ્યાર્થીનીની સિનિયર મહિલા જિલ્લા ક્રિકેટ ટુર્નામેન્ટમાં પસંદગી

વિદ્યાનગર સ્થિત સીવીએમયુ સંચાલિત ઇલ્સાસ કોલેજની ક્લિનિકલ સાયકોલોજી અનુસ્નાતક વિભાગની વિદ્યાર્થીનીની દિવ્યાંકી હડિયાની સૌરાષ્ટ્ર ક્રિકેટ એસોસિએશન દ્વારા આયોજિત સિનિયર મહિલા જિલ્લા ક્રિકેટ ટુર્નામેન્ટ 2025 માટે પસંદગી કરવામાં આવી હતી. સૌરાષ્ટ્ર ક્રિકેટ એસો . દ્વારા આયોજિત સિનિયર મહિલા જિલ્લા ક્રિકેટ ટુર્નામેન્ટમાં રમનાર દિવ્યાંકી હડિયા સ્નાતક કક્ષાએ 3 વખત નેશનલ રમી ચુકી છે. દિવ્યાંકીએ જણાવ્યું હતું કે, સ્પોર્ટ્સ માત્ર રમવા ખાતર નથી હોતું પરંતુ તે શિસ્તમાં રહેવું શીખવે છે અને શિસ્ત રોજિંદા જીવનમાં શિક્ષા, સંચાર અને આદર કરતા શીખવે છે.

સન્ડે ફોટો સ્ટોરી:ચિખોદરાના 308 વર્ષ જૂના રૂખડાની ઐતિહાસિક ઓળખ જાળવવા વન વિભાગની સ્પેશિયલ ટીમ નજર રાખશે

માળા આણંદ થી માત્ર 5 કિમી અંતરે ચિખોદરા ગામના ખેતરમાં અંદાજે 308 વર્ષ જૂનું રૂઘડો એટલે કે ગોરખ આમલી વૃક્ષો છે જેનો હેરીટેજ વૃક્ષમાં સમાવેશ કરી વનવિ‌ભાગે તેને વિરાસત વૃક્ષ જાહેર કર્યું હોવાથી આણંદ જિલ્લાની શાન સમું બની રહ્યું છે. આ વૃક્ષને પવિત્ર ગણી તેની પૂજા કરવામાં આવે છે અને રવિવાર તથા મંગળવારે અહીં તેના થડ નીચે જમણવાર કરી પૂજા-અર્ચના કરાય છે. જે આફ્રિકા અને મડાગાસ્કરનું મૂળ વતની ગણાય છે. આણંદ જિલ્લા વન વિભાગ દ્વારા જિલ્લામાં આવેલા વર્ષો જૂના વૃક્ષ અને ચિખોદરામાં આવેલા રૂખડા વૃક્ષ જતન માટે સ્પેશિયલ ટીમ બનાવાશે. વૃક્ષની ચારેય તરફ ફેન્સીંગ કરી દર સપ્તાહે ટીમ મુલાકાત લઇને તેની ચકાસણી કરશે. કોઇ ઉણપ વર્તાઇ તો દૂર કરાશે તેમ વન વિભાગના સૂત્રોએ જણાવ્યું હતું. રૂખડાના વૃક્ષની વિશેષતાઘેરાવો : 12.75 મીટરઘટા : 20 મીટરઉંચાઇ : 21.5 મીટરમાળા : 100થી વધુ બખોલમાં પક્ષીઓના

પોલીસ કાર્યવાહી:બોરસદ- મુજપુરામાંથી 17 હજારની ચાઈનીઝ દોરી સાથે ત્રણ ઝડપાયા

બોરસદ શહેરમાંથી એક શખ્સ અનેમુંજકુવા ગામેથી પ્રતિબંધિત ચાઈનીઝ દોરી સાથે બે શખ્સોને આંકલાવ પોલીસે ઝડપી પાડી ગુનો દાખલ કરી કાર્યવાહી હાથ ધરી છે. બોરસદ શહેર પોલીસના માણસો પ્રતિબંધિત ચાઈનીઝ દોરીના વેચાણ, સંગ્રહ અને હેરાફેરીની પ્રવૃત્તિ અટકાવવા સારૂ પેટ્રોલીંગમાં હતા ત્યારે બાતમીના આધારે શ્રદ્ધા હોસ્પિટલ નજીક એક શખ્સ ચાઈનીઝ દોરીનું કાર્ટુન આપવા આવતા શખ્સને ઝડપી લઇ પુછપરછ કરતા પોતાનું નામ દેવેન્દ્ર ઉર્ફે દેવ સુરેશભાઈ સોલંકી હોવાનું જણાવ્યું હતું. તેની પાસેથી 3 હજારની કિંમતની પ્રતિબંધિત ચાઈનીઝ દોરીની ફીરકી નંગ-30 મળી આવતા રૂ 18 હજારનો મુદ્દામાલ કબ્જે લઈ ગુનો દાખલ કર્યો છે. આંકલાવ પોલીસે બાતમી આધારે, મુજકુવા રવિપુરા વિસ્તારમાં એક ખેતરમાં છાપો મારીને બે શખ્સો પુઠાના ત્રણ બોક્સ સાથે મળી આવ્યા હતા. જે બંનેને ઝડપી લઈ પુછપરછ કરતા પોતાનું નામ પ્રકાશ પઢીયાર અને દીક્ષીત ચૌહાણ હોવાનું જણાવ્યું હતું. પોલીસે બંને પાસેના પુઠાના ત્રણ કાર્ટુનમાંથી રૂ 14400ની કિંમતની ચાઈનીઝ દોરીની ફીરકીઓ નંગ-144 કબ્જે લઈ બંને વિરુદ્ધ ગુનો દાખલ કરી આગળની કાર્યવાહી હાથ ધરી છે.

ભાસ્કર વિશેષ:પાધરિયા સહિતના વિસ્તારમાં નવી ગટર‎લાઇન આડે દબાણો સહિતના અવરોધ‎

કરમસદ આણંદ મહાપાલિકા બનતાં પૂર્વે બે દાયકા સુધી આણંદ પાલિકામાં ભાજપના શાસનના પગલે મતોના રાજકારણના કારણે શાસકો દ્વારા પૂર્વ વિસ્તારમાં સુવિધાઓ ઉપલબ્ધ કરવા ઉપેક્ષા કરવામાં આવી હતી. તેમજ પાલિકાના શાસન દરમિયાન ગેરકાયદે દબાણો સહિત પ્રવૃતિઓને પગલે હાલમાં ગટર ઉભરાવા સહિતના પ્રશ્ન ઉપસ્થિતી થયા છે. તેમજ સ્થાનિક રહીશોએ પોતાના ઘર નજીક ગટર લાઇન નાંખવા ન દેતાં લેવલીંગના અભાવે ગટર લાઇન ઉભરાઇ રહી છે. પ્રાપ્ત વિગત અનુસાર વર્ષ 2002મા આણંદ પાલિકામાં ભાજપે સત્તા હસ્તે કરી હતી. જે બાદ બે દાયકા સુધી ભાજપનું શાસન રહેતા છતાં શહેરના પૂર્વ વિસ્તારના વોર્ડ વિપક્ષની તરફેણ કરતાં પાલિકા શાસકો દ્વારા ભાજપના સબકા સાથ સબકા વિકાસને કોરાણે મૂકી પૂર્વ વિસ્તારમાં સુવિધાઓ ઉપલબ્ધ કરવા ઉપેક્ષા કરી હતી.જે તે ડીપીના અભાવે બિલ્ડરો પોતાને મનફાવે તેમ રસ્તા કે ગટર સહિતના આયોજન વગર બાંધકામ કરી દીધા હતા. તો વળી કેટલાંક લોકો ગેરકાયદે દબાણો કરી દીધા છે. મનપાએ તાજેતરમાં નવી લાઇન નાંખવા માટે ગયા હતા. ત્યારે સ્થાનિક સોસાયટીના રહીશોએ અન્ય જગ્યાએ લાઇન લઇ જવા માટે હઠાગ્રહ કર્યો હતો.જેથી ગટર લાઇન વળાંક સહિત લેવલીંગ ન જળવતા ગટર ચોકઅપ થઇ રહી છે. ટીપી સ્કીમના અભાવે મનેફાવે તેમ બાંધકામ કરી દીધા હતા. ગટર ઉભરાવવા પાછળના મુખ્યકારણો

સામાજિક કાર્યકર સામે રાવ:કરમસદ-આણંદ મનપામાં રજુઆત કરવા ગયેલા સામાજિક કાર્યકર સામે ફરિયાદ

આણંદ શહેરના જુદા જુદા વિસ્તારોને લગતા વિવિધ પ્રશ્નોની રજૂઆત બાબતે છેલ્લા કેટલાક સમયથી રજુઆતો કરી રહેલા સામજીક કાર્યકર વિરુદ્ધ ગત મોડી રાત્રે આણંદ શહેર પોલીસ મથકમાં મનપાના નાયબ કમિશ્નરના પીએ દ્વારા ફરજમાં અડચણ અંગેની ફરિયાદ નોંધાવવામાં આવી છે. જેને લઈને ઉલટા ચોર કોટવાલકો ડાંટેની ચર્ચાઓ ટોક ઓફ ધી ટાઉન બનવા પામેલ છે. આણંદ શહેરમાં રામેશ્વર એપાર્ટમેન્ટ રૂપાપુરા વિસ્તારમાં હર્ષિલ જતીનભાઈ દવે છેલ્લા કેટલાક સમયથી કરમસદ આણંદ મનપામાં આવેલા જુદા જુદા વિસ્તારોમાં રોડ, રસ્તા, પાણી, ગટર સહિતના પ્રશ્નો બાબતે જાગૃત નાગરિકો સાથે મળીને કરમસદ આણંદ મનપા ખાતે રજૂઆત સાથે નગરજનોની મુશ્કેલીઓ, સમસ્યાઓ હલ કરવાનો પ્રયાસ કરી રહ્યા છે. હર્ષિલ દવે દ્વારા તાજેતરમાં બે-ત્રણ દિવસ અગાઉ આણંદ શહેરના પાધરીયા વિસ્તારની બે સોસાયટીમાં ઉભરાતી ગટરોના ગંદા પાણી બાબતે જાગૃતજનો સાથે મળીને મનપા ડેપ્યુટી કમિશનરની કચેરીની બહાર ગટરનું ગંદુ પાણી રેડી તેમજ ટેબલ પર બંગડીઓ મુકતા મામલો ગરમાયો હતો. અધિકારીઓની ગરીમા જાળવી ન હતી. આખરે પોલીસને દરમ્યાનગીરી કરી મામલો થાળી પાડવો પડ્યો હતો.આ અંગે કરમસદ આણંદ મનપાના કર્મચારી સંતોષભાઈ અરૂણભાઇ રાજગુરુ દ્વારા શહેરના પ્રશ્નો બાબતે રજૂઆતો કરનાર હર્ષિલ જતીનભાઈ દવે વિરુદ્ધ ફરિયાદ નોંધાવતા પોલીસે ગુનો દાખલ કરી આગળની કાર્યવાહી હાથ ધરી છે. પાલિકા વખતના અટવાયેલા‎કામો લઇને ખોટી હેરાનગતિ‎​​​​​​​ આણંદ પાલિકા સતાધિશો જે તે વખતે પૂર્વ વિસ્તારના વિકાસના કામો અટકાવી દીધા હતા. જે તે વખતે બેદરકારીને કારણએ આડેધડ બાંધકામ થઇ જતાં હાલમાં વિકાસના કામોમાં અડચણ ઉભી થઇ રહી છે. તેમ છતાં મપના અધિકારીઓને ખોટી રીતે હેરાન કરવામાં આવી રહ્યાં હોવાની ચર્ચાઓ જોર પકડયું છે.

નાસિકમાં રખડતા શ્વાનોએ હુમલો કરતા અઢી વર્ષીય બાળકનું મોત

બાળક શેરીમાં રમી રહ્યો હતો તે સમયે ઘટના બની શ્વાનોના હુમલામાં વધારો છતાં પાલિકા કોઈ પગલાં ન લેતા લોકોમાં રોષ ફેલાયો મુંબઈ - રાજ્યભરમાં રખડતા શ્વાનનો ત્રાસ દિવસેને દિવસે વધી રહ્યો છે. ત્યારે નાસિકના માલેગાંવમાં રખડતા કૂતરાએ કરડયા બાદ અઢી વર્ષના બાળકનું મોત નીપજ્યું હતું. આ ઘટનાથી સ્થાનિકોમાં રોષ ફેલાયો હતો. વધુમાં આ મામલાને અવગણના બદલ નાગરિકોએ પાલિકાની ટીકા કરી હતી.

રક્તદાન શિબિરનું આયોજન:ચરોતરમાં પ્રેરણા ઉત્સવ અંતર્ગત 33 યુનિટ રક્ત એકત્રિત થયું

ભાસ્કર સમૂહના ચેરમેન સ્વ. રમેશચંદ્ર અગ્રવાલના 81મા જન્મ દિવસ પ્રેરણા ઉત્સવના રૂપમાં મનાવવામાં આવી રહ્યો છે. તેમની જનસેવાની વિચારસરણી આગળ વધારતાં ભાસ્કર પરિવાર દ્વારા 29 નવેમ્બરને શનિવારે દેશના 210 શહેરમાં 252 રક્તદાન શિબિરનું ઉત્સાહભેર આયોજન કરવામાં આવ્યું હતું. હજુ 14 સ્થળો પર 30 નવેમ્બરે કૅમ્પ આયોજિત થશે. ચરોતરમાં આણંદ અને નડિયાદમાં મળી કુલ 33 યુનિટ રક્ત એકત્રિત થયું હતું. આણંદ દિવ્ય ભાસ્કર દ્વારા વિદ્યાનગરની નલિની અરવિંદ પટેલ આર્ટસ કોલેજમાં રેડક્રોસ સોસાયટી સાથે મળીને રક્તદાન શિબિર યોજાઈ હતી. સવારે 9-30 થી 12 વાગ્યા સુધી આયોજિત આ કેમ્પમાં કોલેજ વિદ્યાર્થીઓ અને અન્ય સ્થાનિકોએ ભાગ લીધો હતો. જેમાં 13 યુનિટ રક્ત એકત્રિત કરાયું હતું. આ રક્ત બ્લડ બેન્કોને અપાશે. જેથી ઇમરજન્સીની સ્થિતિમાં જરૂરિયાતમંદોને સહાયતા મળી શકે. આ પ્રસંગે કોલેજના પ્રિન્સીપાલ ભાનુભાઈ પરમાર, રેડક્રોસ સોસાયટીના ઉપપ્રમુખ શૈલેષભાઈ પટેલ હાજર રહ્યા હતા. બીજી તરફ, નડિયાદના સંતરામ મંદિરમાં યોજાયેલી રક્તદાન શિબિરમાં 20 દાતાઓએ રક્ત આપી જીવન બચાવવાનો અન્ય સંદેશ આપ્યો હતો. સંતરામ મંદિરના પૂ. નિર્ગુણદાસજી મહારાજ અને પૂ. ગણેશદાસજી મહારાજે વિશેષ ઉપસ્થિત રહીને શિબિરનો પ્રારંભ કરાવ્યો હતો.

મુંબઈ-અમદાવાદ શતાબ્દી એક્સપ્રેસ ટ્રેનની તત્કાલ ટિકિટ માટે ઓટીપી સિસ્ટમ શરૃ કરાશે

1લી ડિસેમ્બરથી ફેરફાર અમલી બનશે ફોન નંબર પર ઓટીપી આવશે, તે જણાવ્યા પછી જ ટિકિટ મળી શકશે મુંબઈ - મુંબઈ સેન્ટ્રલ-અમદાવાદ શતાબ્દી એક્સપ્રેસ ટ્રેન નંબર ૧૨૦૦૯/૧૨૦૧૦માં પ્રવાસ કરવા માટેની તત્કાલ ટિકિટ બુકિંગ માટે હવે ઓટીપી સુવિધા દાખલ કરવામાં આવી છે. રેલવે બોર્ડની ગાઇડલાઇન્સ અનુસાર આ નિયમ લાગુ કરાશે. આની શરૃઆત શતાબ્દી એક્સપ્રેસ ટ્રેનથી શરૃ કરાશે. ટ્રેન નંબર ૧૨૦૦૯/૧૨૦૧૦ માટે પહેલી ડિસેમ્બરથી ટ્રેનની ટિકિટ બુકિંગ કરવું હોય તો ઓટીપી (વનટાઇમ પાસવર્ડ) વડે ઓથેન્ટીકેશન (ખરાઈ) કર્યા પછી જ તત્કાલ ટિકિટ બુકિંગ થઈ શકશે.

SIRની કામગીરી:ખંભાળિયા-ભાણવડમાં મતદાર યાદી સુધારણા, 2.60 લાખ ફોર્મ ચકાસાયા

દેવભૂમિ દ્વારકા જિલ્લાના ખંભાળીયા વિધાનસભા બેઠક જેમાં ખંભાળીયા તથા ભાણવડ વિસ્તારના સવા ત્રણ લાખ ઉપરાંત મતદારો નોંધાયેલા છે આ મતદારોની મતદાર યાદી સુધારણાના એસ.આઈ.આર.ના કાર્યક્રમમાં ખૂબ સફળતા મળી છે. શુક્રવાર સુધીમાં 75 ટકા ઉપરાંત કામગીરી થઈ ગઈ છે. અનેક બુથોમાં 90 ટકા ઉપરાંતની કામગીરી થઈ છે. ખંભાળીયા પ્રાંત અધિકારી કે.કે.કરમટા તથા મામલતદાર દેસાઈ તથા ગઢવી દ્વારા દેવભૂમિ દ્વારકા જિલ્લા કલેકટર રાજેશકુમાર તન્ના તથા અધિક નિવાસી કલેકટર ભુપેશ જોટાણીયાના માર્ગદર્શનમાં ખંભાળીયા વિધાનસભા તથા ભાણવડ વિધાનસભા તથા ખંભાળીયા શહેર, ભાણવડ શહેર, સલાયા શહેરની ન.પા. વિસ્તારો તથા ગ્રામ્ય પંથક ભાણવડ તથા ખંભાળીયામાં સુચારૂ રીતે કામગીરી સાથે શુક્રવાર સુધીમાં 75 ટકા ઉપરાંતની કામગીરી પૂર્ણ કરી છે. એટલે કે 2.60 લાખ જેટલા ફોર્મ ચકાસણી કરીને પરત આવી ગયા છે. જિલ્લામાં 15/16 તથા 22/23 નવેમ્બરમાં દરેક મતદાન બુથો પર રખાયેલ ખાસ સંઘન ઝુંબેશ કાર્યક્રમોમાં પણ આ કાર્યમાં સફળતા મળી હતી. જયારે શનિવાર બાદ કાલે રવિવારે પણ નક્કી કરાયેલા સ્થળે સંઘન ઝુંબેશ હેઠળ માર્ગદર્શન આપવામાં આવી રહ્યું છે.

હીટ એન્ડ રનની ઘટના:હીટ એન્ડ રન, છાત્રનું મોત, પિતા સારવારમાં

જામનગર-કાલાવડ હાઈવે પર મોથા થાવરીયા ગામના પાટીયા નજીક આજે વહેલી સવારમાં અજાણ્યા વાહન ચાલકે સ્કુલે મુકવા જતા પિતા-પુત્રને અડફેટે લેતા પુત્રનું પિતાની નજર સામે જ કમકમાટી ભર્યુ મોત નિપજતાં પરિવારમાં શોક વ્યાપી ગયો છે. મોટા થાવરીયા ગામમાં રહેતા અશોકભાઈ વિઠ્ઠલભાઈ ચોવટીયા (ઉ.વ.38) નામના યુવક પોતાના પુત્ર રૂત્વિક (ઉ.વ.16)ને વહેલી સવારમાં ઠેબા ગામે સ્કુલ બસમાં બેસાડવા માટે મોટર સાયકલ લઈને જતા હતા. ત્યારે મોટા થાવરીયાના પાટીયાથી નજીક પસાર થતા હોય અને પાછળથી આવેલા અજાણ્યા વાહન ચાલકે ઠોકર મારતા પિતા-પુત્ર બન્ને બાઈક ઉપરથી ફંગોળાઈ ગયા હતા, અને રોડ ઉપર પટકાયા હતા. જેમાં પુત્ર રૂત્વિક રોડ પર પટકાતા માથાના ભાગે ગંભીર ઈજા પહોંચતા ઘટના સ્થળે જ કમકમાટી ભર્યુ મોત નિપજ્યું હતું. જ્યારે પિતા અશોકભાઈને હાથ-પગમાં ઈજા પહોંચતાં સારવાર માટે હોસ્પિટલમાં ખસેડવામાં આવ્યો હતો. બનાવની જાણ થતાં ઈન્ચાર્જ પીઆઈ એચ.વી.રાઠોડ સહિતની ટીમ ઘટના સ્થળે પહોંચી ગઈ હતી. વિઘાર્થીના મૃતદેહનો કબજો સંભાળીને પીએમ માટે મોકલી દીધો હતો. પોલીસે ઈજાગ્રસ્ત પિતા અશોકભાઈની ફરિયાદ પરથી અજાણ્યા વાહન ચાલક સામે ગુનો નોંધીને શોધખોળ આરંભી છે. આ દુ:ખદ ઘટનાથી પરિવારમાં તેમજ મોટા થાવરીયા ગામમાં ભારે શોકની લાગણી વ્યાપી ગઈ છે. તો બીજી બાજુ પોલીસે નાસી છૂટેલા વાહનચાલકની સઘન શોધખોળ હાથધ રી છે.

ટીબીને નાથવા નવતર પ્રયાસ:જામનગરના દરેડમાં ખાનગી ડોક્ટરોની ટીમ ટીબી રોગના લક્ષણો ધરાવતા દર્દીઓ માટે બનશે ઈનફોર્મર

જામનગર જિલ્લા આરોગ્ય વિભાગ દ્વારા દરેડ ઇન્ડસ્ટ્રીઝ વિસ્તારમાં મોટી સંખ્યામાં બહારના પ્રવાસી શ્રમિકો મજૂરી અર્થે આવતા હોવાથી આ સમુદાયમાં ટીબી કે અન્ય રોગોની જાગૃતિનો અભાવ અથવા રોગની ગંભીરતા વિશે ઓછું જ્ઞાન હોય છે. પરિણામે નાની તકલીફો માટે પણ તેઓ અલગ-અલગ જગ્યાએથી સારવાર લેતા હોય છે. ઘણીવાર ટીબીના લક્ષણો હોવા છતાં, જુદી-જુદી જગ્યાએથી સારવાર લેવાને કારણે રોગનું નિદાન મોડું થાય છે અથવા થતું જ નથી. નિદાનમાં વિલંબ થવાથી રોગ વણસી શકે છે, સાજા થવાનો દર ઘટી શકે છે, અને ક્યારેક દર્દીનું મૃત્યુ પણ થઈ શકે છે. આ ગંભીરતાને સમજીને, ટીબીના દર્દીનું વહેલું નિદાન અને તાત્કાલિક સારવાર શરૂ કરવી એ ખૂબ જરૂરી છે. ટીબીના વહેલા નિદાનના ઉદ્દેશ સાથે, દરેડ ઇન્ડસ્ટ્રીઝ વિસ્તારના 15 જેટલા ડોક્ટરોની તાત્કાલિક બેઠક બોલાવવામાં આવી હતી. આ ડોક્ટરોને ઈનફોર્મર તરીકે સક્રિય રીતે જોડીને એક મહત્ત્વપૂર્ણ જવાબદારી સોંપવામાં આવી છે. જો કોઈ પ્રાઇવેટ ડોક્ટર પાસે ટીબીના લક્ષણો ધરાવતો શંકાસ્પદ દર્દી આવે અને ડોક્ટરને ટીબી રોગનું અનુમાન થાય, તો તેઓ દર્દીને તુરંત નજીકના સરકારી આરોગ્ય કેન્દ્રમાં રીફર કરશે. આ ઉપરાંત રીફરલના કારણે ટીબી રોગનું વહેલું નિદાન શક્ય બનશે. પ્રોત્સાહન તરીકે જો રીફર કરેલ દર્દીને ટીબી પોઝીટીવ આવશે, તો ડોક્ટરને ઈનફોર્મર તરીકે રૂ.500 મળવાપાત્ર થશે. આ ભાગીદારીથી દરેડ વિસ્તારના લોકોને ટીબી રોગનું વિનામૂલ્યે નિદાન અને સંપૂર્ણ સારવાર સરળતાથી મળી રહેશે. સમગ્ર કાર્યક્રમનું આયોજન અને માર્ગદર્શન મુખ્ય જિલ્લા આરોગ્ય અધિકારી ડો. નુપુર પ્રસાદ અને ઇન્ચાર્જ જિલ્લા ક્ષય અધિકારી ડો. ધીરેન પીઠડીયાના નેતૃત્વ હેઠળ કરવામાં આવ્યું હતું. જિલ્લા પી.પી.એમ. કોર્ડીનેટર ચિરાગ પરમાર દ્વારા ડોક્ટરોને ટીબી રોગના સચોટ નિદાન, સારવારની પદ્ધતિઓ સમજાવી હતી.

હુમલો:ભાભીને ભગાડી જવા બાબતે યુવાન પર હુમલો

જામનગર તાલુકાના ધુડશીયા ગામમાં પરિણિતાને ભગાડી ગયાનો ખાર રાખીને યુવાન ઉપર મહિલા સહિત ત્રણ શખસોએ હુમલો કરીને પગ ભાંગી નાખ્યાની પોલીસમાં ફરિયાદ નોંધાઈ છે. ધુડસીયા ગામમાં રહેતા કમલેશ ચનાભાઈ રાઠોડ (ઉ.વ.28) નામનો યુવાન ગત તા.27ના ગામમાં બસ્ સ્ટેન્ડ પાસે હોય, ત્યારે આરોપીઓએ આવીને કહેલ કે, તુ કેમ મારા ભાભીને ભગાડી ગયો હતો, તેમ કહીને ઝગડો કરવા લાગ્યા હતા. આરોપી મહેન્દ્ર ભીખાભાઈ ખરા, સંદિપ ભીખાભાઈ ખરા, લક્ષ્મીબેન ભીખાભાઈ ખરાએ લાકડાના ધોકા વડે હુમલો કર્યો હતો. કમરથી નીચેના ભાગે તેમજ જમણા પગમા઼ આઠેક જેટલા ઘા મારીને શરીરે તેમજ ડાબા હાથના ભાગે તેમજ ડાબા પગમાં માર મારીને પગમાં ફેક્ચર સહિતની ઈજા પહોંચાડી હતી. જાનથી મારી નાંખવાની ધમકી આપી હતી. જે અંગેની યુવાને પોલીસમાં ફરિયાદ નોંધાવતા એએસઆઈ ડી.એ.રાઠોડએ તપાસ હાથ ધરી છે.

છેતરપિંડી:જામનગરના વેપારી સાથે અમદાવાદના 3 શખસે કરી રૂ. 59 લાખની છેતરપિંડી

જામનગર શહેરના ગોકુલનગરમાં બ્રાસની પેઢી ચલાવતા વેપારી પાસેથી અમદાવાદના ત્રણ શખસોએ રૂ.53 લાખ ઉપરાંતની કિંમતની 197 ટન (બ્રાસ એસ) માટી મંગાવીને રૂપિયા ન આપીને છેતરપિંડી આચર્યાની પોલીસમાં ફરિયાદ નોંધાઈ છે. પોલીસે અમદાવાદ સુધી તપાસ લંબાવીને આરોપીઓની ધરપકડ માટે શોધખોળ આરંભી છે. શહેરના ભાનુશાળી વાડમાં રહેતા અને ગોકુલનગર વિસ્તારમાં હની ઝીંક ટ્રેડિંગ નામની બ્રાસને લગતી પેઢી ચલાવતા ચિરાગભાઈ ભુપતભાઈ ફલીયા (ઉ.વ.36) નામના વેપારીની પેઢીમાં થોડા મહિનાઓ પહેલા અમદાવાદના ત્રણ વેપારીઓ (બ્રાસ એસ) માટી જોવા માટે આવ્યા હતા. તેમને માટી પસંદ પડી હોવાથી અમદાવાદ ગયા પછી રૂ.53,90,995ની કિંમતની 197 ટન જેટલો જથ્થો મંગાવ્યો હતો. જે પહોંચાડી દીધા બાદ એક માસમાં તેની રકમ ચુકવી આપવાનો વાયદો કરાયો હતો. પરંતુ સમય મર્યાદા પુરી થઈ જવા છતાં ત્રણેય વેપારીઓએ રકમ ચુકવી ન હતી. જેથી જામનગરના વેપારી ચિરાગભાઈ અમદાવાદની પેઢીમાં મળવા માટે ગયા હતા. તે દરમ્યાન આરોપીઓ હર્ષદકુમાર પટેલ, રવિ બાબુભાઈ સુતરીયા અને ધર્મેન્દ્ર હરિભાઈ ઠક્કરએ પૈસા આપવાનો ઈન્કાર કરી દીધો હતો, અને જાનથી મારી નાંખવાની ધમકી આપીને અહીં દાટી દેશું, તેમ કહેતા વેપારી બીકના કારણે પરત જામનગર આવી ગયા હતા. જે અંગેની સીટી સી ડિવિઝન પોલીસ સ્ટેશનમાં ફરિયાદ નોંધાવતા પોલીસે છેતરપિંડીની કલમ હેઠળ ગુનો નોંધ્યો છે. વધુ તપાસ વી.એ.પરમારે હાથ ધરી છે. જામનગરના બ્રાસપાર્ટના વેપારી સાથે લાખોની છેતરપિંડીના સમગ્ર મામલે પોલીસે તપાસનો ધમધમાટ હાથ ધર્યો છે.

ઉત્કૃષ્ટ પ્રદર્શન:જામનગરમાં ખેલ મહાકુંભ એથ્લેટિક્સ સ્પર્ધામાં શાળા નંબર 18 ચેમ્પિયન બની

જામનગરની સત્ય સાયન્સ સ્કૂલમાં ખેલ મહાકુંભ અંતર્ગત ઝોન કક્ષાની એથલેન્ટિક સ્પર્ધા યોજાઈ હતી. જેમાં જેમા શાળા નં-18 એ જામનગર ઝોન -5 ની બહેનોનીની અં-9 અને 11 વયજૂથમાં કુલ 14 ખેલાડીઓમાંથી 10 ખેલાડીઓએ વિજેતા નંબર મેળવી દબદબો જાળવી રાખ્યો હતો ખેલ મહાકુંભ અંતર્ગત એથલેન્ટિક સ્પર્ધા સત્યસાંઇ સ્કૂલ, જામનગર ખાતે ઝોન કક્ષાની સ્પર્ધા યોજાઈ ગઈ હતી જેમા શાળા નં-18 એ જામનગર ઝોન -5 ની બહેનોનીની અં-9 અને 11 વયજૂથમાં કુલ 14 ખેલાડીઓમાંથી 10 ખેલાડીઓએ વિજેતા નંબરમેળવી દબદબો જાળવી રાખ્યો હતો. જેમા અં-9 સ્ટેંન્ડીગ બ્રોડ જમ્પમાં ગોલ્ડી રાજભર પ્રથમ, કરિશ્માકુમારી દ્વિતીય, અને રાધિકા સોની તૃતીય નંબર મેળવ્યો હતો. અં-11 સ્ટેંન્ડીગ બ્રોડ જમ્પમાં વૃષ્ટી રોલા પ્રથમ , ટીકલબા જાડેજા દ્વિતીય, નંબર મેળવ્યો હતો. અં-9 ની 30 મી દોડ માં દીપાલી કંબોયા પ્રથમ , શ્રુતિ કુંવરિયા દ્વિતીય, અને ખુશ્બુ રાય તૃતીય નંબર અને અં-11 ની 50 મી દોડ માં વૃષ્ટી રોલા દ્વિતીય અને સોલંકી મિતલ તૃતીય નંબર મેળવ્યો હતો. કોચ તરીકે ગાયત્રીબા જાડેજા, સંદીપભાઈ રાઠોડ, મોતીબેન કારેથા અને ટીમ મેનેજર દિપક પાગડાએ માર્ગદર્શન આપ્યુ હતું. મુખ્ય શિક્ષક દીપક પાગડાએ આ સિધ્ધી શાળાના વિધાર્થીઓ અને શિક્ષકોની સખત મહેનત અને કર્તવ્ય નિષ્ઠાનુ સન્માન ગણાવ્યુ હતુ

વિપક્ષની માંગ:ઓવરબ્રિજનું નામ જામ રણજીતસિંહ રાખો, વિપક્ષોએ ગુલાબના ફુલો આપ્યા

જામનગર શહેરના સૌરાષ્ટ્રના સૌથી લાંબા ફલાય ઓવરબ્રિજનું નામ જામ રણજીતસિંહ રાખવા માટે આજે વિપક્ષોએ નવતર રીતે ગુલાબના ફુલો આપીને મ્યુ.તંત્રના પદાધિકારી પાસે માંગણી કરી છે. નવાનગર સ્ટેટએ જામનગરને તળાવની પાળ, ભુજીયો કોઠો જેવી અમુલ્ય ભેટ આપી છે, જેમણે ક્રિકેટના મહાન ખેલાડી અને નવાનગર (જામનગર)ના જામ સાહેબ તરીકે ઓળખવામાં આવે છે. જેમની ઓળખ જ ભારતીય ક્રિકેટના પિતામહ માનવામાં આવે છે. તેમની ઈંગ્લેન્ડની ક્રિકેટ ટીમ તરફથી આંતરરાષ્ટ્રીય ક્રિકેટ રમ્યા હતા. ભારતમાં રમાતી ક્રિકેટ ટુર્નામેન્ટ રણજી ટ્રોફીનું નામ તેમના માનમાં રાખવામાં આવ્યું છે અને જામનગરે હંમેશા ક્રિકેટ જગતને જામનગરમાંથી જામ રણજીતસિંહ પછી પણ વિનુ માંકડ, સલીમ દુરાની, કરશન ઘાવરી, અજય જાડેજા, રવિન્દ્ર જાડેજા જેવા મહાન ક્રિકેટરો જામનગરની ધરતી પણ જન્મ લીધો છે અને દેશમાં જામનગરનું નામ રોશન કર્યુ છે. સૌરાષ્ટ્રનો સૌથી મોટા ઓવર બ્રિજનું નામ જામ રણજીતસિંહ રાખવા માટે આજે શહેર કોંગ્રેસ પ્રમુખ દિગુભા જાડેજા, વિપક્ષી નેતા ધવલભાઈ નંદા તેમજ કોર્પોરેટરો અને કાર્યકરોએ અનોખી રીતે ગુલાબના ફુલો આપીને મ્યુ.તંત્રના પદાધિકારીઓને લેખિતમાં રજુઆત કરી છે.

અસામાજિક તત્વોમાં ફફડાટ‎:પોલીસ રાત્રે 137 ગુનેગારોને ચેક કરવા ઘરે પહોંચી

જામનગર શહેરમાં ગુનાહિત પ્રવૃતિઓને નાથવા માટે માથાભારે, હિસ્ટ્રીશીટર, બુટલેગરો, જાણીતા જુગારીઓ, મિલકત સંબંધી, શરીર સંબંધી ગુનાઓના આરોપીઓને ચેક કરવા સ્પેશ્યલ કોમ્બિંગ ડ્રાઈવ યોજવામાં આવી હતી. જેમાં ગુનાહિત 137 શખસોને તેમજ હોટલ, ધાબા, ઝુંપડપટ્ટી અને અવાવરૂ સ્થળોને પણ ચેક કરવામાં આવ્યા હતા. જામનગર જિલ્લા પોલીસ અધિક્ષક ડો.રવિ મોહન સૈનીની સુચનાથી સીટી ડીવાયએસપની જયવિરસિંહ ઝાલાના સુપરવિઝન હેઠળ એલસીબી, એસઓજી, સીટી એ, બી અને સી ડિવિઝનના મળીને કુલ 4 પીઆઈ, 9 પીએસઆઈ અને આશરે 90 પોલીસકર્મીઓની જુદી જુદી ટીમો દ્રારા આરોપીઓને તપાસવા માટેની બે દિવસની કોમ્બિંગ ડ્રાઈવ યોજવામાં આવી હતી. જેમાં તા.27ના શહેરના શંકરટેકરી, પાણાખાણ, ગોકુલનગર અને બાવરીવાસ વિસ્તારમા સ્પેશ્યલ કોમ્બીંગ ડ્રાઇવ યોજવામાં આવી હતી. જે દરમ્યાન પ્રોહીબીશન કેસ 18, મિલ્કત સબંધી ગુનાના એમ.સી.આર ઇસમો ચેક- 47 , માથાભારે ઇસમો ચેક -11, અસામાજીક ઇસમો ચેક- 9, ટપોરી ઇસમ ચેક-2, પ્રોહી બુટેલગર્સ/પ્રોહી ધંધાર્થી ચેક-38, જાણીતા જુગારી/ધંધાર્થી ચેક-12, અવાવરૂ જગ્યા તથા ઝુપડપટ્ટી ચેક-4, વાહન ચેક-157, હોટલ ધાબા/ધાર્મિક સ્થળ ચેક-21 કરવામાં આવી હતી. તેમજ તા. 28 ના રોજ દારૂ ની પ્રવૃત્તિ ના બે કેસ તેમજ મિલકત સંબંધી ગુન્હા આચરતા 11 એમસીઆરને ચેક કરવામાં આવ્યા હતા. દારૂની પ્રવૃત્તિ સાથે સંકળાયેલા સાત વ્યક્તિઓને ચેક કરાયા હતા. જાણીતા જુગારી એવા ચાર ધંધાર્થીને ચેક કરવામાં આવ્યા હતા. ઝૂંપડપટ્ટી તેમજ. અવાવરૂ એવી 7 જેટલી જગ્યાઓ પર ચેકિંગ કરવામાં આવ્યું હતું. જયારે કુલ 42 વાહનો ચેક કરવામાં આવ્યા હતા. ઉપરાંત 3 હોટલ ધાબા અને ધાર્મિક સ્થળનું પણ ચેકિંગ કરાયું હતું.

અકસ્માત સર્જાયો:સોયલ ટોલનાકા પાસે બે ST બસ વચ્ચે અકસ્માત, 8ને ઈજા

ધ્રોલના સોયલ ટોલનાકા પાસે શનિવારે સાંજે પુરપાટ આવતી એસટી બસમાં બ્રેક ન લાગતા આગળ જતી એસ.ટી.બસને ઠોકર લાગતા અકસ્માત સર્જાયો હતો. જેમાં મુસાફરોને નાની-મોટી ઈજા પહોંચતા બુમો પાડવા લાગતા અન્ય વાહનોમાંથી લોકો મદદ માટે દોડી આવ્યા હતા. તો આઠ જેટલા મુસાફરોને ચહેરાના ભાગે ઈજા પહોંચી હતી. તો એક મહિલા મુસાફરનું બી.પી. લો થઈ જતાં 108 એમ્બ્યુલન્સમાં સારવાર માટે હોસ્પિટલમાં ખસેડવામાં આવ્યા હતા. તો અમુક મુસાફરો પ્રાઈવેટ વાહનોમાં સારવાર માટે હોસ્પિટલમાં પહોંચ્યા હતા. બનાવની જાણ થતાં પીઆઈ એચ.વી.રાઠોડ સહિતનો પોલીસ સ્ટાફ તેમજ એસ.ડી.એમ. ઘટના સ્થળે પહોંચી ગયા હતા.

ઈડીની ટીમના દરોડા:જામનગરમાં ઈડીની ટીમનું મધ્યરાત્રિ સુધી સર્ચ ઓપરેશન, બિલ્ડર ભૂગર્ભમાં

જામનગર શહેરમાં બિલ્ડરના બંગેલે ઈડીના દરોડા મોડી રાત સુધી ચાલ્યા હતા. જેમાં હવાલા કૌભાંડ અને ક્રિપ્ટો કરન્સીના મુદે તપાસ થઈ હોવાનું સામે આવી રહ્યું છે. તો બિલ્ડર ભુગર્ભમાં ઉતરી ગયા હોવાથી ઈડીની ટીમની મુંઝવણ વધી છે. શહેરના પોશ વિસ્તાર જયંત સોસાયટીમાં બિલ્ડર જીતેન્દ્ર ગોરીયા ઉર્ફે લાલાના બંગલા પર શુક્રવારે વહેલી સવારના પાંચ વાગ્યામાં એન્ફોર્સમેન્ટ ડીરેક્ટોરેટ એટલે કે ઈડીની ટીમે દરોડો પાડતા ચકચાર મચી જવા પામી હતી. લોકલ પોલીસને બંદોબસ્તમાં સાથે રાખીને સર્ચ ઓપરેશન હાથ ધરવામાં આવ્યું હતું. પરંતુ બિલ્ડર હાજર ન મળતા તેમના પરિવારજનોની ઘનિષ્ઠ પુછપરછ કરવામાં આવી હતી. તો બિલ્ડર લાલા ગોરીયા અંગેની પણ પુછપરછ કરવામાં આવતા પરિવારજનોએ ખબર ન હોવાનું રટણ કર્યુ હતું. ઈડીની ટીમે મધ્યરાત્રિ સુધી તપાસ કરી હતી. બિલ્ડર ભુગર્ભમાં ઉતરી ગયા હોય તેમ મળી આવતા ટીમની મુંઝવણ પણ વધી છે. જેથી ટીમ દ્વારા અમુક સાહિત્ય કબજે કરીને તપાસ કરવામાં આવી રહી છે. આ તપાસમાં હવાલા કૌભાંડ અને ક્રિપ્ટો કરન્સીના મુદે તપાસ થઈ હોવાનું સામે આવે છે. આ અંગે આગામી દિવસોમાં ઈડીની ટીમ સત્તાવાર જાહેર કરે તેમ મનાઈ રહ્યું છે. ઈડીની ટીમ અને બિલ્ડરના સગાઓ વચ્ચે રકઝકથી પોલીસ દોડી બિલ્ડર જીતેન્દ્ર ઉર્ફે લાલા ગોરીયાના બંગલે ઈડીના દરોડા પડતા જ તેમના સગા-સંબંધીઓ આવી પહોંચ્યા હતા. પરંતુ તેઓને અંદર ન જવા દેતા ઈડીના અધિકારીઓ સાથે રકઝક થવા લાગી હતી. જે અંગેની પોલીસને જાણ કરી દેવામાં આવતા પોલીસ અધિકારી સહિતની ટીમ પહોંચી ગઈ હતી. મામલો થાળે પાડ્યો હતો. પરંતુ તપાસ દરમ્યાન બિલ્ડરના સગા-સંબંધીઓ બંગલાની બહાર જ બેઠા રહ્યા હતા. મધ્યરાત્રિના તપાસ પુર્ણ થયા બાદ જ સગા-સંબંધીઓને બંગલાની અંદર જવા દેવામાં આવ્યા હતા.

સન્ડે ફોટો સ્ટોરી:392 વર્ષ પુર્વે સ્થાપિત દેવભૂમિનું સૌથી મોટું ભાટીયા ગામ

દેવભૂમિ જિલ્લાનુ સૌથી મોટુ ગણાતુ ભાટીયા ગામની લગભગ 392 વર્ષ પુર્વે સ્થાપના થયાનુ મનાય છે.ખાસ કરી ગામની મધ્યમાં સ્થિત કેશરીયા તળાવ ભાટીયા ગામને આગવી ઓળખ આપે છે. કાળક્રમે વિકસતુ જતા ભાટીયા ગામના કેશરીયા તળાવના મધ્યમાં સ્થિત સતિઆઇ માતાજીના મંદિર સહિત સમગ્ર ગામનો અવકાશી નજારો નયનરમ્ય બની રહયો છે. ચોતરફ પાણી વચ્ચે જતો મંદિર માર્ગ પર રમણીય સ્થળ તરીકે વિકસી રહયો છે.અવકાશી નજારામાં પ્રાચિન સાથે અર્વાચિન સ્થાપ્તયોનો અદભૂત સંગમ જોવા મળે છે.

રવિ પાકનું વાવેતર:જામનગર જિલ્લામાં 89 હજાર, દેવભૂમિમાં 1.60 લાખ હેકટરમાં રવિ પાકનું વાવેતર થયું

હાલારમાં ગત ચોમાસા દરમિયાન માવઠાના માર વચ્ચે જગતનો તાત પિસાઇ રહયો છે ત્યારે જામનગર અને દેવભૂમિ દ્વારકા જિલ્લાના મોટા ભાગના વિસ્તારોમાં ઠંડીના પ્રારંભ સાથે ગત ઓકટોબરના અંતથી ઘીરે ધીરે ખેડૂતો દ્વારા રવિ પાકનુ વાવતેર શરૂ કરાયુ હતુ. જેમાં નવેમ્બર માસના અંત સુધીમાં જામનગર જિલ્લામાં 89,313 હેકટર તથા દેવભૂમિ દ્વારકા જિલ્લામાં 1.60 લાખ હેકટરમાં ખેડૂતો દ્વારા રવિ પાકનુ વાવેતર પૂર્ણ થયુ છે.જોકે,હજુ આગામી ડીસેમ્બર માસાંત સુધી રવિ પાકનુ ખેડુતો દ્વારા પાક પ્રમાણે વાવેતર થશે. જામનગર જિલ્લામાં 28મી નવેમ્બર સુધીમાં ખેડૂતો દ્વારા 89,313 હેકટરમાં જુદા જુદા પાકોનુ વાવેતર થયુ છે.જેમાં સૌથી વધુ ચણાનુ 49,393 હેકટર, બીજા ક્રમે ઘંઉનુ 18,036 હેકટર, રાઇનુ 598 હેકટર, જીરૂનુ 7009 હેકટર, ધાણાનુ 6,972 હેકટર, લણસનુ 465 હેકટર, ડુંગળીનુ 652 હેકટર તથા શાકભાજીનુ 1828 હેકટરમાં વાવેતર થયુ હોવાનુ સુત્રોએ જણાવ્યુ છે. જયારે દેવભૂમિ દ્વારકા જિલ્લામાં ગત ગુરૂવાર સુધીમાં કુલ 1.60 લાખ હેકટરમાં રવિ પાકનુ વાવેતર પૂર્ણ થયુ છે.જેમાં સૌથી વધુ 63.6 હેકટરમાં ચણા, જીરૂનુ 48 હજાર હેકટર, ધાણાનુ 15.8 હજાર હેકટરમાં અને ઘંઉનુ 13.5 હજાર હેકટરમાં વાવેતર થયુ હોવાનુ સુત્રોએ જણાવ્યુ હતુ. ભાસ્કર એક્સપર્ટઘંઉ-ચણાને નિયત પિયત, જીરૂ‎ધાણામાં દવા છંટકાવ કરવો...‎હાલ રવિ પાકો જેવાં કે ઘઉં, ચણા, ધાણા, જીરૂ વાવેતર લગભગ પૂર્ણ થવામાં છે. ઘઉંના પાકને મુકુટમૂળ, ફૂટ, ગાભા, ફૂલ, દુધિયા દાણા અવસ્થાએ અને ચણાના પાકને ફૂલ, પોપટા અવસ્થાએ અવશ્ય પિયત આપવું. તેમજ ઘઉંના પાકને નાઈટ્રોજન ખાતરનો પૂર્તિ ડોઝ 21 દિવસે મુકુટ મૂળ અવસ્થાએ એક વીઘે 21 કી.ગ્રા. યુરિયા દ્વારા આપવો. ચણાના પાકમાં લીલી અને લશ્કરી ઇયળના વૈયા, કાબર જેવાં પક્ષીઓ દ્વારા કુદરતી નિયંત્રણ માટે ખેતરમાં પક્ષીઓ બેસી શકે તેવા બેલખડા ખોડવા. જીરૂ અને ધાણાના પાકમાં કાળી ચરમી અને ભૂકીછારાના રોગનો ઉપદ્રવ થાય નહિ તે માટે નિયંત્રિત પિયત આપવું અને 15 દિવસે મેંકોઝેબ 40 ગ્રામ અને હેકઝકોનાઝોલ 25 મિલી દવા પ્રતિ પંપ નાખી વારાફરતી છંટકાવ કરવો. > વી.ડી. વોરા, મદદનીશ સંશોધન વૈજ્ઞાનિક, જુ.કુ.યુ.-તરઘડીયા ​​​​​​​માવઠાથી મગફળી મોડી, વાવેતર ધીમુ..‎જામનગર સહિત હાલારભરમાં ચાલુ વર્ષે કમોસમી વરસાદના કારણે અમુક સ્થળોએ ચોમાસુ મગફળીનો પાક પ્રમાણમાં થોડો મોડો થયો હતો.જેના કારણે જમીન સુયોગ્ય ન થતા જરૂરી ખેતીકાર્ય બાદ ખેડૂતો દ્વારા અમુક સ્થળોએ લગભગ પખવાડીયુ મોડુ શિયાળુ પાકનુ વાવેતર આરંભ કર્યુ હતુ. જેના પગલે જામનગર જિલ્લાના અડધાથી વધુ ખેતીલાયક જમીનમાં હજુ સુધી દર વર્ષની સરેરાશની સાપેક્ષમાં ઓછુ વાવેતર થયુ હોવાનુ બહાર આવ્યુ છે. જોકે, આગામી માસાંત સુધીમાં મોટા ભાગના ખેડૂતો શિયાળુ પાકનુ વાવેતર મહદઅંશે પરીપૂર્ણ કરી દેશે.અત્રે ઉલ્લેખનીય છેકે, જામનગર જિલ્લામાં ચોમાસુ પાકમાં કપાસનુ પણ ઘીંગુ (લગભગ 89 હજાર હેકટરમાં) વાવતેર થયુ હતુ. જે છ માસ સુધી પાક ઉભો રહેતો હોવાથી તેમાં શિયાળુ પાકનુ વાવેતર શકય ન બની શકે.

લૂંટ કરનાર ઝડપાયો:વૃધ્ધાનું પાકીટ અને ચાંદીના ક્ડાની લૂંટ ચલાવનાર આરોપીને જેલ હવાલે કરાયો

પોરબંદરના નવા કુંભારવાડામાં રહેતા એક વૃધ્ધાને શખ્સે હાજીસાહેબ તમને કરિયાણું લઈ આપશે તેમ કહી વૃધ્ધાને જૂની કોર્ટ કમ્પાઉન્ડ પાસે લઈ જઈ, તમે ગાંજો વેંચો છો તેમ કહી વૃધ્ધાનો બટવો અને હાથમાં પહેરેલ ચાંદીના કડા ઝૂંટવી લીધા અંગેની ફરિયાદ નોંધાતા પોલીસે આરોપીને ઝડપી લઇ કાર્યવાહી કરી જેલ હવાલે કર્યો છે. પોરબંદરના નવા કુંભારવાડા વિસ્તારમાં રહેતો મહમદ ઉર્ફે મામદો નાશીર શાહમદાર નામના શખ્સે નવા કુંભારવાડા ખાડી કાંઠે રહેતા અમીનાબેન હુસૈનભાઈ રાનીયા નામના 90 વર્ષના વૃધ્ધાને કહ્યું હતુંકે, હાજીસાહેબ તમને કરિયાણું લઈ આપશે, હાલો તમને તેની પાસે લઈ જાવ તેમ કહી વૃધ્ધાને જૂની કોર્ટ કમ્પાઉન્ડ પાસે લઈ ગયો હતો અને ત્યાં ઓટલા પર બેસાડીને કહ્યું હતુંકે, તમારી પાસે ગાંજો છે, તમે ગાંજો વેંચો છો તેમ કહી શખ્સે વૃધ્ધાનો બટવો ઝૂંટી તેમાં રહેલ રૂ. 1500 તથા વૃધ્ધાએ બંને હાથમાં પહેરેલ ચાંદીના રૂ.1500ના કડા હાથ માંથી કાઢી ઝૂંટવી લીધા હતા. આ અંગે વૃધ્ધાએ ફરિયાદ નોંધાવતા પોલીસે શખ્સ સામે ગુન્હો દાખલ કરી, કીર્તિમંદિર પોલીસે આરોપીને ઝડપી લઇ કાર્યવાહી કરી આરોપીને કોર્ટમાં રજૂ કરી જેલ હવાલે કર્યો છે.

પાલિકાની ચૂંટણી જાન્યુઆરીના બદલે ફેબુ્રઆરીના પ્રથમ અઠવાડિયામાં યોજાવાના સંકેતો

ધોરણ 12 અને ધોરણ 10 ની પરીક્ષાઓ શરૃ થાય તે પહેલા .....

5500 ખેડૂતોને 11.38 કરોડ ચૂકવાયા:પોરબંદરના દર 10 ખેડૂતમાંથી 1 ખેડૂતને પાક નુકસાનની સહાય ચૂકવાઈ

પોરબંદર જિલ્લામાં પાક સહાય હેઠળ અંદાજે 5500 ખેડૂતોને 11.38 કરોડની રકમ ચુકવવામાં આવી છે.જિલ્લામાં દર 10 ખેડૂત દીઠ એક ખેડૂતને હાલ વળતરની રકમ ચુકવવામાં આવી છે. જિલ્લામાં પાક ઉપાડવા ટાણે જ થયેલ માવઠાને લીધે પોરબંદરના 80 હજાર હેકટરમાં વાવેલ મગફળીના પાકને જંગી નુકશાન થયું હોવાના અંદાજ સામે આપેલ સહાય માસ્કરી સમાન હોવાથી ખેડૂતોમાં ભારે રોષ જોવા મળી રહ્યો છે. પોરબંદર જિલ્લામાં હાલ પણ પાક નુક્શાન અંગે ફોર્મ સબમિટ થઈ રહ્યા છે ત્યારે પોરબંદર જિલ્લા ખેતીવાડી વિભાગ દ્વારા પાક નુકસાનની સહાયની ચુકવણી પણ શરૂ કરવામાં આવી છે. જિલ્લામાં હાલ અંદાજે 5500 ખેડૂતને રૂપિયા 11.38 કરોડની રકમ ખેડૂતને પોતાના બેન્ક ખાતા મારફતે ચુકવવામાં આવી છે.ત્યારે હાલ જિલ્લામાં 54000 હજાર ફોર્મ પાક નુકશાન સહાય મેળવવા માટે સબમિટ થયા છે.જેથી દર 10 ખેડૂત દીઠ 1 ખેડૂતને હાલ સહાય ચુકવવામાં આવી છે. પાક સહાય ફોર્મ સબમિટ કરાવવા સમયમાં વધારો થતાં ખેડૂતને ફાયદો પોરબંદર જિલ્લામાં ખેતીવાડી વિભાગ દ્વારા 15 નવેમ્બરથી 15 દિવસ માટે પાક નુકશાન સહાય ફોર્મ ભરવાની કામગીરી કરવાની હતી જે કામગીરીમાં હાલ પણ અનેક ખેડૂતો બાકી હતા ત્યારે સમયમર્યાદા 5 ડિસેમ્બર સુધી કરવામાં આવતા ખેડૂતોને ફાયદો થશે અને ફોર્મ સબમીટ કરવામાં બાકી રહેલા ખેડૂતોને પણ લાભ મળશે.

કમકમાટીભર્યો અકસ્માત:આશાપુરા ચોક પાસે ટ્રક હડફેટે વૃધ્ધનું મોત નિપજ્યું

પોરબંદરના આશાપુરા ચોક પાસે એક ટ્રક ચાલકે બેદરકારી રીતે ટ્રક ચલાવી વૃધ્ધને હડફેટે લેતા વૃધ્ધને ગંભીર ઇજાઓ પહોંચતા વૃધ્ધનું મોત થયું હતું. આ બનાવમાં પોલીસે ટ્રક ચાલક સામે ગુન્હો નોંધી આગળની કાર્યવાહી હાથ ધરી છે. પોરબંદરના જીઆઈડીસી રોડ પર આવેલ આશાપુરા ચોક રમણ પાર્કમાં રહેતા અમૃતલાલ કાછેલા નામના વૃધ્ધ ગઈકાલે તા. 28/11ના રોજ સાંજે 7:45 કલાકે આશાપુરા ચોક પાસેથી પસાર થયા હતા તે દરમ્યાન GJ 25 T 5090 નંબરના ટ્રક ચાલકે પોતાનો ટ્રક જાહેર રસ્તા પર પૂર ઝડપે માનવ જિંદગી જોખમાઈ તે રીતે ચલાવી અમૃતલાલ કાછેલા નામના વૃધ્ધને હડફેટે લેતા વૃધ્ધને માથાના ભાગે અને શરીરે વિવિધ ઇજાઓ પહોચતા આ વૃધ્ધનું મોત નિપજ્યું હતું. વૃધ્ધના મોતથી તેમના પરિવારજનો શોકમગ્ન બન્યા છે. વૃધ્ધના પુત્ર ઇલેશે ફરિયાદ નોંધાવતા પોલીસે ટ્રક ચાલક સામે ગુન્હો નોંધી આગળની કાર્યવાહી ઉદ્યોગનગર પોલીસ ચલાવી રહી છે. ભાસ્કર ઇનસાઈડવાહન હડફેટે મોતનું પ્રમાણવધ્યું પોરબંદરમાં અવારનવાર વાહન હડફેટે વ્યક્તિઓના મોત થાય છે અને ગંભીર ઇજાઓ પણ પહોંચે છે. માતેલા સાંઢની માફક વાહન ચાલકો પોતાનું વાહન ચલાવી નિર્દોષ વ્યક્તિનો ભોગ લે છે. તાજેતરમાં જ બસ હડફેટે આધેડનું મોત થયું હતું. પોલીસે આવા અકસ્માતો અટકાવવા કડક કાર્યવાહી કરવી જોઈએ.

વ્યાજખોર પોલીસના સકંજામાં:પોરબંદરનો વ્યાજખોર શખ્સ પાસાના પાંજરે પુરાયો

પોરબંદર જિલ્લામાં વ્યાજખોરી કરી પઠાણી ઉઘરાણી કરતા શખ્સને પાસા હેઠળ અટકાયત કરી વડોદરા જેલ ખાતે ધકેલી દેવામાં આવ્યો છે. પોરબંદર પોલીસ અધિક્ષક ભગીરથસિંહ જાડેજા દ્વારા પોરબંદર જિલ્લામાંથી વ્યાજખોરીના દુષણને ડામવા આરોપીઓ વિરૂધ્ધમાં પાસા કાયદા હેઠળના અટકાયતી પગલા લેવા સુચના કરેલ હોય. જે અનુસંધાને નાયબ પોલીસ અધિક્ષક સુરજીત મહેડુના માર્ગદર્શન હેઠળ બગવદર પોલીસ મથકે નોંધાયેલ ગુજરાત નાણા ધીરધાર કરનાર બાબત અધિનીયમ મુજબના ગુન્હામાં સંડોવાયેલ પોરબંદરના ભારતીય વિદ્યાલય પાછળ, જનતા સોસાયટીમાં રહેતો આરોપી અર્જુન ઉર્ફે બુધો જેઠા મકવાણા વિરૂધ્ધમાં પીએસઆઈ એ.એસ.બારાએ પાસા દરખાસ્ત તૈયાર કરી હતી પોલીસ અધિક્ષક મારફત પોરબંદર જિલ્લા મેજીસ્ટ્રેટ તરફ મોકલતા પોરબંદર જિલ્લા મેજીસ્ટ્રેટ દ્વારા આ આરોપીને પાસા હેઠળ વડોદરા જેલમાં અટકાયતમાં રહેવા પાસા વોરન્ટ ઇસ્યુ કરતા એલસીબી પીઆઈ આર.કે.કાંબરીયાએ આરોપીની પાસા વોરંટની બજવણી કરી, પાસા હેઠળ અટકાયત કરી વડોદરા જેલ ખાતે મોકલી દેવામાં આવ્યો છે.

ખેડૂતો માટે જાગૃતિ સેમિનાર યોજાયો‎:ચણા તેમજ અન્ય કૃષિ જણસ પર જીઆઈ ટેગ લગાવવાથી ખેડૂતોને ફાયદો થશે

પોરબંદર જિલ્લાના ઘેડ વિસ્તારના ખેડૂતોને જીઆઈ ટેગ વિષે માહિતગાર કરવા માટે EDII, અમદાવાદ તથા NABARDનાં સંયુક્ત આયોજન હેઠળ માધવપુર ખાતે જાગૃતિ સેમિનાર યોજાયો હતો. સેમિનારમાં ઘેડ વિસ્તારમાં ઉગતા ચણા તેમજ અન્ય કૃષિ ઉત્પન્નને જીઆઈ ટેગ મળવાથી ખેડૂતોને થતા ફાયદા વિશે વિગતવાર માર્ગદર્શન આપવામાં આવ્યું હતું. આ કાર્યક્રમમાં જીઆઈ રીજનલ સેન્ટર, ગાંધીનગરના પ્રતિનિધિ ઇન્દ્રવદન ચાવડા અને NABARD પોરબંદરના જિલ્લા વિકાસ વ્યવસ્થાપક (DDM) શીતલબેન શ્રીવાસ્તવ ઉપસ્થિત રહ્યા હતા. બંનેએ જીઆઈ નોંધણી પ્રક્રિયા, બ્રાન્ડિંગ, બજારીકરણ તથા ઉત્પાદનને વૈશ્વિક ઓળખ અપાવવાના મુદ્દાઓ પર ખેડૂતોને માર્ગદર્શન આપ્યું હતું. ચણાને ટેગ પ્રાપ્ત થશે તો ખેડૂતોને ફાયદો થશે‎આગામી સમયમાં ઘેડ ચણાને જીઆઈ ટેગ પ્રાપ્ત થશે તો તેને વિશ્વસ્તરીય ઓળખ મળશે, ખેડૂતોને વધુ સારો બજારભાવ મળશે તથા પોરબંદર જિલ્લાને નવી એવી વિશિષ્ટ ઓળખ મળશે. ખેડૂતોએ જીઆઈ ટેગ પ્રક્રિયા તેમજ સંસ્થાકીય સહાય અંગે પૂછેલ પ્રશ્નોના નિરાકરણ સાથે કાર્યક્રમ સફળતાપૂર્વક પૂર્ણ થયો હતો.

317639 પાત્રોમાં પોરાનાશક દવાનો છંટકાવ:રોગચાળાને કંટ્રોલ કરવા 6 ટીમ દ્વારા પોરાનાશક કામગીરી શરૂ

પોરબંદર જિલ્લામાં વેક્ટર કંટ્રોલની 6 ટીમના 30નો સ્ટાફ ઘરે ઘરે સર્વે કરી પોરા નાશક કામગીરી કરી રહ્યા છે જેમાં અત્યાર સુધીમાં 149060 ઘરનો સર્વે કરતા 18974 ઘરના પાત્રો માંથી પોરા મળ્યા હતા. કુલ 317639 પાત્રોમાં પોરાનાશક દવાનો છંટકાવ કર્યો હોવાનો આરોગ્ય વિભાગે દાવો કર્યો છે. પોરાનાશક કામગીરી માટે 6 ટીમ એટલે કે 30નો સ્ટાફ આવ્યો છે. પોરબંદર જિલ્લા આરોગ્ય અધિકારી ડી.બી. મહેતાની સૂચના મુજબ જિલ્લા મેલેરિયા અધિકારી ડો.એન.એન. બામણીયાના માર્ગદર્શન હેઠળ અને તાલુકા હેલ્થ ઓફિસરની દેખરેખ હેઠળ વેક્ટર કંટ્રોલની ટીમ કામગીરી કરી રહી છે. આ 6 ટીમમાં પોરબંદરમાં 4 અર્બન વિસ્તાર તથા રાણાવાવ અને કુતિયાણા અર્બન વિસ્તારમાં ટીમ કામ કરે છે ત્યારે જૂન થી અત્યાર સુધીમાં જિલ્લામાં આ ટીમો દ્વારા એક જ વિસ્તારમાં અને જરૂર પડે ત્યારે ચકાસણી કરેલ ઘરોમાં 2 થી 3 વખત ચકાસણી કરવા જાય છે. અત્યાર સુધીમાં આ ટીમો દ્વારા 149060 ઘર આવરી લેવાયા છે અને 18974 પોઝિટિવ એટલે કે ઘરોના પાત્રો માં પોરા મળ્યા છે, જ્યારે 331311 પાત્રો તપાસ્યા હતા, જેમાંથી 24578 પોઝિટિવ પાત્રો મળ્યા હતા. 3,17,639 પાત્રોમાં પોરાનાશક દવા નાખવામાં આવી છે. ઘરની બહાર શેરી વિસ્તારમાં 39777 પાત્રો તપાસ્યા છે. શેરી અને વિવિધ વિસ્તારમાં આવેલ 11116 ખાબોચિયામાં બળેલ ઓઈલનો છંટકાવ કરવામાં આવ્યો હતો. મેલેરિયા અને ડેન્ગ્યુના કેટલા કેસ નોંધાયા પોરબંદર જિલ્લામાં ગત માસે રોગચાળો વકર્યો હતો અને મેલેરિયા તથા ડેન્ગ્યુના લક્ષણો ધરાવતા દર્દીઓની સંખ્યામાં વધારો થયો હતો. ગત ઓકટોબર માસમાં મેલેરિયા પોઝીટીવના 8 કેસ તથા ડેન્ગ્યુના 3 કેસ નોંધાયા હતા જ્યારે તા. 7/11 થી તા.28/11 સુધીમાં મેલેરિયાનો 5 અને ડેન્ગ્યૂનો 2 પોઝિટિવ કેસ નોંધાયો હતો. જાન્યુઆરી થી અત્યાર સુધીમાં મેલેરિયાના 48 અને ડેન્ગ્યુના 17 પોઝિટિવ કેસ નોંધાયા છે. પાણીના પાત્રો નિયમિત સાફ કરવા જોઈએ‎લોકોએ પાણીના પાત્રો નિયમિત રીતે સાફ કરવા જોઈએ. અગાસી‎પરના પાણીના પાત્રો, ઘર બહાર ઓટલા પરના ખાબોચિયા સહિતના‎પાણીના પાત્રોમાં દિવસો સુધી પાણી રાખી રાખવું જોઈએ નહીં. આવા‎પાણીમાં મચ્છરો થવાને કારણે મચ્છરજન્ય રોગચાળો ફેલાય છે, જેથી‎પાણીના પાત્રોની નિયમિત સફાઈ કરવી જોઈએ.‎

રૂ. 35 લાખ રિફંડ ધંધાર્થીના ખાતામાં જમા કરાવ્યું:મનપાએ વળતર રૂપે દરેક ધંધાર્થીને ભાડામાં 20 ટકા રિફંડ આપ્યું

પોરબંદરના જન્માષ્ટમીના લોકમેળા દરમ્યાન અનેક ધંધાર્થીઓએ ચકડોળ સહિતના સ્ટોલ રાખ્યા હતા અને મનપાને ભાડું તથા જીએસટી રકમ ચૂકવી હતી, લોકમેળા દરમ્યાન વરસાદ ખાબક્યો હતો જેથી સ્ટોલ ધારકોએ રિફંડની માંગ કરતા મનપા દ્વારા 20 ટકા રિફંડ આપવામાં આવ્યું છે. પોરબંદરનો જન્માષ્ટમીનો લોકમેળો પ્રથમ વખત મનપા હસ્તક થયો હતો. આ વખતે 5 દિવસનો મેળો જાહેર કર્યો હતો. મેળામાં ચકડોળ, ખાણીપીણી, રમકડા સહિતના સ્ટોલની હરરાજી કરવામાં આવી હતી અને ચકડોળ તથા વિવિધ સ્ટોલ ધારકોએ મેળામાં ચકડોળ સહિતના સ્ટોલ ઉભા કર્યા હતા પરંતુ આ વખતે પણ મેળા દરમ્યાન વરસાદ ખાબક્યો હતો. મેળામાં 1 દિવસ વધાર્યો હતો પરંતુ વરસાદના કારણે તેનો લાભ ધારકોને મળ્યો ન હતો જેથી તમામ ધારકોએ મનપા કમિશનર પાસે રિફંડ આપવાની માંગ સાથે રજૂઆત કરી હતી જેને પગલે તમામ ધારકોને 20 ટકા રિફંડ મંજૂર કરી હાલ ધારકોના ખાતામાં જમા કરવામાં આવી રહ્યા છે. અંદાજે 35 લાખ જેટલું રિફંડ ધંધાર્થીના ખાતામાં જમા કરવામા આવ્યું છે.

ગેરકાયદેસર ફિશીંગ કરતા 3 શખ્સ સામે ગુન્હો નોંધાયો:સમુદ્રમાં એલઇડી લાઇટ ચાલુ રાખી ગેરકાયદેસર ફિશીંગ કરતી 2 બોટ સામે મરીન પોલીસની કાર્યવાહી

સમુદ્રમાં લાઇન ફિશીંગ, લાઈટ ફિશીંગ, ઘેરા ફિશીંગ કરવા પર પ્રતિબંધ છે ત્યારે સમુદ્રમાં લાઈટ ફિશીંગ કરતી 2 બોટ સામે હાર્બર મરીન પોલીસે કાર્યવાહી કરી 3 શખ્સ સામે ગુન્હો નોંધ્યો છે. પોરબંદર જિલ્લા પોલીસ અધિક્ષક ભગીરથસિંહ જાડેજાની સુચના હેઠળ ગુજરાત રાજયના કોસ્ટલ વિસ્તારમાં ગુજરાત મત્સ્યદ્યોગ અધિનિયમના કાયદાનો ભંગ કરી અનઅધિકૃત રીતે જેમ કે, ટોન વગર, રજીસ્ટ્રેશન વગર, ટોકન સમય મર્યાદાનો ભંગ તથા ગેરકાયદેસર પધ્ધતીથી લાઇન ફીશીંગ, ઘેરા ફીશીંગ, લાઇટ ફીશીંગ થી ગેરકાયદેસર રીતે માચ્છીમારી કરતા શખ્સ વિરૂધ્ધ કાયદેસરની કાર્યવાહી કરવા કોસ્ટલ એરીયામાં થતી ગેરકાયદેસર પ્રવૃતીને રોકવા તેમજ કોસ્ટલ સીક્યુરીટી સબબ સરકારી બોટ દ્વારા સખત દરીયાઇ પેટ્રોલીંગ કરી બોટો ચેકીંગ કરવા તથા હાલના સંજોગોને ધ્યાનમાં લઇ દરીયાઇ સુરક્ષા માટે પોરબંદર જીલ્લાના દરીયાઇ વિસ્તારમાં ફીશીરીઝ એકટ હેઠળ ગુન્હા નોંધવા તેમજ સખત અને અસરકારક બોટ ચેકીંગ કરવા ઝુંબેશ રાખવામાં આવેલ. જેથી પોરબંદર ગ્રામ્ય વિભાગના નાયબ પોલીસ અધિક્ષક સુરજીત મહેડુના માર્ગદર્શન હેઠળ હાર્બર મરીન પોલીસ સ્ટેશનના પીઆઈ એસ.ડી. સાળુંકે તથા પોલીસ સ્ટાફ બોટ મારફતે દરીયાઇ પેટ્રોલીંગ દરમ્યાન દીદાર 1 બોટ પીલાણુ IND GJ 37 MO 3309 અને ગુલસને ગરીબ નવાઝ નામના IND GJ 37 MO 2239 પીલાણામાં અનઅધિકૃત રીતે ગેરકાયદેસર રીતે લાઇટ ફીશીંગ કરતા મળી આવતા માંગરોળના જુલ્ફીકાર ઈબ્રાહીમ પટેલિયા અને મોહમદ હુસેન પટેલીયા તથા કાસમ હુસેન સંધીભટ્ટી વિરૂધ્ધ ગુનો નોંધ્યો હતો.

ભાસ્કર એક્સક્લૂઝિવ:પોરબંદર શહેરમાં ઠેરઠેર જાહેરમાં કચરાની હોળી‎

જાહેર જગ્યા પર કચરો બાળવા પર 2016થી પ્રતિબંધ છે, આમછતાં પોરબંદરમાં વિવિધ વિસ્તારોમાં જાહેરમાં કચરાના ઢગલા પર કચરો સળગાવવામાં આવે છે. કેટલાક સ્થળે તો લોખંડની કચરા પેટીમાં જ આગ લગાવી કચરો સળગાવવામાં આવે છે અને ધુમાડા ઊઠે છે. શહેરોમાં વધતા ઘનકચરાનું સૌથી ખતરનાક પરિણામ છે. અયોગ્ય રીતે કચરો બાળવો, કાગળ, પ્લાસ્ટિક, રબર, કપડાં, જૈવિક કચરા વગેરેને ખૂલ્લી જગ્યાએ બાળવાથી પર્યાવરણ તથા માનવ આરોગ્ય પર ગંભીર અસર થતાં વૈજ્ઞાનિક સ્તરે વારંવાર ચેતવણીઓ આપવામાં આવી છે. આમછતાં પોરબંદરમાં ઠેકઠેકાણે પ્રદૂષણના પાટલા તમામ નિયમોની ઐસીતૈસી કરી રહ્યા છે. શહેરમાં ઠેરઠેર જાહેરમાં કચરાની હોળી જોવા મળે છે ત્યારે પ્રતિબંધ હોવા છતાં જાહેરમાં કચરો સળગાવવાના કૃત્યને અટકાવવામાં મનપા નિષ્ફળ નીવડી છે. ભાસ્કર એક્સપર્ટજાહેરમાં કચરો સળગાવવાથી‎બાળકો અને વૃદ્ધોમાં અસર‎‎જાહેરમાં કચરો સળગાવવાથી વાયુ પ્રદૂષણ થાય છે, કચરો બળે ત્યારે તેમાં રહેલા પ્લાસ્ટિક અને રસાયણો પરથી ઝેરી વાયુઓ બને છે. ડાયોક્સિન અને ફ્યુરાન્સ ઝેરી વાયુથી હોર્મોનલ વિકાર, રોગપ્રતિકારક શક્તિમાં ઘટાડો કરે છે. હવામાં તરતા અશુધ્ધ કણો વાયુ જે ફેફસાંમાં ઊંડે સુધી પહોંચી દમ, COPD, હાર્ટ એટેકનું જોખમ વધારે છે, કાર્બન મોનોક્સાઇડ રક્તમાં ઓક્સિજન ઘટાડે છે, ખાસ કરીને બાળકો અને વૃદ્ધોમાં ગંભીર અસર પડે છે. વૈજ્ઞાનિક અભ્યાસ દર્શાવે છે કે કચરો બળાતાં PM2.5નું પ્રમાણ 4 ગણું વધે છે, જે WHOની માર્ગદર્શિકા કરતાં ઘણી વધારે છે. આ ઉપરાંત કચરો બળ્યા પછી નીકળતી રાખને અર્ધબળેલા કચરામાં ભારે ધાતુઓ જમીનની ફળદ્રુપતા ઘટાડે છે, વૃક્ષો અને ખેતીના પાકોમાં ઝેરી તત્વોને ભેળવી દે છે, ભૂગર્ભજળમાં ઝેર ફેલાવે છે. જ્યારે અનિયંત્રિત દહનથી કાર્બન ડાયોક્સાઇડ, મિથેન, નાઇટ્રસ ઑક્સાઇડ જેવા ગ્રીનહાઉસ ગેસો વધે છે. શહેરોમાં હીટ-આઈલેન્ડ ઈફેક્ટ વધારે જોવા મળે છે, જેના કારણે ગરમીની લહેરો વધુ ખતરનાક બની શકે છે. કચરો બળતાં ઉત્પન્ન તાપમાન અને ઝેરીધુમાડો પક્ષીઓ, સ્ટ્રીટ ડૉગ્સ, બિલાડીઓ તેમજ નજીકના જંગલી જીવો માટે જીવલેણ બને છે. ગાંધીનગર અને પોરબંદરના ક્ષેત્રોમાં થયેલા સર્વે દર્શાવે છે કે કચરાના ધુમાડાના કારણે પક્ષીઓના શ્વસનરોગમાં વધારો થયો છે.> ડો. ભુપેન્દ્રસિંહ જાડેજા, એક્સપર્ટ ભાસ્કર સુજાવ પ્લાસ્ટિક, મેટલ, ગ્લાસ અને કાગળનું સંપૂર્ણ રીસાયક્લિંગ જરૂરી‎ઘર, દુકાન અને સંસ્થાઓમાં સૂકો, ભીનો જીવલેણ કચરો અલગ એકત્રિત‎કરવો, ડોર ટુ ડોર કચરાના કલેક્શન માટે આવતા વાહન માં જ કચરો‎ઠાલવવો, કચરો સળગાવનાર શખ્સ સામે દંડ, CCTV અને સિટિ-સર્વેલન્સ‎સિસ્ટમનો ઉપયોગ કરી શકાય. ઉલ્લેખનીય છે કે, ભીનો જૈવિક કચરો‎ઘરમાં/સો સાયટીમાં કમ્પોસ્ટ કરી શકાય છે.શહેર સ્તરે બાયો-ગેસ પ્લાન્ટનો‎ઉપયોગ કરીને ઊર્જા અને ખાતર મેળવી શકાય. પ્લાસ્ટિક, મેટલ, ગ્લાસ અને‎કાગળનું સંપૂર્ણ રીસાયક્લિંગ. પોરબંદર જેવી જગ્યાએ માછીમારી- પ્લાસ્ટિક‎અને પેકેજિંગ પ્લાસ્ટિકના સંગ્રહ માટે સ્પેશિયલ રીસાયક્લિંગ હબ જરૂરી છે. ‎અનિયંત્રિત બર્નિંગ આરોગ્ય માટે કેટલી ખતરનાક છે તે અંગે સમાજમાં જાગૃતિ‎ફેલાવવી, વિદ્યાર્થીઓમાં ઝીંક વેસ્ટ કલ્ચર વિકસાવવા શિક્ષણ વિભાગની ખાસ‎ભૂમિકા બાંધવી જોઈએ. શહેરના કચરાને બાળવું માત્ર પર્યાવરણનું નહીં પરંતુ‎જાહેર આરોગ્યનું પણ સૌથી મોટું જોખમ છે. ડાયોક્સિન, ફ્યુરાન્સ અને‎PM2.5 જેવા ઝેરી પદાર્થો શ્વાસ દ્વારા શરીરમાં પ્રવેશે છે અને લાંબા ગાળે‎કેન્સર, હૃદયરોગ અને શ્વસનતંત્રના ગંભીર રોગો ઉત્પન્ન કરે છે. વૈજ્ઞાનિક‎પદ્ધતિઓનો અમલ થશે તો માત્ર પ્રદૂષણ જ નહીં ઘટે, પરંતુ શહેરને સ્વચ્છ‎અને આરોગ્યદાયક બનાવવાની દિશામાં મોટું પલટણ આવશે.પોરબંદર‎જિલ્લામાં વધતા કચરા બર્નિંગને રોકવા મનપા, શિક્ષણ વિભાગ અને નાગરિક‎એમ ત્રણે મળીને કાર્ય કરવું જરૂરી છે.‎

સન્ડે ફોટો સ્ટોરી:મુંબઇ બાદ સૌથી લાંબા અંતરની વિલિંગ્ડન મરીના(ચોપાટી)નું ઇ.સ.1936માં લોકાર્પણ થયું હતું

મુંબઇ બાદ ગુજરાતમાં એકમાત્ર અને સૌથી લાંબી વિલિંગ્ડન મરીના(ચોપાટી)નું ઈ.સ. 1936 ની 19મી જાન્યુઆરીએ ગવર્નર જનરલ વિલિંગ્ડનના હસ્તે મહારાણા નટવરસિંહજીની ઉપસ્થિતિમાં થયું હતું લોકાર્પણ કરવામાં આવ્યું હતું.બીગ બી અમિતાભ બચ્ચનથી માંડીને અનેક કલાકારો, રાજકારણીઓ, મહાનુભાવો ટહેલ્યા છે. ભવ્ય ભૂતકાળ ધરાવતી ચોપાટી પર આજે પણ હજારો પ્રવાસીઓ વર્ષ દરમ્યાન મુલાકાતે આવે છે. પોરબંદરની ચોપાટી માત્ર સૌરાષ્ટ્ર, ગુજરાત કે ભારત જ નહીં પરંતુ વિશ્વભરમાં વિખ્યાત છે અને અહીં બારેમાસ દેશ-વિદેશના પર્યટકો ઉમટી પડે છે ત્યારે આ રમણીય ચોપાટી કે જેનું ગવર્નર જનરલ વિલિંગ્ડનના હસ્તે મહારાણા નટવરસિંહજીની ઉપસ્થિતિમાં લોકાર્પણ થયું હતું, દરવાજાની દિવાલ પર જડેલો શિલાલેખ આજે પણ ઉપલબ્ધ‎ પોરબંદરના કનકાઈ મંદિર તરફના દરવાજાની દિવાલ પર તેનો શિલાલેખ જડી દેવામાં આવ્યો છે. જેમાં “વિલિંગ્ડન મરીના ઓપન્ડ બાય હીઝ એક્સેલેન્સી અ અર્લ ઓફ વિલિંગ્ડન વિક્ટરી એન્ડ ગવર્નર જનરલ ઓફ ઈન્ડીયા ઓન 19 જાન્યુઆરી 1936 લખેલું છે. ઈતિહાસવિદ્ નરોત્તમભાઈ પલાણે જણાવ્યું હતું કે, પોરબંદરના પ્રજાવત્સલ રાજવી મહારાણા નટવરસિંહજીએ ખાસ રસ લઈને પોરબંદરની ચોપાટીના નિર્માણમાં ખૂબ મહત્વનું યોગદાન આપ્યું હતું.

વેધર રિપોર્ટ:પોરબંદરમાં ઠંડીનો પારો 1.7 ડિગ્રી ઊંચકાયો

પોરબંદરમાં ઠંડીનો પારો 1.7 ડિગ્રી વધીને આવ્યું છે. લઘુતમ તાપમાન 21 ડિગ્રી સુધી પહોંચી ગયું છે જેને કારણે વાતાવરણમાં ઠંડીનુ પ્રમાણ ઘટ્યું છે. પોરબંદરમાં થોડા દિવસો પહેલા એટલેકે તા. 19 અને 20 નવેમ્બરના રોજ લઘુતમ તાપમાન 13.1 ડિગ્રી નોંધાયું હતું. ઠંડીનો પારો ગગડતા જ શહેર ઠંડુગાર બન્યું હતું, પરંતુ ત્યાર બાદ પણ લઘુતમ તાપમાન 14 થી 16 ડિગ્રી આસપાસ રહ્યું હતું. જ્યારે શનિવારે મહતમ તાપમાન 32 ડિગ્રી નોંધાયું છે અને લઘુતમ તાપમાન 1.7 ડિગ્રી વધીને 21 ડીગ્રીએ પહોંચ્યું છે. છેલ્લા 6 દિવસમાં લઘુતમ તાપમાન 6.7 ડિગ્રી ઊંચકાયુ ગત સોમવારે લઘુતમ તાપમાન 14.3 ડિગ્રી નોંધાયું હતું જ્યારે મંગળવારે લઘુતમ તાપમાન 14.7 ડિગ્રી, બુધવારે લઘુતમ તાપમાન 16.4 ડિગ્રી, ગુરુવારે લઘુતમ તાપમાન 16 ડિગ્રી અને શુક્રવારે લઘુતમ તાપમાન 19.3 ડિગ્રી ત્યારે શનિવારે લઘુતમ તાપમાન 21 ડિગ્રી નોંધાયું છે. આમ છેલ્લા 6 દિવસમાં લઘુતમ તાપમાન 6.7 ડિગ્રી વધ્યું છે.

ACBની કાર્યવાહી:મત્સ્યોદ્યોગ કચેરી બહાર રૂ. 10 હજારની લાંચ લેતો શખ્સ એસીબીના છટકામાં આવ્યો

પોરબંદરમાં બોટનું રજિસ્ટ્રેશન કરાવી આપવા ફિશરીઝ વિભાગના સાહેબને રૂપિયા આપવા પડશે તેમ કહી એક શખ્સે નાગરિક પાસેથી રૂ. 16 હજાર પૈકી રૂ. 10 હજાર આપવાનું નક્કી કર્યું હતું. જાગૃત નાગરિકે એસીબીને જાણ કરી છટકું ગોઠવતા આ શખ્સ લાંચની રકમ લેતા ઝડપાયો હતો. પોરબંદરના ભાટિયા બજારમાં રહેતો દિનેશ પ્રેમજી સલેટ નામનો શખ્સ ફરિયાદીની બોટનું રજિસ્ટ્રેશન કરાવી આપવા ફિશરીઝ વિભાગના સાહેબને રૂપિયા આપવા પડશે તેમ જણાવ્યું હતું અને ફરિયાદી પાસેથી રૂપિયા 16 હજારની લાંચની માંગણી કરી હતી. ફરિયાદીએ શનિવારે રૂ.10,000 આપવાનું નક્કી કર્યું હતું. જાગૃત ફરિયાદીએ આ અંગે એસીબી ટોલ ફ્રી 1064 પર સંપર્ક કર્યો હતો અને ફરિયાદ આપી હતી, આથી ટ્રેપિંગ અધિકારી જે.બી. કરમૂર, જૂનાગઢ ટીમના સુપરવિઝન અધિકારી બી.એમ. પટેલ તથા ટીમે પોરબંદરમાં છટકું ગોઠવ્યું હતું જેમાં આરોપી દિનેશ પ્રેમજી સલેટ જૂની કોર્ટ કમ્પાઉન્ડમાં આવેલ મદદનીશ મત્યોધોગ નિયામકની કચેરી બહાર રૂ.10,000ની લાંચ લેતા રંગેહાથ ઝડપાયો હતો. ટીમે આગળની કાર્યવાહી હાથ ધરી છે.

પત્નીને માર માર્યો:ધોળાદ્રીમાં પતિએ પત્નીને ઘરકામ બાબતે માર માર્યો

જાફરાબાદના ધોળાદ્રીમાં પતિએ પત્નિને ઘરકામ બાબતે શારીરીક અને માનસીક દુ:ખ ત્રાસ આપી મારી નાખવાની ધમકી આપી હતી. આ ઉપરાંત માર માર્યાની પણ પરણિતાએ નાગેશ્રી પોલીસ મથકમાં ફરિયાદ નોંધાવી હતી. મુળ જાફરાબાદના ધોળાદ્રીના વતની અને હાલ વઢેરામાં રહેતા હંસાબેન ગુણવંત રાઠોડ (ઉ.વ.19)એ તેના પતિ ગુણવંત ગભાભાઈ રાઠોડ (છુપા) સામે નોંધાવેલી ફરિયાદમાં જણાવ્યું હતું કે તેના પતિ ગુણવંત રાઠોડે 14 જાન્યુઆરથી 26 નવેમ્બર સુધીના લગ્ન જીવન દરમિયાન ઘરકામ બાબતે શારીરીક માનસીક દુ:ખ ત્રાસ આપ્યો હતો. આ ઉપરાંત તેને ગાળો આપી તેની સાથે ઝઘડો કર્યો હતો. તેમજ શીરીરે મુંઢ માર માર્યો હતો. જેના કારણે હંસાબેન રાઠોડને મુંઢ ઈજા થઈ હતી. તેમજ ગુણવંત રાઠોડે હંસાબેનને મારી નાખવાની ધમકી આપી હતી.

ગટરની પાલિકા સદસ્ય દ્વારા સફાઈ કરાવાઈ‎:કુંડલા વોર્ડ નં. 5 માંથી પસાર થતાં રાહદારીઓ, વિદ્યાર્થીઓને ઉભરાતી ગટરોથી મળી રાહત

સાવરકુંડલા શહેરમાં વોર્ડ નંબર પાંચમાં આવેલ શિવશક્તિ સોસાયટીના મંદિરના મુખ્ય પ્રવેશદ્વાર આગળ ગટરની કુંડીઓ ઘણા સમયથી ઉભરાતી હતી મંદિર આવતા દર્શનાથીઓ પોતાનું મોં મચકોડીને તથા મોં પર રૂમાલ બાંધીને અહીંથી પસાર થતાં હતા. શીવ શક્તિ સોસાયટીના રહીશો ગટરના ગંદા અને દુર્ગંધ યુક્ત પાણી અને ગંદકીથી કંટાળી પોતાના ઘરના બારી બારણાઓ પણ બંધ રાખતા હતા. અહીંના રહેવાસી મહેન્દ્રભાઈએ વોર્ડ નંબર પાંચના કોંગ્રસ પક્ષના સદસ્ય અશોકભાઈ ખુમાણને જાણ કરતા શીવ શક્તિ સોસાયટીમાં આવેલ તમામ કુંડીઓની જેટીંગ મશીન દ્વારા સફાઈ કરવામાં આવી હતી વોર્ડ નંબર પાંચની ગટરો માંથી અઢળક ગાળ કચરો કાઢીને ગટરોનો પ્રશ્ન હલ કરીને કુંડી ઉભરાતી બંધ થતાં રહીશો, રાહદારીઓ અને મંદિરે આવતા દર્શનાર્થી ઓએ રાહત અનુભવી હતી. શીવ શક્તિ સોસાયટીમાં ઉભરાતી ગટરોમાંથી નાગનાથ સોસાયટી તરફ જવાનો માર્ગ હોવાથી અહીંથી પસાર થતા અનેક રાહદારીઓ, વિદ્યાર્થીઓ અને વાલીઓ ગટરોના પાણીમાંથી પ્રસાર થવા મજબુર હતા નગરપાલિકા તંત્ર અને સદસ્યો યોગ્ય ધ્યાન આપે તો શહેરની જાહેર સ્ટ્રીટ લાઈટ, ગટર પાણી અને સફાઈની સમસ્યાઓના પ્રશ્ન હલ થઈ શકે તેમ છે

મગફળીની ખરીદીમાં બીજા સેન્ટરની મંજૂરી મળી:બાબરા ખાતે ટેકાના ભાવે મગફળી ખરીદીમાં બીજા સેન્ટરના પ્રારંભ, પ્રથમ દિવસે 51 ખેડૂતને મેસેજ મળ્યા

બાબરામાં ટેકાના ભાવે મગફળીની ખરીદીમાં બીજા સેન્ટરની મંજુરી મળી છે. મંજુરી મળતાની સાથે જ તાલુકા કૃષિ સેવા સહકારી મંડળી દ્વારા ટેકાના ભાવે મગફળી ખરીદીનો પ્રારંભ કરવામાં આવ્યો છે. બાબરામાં અમરેલી રોડ પર આવેલા અમીધારા જિનપર ખરીદી શરૂ કરવામાં આવી હતી. પ્રથમ દિવસે 51 ખેડૂતોને મેસેજ કરવામાં આવ્યા હતા. બાબરામાં માર્કેટીંગ યાર્ડમાં ટેકાના ભાવે એક જ મંડળીને મગફળીની ખરીદી કરવાની મંજૂરી હતી. મોટા રજિસ્ટ્રેશન વચ્ચે ખરીદી ધીમીગતિએ ચાલતી હતી. જેના કારણે ખેડૂતો દ્વારા અન્ય સેન્ટરની ફાળવણી કરવા માટે માંગણી કરી હતી. અંતે રાજ્ય સરકાર દ્વારા બાબરા તાલુકામાં વધુ એક સેન્ટર ટેકાના ભાવે મગફળી ખરીદી કરવા ફાળવ્યું છે. અહીં ખેડૂતોના હિત માટે તાલુકા કૃષિ સેવા સહકારી મંડળીને મગફળી ખરીદી કરવાની મંજુરી આપવામાં આવી છે. બાબરા તાલુકા કૃષિ સેવા સહકારી મંડળી દ્વારા ખરીદી સેન્ટર અમરેલી રોડ પર બંધ પડેલ અમીધારા જિનમાં શરૂ કરવામાં આવ્યું છે. આજથી વિધિવત રીતે ખેડૂતોના હસ્તે ખરીદી શરૂ કરવામાં આવી છે. પ્રથમ દિવસે 51 ખેડૂતોને મંડળી તરફથી મેસેજ મોકલવા આવ્યા હતા. વહેલી સવારથી જ ખેડૂતો વાહનમાં મગફળી ભરી ખરીદી સેન્ટર પર પહોચ્યા હતા. અહીં મગફળીના સ્થળ પર સેમ્પલ લેવામાં આવશે. તેમજ તોલમાપની કામગીરી પણ સ્થળ થઈ રહી છે. જેના કારણે ખેડૂતોને દોડા દોડી થશે નહી. આ તકે તાલુકા કૃષિ સેવા સહકારી મંડળીના ચેરમેન જગદીશભાઈ નાકરાણી,વાઇસ ચેરમેન હરેશભાઇ આખજા,પાલિકા પ્રમુખ પ્રવિણભાઈ કરકર,ખાખરીયા મંડળીના પ્રમુખ અજિતભાઈ ખોખરીયા, ગુજકોમાસોલના અધિકારીઓ તેમજ ખેડૂતોની ઉપસ્થિતિમાં બીજા સેન્ટરનો પ્રારંભ કરવામાં આવ્યો હતો. પાલિકા પ્રમુખે કહ્યું, બીજુ સેન્ટર ફાળવતા ખેડૂતોને રાહત મળશે‎બાબરા પાલિકા પ્રમુખ પ્રવિણભાઈ કરકરે જણાવ્યું હતું કે બાબરા તાલુકાભરમાં ટેકાના ભાવે મગફળી ખરીદી માટે મોટી સંખ્યામાં ખેડૂતોએ રજિસ્ટ્રેશન કરાવ્યું છે. અહીં બીજા સેન્ટરની ખૂબ જરૂરિયાત હતી. ત્યારે રાજ્ય સરકાર દ્વારા બીજું સેન્ટર ફાળવતા ખેડૂતોને મોટી રાહત મળી છે. સેન્ટર પર ખેડૂતો માટે 24 કલાક ચા-પાણીની સુવિધા ઉભી કરાય​​​​​​​બાબરામાં અમરેલી રોડ પર ટેકાના ભાવે મગફળી ખરીદી માટે બીજા સેન્ટરનો આરંભ થયો છે. અહીં ખેડૂતો માટે ચા- પાણીની 24 કલાક માટે સુવિધા મંડળી તરફથી ઉપલબ્ધ કરવામાં આવી છે.

કમકમાટીભર્યો બનાવ:લાઠી-ચાવંડ હાઇવે પર કાર સાથે અથડાતા આધેડ એક્ટિવાચાલકનું ઘટનાસ્થળે મોત

લાઠીના ચાવંડ હાઇવે પર કાર અને બાઈક વચ્ચે અકસ્માત સર્જાયો હતો. એક્ટિવા અને ફોરવ્હીલ વચ્ચે અકસ્માત થતા લાઠીના એકટીવા ચાલકનું મોત થતા પરિવારમાં આક્રંદ સવાયો હતો. ​ લાઠી નજીક ચાંવડ હાઇવે પર આજે એક માર્ગ અકસ્માતની ઘટના બની હતી. જેમાં એક એક્ટિવા ચાલકે પોતાનો જીવ ગુમાવ્યો છે. ચાંવડ ગામ પાસેના હાઇવે પર એક્ટિવા નંબર જીજે.14.એ.એફ .6079 અને કાર વચ્ચે અકસ્માત સર્જાયો હતો. અકસ્માતની આ ઘટનામાં લાઠીના એક્ટિવા ચાલક પ્રવિણસિંહ રાયજાદા ( ઉં. વ.50) નું ઘટના સ્થળે મોત નીપજ્યું હતુ. ઘટનાની જાણ થતા જ લાઠી પોલીસની ટીમ તાત્કાલિક સ્થળ પર પહોંચી હતી. પોલીસે કાયદેસરની કાર્યવાહી હાથ ધરી હતી. આધેડના મૃતદેહને પોસ્ટમોર્ટમ માટે લાઠી સિવિલ હોસ્પિટલ ખાતે ખસેડ્યો છે. લાઠી પોલીસે કાર્યવાહી હાથ ધરી હતી.

સન્ડે ફોટો સ્ટોરી:આંબરડી સફારી પાર્કમાં કડકડતી ઠંડી વચ્ચે સિંહનું સુર્ય સ્નાન

ધારી નજીક આવેલ આંબરડી સફારી પાર્કમાં ભગત નામનો સિંહ તેમજ સેલજા નામની સિંહણે પ્રવાસીઓમાં આકર્ષણ જમાવ્યું છે. અહીં ત્રિપુટી સિંહ પણ પ્રવાસીઓને મોજ મસ્તી કરતા જોવા મળે છે. હાલ શિયાળામાં ઠંડી જામી છે. ધારી શહેરમાં 14 ડીગ્રી તાપમાન વચ્ચે ઠંડીનું પ્રમાણ વધ્યું છે. આવા સમયે આંબરડી સફારી પાર્કમાં રહેલ સિંહ સુર્ય સ્નાન કરી ઠંડીથી રાહત મેળવી રહ્યો છે.

એરબસ એ320માં સોલાર રેડિયેશનથી સમગ્ર દુનિયા સ્તબ્ધ

- એરબસે 6000 વિમાનોને તાકીદે અપડેટ કરવાના આદેશ આપ્યા, ભારતમાં 350 વિમાનોનું ઉડ્ડયન પણ ખોરવાયું - જેટબ્લૂ એરલાઈન્સની ન્યૂયોર્ક જઈ રહેલી ફ્લાઈટને સોલાર રેડિયેશનના કારણે મોટો ઝાટકો લાગ્યો અને તે પીચ ડાઉન થઈ ગઈ. તેમાં 15 પેસેન્જર ઈજાગ્રસ્ત થયા હતા : સોલાર રેડિયેશનના કારણે બિલ ફ્લિપથી પાઈલટની કામગીરી કે મંજૂરી વગર જ પ્લેન કાબુ બહાર જતું રહે છે અને પીચડાઉન થઈ શકે છે. તે ઉપરાંત ઓટોપાઈલટ મોડ પણ ફેઈલ જાય છે. કોમ્યુનિકેશન બ્લેકઆઉટ જેવી સમસ્યા આવી શકે છે: નવેમ્બર 2025માં સોલાર સાઈકલ પોતાની ચરમસીમાએ હોય છે અહીંયા 10-20 વખત સોલાર ફ્લેર નીકળે તે સાહજિક હોય છે. આ સંજોગોમાં 28,000 કે તેનાથી વધારે ફૂટની ઉંચાઈએ ઉડતા વિમાનોને સોલાર રેડિયેશનની અસર થઈ શકે છે : ભારતમાં ઈન્ડિગો અને એર ઈન્ડિયા તથા એર ઈન્ડિયા એક્સપ્રેસના તમામ વિમાનો સોફ્ટવેર અપડેશન માટે ગ્રાઉન્ડેડ કરવામાં આવ્યા છે.

બિસ્માર રોડના સમારકામની માંગ:કોડીનાર પાસેના ડોળાસા અને ગીર ગઢડાના જાંજરિયા ગામો ને જોડતો માર્ગ પેવર બનાવો

કોડીનાર તાલુકાના ડોળાસા અને ગીર ગઢડા તાલુકા ના જાંજરિયા ગામ નું અંતર માત્ર ત્રણ કીમી.છે.પણ રસ્તો બિસ્માર હોવાના કારણે લોકો બોડીદર થઈ ને જાંજરિયા પહોંચે છે.જેથી ચાર કી.મી.નું અંતર વધી જાય છે. ડોળાસા થી જાંજરિયા ગામો ને જોડતા રોડ ની માંગ બંને ગામો ના લોકો છેલ્લા પાંચ વર્ષથી કરી રહ્યા છે.પણ તંત્ર દ્વારા આ બાબતે કોઈ નક્કર કામગીરી હાથ ધરવામાં આવી નથી.જે ના કારણે બંને ગામો ના લોકો ઉપરાંત અનેક ખેડૂતો જેની વાડી આ રસ્તા ઉપર આવેલી છે તેઓ પણ પરેશાન થાય છે.જો આ રસ્તા ને પેવર થી મઢવા માં આવે તો બંને ગામો ડોળાસા અને જાંજરિયા ગામો નું અંતર ચાર કી. મી. ઘટી જશે.ખેડૂતો ને પણ વાડીએ જવા આવવા માં રાહત રહેશે.અને જાંજરિયા અને વેળાકોટ ગામો ના લોકો અને વિદ્યાર્થીઓ ને પણ આ રોડ નો લાભ મળશે. આ ઉપરાંત ડોળાસા થી દોઢ કી.મી.દૂર આજ રોડ ઉપર ખોડીયાર માતાજી નું ભવ્ય મંદિર આવેલું છે.અહી ગામે ગામ થી ખોડીયાર ભક્તો દર્શનાર્થે આવે છે.જેથી તેમને પણ મુશ્કેલીનો સામનો કરવો પડી રહ્યો છે. .

ભાસ્કર એક્સક્લૂસિવ:અંજાર અને ભચાઉના 29,919 કિસાનોએ રાહત પેકેજમાં સહાય મેળવવા અરજી કરી

ઓક્ટોબર માસમાં કચ્છ સહીત રાજ્યમાં થયેલા કમોસમી વરસાદના કારણે ખેડૂતોના તૈયાર પાકને મોટી નુકશાની થઇ હતી. તે માટે ગુજરાત સરકારે 10 હજાર કરોડનો રાહત પેકેજ જાહેર કર્યો હતો, અને અરજી કરવાની આખરી તારીખ 29 નવેમ્બર હતી. પણ સર્વર અને ટેકનિકલ ઇસ્યુ આવતા હોવાથી ખેડૂતોને અરજી કરવામાં મુશ્કેલી પડી રહી હોવાના કારણે અપેક્ષા પ્રમાણે સરકારે અરજી કરવાની મુદ્દતમાં 7 દિવસમાં વધારો કર્યો છે. આ દરમિયાન અત્યાર સુધી કચ્છના અંજાર અને ભચાઉના 29,919 કિસાનોએ સહાય મેળવવા કરી અરજી કરી હોવાનું બહાર આવ્યું છે.છેલ્લા કેટલાક દિવસોથી ખેડૂતોને અરજી કરવામાં મુશ્કેલી આવતી હોવાની સમસ્યાને સરકારે ધ્યાનમાં લઈને અરજી કરવા માટે વધારે સાત દિવસ આપ્યા છે. આ જાહેરાતથી અરજી કરી શક્યા નથી, તેવા ખેડૂતો માટે રાહત મળી છે. આ 10,000 કરોડ રૂપિયાના પેકેજના ભાગરૂપે કમોસમી વરસાદના કારણે થયેલા પાકની નુકશાની સામે ખેડૂતોને હેક્ટર પ્રતિ 22,000 રૂપિયા (મહત્તમ 2 હેક્ટર) સહાય મળવાની છે. અરજી કરવાની મુદ્દતમાં વધારો કરવાના નિર્ણયથી કચ્છ સહીત રાજ્યના હજારો ખેડૂતોને ફાયદો થશે. ગુજરાત સરકારે 7 નવેમ્બરના રોજ 10,000 કરોડ રૂપિયાના કૃષિ રાહત પેકેજની જાહેરાત કરી હતી. આ પેકેજ કમોસમી વરસાદથી થયેલા પાકના નુકસાનને આવરી લે છે. જેમાં ખેડૂતોને હેક્ટર પ્રતિ 22,000 રૂપિયા (મહત્તમ 2 હેક્ટર, એટલે કુલ 44,000 રૂપિયા પ્રતિ ખેડૂત) આપવામાં આવશે. 947 કરોડના કૃષિ રાહત પેકેજનો લાભ રાપર-ભચાઉના કિસાનોને જ મળશેકચ્છમાં ઓગસ્ટ અને સપ્ટેમ્બરમાં થયેલા અતિભારે વરસાદથી પાકને નુકશાન થયું હતું. જેમાં સરકાર દ્વારા કચ્છ તેમજ જૂનાગઢ, વાવ-થરાદ, પંચમહાલ અને પાટણ જિલ્લાના ખેતી પાકોમાં નુકશાની માટે 947 કરોડના કૃષિ રાહતજાહેર કર્યો હતો. જેની સહાય માત્ર રાપર અને ભચાઉના જ 52,611 ખેડૂતોને મેળવા પાત્ર છે. વરસાદ બાદ ૩૩ ટકાથી વધુ નુકશાન હોય તેવા ખેડૂતોનો સર્વે કરી રાપર અને ભચાઉ વિસ્તારના 169 ગામોનો સર્વે કરવામાં આવ્યો છે. તે વિસ્તારના 52,611 ખેડૂતોને લાભ મળશે.

આગ લાગી:સોમનાથ મેળાના ગ્રાઉન્ડ પાસે જ આગ ભભૂકતા દોડધામ

સોમનાથ ખાતે પાંચ દિવસ ના કાર્તિકી પૂર્ણિમા ના મેળા નુ સાજ ના પાંચ કલાકે ઉદધાટન થયું હતું. બાદ સાજ ના સમયે મેળા ના ગ્રાઉન્ડ મા કાજલી તરફ બહાર નીકળવા ના રસ્તા ઉપર પડેલા કચરામાં આગ લાગેલ હતી. આ બાબત ની જાણ સોમનાથ ટ્રસ્ટ ને થતાં સોમનાથ ટ્રસ્ટ દ્વારા ફાયરબ્રિગેડ ને જાણ કરતા ફાયરબ્રિગેડ મીની બંબા સાથે ધટના સ્થળે પહોંચી ફાયરબ્રિગેડ ના નરેન્દ્રસિંહ,ફાયરમેન ગોહિલ જીતેન્દ્રસિંહ,ડાભી મયંક સહિત ના સ્ટાફ દ્વારા આ કચરા મા લાગેલ આગ ને કાબુમાં લેવામાં આવી હતી. મોટી દુર્ઘટના બનતી અટકાવી કારણ કે મેળા ના ગ્રાઉન્ડ મા 200 થી વધુ દુકાનો 50 થી વધુ રાઇડર્સ અને મોટી સંખ્યામાં લોકો ઉપસ્થિત હતા.

ભાસ્કર વિશેષ:કચ્છમાં પ્રથમવાર ધો 11-12ના છાત્રોને પણ સ્ટાર્ટઅપમાં જોડવામાં આવશે, 20 હજાર સુધીની ગ્રાન્ટ પણ અપાશે

નવી એજ્યુકેશન પોલિસીમાં ભણતરની સાથે સ્કીલ એજ્યુકેશન પર ભાર મૂકવામાં આવ્યો છે. વિદ્યાર્થીઓમાં રહેલી સર્જનાત્મક શક્તિઓ સ્ટાર્ટઅપ સહિતના આયામ થકી બહાર આવી શકે છે.કચ્છમાં એકમાત્ર માંડવી કોડાયની SGJ કોલેજ પાસે સ્ટાર્ટઅપની માન્યતા છે ત્યારે હવે આ કૉલેજ દ્વારા ધો.11 અને 12માં અભ્યાસ કરતા વિદ્યાર્થીઓની શક્તિઓ બહાર લાવવા માટે નવો પ્રોજેકટ લાગુ કરવામાં આવ્યો છે જે માંડવી અને મુન્દ્રા પૂરતો સીમિત રહેશે જેમાં વિદ્યાર્થીઓને પોતાના સ્ટાર્ટઅપ માટે 20 હજાર સુધીની સહાય કોલેજ દ્વારા કરવામાં આવશે.કચ્છની એકમાત્ર સેલ્ફ ફાઇનાન્સ કૉલેજ અને એસએસઆઈપી માન્યતા ધરાવતા એસજીજે ગ્રુપ દ્વારા જિલ્લામાં પ્રથમવાર સ્કૂલના વિદ્યાર્થીઓ ધોરણ 11 અને 12 માટે અનોખું સ્ટાર્ટઅપ ઈવેંટ આયોજીત કરવામાં આવ્યું છે. આ ઈવેન્ટનો મુખ્ય ઉદ્દેશ યુવા પ્રતિભાઓને નવીનતા, સંશોધન અને સ્ટાર્ટઅપ સંસ્કૃતિ તરફ પ્રોત્સાહિત કરવાનો છે. પાયલોટ રીતે મુન્દ્રા અને માંડવીના ધોરણ 11 અને 12ના વિદ્યાર્થીઓ આમાં ભાગ લઈ શકશે.આ ઇવેન્ટ ફોકિયા સાથેના સહયોગથી અને કચ્છના સ્ટાર્ટઅપ ઇકોસિસ્ટમ એક્સપર્ટ તથા SGJ ગ્રુપના ડાયરેક્ટર બિનુ પિલ્લાઈના માર્ગદર્શન હેઠળ યોજાઈ રહ્યો છે. કચ્છમાં કોલેજ લેવલ પર સ્ટાર્ટઅપ ગ્રાન્ટની સફળતા બાદ હવે સ્કૂલ લેવલ પર પણ વિદ્યાર્થીઓને લગભગ ₹20,000 જેટલી સીડ ગ્રાન્ટ આપવામાં આવશે.મુખ્ય પ્રશાસક સ્વામી કૃષ્ણજીવનદાસજીએ આ પ્રયાસ માટે આશીર્વાદ પાઠવતા જણાવ્યું કે, આ કાર્યક્રમ જરૂરથી કચ્છના સ્ટાર્ટઅપ ઇકોસિસ્ટમને નવી દિશા અને નવી ઊંચાઇઓ આપશે. ઉલ્લેખનીય છે કે, કચ્છમાં અને સમગ્ર ગુજરાતમાં સ્કૂલના વિદ્યાર્થીઓ સુધી સ્ટાર્ટઅપ કલ્ચર પહોંચાડવામાં બિનુ પિલ્લાઈએ મહત્વપૂર્ણ ભૂમિકા ભજવી છે તેમના માર્ગદર્શનથી અનેક વિદ્યાર્થીઓને સ્ટાર્ટઅપ વિચારોને વાસ્તવિકતા આપવાનો મોકો મળ્યો છે.આ કાર્યક્રમ કચ્છમાં યુવા પ્રતિભાને પ્રોત્સાહિત કરતી ઐતિહાસિક પહેલ તરીકે ઉભરી આવશે. 18 ડિસેમ્બર સુધી પ્રોજેક્ટ સબમિશન કરી શકાશેઓનલાઈન પ્રોજેક્ટ સબમિશનની અંતિમ તારીખ 18 ડિસેમ્બર છે જ્યારે અધિકૃત સમિતિ દ્વારા સ્ક્રુટિની 22 ડિસેમ્બરના કરવામાં આવશે. વિદ્યાર્થીઓ કોઈપણ ક્ષેત્રના ટેકનોલોજી, સામાજિક મુદ્દાઓ, બિઝનેસ, પર્યાવરણ, એજ્યુકેશન વગેરે પ્રવર્તનાત્મક વિચારો સાથે ભાગ લઈ શકે છે. પસંદ કરાયેલા પ્રોજેક્ટ્સને સીડ ગ્રાન્ટ અને માર્ગદર્શન બંને મળશે.વધુ માહીતી માટે કોલેજનો સંપર્ક કરી શકાશે.

સન્ડે ફોટો સ્ટોરી:સોમનાથ દરિયાકિનારે બાંણગંગા શિવલિંગ,આસ્થાનું કેન્દ્ર

સોમનાથ સાનિધ્યે સાગર તટે આવેલ ભીડ ભંજન મંદિર સામે સમુદ્ર જળ સ્થિત બાણગંગાનું પવિત્ર શિવલીંગ આવેલુ છે. આ અંગે સોમનાથના વિદ્ધાન બ્રાહ્મણો દ્વારા મળતી માહિતી મુજબ બાણેશ્વરની પૂજા પૂણ્યપ્રદ છે અને તે ઠેકાણેથી જ જરા નામના પારધીએ શ્રીકૃષ્ણને બાણ માર્યુ હતુ. અન્ય માહિતી અનુસાર જરા ભીલે અહીંથી ભલ્લુક તીર્થમા બેઠેલા શ્રી કૃષ્ણ ભગવાનને તીર માર્યુ હતુ. જેમની કથા પ્રભાસખંડમાં છે તેમ જણાવ્યુ છે. ઘૂઘવતા સમુદ્રના નિરંતર આ શિવલીંગ ઉપર જળાભિષેક કરતા રહે છે. સમૂદ્રના કાંઠા પાસે જ સમુદ્રમાં આ શિવલીંગ હોય જે દર્શન અને સ્પષ્ટ જોઈ શકાય છે. .

વ્યવસાયની તાલીમથી મહિલાઓ બની આત્મનિર્ભર:સખીમંડળે ખાખરા, અથાણા, મુખવાસ, પાપડ, મીઠાઇ સહિતની વસ્તુઓ તૈયાર કરી 1 લાખની આવક મેળવી

સરસ મેળાની શરૂઆત કરવામાં આવી હતી.સખી મંડળના સથવારે ઝંખનાબહેન મહિને અંદાજિત રૂ.1 લાખ કમાઇ આત્મનિર્ભર બન્યાં છે. સોમનાથના સદ્દભાવના ગ્રાઉન્ડ ખાતે આયોજિત સરસ મેળામાં પોતાના સ્ટોલ થકી ખાખરા, અથાણા, મુખવાસ, પાપડ, મીઠાઇ સહિતની વસ્તુઓ વેચીને ઉદ્દઘાટનના માત્ર 6 કલાકમાં ઝંખનાબહેને રૂ.30 હજારની આવક મેળવી આગવું ઉદાહરણ પ્રસ્તુત કર્યું છે. ઉલ્લેખનીય છે કે, સરસ મેળામાં રાજ્યભરમાંથી 50 જેટલા સખી મંડળ જૂથ દ્વારા વિવિધ સ્ટોલ લગાવવામાં આવ્યાં છે. જેમાં અમરેલી જિલ્લાના ખાંભા તાલુકાના જીકિયાણી ગામના ઝંખનાબહેન નસીતનો સ્ટોલ આગવું આકર્ષણ જમાવી રહ્યો છે. તેમની હાથ બનાવટની ખાણીપીણીની વસ્તુઓ લેવા માટે લોકો રીતસર ભીડ લગાવી છે. ઝંખનાબહેન નસીતે આ જણાવ્યું હતું કે, થોડા સમય પહેલા હું મારા પતિ સાથે સુરત રહેતી હતી. પરંતુ, ઘરની આર્થિક પરિસ્થિતિને કારણે સુરત છોડીને અમરેલી જિલ્લાના વતનના ગામે આવવું પડ્યું હતું. જેથી પતિનો ચાલુ ધંધો બંધ પડ્યો. આ સમયે ઘર ચલાવવા માટે કંઇક પ્રવૃત્તિ કરવાની જરૂરિયાત ઉભી થઇ.આ અગાઉ, હું ઘરે સિલાઇકામ કરીને મહિને રૂ. 6 હજાર કમાતી હતી. પરંતુ, ઘરની પરિસ્થિતિને પહોંચી વળવા માટે અને કંઇક વધુ મોટું કરવાની મહેચ્છાને કારણે આ વ્યવસાય શરૂ કર્યો છે. મને ખાખરા, અથાણા, મુખવાસ સહિતની વસ્તુઓ બનાવતા આવડતી હતી. તેથી ઘરેથી નાનાપાયે તેની શરૂઆત કરી આ માટે એફડબલ્યુડબલ્યુબી (ફેન્ડ ઓફ વુમ વર્ડ બેન્ક) પાસેથી પણ આ અંગેની વધુ તાલીમ મળી અને આ સંસ્થા દ્વારા સાધન ખરીદી માટે રુ.1 લાખની સહાય પણ આપવામાં આવી હતી.જેથી મારો વ્યવસાય ધીમે ધીમે ચાલવા લાગ્યો છે. તેમણે સરસ મેળામાં રાજ્ય સરકાર દ્વારા ઉપલબ્ધ કરાવવામાં આવેલી સુવિધાઓનો ઉલ્લેખ કરીને જણાવ્યું હતું કે, આ મેળામાં મને વિના મૂલ્યે સ્ટોલ ફાળવવામાં આવ્યો છે. તેમજ નાસ્તા-જમવાની પણ સુવિધા કરી આપવામાં આવી છે. આ અગાઉ અમરેલી ખાતે યોજાયેલા મેળામાં મને 10 દિવસમાં રૂ.3 લાખની આવક થઇ હતી. ત્યારે આ મેળામાં અંદાજિત રૂ.5 લાખ જેટલી આવક થવાનો અંદાજ છે. એક વર્ષ પહેલા 10 બહેનોનું “માશ્રય આજીવિકા જૂથ” નામનું સખી મંડળ બનાવ્યું અને તેના દ્વારા ખાખરા, અથાણા, મુખવાસ, પાપડ, મીઠાઇ સહિતની વસ્તુઓ બનાવી વેચાણ કરવાનું શરૂ કર્યું હતું. ઘીમે ધીમે મેં રાજ્યભરમાં યોજાતા સખી મંડળના મેળાઓમાં ભાગ લેવા માટે જવા લાગ્યા રાજ્ય સરકારના મિશન મંગલમ દ્વારા મને તે અંગેની સારી એવી મદદ મળી. આજે હું ઘરેથી ઓર્ડર લઇને તેમજ વિવિધ મેળાઓમાં મારી ચીજવસ્તુઓનું વેચાણ કરીને મહિને અંદાજિત રૂ.1 લાખ જેટલી આવક મેળવે છે.

ભાસ્કર એનાલિસીસ:કૃષિ સહાય પેકેજ - 9 તાલુકામાં કુલ 155637 અરજી, 42428 ખેતીવાડી અધિકારીએ મંજૂર કરી,113,209 હજુ પ્રક્રિયા હેઠળ !

જૂનાગઢ જિલ્લામાં કૃષિ સહાય પેકેજ માટેની કુલ 155637 અરજી થઈ છે જેમાં 28 નવેમ્બરની સ્થિતિએ 30 ટકાને મંજૂરી મળી છે.સોરઠ પંથકમાં ચોમાસું પાકમાં મગફળી,સોયાબીન,કપાસ,ડ ુંગળી સહિતના પાકનું વાવેતર થયું હતું. ચોમાસા દરમિયાન શરૂઆતના સમયમાં જરૂરિયાત મુજબ નો વરસાદ પડતાં પાકનું ચિત્ર સારૂ હતું.બાદમાં ઓગસ્ટ મહીનામાં અમુક વિસ્તારમાં ભારે વરસાદ પડતાં ઘેડના અનેક ગામોમાં પાકની સાથે જમીન ધોવાણ પણ થયું હતું. બાદમાં સ્થિતિ થોડી સામાન્ય બની હતી પરંતુ પાક તૈયાર થતા જ ખેડુતોને કાપણી કરી હતી અને તૈયાર પાક ખેતરમાં પડ્યો હતો એ સમયે છેલ્લા કેટલાક વર્ષમાં ન થયું હોય તેવું તીવ્રતા વાળું માવઠું થતા વ્યાપક નુકસાન થયું હતું બાદમાં સરકાર દ્રારા ખાસ રાહત પેકેજની જાહેરાત કરવામાં આવી હતી. જેમની ઓનલાઈન અરજી પ્રક્રિયા શરૂ થઈ હતી જે હજુ પણ શરૂ છે ત્યારે જ જૂનાગઢ જિલ્લાની વાત કરીએ તો 28 નવેમ્બર સુધીમાં 155637 અરજી થઈ ચૂકી છે અને જિલ્લા ખેતીવાડી અધિકારી દ્રારા 42428 અરજીની આગળની પ્રક્રિયા માટે મંજૂરી આપી દેવામાં આવી છે.અન્ય અરજી હજુ પણ પેન્ડિગ છે જરૂરી કાર્યવાહી બાદ આગળ મોકલવામાં આવી રહી છે. વીસીઇ પાસે 47561 અરજી પેન્ડિગજૂનાગઢ જિલ્લાની વાત કરીએ તો વી.સી.ઇ મારફત અરજી કરવામાં આવી હતી જેમાં 47561 અરજીઓ હજુ પેન્ડિગ છે જેમાં ખેડૂતની સહી કે સંમતીપત્ર બાકી હોવુ કે કોઈ અન્ય કારણ પણ જવાબદાર હોય શકે છે. આ અરજીઓનો તુરંત પણે નિકાલ થાય તે માટે પણ પ્રયાસો શરૂ કરવામાં આવ્યા હોવાનું તંત્ર દ્વારા જણાવવામાં આવી રહ્યું છે. અહીં સમજો.... શુ હોય છે આખી પ્રક્રિયાઅરજી થી પેમેન્ટ સુધીની આખી પ્રક્રિયા જોઈએ તો પ્રથમ વી.સી.ઇ દ્રારા અરજી કરવામાં આવે છે જે ઓનલાઈન સબમિટ કરાઈ છે.બાદમાં ગ્રામ સેવક આ અરજીનો સ્વીકાર કરે છે ચકાસણી બાદ મંજૂર કરે છે બાદમાં ટીડીઓ અને જિલ્લા ખેતીવાડી અધિકારી મંજૂરી આપે છે.બાદમાં ખેડૂતોના બેંક ખાતામાં રકમ જમા કરવામાં આવે છે. રિજેક્ટ થયેલી અરજીઓઆ પેકેજમાં 10 અરજી કોઈ કારણસર રિજેક્ટ કરવામાં આવી છે જેમાં ભેંસાણમાં 3,માળીયામાં 1, માંગરોળમાં 3, વંથલી 1 અને વિસાવદરમાં 2 અરજીનો સમાવેશ થાય છે.

67% અમેરિકન્સના મતે 4 વર્ષની કોલેજનો કોઈ મતલબ નથી, ખર્ચ વધુ અને નોકરીની ગેરંટી નહીં

- મોંઘી ફી અને એજ્યુકેશન લોન વચ્ચે સવાલ USA EDUCATION NEWS : વિશ્વની ટોપ 100 કોલેજમાંથી 28 અમેરિકામાં છે. વર્લ્ડ યુનિવર્સિટી રેન્કિંગમાં પણ વિશ્વમાં સૌથી વધુ અમેરિકાની 171 યુનિવર્સિટીઓને સ્થાન મળ્યું છે. વિશ્વના એજ્યુકેશન સેક્ટરમાં ડંકો વગાડનાર દેશ- અમેરિકાના નાગરિકોનો કોલેજ ડિગ્રીથી મોહ ભંગ થયો છે. એક સર્વેમાં સામે આવ્યું છે કે, અમેરિકનો ચાર વર્ષની કોલેજ ડિગ્રીની ઉપયોગિતા પર સવાલ ઉઠાવી રહ્યાં છે. 67 ટકા અમેરિકનો માની રહ્યાં છે કે, ચાર વર્ષની કોલેજ ડિગ્રી પાછળ કરવામાં આવી રહેલો ખર્ચ યોગ્ય નથી.

યુવકે જીવન ટૂંકાવ્યું:પ્રાંસલીના યુવકે વંથલી પાસે ઝેરી દવા ગટગટાવી જીવન ટૂંકાવ્યું

જૂનાગઢ| કેશોદ તાલુકાના પ્રાંસલી ગામના 30 વર્ષીય ભાવેશભાઇ રામભાઇ મારૂ નામના યુવાને શુક્રવારે સાંજે વંથલી પાસે આવેલ ગેલેક્સી હોટેલ ધાબા નજીક ઝેરી દવા પી લઈ આપઘાત કરી લીધો હતો. જેની જાણ થતાં પોલીસે દોડી જઈને યુવાનના મૃતદેહને પોસ્ટમોર્ટમ માટે મોકલી આપી આગળની કાર્યવાહી કરી હતી. ઘટના અંગે પોલીસે રાજુભાઈ ઉર્ફે સુખાભાઈ રામભાઈ મારુનું નિવેદન નોંધી યુવકના આપઘાત પાછળનું કારણ મેળવવા વધુ તપાસ હાથ ધરી હતી.

ફરાર આરોપી ઝડપાયો:સજા વોરંટનો ફરાર એક શખ્સ મજેવડી દરવાજા પાસેથી પકડાયો

સજા વોરંટનો ફરાર ખામધ્રોળના શખ્સને પોલીસે શહેરમાં મજેવડી દરવાજા પાસેથી પકડી જેલ હવાલે કરી દીધો હતો. ખામધ્રોળ ખાતે બાલકૃષ્ણ સોસાયટી પાછળ આવેલ રાજમોતી પાર્કમાં રહેતો શૈલેષ કડવાભાઈ મકવાણા જૂનાગઢ કોર્ટના પ્રિન્સિપલ જજ દ્વારા ફેમિલી કોર્ટના કેસમાં સજા ફરમાવી હતી. પરંતુ સજા વોરંટની બજવણી ન થાય તે માટે શખ્સ નાસતો ફરતો હતો. સજા વોરંટ કોર્ટમાંથી અવારનવાર આવતું હતું પરંતુ આરોપી મળી આવતો ન હોય જેની ગંભીરતા લઈ જૂનાગઢ તાલુકા પોલીસ મથકના વુમન પીઆઇ એફ. બી. ગગનીયાએ આરોપીને શોધી કાઢવા સૂચના જારી કરી હતી જે અન્વયે સર્વેલન્સ સ્ક્વોડે તપાસ હાથ ધરી ટેકનિકલ સોર્સ તથા ખાનગી બાતમીદારોની મદદથી સજા વોરંટનો આરોપી શૈલેષ મકવાણાને જૂનાગઢ શહેરમાં મજેવડી દરવાજા ખાતેથી શોધી સજા વોરંટ આધારે જિલ્લા જેલ ખાતે મોકલી આપ્યો હતો.

દુષ્કર્મનો મામલો:વિજપડીમાં સગીરાને લગ્નની લાલચ આપી દુષ્કર્મ આચર્યું

અમરેલી વિજપડીમાં રહેતા સગીરાના પિતાએ જેસર તાલુકાના સરેરા ગામના સંજય નાથા ચૌહાણ સામે સાવરકુંડલા રૂરલ પોલીસ મથકમાં ગુનો નોંધાવતા જણાવ્યું હતું કે 15 વર્ષિય સગીરનું 20 નવેમ્બર તથા ચારેક માસ દરમિયાન સંજય ચૌહાણે અવાર નવાર અપહરણ કર્યું હતું. તેમજ લગ્નની લાલચ આપી વિજપડી અને નવાગામ જાબુંડા વિસ્તારમાં લય જઈ અવારનવાર દુષ્કર્મ આચર્યું હતું. સગીરાના ભાઈને મારી નાખવાની ધમકી આપી હતી.

સિટી ડેવલોપમેન્ટ પ્રોજેક્ટ:જૂનાગઢમાં જોશીપરા બ્રિજની 75% કામગીરી બાકી, રેલવે મંજૂરી બાદ વેગ મળશે‎

સિટી ડેવલોપમેન્ટ પ્રોજેક્ટ મુજબ જોષીપરા વિસ્તારમાં રૂપિયા 59 કરોડના ખર્ચે બની રહેલો જોશીપરા બ્રિજ 2027 માં તૈયાર થઇ જશે, જેની હાલ 75% કામગીરી બાકી છે. રેલવે મંજૂરી બાદ કામગીરીને વેગ મળશે‎. આ સિવાય પોરબંદરમાં મેડિકલ કોલેજની હોસ્પિટલ બિલ્ડીંગ‎ નિર્માણ પામવા જઈ રહી છે અને અમરેલીમાં સેન્ટર પોઇન્ટથી ઠેબી ડેમ સુધીનો રોડ‎ નિર્માણાધીન છે. જોષીપરા ફાટક બ્રિજ ફાટક પર બ્રિજ નિર્માણની કામગીરી ચાલી રહી છે. જે ડિસેમ્બર 2027 સુધીમાં 59 કરોડના ખર્ચે બ્રિજની કામગીરી પૂર્ણ થશે જે બાદ સીટી તરફ જવા માટેની પડી રહેલા ટ્રાફિક સમસ્યા હળવી થશે. કોણ બનાવે છે : મનપા બાંધકામ શાખાકામ ક્યારે પૂરું થશે : ડિસેમ્બર 2027અતિયારે કેટલું કામ પૂર્ણ થયું છે ને કેટલું બાકી : હાલ જોશીપરા બ્રિજની કામગીરી 25 ટકા પૂર્ણ થઈ છે. 75 ટકા કામગીરી ચાલી રહી છે. રેલવે મંજૂરી મળે તે મુજબ કામગીરી થઇ રહી છે.કેટલો ખર્ચ થશે : 59 કરોડનો ખર્ચે થશે પ્રોજેક્ટ - સેન્ટર પોઇન્ટથી ઠેબી ડેમ સુધીનો રોડ‎અમરેલીમાં રાધેશ્યામ ચોકડીથી લાઠી રોડ બાયપાસ સુધી તથા સેન્ટર પોઇન્ટથી ઠેબી ડેમ સુધી આરસીસી રોડનું કામ ચાલી રહું છે. હાલમાં ઠેબી ડેમ તરફનો માર્ગ વન વે કરી દેવાયો છે. કોણ બનાવે છે: માર્ગ અને મકાન વિભાગકામની રકમ: 10 કરોડકામ ક્યારે શરૂ થયું: 2025કામ ક્યારે પૂર્ણ થશે: 2026કેટલા ટકા કામ થયું: 25 ટકા પ્રોજેકટ - મેડિકલ કોલેજની હોસ્પિટલ બિલ્ડીંગ‎ પોરબંદરના ધરમપુર નજીક જી.એમ.ઇ.આર.એસ.મેડિકલ કોલેજ અને હોસ્પિટલ સહિતના બિલ્ડીંગનું કામ વર્ષ 2022માં શરૂ કરવામાં આવ્યું હતું. કોણ બનાવે છે- જી.એમ.ઇ.આર.એસ.ક્યારે કામ પૂર્ણ કરવાનું હતું- સપ્ટેમ્બર 2024અત્યારે કેટલું કામ થયું અને કેટલું બાકી- 85 ટકા કામ પૂર્ણ 15 ટકા બાકી કામ મોડું થવાનું કારણ- એરપોર્ટની એન.ઓ.સી અને પાછળથી વધારાના પ્રોજેકટના બિલ્ડીંગના કામ વધી જતાં ક્યારે સંપૂર્ણ કામ પૂરું થશે-ડિસેમ્બર 2025 સંપૂર્ણ કામ પૂરું થશે. પ્રોજેક્ટ - અમરેલી ખીજડિયા બ્રોડગેજ રેલ લાઈન 1912માં અમરેલીમાં રેલવે સ્ટેશન બન્યું હતું. અને જુનાગઢથી અમરેલી થઈ ખીજડીયાની રેલ લાઈન નખાઈ હતી.હવે રેલ મંત્રાલય દ્વારા અમરેલીથી ખીજડિયા સુધી બ્રોડગેજનું કામ શરૂ કરાયું છે.અહીં જૂની મીટરગેજ લાઇન ઉખેડી નાખવામાં આવી છે.કોણ બનાવે છે: ભારતીય રેલવે બોર્ડકામની રકમ: 178.07 કરોડકામ ક્યારે શરૂ થયું: 2025કામક્યારે પૂર્ણ થશે: 2027કેટલા ટકા કામ થયું: 25 ટકા

કચ્છભરમાંથી શ્રદ્ધાળુઓ ઉમટશે:સરહદના સંત્રી કાળાડુંગરે દત્ત જયંતિ રજત ઉત્સવ

કચ્છની પશ્ચિમ સીમાના સંત્રી એવા પ્રખ્યાત કાળા ડુંગર પર પવિત્ર દત્તાત્રેય તીર્થધામ પર ચાલુવર્ષે દત્ત જયંતી રજત ઉત્સવ ઉજવવામાં આવશે. ભૂકંપ બાદ વર્ષ 2001થી શરૂ થયેલ દત્ત જયંતિ હવે રજત ઉત્સવના ભવ્ય મુકામે પહોંચી ગયો છે. છેલ્લા પચ્ચીસ વર્ષથી કચ્છના સર્વોચ્ચ સ્થાને ધાર્મિક શ્રધ્ધા, સામાજિક સંગઠન, સમરસતા તથા દેશ ભકિત અને રાષ્ટ્રીય એકતાના ત્રિવેણી સંગમરૂપે આયોજન થતું રહ્યું છે. દત્ત રજત જયંતિ ઉત્સવ કાર્યક્રમમાં પદયાત્રા ૨ ડિસેમ્બરે મંગળવારના સવારે ૬.૩૦ કલાકે શ્રી રામ રોટી અને છાશ કેન્દ્ર, રામ મંદિર, રામધુન પાછળ, હમીરસર તળાવ પાસે ભુજથી પ્રસ્થાન થશે. જેમાં વિવિધ ગામોથી દત્ત શીખર કાળા ડુંગર પ્રયાણ કરવામાં આવશે. આ પદયાત્રા મંગળવારે બપોરે ભોજન, વિશ્રાંતિ, લોરિયા ફાટક પાસે, રાત્રી ભોજન નિવાસ મારવાડા વાસ, રામદેવજી મંદિર પાસે, ભીરંડીયારા કરશે. પદયાત્રા 3 ડિસેમ્બર બુધવારે બપોરે ભોજન, વિશ્રાંતિ, પ્રમુખ સ્વામિનારાયણ નગર, ખાવડા રાત્રી ભોજન વિશ્રાંતિ દત્ત મંદિર કાળા ડુંગર ખાતે કરશે. પદયાત્રાના સમગ્ર માર્ગમાં ચા-પાણી નાસ્તો - ભોજન તથા રહેવા અને તબીબી સહિતની સુવિધા વિવિધ સ્થાનો સાથે સેવા કેમ્પો તેમજ ફરતા વાહનો દ્રારા (મોબાઇલ સર્વિસ) પદયાત્રી ભાઇ-બહેનો માટે વિશેષ વ્યવસ્થા ગોઠવવામાં આવી છે. સંત સત્સંગ તથા આરાધીવાણીનું આયોજન ૩ ડિસેમ્બરે, બુધવારે રાત્રે 10 વાગ્યે યોજાશે. 4 ડિસેમ્બર ગુરુવારે હવન યજ્ઞ 9 વાગ્યે, મહા પ્રસાદ અને બપોરે અને ૨ થી 3.30 કલાક ધર્મસભાનું આયોજન કરાયું છે. શ્રી દત્ત જન્મોત્સવ અને મહાઆરતી સાંજે 4 થી 4:30 સુધી યોજાશે. જેમાં 1111 બહેનો દ્વારા મહારાસનું પણ વિશિષ્ટ આયોજન 4:30 થી 5:30 કલાક સુધી કરાયું છે. આયોજનને સફળ બનાવવા દત્ત વિકાસ સમિતિના પ્રમુખ વિપુલભાઈ તન્ના, મંત્રી પંકજભાઈ રાજદે, સંયોજક પ્રવીણભાઈ પુજારા, સહસંયોજક દિનેશભાઇ ગજજર, સીમા જાગરણ મંચ પશ્ચિમ કચ્છના સંયોજક રાજેશભાઈ જોષી સહીત તમામ કાર્યકર્તાઓ રજત જયંતીના આયોજનને સફળ બનાવવા ખડેપગે દિવસરાત કાર્ય કરી રહ્યા છે. સરહદી ગામડામાં હિન્દુ ઘરે-ઘરે લહેરાશે ભગવો ધ્વજસીમા જન જાગરણ બને અને સમરસતાના ભાવથી કાર્યકર્તાઓ રૂબરૂ છેવાડાના સરહદી ગામડાઓ સુધી પ્રવાસ કરીને આમંત્રણ પાઠવી રહ્યા છે. તથા દરેક હિન્દૂ ઘરે જઈને ભાગવા ધ્વજ અર્પણ કરાયા હતા. દત્ત જયંતીના દિવસે દરેક હિન્દૂ પરિવાર પોતાના ઘર પર ભગવો ધ્વજ લહેરાવશે. આ કાર્યમાં વિશ્વ હિન્દૂ પરિષદના જિલ્લા મંત્રી નાજાભાઇ ભરવાડ, સહમંત્રી પ્રવીણભાઈ આહીર, સુમરાસરના દીપકભાઈ અને રાજેશભાઈ જોડાયા હતા. લોંગ પ્રસાદ માટે ઘરે ઘરેથી મુઠ્ઠી ચોખા જશેદત્તશિખર કાળા ડુંગર પર સ્વયં ભગવાન શ્રી દત્તાત્રેયે શરૂ કરેલ અનોખા લોંગ પ્રસાદની પ્રાચીન પરંપરામાં સહભાગી બનવા ભાવિક ભાઈ-બહેનો પોતાના ઘર તથા શેરી, મહોલ્લા, ગામ અને શહેરના પ્રત્યેક ઘર- ઘરમાંથી મુઠ્ઠી ચોખા (અક્ષત) સાથે લાવી પ્રથમ દત્ત મંદિરમાં ધરાવશે અને બાદમાં તે ચોખાથી પ્રસાદ બનાવી દત્તભગવાનના પ્રિય એવા લોંગને અર્પણ કરાશે.

સાઇબર સેફ્ટીનો સેમિનાર યોજાયો‎:કોલેજની છાત્રોઓએ નાટક દ્વારા ફ્રોડથી બચવાના ઉપાયો સમજાવ્યા

શહેરની બહાઉદ્દીન સરકારી વિનયન કોલેજમાં ચાલતા સાઇબર સિક્યોરીટી પ્રોગ્રામ ‌‌‌‌‌‌‌‌‌કવચ અંતર્ગત જાગૃતિ કાર્યક્રમ યોજાયો હતો. સંસ્થાના આચાર્ય ડૉ. જે.આર.વાંઝાના માર્ગદર્શનથી કોલેજના વિદ્યાર્થીઓ દ્વારા એન.બી.કાંબલિયા કન્યા વિદ્યાલય ખાતે સોશિયલ સાઇબર સિક્યોરિટી વિષયક સેમિનારનું આયોજન કરવામાં આવ્યું હતું. આ કાર્યક્રમમાં કોલેજના સમાજશાસ્ત્ર વિભાગની વિદ્યાર્થીનીઓ પંપાણિયા નિધિ, મેઘનાથી જાનકી, જીલ કરમૂર, ઉર્વીશા બમરોટિયા, અને મોનિકા ચંદ્રવડિયા દ્વારા એક નાટક તૈયાર કરીને કન્યા વિદ્યાલયની બહેનો સમક્ષ રજૂ કરાયું હતું. નાટક દ્વારા સોશિયલ મીડિયામાં ફ્રોડનો શિકાર ન બનવા માટેની સાવધાનીઓ અને ફ્રોડની ઘટના બને તો શું કરવું તે અંગેની માહિતી આપવામાં આવી હતી. આ કાર્યક્રમમાં કોર્ડીનેટર ડૉ. મેઘરાજસિંહ જાડેજા દ્વારા વિદ્યાર્થીઓના પ્રશ્નોના જવાબો આપવામાં આવ્યા હતા અને કવચ સમિતિના કોર્ડીનેટર ડૉ. જીગ્નેશ કાચા દ્વારા સમગ્ર આયોજનનું સંકલન કરાયું હતું. બહાઉદ્દીન કોલેજ સતત આ અભિયાન દ્વારા જૂનાગઢમાં કોઈ દીકરી સાઇબર ફ્રોડનો શિકાર ન બને તે માટે જાગૃતિ લાવવા અભિયાન ચાવવામાં આવી રહ્યું છે.

VHP દ્વારા સંવાદ ગોષ્ઠી:વિશ્વ હિન્દુ પરિષદ દ્વારા ગુરુ સાહેબના શહીદી વર્ષ નિમિત્તે સામાજિક સમરસતા માટે સંવાદ સંગોષ્ઠિ યોજાઈ

વિશ્વ હિન્દુ પરિષદ જૂનાગઢ મહાનગર દ્વારા નવમા પાતશાહ શ્રી ગુરૂ તેગબહાદુર સાહેબજીના 350માં શહીદી દિવસ અને શ્રી ગુરુ ગોવિંદસિંહ સાહેબના 350 વર્ષીય ગુરુગાદી વર્ષ નિમિત્તે જૂનાગઢના બી.એ.પી.એસ, અક્ષર મંદિર ખાતે સંવાદ સંગોષ્ઠિનું આયોજન કરવામાં આવ્યું હતું. આ કાર્યક્રમનો હેતુ હિન્દુ સમાજની એકતા અને સમરસતા વધારવાનો હતો. વીએચપીના કેન્દ્રીય સહસંગઠન મહામંત્રી વિનાયકરાવજી દેશપાંડેએ વક્તા તરીકે સંબોધન કર્યું હતું. તેમણે સમાજમાંથી છૂત-અછૂત અને ભેદભાવ સમાપ્ત કરીને સમગ્ર હિન્દુ સમાજને સંગઠિત કરવાના વીએચપીના ધ્યેય પર ભાર મૂક્યો હતો. આ પ્રસંગે ધર્મવિનય સ્વામી, ભૂતનાથ મંદિરના મહંત મહેશગીરી બાપુ અને ગુરુદ્વારાના હેડ ગ્રંથી ભાઈસાહેબ મનીસિંઘ સહિત વિવિધ જ્ઞાતિઓના સામાજિક અને રાજકીય આગેવાનો ઉપસ્થિત રહ્યા હતા. કાર્યક્રમની સફળતા માટે જૂનાગઢ મહાનગર મંત્રી વિપુલભાઈ રાવત સહિતના કાર્યકર્તાઓએ જહેમત ઉઠાવી હતી.

ફોર્મ ડિજીટાઈઝેશનની કામગીરી:મતદાર યાદી ગણતરી ફોર્મના ડિજીટાઈઝેશનમાં 83.34 ટકા કામ સાથે જૂનાગઢ જિલ્લો રાજ્યમાં આઠમા ક્રમે !

રાજ્યભરમાં 2025ની મતદાર યાદીમાં નોંધાયેલા 5 કરોડથી વધુ મતદારોને ગણતરી ફોર્મનું વિતરણ કરી દેવાયું છે. રાજ્યના 33 જિલ્લાઓમાંથી મોટાભાગના જિલ્લાઓમાં 100 ટકા ફોર્મ વિતરણ થઈ જતા હવે આ ફોર્મ ડિજીટાઈઝેશનની કામગીરી પુરજોશમાં ચાલી રહી છે. ડિજિટલાઈઝેશનની કામગીરીમાં ટોપ ટેન જિલ્લાની યાદી જાહેર કરાઈ છે, જેમાં 91.41 ટકા ગણતરી ફોર્મના ડિજીટાઈઝેશન સાથે ડાંગ જિલ્લો પ્રથમ ક્રમાંક પર છે અને 83.34 ટકા સાથે જૂનાગઢ આઠમાં ક્રમે છે. ઉલ્લેખનીય છે કે, ગુજરાતમાં મતદાર યાદીની ખાસ સઘન સુધારણા ઝુંબેશમાં ગણતરીનો તબક્કો 4થી ડિસેમ્બર સુધી ચાલવાનો છે. ગણતરી દરમિયાન રાજ્યભરમાં 14.16 લાખથી વધુ અવસાન પામેલ મતદારો મતદાર યાદીમાં સામેલ હતા. જ્યારે 2.88 લાખથી વધુ મતદારો તેમના સરનામે ગેરહાજર જોવા મળ્યા, સાથોસાથ 18 લાખથી વધુ મતદારો કાયમી સ્થળાંતરિત થઈ ચૂક્યા હોવાનું ધ્યાને આવ્યું છે. તદુપરાંત 2.26 લાખથી વધુ મતદારો રિપીટેડ હોવાનું ધ્યાનમાં આવ્યું છે.

વીજ ચોરી પકડાઈ:ગાંધીગ્રામમાં બુટલેગરોના 2ના ઘરમાંથી વીજ ચોરી પકડાઈ

લૂંટ, અપહરણ, બળજબરીથી પૈસા કઢાવવાની કોશિશ સહિતના ગંભીર ગુનામાં અવારનવાર સંડોવાયેલા હીટ લિસ્ટ ગુનેગારોની મિલકતની યાદી તૈયાર કરી ગેરકાયદે દબાણ અથવા કબજો કરેલ હોય અને ગેરકાયદે વિવિધ જોડાણ લીધેલ હોય એવા ગુનેગારોની 100 કલાકમાં યાદી તૈયાર કરી કાર્યવાહી હાથ ધરવામાં આવી હતી. દરમિયાન ગાંધીગ્રામમાં રહેતા બુટલેગર કમલેશ લખમણ રાડા તથા અલ્પેશ બાલાભાઈ કોડીયાતર પોતાના રહેણાંક મકાનમાં પાવર ચોરી કરતા હોવાની હકીકત મળતા સી ડિવિઝન પીઆઈ એ. બી. ગોહિલે પીજીવીસીએલના અધિકારીઓને જાણ કરી તેની સાથે સંકલનમાં રહી ગેરકાયદેસરનું વીજ જોડાણ દૂર કરાવ્યું હતું અને પાવર ચોરી મુદે રૂપિયા 1,32,612નો દંડ કર્યો હતો. 100 કલાક અંતર્ગત સામાજિક તત્વોને પોલીસ સ્ટેશન પર બોલાવી હાલ કઈ પ્રવૃત્તિ સાથે જોડાયેલ છે તે અંગે તપાસ હાથ ધરવામાં આવી છે.

ભાસ્કર વિશેષ:મેઘાણી નગરમાં સાર્વજનિક પ્લોટ પર પાણીના સમ્પનો વિવાદ

જૂનાગઢ શહેરના બિલખા રોડ સ્થિત સર્વે નંબર 309 પર ગુજરાત હાઉસિંગ બોર્ડ (ગુ.હા.બોર્ડ)ની મેઘાણી નગર યોજના હેઠળની જમીન પર બે વિશાળ પાણીના ટાંકા અને સમ્પનું બાંધકામ ચાલી રહ્યું છે, જેને લઈને વસાહતીઓમાં ભારે રોષ છે. વર્ષ 1972-73માં ગુ.હા.બોર્ડે નગરપાલિકા પાસેથી 59,774 ચો.વાર જમીન સંપાદિત કરી હતી અને LIG સ્કીમ હેઠળ 240 મકાનો બાંધ્યા હતા. આ જમીનની કિંમત વ્યાજ સહિત રહિશો પાસેથી વસૂલી તા. 8-10-1993ના રોજ ગુ.હા.બોર્ડ દ્વારા ચૂકવાઈ હોવાથી, આ જમીન ગુ.હા.બોર્ડની માલિકીની છે. હાલમાં, આ વસાહતની જમીનના ટાઇટલ ક્લિયરન્સ બાબતનો રે.દી. દાવા નંબર 253/2019 જૂનાગઢ સિવિલ કોર્ટમાં પેન્ડિંગ છે. આ સંજોગોમાં, સોસાયટીના સાર્વજનિક પ્લોટ, જ્યાં ગાયત્રી મંદિર આવેલું છે, તેના પર અચાનક તંત્ર દ્વારા પાણીના ટાંકા અને સમ્પનું બાંધકામ શરૂ થતાં વસાહતીઓ સ્તબ્ધ છે. રહિશોનો મુખ્ય સવાલ એ છે કે એકવાર જમીનની કિંમત વસૂલ્યા પછી અને કોર્ટમાં દાવો પેન્ડિંગ હોવા છતાં, જમીન ધારણકર્તા (વસાહતીઓ)ની જાણ કે મંજૂરી વગર તંત્ર કઈ રીતે જમીનનું અધિગ્રહણ કરી શકે? વસાહતીઓ ભીતિ સેવી રહ્યા છે કે ગુ.હા.બોર્ડ, જે તેમને મકાનોનો નિર્વિવાદિત ટાઇટલ કબ્જો આપી શક્યું નથી, તે હવે અન્ય બે સાર્વજનિક પ્લોટને પણ તંત્રની ‘ખાલસા નીતિ'થી સુરક્ષિત રાખી શકશે ખરું? આ મામલે ગુ.હા.બોર્ડનું નિષ્ક્રિય વલણ શંકા પ્રેરે છે અને વસાહતીઓના મનમાં ''''લેન્ડ ગ્રેબિંગ''''નો કાયદો તંત્રને લાગુ ન થતો હોય તેવી છબી ઊભી થઈ છે. વસાહતીઓ દ્વારા ગુ.હા.બોર્ડના સક્ષમ અધિકારીઓ પાસે સ્થળની મુલાકાત લઈ, તેમના કાયદેસરના હક્ક ભોગવટા બાબતે વિશ્વાસ આપવા માંગણી કરાઈ છે.

કાર્યવાહી:મુન્દ્રાના પત્રી વિસ્તારમાં રોયલ્ટી અને ઓવરલોડ ટ્રકને ટાસ્ક ફોર્સે ઝડપી પાડી

મુન્દ્રા તાલુકાના પત્રી વિસ્તારમાં કચ્છના કલેક્ટર દ્વારા રચાયેલ જિલ્લા ટાસ્ક ફોર્સે ગેરકાયદે રેતી પરિવહન સામે કાર્યવાહી હાથ ધરી છે. ટાસ્ક ફોર્સની ટીમ પેટ્રોલિંગમાં હતી તે દરમ્યાન શંકાસ્પદ વાહનોને રોકીને તપાસ હાથ ધરવામાં આવી હતી. જેમાં GJ 13 AW 5780 નંબરની ટ્રકમાંથી રોયલ્ટી વગર 26.7 મેટ્રિક ટન ગેરકાયદેરસ રેતી મળી આવી હતી. સાથે જ બીજી ટ્રક GJ 39 TA 6611 ઓવરલોડ 21.6 મેટ્રિક ટન રેતી લઈને જતી હોવાનું જણાતાં બંને વાહનોને સ્થળ પર જ અટકાવવામાં આવ્યા હતા. ટાસ્ક ફોર્સની ટીમે તરત જ બંને ટ્રકો તાબામાં લઈ જરૂરી દસ્તાવેજોની તપાસ હાથ ધરી હતી. ગેરકાયદે રેતી વહન અને ઓવરલોડિંગ બંને ગંભીર ગુનાઓ ગણાતા હોવાને કારણે વાહનોને વધુ કાર્યવાહી માટે પ્રાગપર પોલીસને સુપરત કરવામાં આવ્યા છે. આ અંગે અધિકારીઓએ જણાવ્યું હતું કે કચ્છ જિલ્લામાં રેતીના ગેરકાયદે પરિવહનને રોકવા માટે જિલ્લા ટાસ્ક ફોર્સની ટીમ સતત પ્રયાસો કરી રહી છે અને નિયમોના ભંગમાં ઝડપાયેલા વાહનો વિરુદ્ધ સખ્ત કાર્યવાહી કરવામાં આવે છે.

સન્ડે ફોટો સ્ટોરી:જૂનાગઢના મકબરાની જાળવણી સામે સવાલ, ઘુમ્મટનું રીપેરીંગ શરૂ

જૂનાગઢનું ગૌરવ અને નવાબી શાસનકાળની બેનમૂન વારસો ગણાતા મહાબત મકબરો અને બહાઉદ્દીન મકબરાનું રિનોવેશનનું કામ ફરી એકવાર ખાનગી કંપની દ્વારા શરૂ કરવામાં આવ્યું છે, ત્યારે આ ઐતિહાસિક સ્થાપત્યની જાળવણી સામે ગંભીર સવાલો ઊભા થયા છે. જે ધરોહરને 'રાજ્ય સંરક્ષિત સ્મારક' તરીકે જાહેર કરાઈ હોય, તેને તૂટવાની કે જર્જરિત થવાની ફરજ કેમ પડી? વર્ષો સુધી સરકારી તંત્ર દ્વારા તેની જાળવણી શા માટે ન થઈ શકી, જેનું પરિણામ આજે કરોડોના ખર્ચે રિસ્ટોરેશનના સ્વરૂપે સામે આવ્યું છે? આ મકબરાનું રિનોવેશન અગાઉ પણ કરોડોના ખર્ચે કરવામાં આવ્યું હતું, તેમ છતાં વરસાદની એક સીઝનમાં જ શેવાળ અને કાળાશ જામી જવાની ઘટનાએ કામગીરીની ગુણવત્તા પર સવાલો ઉઠાવ્યા હતા. હવે ફરીથી કામ શરૂ થયું છે, ત્યારે પ્રજાના પૈસે થતા આ કામનો ખર્ચ કેટલો છે અને કઈ શરતો પર ખાનગી કંપનીને કામ સોંપાયું છે, તેની કોઈ સત્તાવાર વિગત તંત્ર દ્વારા જાહેર કરવામાં આવી નથી.

પાલઘરમાં બનાવટી દસ્તાવેજો દ્વારા રૃ.111 કરોડની ઉચાપતનો આરોપ

નગર પંચાયતના વડાની ધરપકડ દસ્તાવેજો પર સહી અને પત્ર લખવાની શૈલી અલગ, કરોડને બદલે બિલિયન શબ્દનો ઉપયોગ મુંબઈ - પાલઘર જિલ્લાના વિક્રમગઢ ખાતે સ્થાનિક નગર પંચાયતના પ્રમુખની ધરપકડ કરવામાં આવી છે. આરોપી સામે બનાવટી દસ્તાવેજો રજૂ કરીને રૃ.૧૧૧ કરોડની ઉચાપતનો આરોપ છે.

આયોજન:મતદારયાદી ખાસ સઘન સુધારણાના ઝુંબેશ કેમ્પમાં 3,970 ફોર્મ જમા કરાવાયા

ચૂંટણી પંચ દ્વારા મતદારયાદી ખાસ સઘન સુધારણા કાર્યક્રમ જાહેર કરવામાં આવ્યો છે. જે અનુસંધાને કચ્છમાં હજુ પણ જે લોકોએ સુધારણા ફોર્મ જમા નથી કરાવ્યા, તેવા મતદારો માટે કચ્છની તમામ મામલતદાર કચેરી ખાતે 2 દિવસીય ખાસ ઝુંબેશ કેમ્પનું આયોજન કરવામાં આવ્યું છે. પ્રથમ દિવસે આ કેમ્પમાં 3,970 મતદારોએ પોતાના બાકી રહેલા ફોર્મ જમા કરાવ્યા હતો. જેમાં મામલતદાર કચેરી નલીયા, નખત્રાણા, લખપત, માંડવી, મુન્દ્રા, ભુજ (શહેર), ભુજ (ગ્રામ્ય), અંજારમાં મામલતદાર કચેરી અને ભુજ ગ્રામ્ય કચેરી તેમજ ભચાઉ, રાપરની મામલતદાર કચેરી ખાતે ખાસ ઝુંબેશ કેમ્પનું આયોજન કરવામાં આવ્યું હતું. સાથે જ ગાંધીધામમાં સી. જી. ગીધવાણી હોલ, ગળપાદરમાં ગાયત્રીકૃપા પ્રાથમિક શાળા ખાતે પણ મતદાર યાદી સઘન સુધારણા કાર્યક્રમ અંતર્ગત ખાસ ઝુંબેશ કેમ્પનું આયોજન કરવામાં આવ્યું છે. જેમાં BLO અને વહીવટી તંત્રના અધિકારીઓ નાગરિકોને મદદરૂપ બનવાનો પ્રયાસ કરી રહ્યા છે. જે મતદારોએ હજુ પણ ફોર્મ જમા નથી કરાવ્યા તેમના માટે આજે ફોર્મ જમા કરવાની આજે અંતિમ તક છે. જેઓને ગણતરી ફોર્મ મળેલ ન હોય, અથવા ગણતરી ફોર્મ પરત આપવાનું બાકી હોય તેવા મતદારોને ગણતરી ફોર્મ ભરવા, 2002ની મતદારયાદીમાંથી પોતાનું કે માતા-પિતા-દાદા-દાદીનું નામ શોધવા અને ભરેલા ગણતરી ફોર્મ સ્વીકારવા સહિતની કામગીરી કરવામાં આવી આવી રહી છે. ઉલ્લેખનીય છે કે, આજે સવારે ઉપરોક્ત સ્થળે સવારે 10 થી સાંજના 5 વાગ્યા સુધી સુધી ખાસ કેમ્પનું આયોજન કરવામાં આવ્યું છે. જેમાં મતદારો ગણતરી ફોર્મ ભરીને કેમ્પ ખાતે જમા કરાવી શકશે.

ભાસ્કર ફોલોઅપ:પૂર્વ મેયરના પુત્રની જમીનમાં ખોદાણ બાદ ખાડા પૂરવાનું શરૂ !

જૂનાગઢ જિલ્લાના વિજાપુર ગામમાં આવેલી લીઝની જમીન ફરી એકવાર વિવાદના વમળમાં ફસાઈ છે. આ જમીન પર ગેરકાયદેસર ખોદાણ થયાની ગંભીર બાબત સામે આવ્યા બાદ તંત્ર દ્વારા કોઈ સત્તાવાર પગલાં લેવાય તે પહેલાં જ, આ જમીન પર ખોદાયેલા ખાડાઓને તાત્કાલિક પુરવાનું કામ શરૂ કરી દેવામાં આવ્યું છે. આ ઝડપી કાર્યવાહીએ અનેક સવાલો ઊભા કર્યા છે.પૂર્વ મેયર ધીરુ ગોહેલના પુત્ર વિવેક ગોહેલ અને મનીષ મારવાડીયાની જમીન ઉપર કામગીરી થતી હોવાનું સરપંચ જણાવ્યું હતું. આ સમગ્ર મામલો વિજાપુરની સર્વે નંબરો ધરાવતી જમીન સાથે જોડાયેલો છે. સ્થાનિક સૂત્રોના જણાવ્યા અનુસાર, આ જમીનમાં કોઈપણ પ્રકારની કાયદેસર લીઝ મેળવ્યા વિના જ મોટા પાયે માટીનું ખોદાણ કરવામાં આવ્યું હતું, જે સ્પષ્ટપણે સરકારી નિયમોનું ઉલ્લંઘન છે. ગેરકાયદેસર પ્રવૃત્તિ પ્રકાશમાં આવતા જ, તંત્ર દ્વારા કોઈ મોટી કાર્યવાહી થાય તે પહેલાં જ સંબંધિત ઈસમો દ્વારા રાતોરાત આ ખાડાઓને માટીથી પૂરવાની પ્રક્રિયા શરૂ કરી દેવામાં આવી હતી. ખાસ કરીને, આ જમીનમાં પૂર્વ મેયર ધીરુ ગોહેલના પુત્ર વિવેક ગોહેલ અને મનીષ મારવાડીયાની સંડોવણી હોવાનું ચર્ચાઈ રહ્યું છે. આ સમગ્ર મામલે જિલ્લા વહીવટી તંત્ર દ્વારા તટસ્થ અને ઊંડી તપાસ કરવામાં આવે અને ગેરકાયદેસર ખોદાણ કરનારાઓ સામે કાયદેસરની કડક કાર્યવાહી કરવામાં આવે તે જરૂરી છે, જેથી સરકારી જમીનો પર થતા આવા અતિક્રમણોને રોકી શકાય. ખનીજ ચોરોને છોડવામાં નહીં આવે જૂનાગઢ જિલ્લામાં ક્યાંય પણ ખનીજ ચોરી થઈ હોય કોઈપણ મોટા માથા હોય તેને છોડવામાં નહીં આવે. આ મામલે જિલ્લા કલેકટર થી માંડી રાજ્ય સરકાર સુધી તમામને ટૂંક સમયમાં રજૂઆત કરીને જે પણ દોષિતો હશે તેને સજા કરવામાં આવશે > હરેશભાઈ ઠુંમર, જૂનાગઢ જિલ્લા પંચાયત પ્રમુખ

કચ્છ અને હિમાલયન આર્કને સૌથી જોખમી શ્રેણીમાં મુકાયા:હવે ભૂકંપ ઝોન 6માં સમાવેશ, ભુજમાં હજુ પણ 80 ટકા ઈમારતો જોખમી

ભારતે સિસ્મિક સુરક્ષાની દિશામાં ઐતિહાસિક પગલું ભરીને રાષ્ટ્રીય સિસ્મિક ઝોનેશન નકશામાં મોટો સુધારો જાહેર કર્યો છે. બ્યુરો ઑફ ઇન્ડિયન સ્ટાન્ડર્ડ્સ દ્વારા જાહેર કરાયેલા આ નવા નકશામાં સમગ્ર કચ્છ અને હિમાલયન આર્કને પહેલી વાર સૌથી વધુ જોખમવાળા ઝોન–6 માં સામેલ કરવામાં આવ્યો છે. ભૂકંપના લીધે 13 હજારથી વધુ લોકોના મોત થઇ ગયા હોવા છતાં કચ્છે બોધપાઠ લીધો નથી. અને ભુજમાં હજુ પણ 80 ટકા બહુમાળી ઈમારતો જોખમી ઊભી છે. તેને તોડી પાડવા સરકારી કચેરીઓ એક મેકને ખો આપી રહી છે. અત્યાર સુધી કચ્છનો સમાવેશ ભૂકંપ ઝોન-5માં થતો હતો. ભુજની વાત કરીએ તો ધરતીકંપ ઝોન-5 માં સમાવિષ્ટ જિલ્લા મથક ભુજ બહુમાળી ઇમારતોથી ઘેરાયેલું છે. ધરતીકંપ બાદ ખૂબ જર્જરિત જી-5 કેટેગરીમાં આવતી ઈમારતોને તોડવામાં આવી, પરંતુ હજુ અંદાજે 100થી વધુ ઇમારતો એવી છે કે જે જી - 3 અથવા તો જી-4 માંથી 3માં રૂપાંતરિત કરવામાં આવી હતી. ભુજના વાણીયાવાડ, હોસ્પિટલ રોડ કે લાલ ટેકરી જેવા વિસ્તારમાં અનેક બિલ્ડિંગ આવેલી છે. કચ્છનો હવે ઝોન-6માં સમાવેશ થતા કચ્છમાં બાંધકામ ક્ષેત્રે પણ અનેક ફેરફારો કરવાની જરીરીયાત ઉભી થશે. કેમ કે કચ્છમાં મોટા ભૂકંપની શક્યતાઓ પણ સૌથી વધુ રહેલી છે. કચ્છની સાથે દેશનો 61% વિસ્તાર હવે મધ્યમથી ઊંચા ભૂકંપ જોખમ હેઠળ આવે છે, એટલે કે ભારતની બે તૃતીયાંશથી વધુ વસ્તી સિસ્મિકલી સક્રિય વિસ્તારોમાં વસે છે. નવા નકશા સાથે 2025 ધરતીકંપ ડિઝાઇન કોડ તરત અમલમાં લાવવો જરૂરી હોવાનું બીઆઈએસે સ્પષ્ટ કર્યું છે. નિષ્ણાતો માને છે કે નવા કોડ મુજબ બાંધકામ કરવાથી મોટી આપત્તિઓનું જોખમ ઓછું થઈ શકે છે. વાડિયા ઇન્સ્ટિટ્યૂટ ઑફ હિમાલયન જિઓલોજીના ડિરેક્ટર ડૉ. વિનોદ ગેલોથે જણાવ્યું કે હિમાલય સમગ્ર પણે સિસ્મિક તણાવ હેઠળ છે, એટલે તેને ઝોન 4–5માં વિભાજિત કરવાની કોઈ વૈજ્ઞાનિક જરૂર નહોતી. ઝોન–6માં આવેલા વિસ્તારોમાં ઈમારતોનું ભૂકંપ પ્રૂફ બાંધકામ કરવું પડશે. ભુજની ઈમારતોનું વાર્ષિક ઓડીટ જરૂરી કચ્છ જિલ્લાનો ભૂકંપ ઝોન-6માં સમાવેશ કરવામાં આવ્યો છે, તેનો સ્પષ્ટ અર્થ થાય છે કે કચ્છમાં મોટા ભૂકંપની શક્યતા સૌથી વધારે છે. હવે ભુજમાં આવેલી ઈમારતોનું વાર્ષિક ઓડીટ કરવું જરૂરી બની ગયું છે. જિયોલોજી, આર્કિટેક અને સિવિલ ઈજનેરની એક ટીમ બનાવીને શહેરમાં આવેલી તમામ ઈમારતોનું વાર્ષિક ઓડીટ જરૂરી બની ગયું છે. જો ઈમારત સુરક્ષિત ન હોય તો તેની ઝડપી ડીમોલેશન કરી દેવું જોઈએ, જેથી ભૂકંપ સમયે મોટી દુર્ઘટનાને ટાળી શકાય. - ગૌરવ ચોહાણ, આસિસ્ટન્ટ પ્રો કચ્છ યુનિ.

સ્ટેન્ડિંગ કમિટીની સૂચના‎:પંચેશ્વર સર્કલથી કોબા રોડ ડેવલપમેન્ટ પાછળ 156 કરોડનો ખર્ચ યોગ્ય નહીં, રિવાઇઝ પ્લાન માટે તાકીદ

ગાંધીનગર મહાનગરપાલિકામાં સામાન્ય સુવિધાના કામોમાં પણ બિનજરૂરી ઝાકમઝોળ કરીને પ્રોજેક્ટની મોટી કોસ્ટ દર્શાવવાની પ્રવૃત્તિ સામે સ્ટેન્ડિંગ કમિટી દ્વારા લાલબત્તી દેખાડવામાં આવી છે. પંચેશ્વર સર્કલથી ચ-0 સુધી 80 મીટર પહોળો આઇકોનિક રોડ ડેવલપ કરવા માટે 156 કરોડ રૂપિયાના ખર્ચની દરખાસ્ત કરવામાં આવી હતી. સ્ટેન્ડિંગ કમિટી દ્વારા આ રસ્તાના કામને મંજૂરી આપવામાં આવી છે પરંતુ બિનજરૂરી કામો દૂર કરી માત્ર રોડ, ફૂટપાથ અને બેઝીક સુવિધાના કામો કરીને પ્રોજેક્ટ કોસ્ટ ઘટાડી પ્લાન રીવાઇઝ કરવા ઇજનેરી શાખાને તાકીદ કરવામાં આવી છે. હાલ ભાઇજીપુરાથી સિગ્નેચર બ્રિજ સુધીનો પીડીપીયુ રોડ આઇકોનિક બનાવવામાં આવ્યો છે. જ્યારે આ રોડને પંચેશ્વર સર્કલથી ક્રોસ કરીને કોબા સર્કલ સુધીનો 4.4 કિલોમીટરનો નવો આઇકોનિક રોડ 80 મીટર પહોળાઇ સાથે ડેવલપ કરવાની દરખાસ્ત કરવામાં આવી હતી. આ માટે 156 કરોડના ટેન્ડરને મંજૂરી માટે સ્ટેન્ડિંગમાં મૂકવામાં આવ્યું હતું. આ રસ્તા પર આઇકોનિક રોડની જેમ બંને તરફ બ્યુટીફિકેશન, વોક વે, સાયકલ ટ્રેક, બેસવા માટે બેંચીસ, લેન્ડ સ્કેપીંગ સહિતની કામગીરીનો સમાવેશ ટેન્ડરમાં કરવામાં આવ્યો હતો. સ્ટેન્ડિંગ કમિટી દ્વારા આ કામ તો મંજૂર કરવામાં આવ્યું છે પરંતુ આઇકોનિકના બદલે નાગરિકો અને વાહનચાલકોની સુવિધા પુરતો રોડ, ફૂટપાથ અને અન્ય જરૂરી વ્યવસ્થા રાખવા કહેવાયું છે. આ માટેનો રીવાઇઝ પ્લાન તૈયાર કરી ખર્ચ ઘટાડવાની સૂચના આપવામાં આવી છે. આઇકોનિકના નામે 35 કરોડ સામાન્ય રીતે 80 મીટર પહોળો એક કિલોમીટર રોડ અને ફૂટપાથ બનાવવાનો ખર્ચ 13 કરોડ થાય છે. જ્યારે મહાનગરપાલિકા દ્વારા આઇકોનિક રોડ બનાવવાના નામે પ્રતિ કિલોમીટર 35 કરોડ લેખે કુલ 156 કરોડની દરખાસ્ત કરાઇ હતી. મહાપાલિકા દ્વારા વિવિધ વિસ્તારોનો વિકાસ કરી તેને આઇકોનિક બનાવવામાં આવી રહ્યા છેે. પણ તેમાં મહાપાલિકાનો ખર્ચ વધી જાય છે

રક્તદાન શિબિરનું આયોજન:ભાસ્કર જૂથના ચેરમેન સ્વ. રમેશજીની સ્મૃતિમાં રક્તદાન શિબિર યોજાઇ

ભાસ્કર ગૃપના સંસ્થાપક સ્વ. રમેશચંદ્ર અગ્રવાલના જન્મ દિવસને ભાસ્કર ગૃપ દ્વારા પ્રેરણા દિવસ તરીકે ઉજવવામાં આવે છે. સ્વ. રમેશજીના 81મા જન્મ દિવસ નિમિત્તે દેશભરમાં 209 શહેરોમાં રક્તદાન અભિયાનનું આયોજન કરવામાં આવ્યું હતું. ગાંધીનગરમાં પણ ભાસ્કર જૂથ દ્વારા હેપ્પી યુથ ક્લબ અને સિવિલ હોસ્પિટલની બ્લડ બેંકના સહયોગથી બ્લડ ડોનેશન કેમ્પ યોજાયો હતો. જેમાં શહેરના નાગરિકોએ ઉત્સાહભેર રક્તદાન કર્યુંં હતું. આ શિબિરમાં એકત્ર થયેલું લોહી સિવિલ હોસ્પિટલની બ્લડ બેંકમાં આપવામાં આવ્યું હતું. આ લોહી દુર્ઘટના પિડીત દર્દીઓ, થેલેસેમિયાના દર્દીઓ, ગર્ભવતી મહિલાઓ કે અન્ય જરૂરિયાતમંદ દર્દીઓનું જીવન બચાવી શકશે.

ચેઇન સ્નેચિંગનો મામલો:કુડાસણમાં મહિલાના ગળામાંથી ચેઇન ખેંચાઇ

ન્યૂ ગાંધીનગરમાં ચેઇન સ્નેચર નગ્ન નાચ કરી રહ્યા છે. ત્યારે ગત રોજ સાંજના સમયે એક વૃદ્ધા તેમના કામ અર્થે ઘરની બહાર નિકળ્યા હતા અને અક્ષત હેવસ સોસાયટીના ગેટ પાસે પહોંચતા એક બાઇક ઉપર ચેઇન સ્નેચર આવ્યો હતો અને વૃદ્ધાના ગળામાં હાથ નાખીને તેમણે પહેરેલી સોનાની ચેઇન તોડી ફરાર થઇ ગયો હતો. જેથી વૃદ્ધાના પતિએ ઇન્ફોસિટી પોલીસ મથકમાં આશરે 2 લાખની કિંમતની ચેઇન સ્નેચીંગની ફરિયાદ નોંધાવી હતી. અશોકભાઇ અંબાલાલ પટેલ (રહે, રાધે હોમ્સ, મૂળ, દેલવાડ) માણસામાં રેડીમેઇડ કપડાનો વેપાર કરે છે. ત્યારે તેમણે ફરિયાદ નોંધાવી હતી કે, ગત રોજ સાંજના સમયે તેમના પત્ની લીલાબેન એકલા ઘરેથી ચાલવા નિકળ્યા હતા અને કુડાસણમાં આવેલી અક્ષત હેવન સોસાયટી પાસે પહોંચ્યા હતા, તે દરમિયાન એક બાઇક ચાલક પાછળથી આવ્યો હતો અને ચાલતા જઇ રહેલા વૃદ્ધાના ગળામાં હાથ નાખતા તેમણે પહેરેલી સોનાની ચેઇન તોડીને ફરાર થઇ ગયો હતો.

નાણાંપંચની ગ્રાન્ટનો બીજો હપ્તો આપવામાં આવ્યો:15મા નાણાંપંચની બીજા હપ્તાની 12.46 કરોડની ગ્રાન્ટ જિલ્લા પંચાયતને ફાળવાઇ

આગામી સ્થાનિક સ્વરાજની ચૂંટણીઓમાં મતદારોને રીઝવવા માટે રાજ્ય સરકારે 15માં નાણાંપંચની ગ્રાન્ટનો બીજો હપ્તો આપવામાં આવ્યો છે. તેમાં જિલ્લાને રૂપિયા 12.46 કરોડની ગ્રાન્ટ 15માં નાણાંપંચ પેટે ફાળવાશે. જિલ્લા પંચાયતને મળેલી ગ્રાન્ટમાંથી 70 ટકા ગ્રામ પંચાયત, 20 ટકા તાલુકા પંચાયત અને 10 ટકા જિલ્લા પંચાયતને ફાળવવાનો નિયમ છે. તેમાંય ગ્રામ પંચાયત, તાલુકા પંચાયત અને જિલ્લા પંચાયત હસ્તકની ગ્રાન્ટમાંથી ટાઇડ અને અનટાઇડ પ્રકારના વિકાસના કામો કરવાના રહેશે. જિલ્લા પંચાયત, તાલુકા પંચાયતની પાંચ વર્ષની ટર્મ પૂર્ણ થવાને માંડ ચારેક માસ જેટલો સમય બાકી છે. ત્યારે સ્થાનિક સ્વરાજની ચૂંટણીમાં મતદારોને રીઝવવા માટે ગ્રામ્ય કક્ષાએ વિકાસના કામો વેગવંતા કરવા 15માં નાણાંપંચની ગ્રાન્ટનો બીજો હપ્તો આપવામાં આવ્યો છે. રાજ્યભરની જિલ્લા પંચાયત માટે રૂપિયા 741.90 કરોડની ગ્રાન્ટમાંથી ગાંધીનગર જિલ્લા પંચાયતને રૂપિયા 12.46 કરોડની ગ્રાન્ટ ફાળવવામાં આવી છે. તેમાંથી 70 ટકા ગ્રાન્ટ ગ્રામ પંચાયતને ફાળવવાની રહેશે. જ્યારે 20 ટકા ગ્રાન્ટ તાલુકા પંચાયતને ફાળવવાની રહેશે. જ્યારે 10 ટકા ગ્રાન્ટમાંથી જિલ્લા પંચાયતે પોતાના તાબાના ગ્રામ્ય વિસ્તારોમાં નિયત કરેલા નિયમોના કામો ટાઇડ અને અનટાઇડ યોજના હેઠળ હાથ ધરવામાં આવશે. 15માં નાણાંપંચની ગ્રાન્ટની ફાળવણીને પગલે ગ્રામ્ય વિસ્તારોમાં અનેક વિકાસના કામો શરૂ કરાશે. ભાસ્કર ઇનસાઈ​​​​​​​ટ​​​​​​​જિ. પંચાયતની ખાસ સામાન્ય સભા બોલાવાશે રાજ્ય સરકારે 15માં નાણાંપંચની ગ્રાન્ટનો બીજો હપ્તો આપવામાં આવ્યો છે. તેમાં ગાંધીનગર જિલ્લા પંચાયતના હસ્તક રૂપિયા 12.46 કરોડની ગ્રાન્ટ મળવાથી તેમાંથી 10 ટકા લેખે 1.24 કરોડની ગ્રાન્ટ વાપરવા મળશે. જ્યારે બીજી તરફ જિલ્લા પંચાયતની પાંચ વર્ષની ટર્મ પૂર્ણ થવાને માંડ ત્રણેક માસ બાકી રહ્યા છે. આથી આ ગ્રાન્ટ વાપરવા માટે જિલ્લા પંચાયતની ખાસ સામાન્ય સભા આગામી સમયમાં બોલાવાય તેવી શક્યતા છે.

ચોરીનો મામલો આવ્યો સામે:સે- 4માં એક રાતમાં 3 ઇકો કારના સાઇલેન્સર ચોરાયા

ગાંધીનગર શહેરમાં કારના સાઇલેન્સર ચોરનાર ગેંગ ધીરે ધીરે સક્રિય બની રહી છે. થોડા સમય પહેલા કારના સાઇલેન્સર ચોરીનો બનાવ સામે આવ્યો હતો. ત્યારે સેક્ટર 4માં એક રાતમાં એક સાથે 3 કારના સાઇલેન્સર ચોરાયા છે. સેક્ટર 4 ખાતે એક વ્યક્તિ અવાજ સાંભળીને જાગી જતા ચોર ઉભી પૂંછડીએ ભાગી ગયા હતા. આ બનાવને લઇ સેક્ટર 7 પોલીસ મથકમાં ગુનો નોંધાવ્યો હતો. મળતી માહિતી મુજબ ગાંધીનગર શહેરના સેક્ટર 4સી, પ્લોટ નંબર 1284-2 ખાતે રહેતા શૈલેષકુમાર હરિલાલ સોની ખાનગી બેંકમાં નોકરી કરે છે. ત્યારે તેમણે પોતાના માટે એક ઇકો કાર નંબર જીજે 18 બીએલ 3969 વસાવી છે. ત્યારે બે દિવસ પહેલા તેમના ઘર આગળ રાતના સમયે કાર પાર્ક કરવામાં આવી હતી અને સુઇ ગયા હતા. જ્યારે બીજા દિવસે તેમના પડોશી ધીરજભાઇ અમરસિંહ બગેરીયાએ ફોન કરીને કહ્યુ હતુ કે, કોઇ અજાણ્યા લોકો તમારી ગાડી પાસે કઇક કરતા હતા, જ્યારે તેમની પાસે જવાનો પ્રયાસ કરતા તે લોકો ભાગી ગયા હતા. જેથી કારની તપાસ કરવા ચાલુ કરી હતી, જેથી કારનો અવાજ બદલાયેલો હતો. જેથી તપાસ કરતા સાઇલેન્સર ચોરી થયુ હોવાનુ જોવા મળ્યુ હતુ. જેથી સેક્ટર 7 પોલીસ મથકે ફરિયાદ નોંધાવવા પહોંચતા પડોશમાં રહેતા પરેશભાઇ બળદેવભાઇ વાળંદની કાર નંબર જીજે 18 બીએન 0665નુ સાઇલેન્સર અને જયેશકુમાર મુળજીભાઇ રાઠોડની કાર નંબર જીજે 18 બીએલ 2465નુ સાઇલેન્સર ચોરાઇ ગયુ હોવાથી ગુનો નોંધાવવા આવતા ત્રણેયની ફરિયાદ નોંધવામાં આવી હતી. પોલીસે 90 હજારની કિંમતના સાઇલેન્સરની શોધખોળ હાથ ધરી હતી.

ગોઝારો અકસ્માત સર્જાયો:મગોડી પાસે બસની ટક્કરે 1નું મોત

ગાંધીનગરના મગોડી ગામ પાસેથી પસાર થતા દહેગામ-ચિલોડા હાઇવે ઉપર એક મંદિર નજીકમાં બસ ચાલકે રાહદારીને ટક્કર મારી હતી. જેમાં રાહદારીનુ મોત થયુ હતુ. આ રાહદારી છેલ્લા એક સપ્તાહથી મગોડી ગામમાં મજુરી કરવા માટે આવ્યો હતો. ત્યારે આ બનાવને લઇ ગામના વ્યક્તિએ ચિલોડા પોલીસ મથકમાં ગુનો નોંધાવ્યો હતો. મળતી માહિતી મુજબ મગોડી ગામમાં રહેતા નરેન્દ્રસિંહ ઉર્ફે નરેશજી ભગાજી બિહોલાએ ફરિયાદ નોંધાવી હતી કે, તેમના ખેતરમાં આશરે એક સપ્તાહ પહેલા 50 વર્ષિય આધેડ વિરસંગભાઇ મજુરી કરવા માટે આવ્યા હતા. ખેતરમાં પાંચેક દિવસ સુધી કામ કર્યુ હતુ અને મજુરીના રોકડા રૂપિયા આપી દેવામાં આવતા હતા. ત્યારે વિરસંગભાઇ બે દિવસ પહેલા મગોડીથી દહેગામ તરફ જવાના રોડ ઉપર ચાલતા જતા હતા, તે સમયે એક એસટી બસના ચાલકે રાહદારી વિરસંગભાઇને ટક્કર મારી હતી. જેમાં તેમણે શરીરે ઇજાઓ થતા તાત્કાલિક સારવાર અર્થે અમદાવાદ સિવિલ હોસ્પિટલમાં લઇ જવામાં આવ્યા હતા. જ્યાં તેમનુ સારવાર દરમિયાન મોત થયુ હતુ. આ બનાવ બાદ પોલીસે નરેન્દ્રસિંહને ફોટો બતાવી વાતચીત કરતા તેમણે માહિતી આપી એસટી બસ ચાલક સામે ગુનો નોંધાવ્યો હતો. જેથી પોલીસે મૃતકના પરિવારની શોધખોળ હાથ ધરી હતી.

સ્થાનિકોની માગણીને અપાયું માન:ખરણાં, મોટી ભોંયણ અને પાલડી વ્યાસમાં કુલ-12.98 કરોડના ખર્ચે 11.70 કિમીનો રોડ બનશે

જિલ્લાના ગ્રામ્ય વિસ્તારના માર્ગોની હાલત ખાડા વધારે અને રોડ ઓછો તેવી બની જવા પામી હતી. આથી રાજ્ય સરકારે માર્ગોને ચકાચક કરવાની મંજુરી આપી છે. તેના ભાગરૂપે જિલ્લાના ખરણાં, મોટી ભોંયણ અને પાલડી વ્યાસ ગામના કુલ-12.98 કિમીના રોડને માટીકામ, મેટલકામ, ડામરકામ પાછળ રૂપિયા 11.20 કરોડ ખર્ચીને ચકાચક કરાશે. રાજ્યના ગ્રામ્ય વિસ્તારોમાં પણ માળખાકિય સુવિધાઓ સુદ્દઢ કરવા માટે અનેક યોજના ચલાવવામાં આવી રહી છે. ગ્રામ્ય વિસ્તારના રોડની હાલત ભંગાર થઇ જતા રાજ્ય સરકાર દ્વારા ગ્રામ્ય વિસ્તારના માર્ગોને ચકાચક કરવા માટે ખાસ ગ્રાન્ટ આપવામાં આવી હતી. તેમાં જિલ્લાના ચાર તાલુકામાંથી માણસા તાલુકાના ત્રણ અને કલોલ તાલુકાના એક ગામના માર્ગોને ડામરકામ, મેટરકામ, માટીકામ સહિત કરાશે. તેમાં માણસા તાલુકાના ત્રણ ગામોમાં ખરણા (અમરાપુરા) એપ્રોચ 2 કિ.મી.ના રોડને રૂપિયા 3 કરોડના ખર્ચે 5.50 મીટર પહોળો કરીને બોક્ષ કટીંગ, પીસીસી, સીસી, પેવર બ્લોક તથા રોડ ફર્નીસીંગની કામગીરી કરાશે. જ્યારે ખરણાં હાઇસ્કુલથી ડેરી થઇ પંચાયત ઘર સુધીના અને ડેરી પાછળથી ગોજારીયા હાઇવેને જોડતા 2 કિમીના રોડમાં રૂપિયા 3 કરોડના ખર્ચે સી.સી., ડીમોલેશન, બોક્ષ કટીંગ, મેટલકામ, પી.સી.સી., સી.સી., પેવર બ્લોક તથા રોડ ફર્નીસીંગથી રોડને ચકાચક કરાશે. માણસા તાલુકાના પાલડી વ્યાસ ગામના ઇન્દીરાનગર ગામ તળાવ થઇ કુમ્ભારીયાથી હાજીવાળા ગદનાર તળાવ 1.50 કિમીના રોડેને રૂપિયા 1.35 કરોડના ખર્ચે માટીકામ, મેટલકામ, ડામરકામ, પીસીસી, નાળાકામ, સીસી રોડ, રોડ ફર્નીચરથી નવો બનાવાશે. જ્યારે કલોલ તાલુકાના મોટી ભોંયણ વાંસજડા વામજ સુધીનો 5.90 કિમીના રોડને 5.63 કરોડના ખર્ચે ચકાચક જિલ્લા પંચાયતના બાંધકામ શાખા દ્વારા કરવામાં આવશે. જોકે જિલ્લાના અન્ય ગામોના માર્ગોને આગામી સમયમાં તબક્કાવાર ડામરકામ, પેવરકામ સહિતની કામગીરી હાથ ધરવામાં આવશે. ચોમાસામાં ભારે વરસાદને લઇ રોડનું ધોવાણ થતાં માર્ગો ખખડધજ બની જતાં સ્થાનિકોએ પાકા રોડ બનાવવા માટે રજૂઆત કરી હતી.

મનપાની નવી પોલીસી:શહેરમાં પેટ ડોગનું રજિસ્ટ્રેશન ફરજિયાત, અન્યને કરડશે તો કાર્યવાહી પણ કરાશે

ગાંધીનગરમાં પણ હવે અમદાવાદની પેટર્ન પર પેટ ડોગનું રજિસ્ટ્રેશન ફરજિયાત બનાવામાં આવ્યું છે. મહાનગરપાલિકાની પોલિસીને સ્ટેન્ડિંગ કમિટી દ્વારા મંજૂરી આપી દેવાઇ છે. જે મુજબ 18 વર્ષથી વધુ વયના વ્યક્તિ જ પેટ ડોગને લઇને બહાર નીકળી શકશે. એટલે કે બાળકો ડોગને લઇને ગમે ત્યાં નીકળી શકશે નહીં. પેટ ડોગ દ્વારા અન્ય પ્રાણી કે વ્યક્તિને કરડવાના કિસ્સામાં રજિસ્ટ્રેશન રદ કરી કાયદેસરની કાર્યવાહી હાથ ધરાશે. ગાંધીનગરમાં લોકો મોટા પ્રમાણમાં પેટ ડોગ રાખતા થયા છે ત્યારે પેટ ડોગ દ્વારા સોસાયટીના અન્ય રહિશોને કરડવાના કે અન્ય પ્રકારે પજવણીના કિસ્સા ન બને તે માટે રજિસ્ટ્રેશન પોલિસી તૈયાર કરવામાં આવી છે. ગાંધીનગરને રેબિશ ફ્રી બનાવવાના ભાગરૂપે આ કવાયત હાથ ધરાઇ છે. પોલિસીની જોગવાઇઓ મુજબ પેટ ડોગનું મહાનગરપાલિકામાં ફરજિયાત રજિસ્ટ્રેશન કરાવવું પડશે. આ માટે 200 રૂપિયા જેટલી રજિસ્ટ્રેશન ફી ભરવાની રહેશે. આ સાથે ડોગ અને તેના માલિકનો ફોટોગ્રાફ, આધાર કાર્ડ, વેરા બિલ સહિત રહેણાંકના પુરાવા સાથે નિયત ફોર્મ ભરીને રજિસ્ટ્રેશન કરાવવાનું રહેશે. શ્વાનના માલિકે શ્વાનને વખતો વખત એન્ટી રેબીશ વેક્સિન મૂકાવવાની રહેશે અને તેનું સર્ટીફિકેટ પણ મહાનગરપાલિકાને રજૂ કરવાનું રહેશે. એગ્રેસિવ એટલે કે વારંવાર ભસતો હોય અથવા તો કોઇને જોઇને કરડવા દોડતો હોય તેવા પેટ ડોગને માસ્ક- મઝલ પહેરાવીને પછી જ બહાર લાવવો ફરજિયાત કરાયું છે. પેટ ડોગ થકી સ્ટ્રીટ ડોગમાં બ્રિડીંગ ન થાય તેની તકેદારી પણ તેના માલિકે રાખવાની રહેશે. ડોગની માલિકી બદલાય તેવા કિસ્સામાં નવા માલિકે અલગથી રજિસ્ટ્રેશન કરાવવું પડશે. જાહેર બગીચા, પાર્કિંગ, ફૂટપાથ, રસ્તા સહિતની જાહેર જગ્યા પર પેટ ડોગ દ્વારા ગંદકી કે શૌચ ક્રિયા કરવામાં આવશે તો તેના માલિકને 500નો દંડ કરાશે.

ભાસ્કર એક્સક્લુસિવ:ટ્રાવેલેટરથી ચાલ્યા વિના રેલવે સ્ટેશનથી મેટ્રો સ્ટેશન જવાશે

રાજ્યમાં પ્રથમ વખત એરપોર્ટ સિવાય ખુલ્લી જગ્યામાં ટ્રાવેલેટર ગાંધીનગરમાં ફીટ કરાશે. તેમાં કેપિટલ રેલ્વે સ્ટેશનથી મહાત્મા મંદિરના મેટ્રો સ્ટેશન સુધી જવા માટે મુકાશે. રૂપિયા 35 કરોડના ખર્ચે મુકવામાં આવનાર ટ્રાવેલેટરથી મહેમાનો અને મુસાફરોને ચાલવા છુટકારો મળવાની સાથે સાથે 400 કિમીનું અંતર કાપવામાં સરળતા રહેશે. ટ્રાવેલેટર મુકવાથી લીલા હોટલ, કેપિટલ રેલ્વે સ્ટેશન, મહાત્મા મંદિર, દાંડી કુટીર, મહાત્મા મંદિર મેટ્રો સ્ટેશન સહિત જવા માટે સરળતા રહેશે. રાજ્યમાં પ્રથમ વખત ટ્રાવેલેટર બે રેલવે સ્ટેશનને જોડવા માટે મુકવામાં આવશે. તેમાં ગાંધીનગરના કેપિટલ રેલ્વે સ્ટેશનથી મહાત્મા મંદિરથી અંદાજે 400 મીટર દુર આવેલા મેટ્રો રેલ સ્ટેશન સુધી જવા માટે ટ્રાવેલેટરનો ઉપયોગ કરાશે. મેટ્રો રેલ વિભાગ દ્વારા રૂપિયા 35 કરોડના ખર્ચે ટ્રાવેલેટર મુકવામાં આવનાર છે. તેમાં કેપિટલ રેલ્વે સ્ટેશન ખાતે મુસાફરો કે મહેમાનોને જવા માટે એક્સેલેટરની સુવિધા પણ ઉભી કરવામાં આવી છે. જોકે ટ્રાવેલેટર મુકવામાં આવે નહી તો કેપિટલ રેલ્વે સ્ટેશન કે હોટલ લીલામાંથી મુસાફરોને મહાત્મા મંદિર, મેટ્રો રેલ સ્ટેશન, દાંડી કુટીર જવા માટે રોડ ક્રોસ કરવાની સાથે સાથે વાહનમાં જવાની ફરજ પડે છે. પરંતું ટ્રાવેલેટર મુકવાથી મુસાફરો કે મહેમાનોને હોટલ લીલા, કેપિટલ રેલ્વે સ્ટેશન, દાંડી કુટીર, મહાત્મા મંદિર, મેટ્રો સ્ટેશન જવામાં સુલભતા રહેશે. ટ્રાવેલેટરની ફીટ કરીને કાર્યરત કરવાની કામગીરી આગામી માસમાં પૂર્ણ કરી દેવામાં આવશે. ટ્રાવેલેટર ફીટ કરવામાં સ્ટીલ અને આરસીસીના પિલર બનાવીને તેની ઉપર સ્ટીલના ગડર મુકવામાં આવ્યા છે. આ ગડરની ઉપર ટ્રાવેલેટર ફીટ કરવામાં આવ્યા છે. ટ્રાવેલેટર અને કેપિટલ રેલ્વે સ્ટેશને ફીટ કરવામાં આવેલા એક્સિલેટર માટેની વીજ સપ્લાય મેટ્રો રેલમાંથી આપવામાં આવનાર છે. દિવ્યાંગો માટે ખાસ સુવિધા દિવ્યાંગ મુસાફરો કે મહેમાનોને પણ તકલીફ પડે નહી તે માટે ટેકટાઇલની સુવિધા ઉભી કરાઇ છે. જેનાથી દિવ્યાંગ મુસાફરો કે મહેમાનોને અવર જવરમાં સરળતા રહેશે. ટ્રાવેલેટરને કવર કરાશે અને રેલિંગની સુવિધાટ્રાવેલેટરમાં બે લાઇન અપ અને ડાઉન રાખવામાં આવી છે. ઉપરાંત તેને ફરતે કવર કરવાની સાથે સાથે ટ્રાવેલેટર ઉપર જતા મુસાફરો કે મહેમાનોને પકડવા માટે રેલીંગ સહિતની સુવિધા ઉભી કરવામાં આવનાર છે.

રમતગમત દિવસની ઉજવણી કરાઈ:પીએમ શ્રી કેન્દ્રીય વિદ્યાલય CRPF ખાતે રમતગમત દિવસ ઉજવાયો

પીએમ શ્રી કેન્દ્રીય વિદ્યાલય CRPF, ગાંધીનગરમાં રમતગમત દિવસ ઉત્સાહભેર ઉજવાયો. વિદ્યાર્થીઓમાં રમતગમતની ભાવના, સ્પર્ધાત્મકતા અને ટીમવર્ક વિકસે તે હેતુથી કાર્યક્રમ યોજાયો. શાળાના તમામ વિદ્યાર્થીઓ અને સ્ટાફે ઉત્સાહપૂર્વક ભાગ લીધો. મુખ્ય મહેમાન તરીકે CRPF ગાંધીનગરના DIG અનુપમ શર્મા હાજર રહ્યા. શાળાના આચાર્ય ડૉ. મમતા સિંહે મહેમાનનું સ્વાગત કર્યું. અનુપમ શર્માએ બાળકોને રમતગમતના મહત્વ વિશે સમજાવ્યું. શિસ્ત, સક્રિયતા અને સ્વાસ્થ્ય માટે રમતગમત જરૂરી હોવાનું જણાવ્યું.

જન આક્રોશ યાત્રા માણસા પહોંચી:કોંગ્રેસની જન આક્રોશ યાત્રાનું માણસા તાલુકામાં ભવ્ય સ્વાગત

ગુજરાત પ્રદેશ કોંગ્રેસ સમિતિ દ્વારા આયોજિત જન આક્રોશ યાત્રા આજ રોજ ગાંધીનગર જિલ્લાના માણસા તાલુકામાં પ્રવેશી હતી. ગુજરાત વિધાનસભાના વિરોધ પક્ષના નેતા તુષાર ચૌધરીની અધ્યક્ષતામાં યોજાયેલ આ યાત્રામાં વરિષ્ઠ નેતા લાલજીભાઈ દેસાઈ, અનુસૂચિત જાતિના ગુજરાત પ્રદેશ ચેરમેન હિતેન્દ્ર પઢિયાર, ગુજરાત પ્રદેશ મહિલા અધ્યક્ષ ગીતાબેન પટેલ, યુથ કોંગ્રેસ અધ્યક્ષ હરપાલસિંહ ચુડાસમા, પૂર્વ ધારાસભ્ય બાબુસિંહ ઠાકોર, ગાંધીનગર જિલ્લા કોંગ્રેસ સમિતિના પ્રમુખ અરવિંદસિંહ, ગાંધીનગર જિલ્લા પંચાયતના વિરોધ પક્ષના નેતા અજીતસિંહ, માણસા તાલુકા-શહેર સમિતિના પ્રમુખ સહિત સંગઠનના હોદ્દેદારો, પદાધિકારીઓ અને વિશાળ સંખ્યામાં કાર્યકરો ઉપસ્થિત રહ્યા હતા. તુષારભાઈએ ગુજરાતની સમસ્યાઓ અને ભ્રષ્ટાચાર તેમજ ખેડૂતોની વિટંબણાઓ વિશે વક્તવ્ય રજૂ કર્યું. સદર યાત્રાનું ગાંધીનગર જિલ્લાના ગાંધીનગર -પેથાપુર-અંબોડ-લોદરા -મહુડી મુકામે ભવ્ય સ્વાગત કરવામાં આવ્યું હતું એમ એક અખબારી યાદીમાં સમાજસેવી રાકેશ પ્રજાપતિ જણાવે છે.

ઉત્કૃષ્ટ પ્રદર્શન:શેઠ સીએમ હાઇસ્કૂલના વિદ્યાર્થીઓ ખો- ખો સ્પર્ધામાં રાજ્યકક્ષાએ પહોંચ્યા

સર્વ વિદ્યાલય કેળવણી મંડળ સંચાલિત શેઠ સી.એમ. હાઈસ્કૂલ, સેક્ટર-23ના વિદ્યાર્થીઓએ ખેલ મહાકુંભ-2025ની ખો-ખો સ્પર્ધામાં ઝોન કક્ષાએ તાલુકા સ્તરે પ્રથમ સ્થાન મેળવ્યું. તેમને ₹12,000નું ઇનામ મળ્યું. ત્યારબાદ જિલ્લા કક્ષાએ બીજી રેન્ક મેળવી ₹24,000નું ઇનામ જીત્યું. બંને ઇનામ મળીને કુલ ₹36,000 મળ્યા. હવે આ ખેલાડીઓ રાજ્ય કક્ષાએ રમશે. ટીમમાં યુગ પરમાર, આશીક ઠાકોર, ચિરાગ ધામા, ઓમ ઝાલાવાડિયા, અંશ ભોજાણી, આયુષ ઉમટ, ખુશ મકવાણા, જૈમિન મનવર, દિપ પટેલ, ક્રિશ પ્રજાપતિ, ધ્વનિત વાઘેલા અને કૃષિ પ્રજાપતિનો સમાવેશ થાય છે. શાળાના આચાર્ય ડો. મહેશભાઈ બી. ત્રાજિયાએ તમામ ખેલાડીઓ અને વ્યાયામ શિક્ષક લાભુભાઈ દેસાઈને અભિનંદન પાઠવ્યા.